Read Mid Grand Valley Dani A'bikaka 9 Bible Online

A'bikaka 9 - Mid Grand Valley Dani bible

A'bikaka 9

¹Itithogon malaikat inebe 4 emenogo nen inapikon ane huthegasik oba nen, ageikhe apikon ane huthasinem, husagal ageikhe nen wema baga kilinmo wema eloma usegarekma, thu hualuagaluk kunci wogokhemo pogot oba nen agat oba usa'agunem lakhigi o.

²Usa'agasik nen, wema baga kilinmo wema eloma thu hualhunem, hetu thode thakne 'bisinem doalegat dageikherek iti hak, thu hualekma iti nen, thode dageikhe dogolik, mulikin inom, pogot inom, mumerogo 'bekhe laga lakhigi.

³Thode iti akla nen, yi yibirla ti yibirla eken'buka isa aik nen palinakherek iti hak, inaik nen akhuni palinakhe dogoagaluk, iteerek 'bisegama, thode aklake nen dagei aga laga.

⁴It yibirla iti yogeisekhe dogolik, “O ebe inom, oka herleka inom, yi meke ti meke ai yago ninat meke aperek inom, tha'bokhogonat weagatdusak motok dek o. Akhuni Allah asirlo inilhaoak oba holal waganek dek meke halok weagarinabino,” iluk lia'isa agama lageisigi.

⁵Itithogon lia'isa aga dogolik, “Akhuni inebe motok pikeat inasusak dek. Weat, warlo eken'buka isa aik nen palinakhunem hinet weak wakharek iti hak, thut 5 baga dogolik, hinet yitlago-watlago dogoak o,” iluk yogeisegama hisigi o.

⁶Itithogon hagarinakhunem u nen inoak hinet yitlago-watlago dogolik, “Ninebe tirliphogon watlatlo e,” iluk watlasuogoluk, inekaerek nen yi walhigik, ti walhigik, hagasugun meke re, inebe tirliphogon watlasusak dek, iluk ilukmo nogo nen, watlageidek hinet anek wakho motok dogogun o.

⁷Nen, it yibirla iti inebe, kuda akhuni nen apot oba yasuklatluk wim yakhe luogoluk doalharek iti hakeneat welageikha. It iti inelokhoken he, akhuni inelokhoken hakene meke re, inukuloakma kare-kare hakene emas meke ugu.

⁸Nen, inisi humi inisi hakene. Nen, inaik, helo yeke hakene etaga singa iti meke aik hakene.

⁹Nen, inamigoak oba, thin ikharek iti hak, pisue omaken meke ugu. Nen, ina'bikha ane, ap wim yabi luogoluk kuda doalegat nen oto hakene aga hun-hun meke etaga kereta nen lisogo wogosik lagunem, inisok amitmit ane kogat ekherek iti hakene.

¹⁰Nen, inaga therle, warlo eken'buka isa aga therle aik werek meke hakene werekma, thut 5 baga dogolik inaik nen akhuni palinakhe dogoagaluk iteerek 'bisegama palinakhe lageikha lageisigi.

¹¹Nen, it iti inoe kok etagapogot hagasik welagarek meke, at malaikat Allah nen wema baga kilinmo usa'i ageikhemo welagarek meke etnogoat. At iti etaga, nit ninane baga, weagarinakherek meke u hak, it akhuni Ibrani meke inane baga etaga Abadon igik, nen, it akhuni Yunani meke inane baga, Apolion igik, egarek meke lakhigi.

¹²Itithogon hagatlagunem higirik nen, weagarinabigin meke ageikhe weagarinakhesik, yabokane iki pere baga ageikhe weagarinabigin meke aban werek o.

¹³Malaikat inebe 5 inapikon ane itithogon huthegasik oba nen, malaikat ageikhe apikon ane huthasinem, Allah hasik obasi hano meke elokhoma hetu hunekharekma, ebe emas meke hagarek meke, nen, ukut ebelak-ebelak 4 oba sapi aik hakene hagarek meke, Allah elokhoma werekma etoma nen akhuni inane hakene isinem holhi.

¹⁴At ane iti nen, at malaikat ageikhe apikon ane huthekhe meke etnogo, itithogon ane huthekhesik ikimo herogo werekma men yogokhe, “Malaikat inebe 4 oba i kok etaga Efrat alilu herle warek werek emenaga herle hisalinabi lan o,” iluk yogokhe.

¹⁵Itithogon yogokhe iti, it malaikat iti nen akhuni inebe 3 oba mikirlogo 'bisalok, pere here'isekhe dogolik, ageikhe tahun iti baga, thut iti baga, iniki iti baga, jam iti baga, inebe motok inarik lausak, iluk haganeat Allah nen inayoko 'bisikhemo kagalek werekma, herle hisaldisugunem nileken lageisigi o.

¹⁶Itithogon lageisigirik werekma, yabokane yoknekhe dogolik, “Ap tentara agot dopok doalek inakuda tomok apot oba yasukhogon werekma hisegen iti, inebe doalegat, 200 juta baga nen werek,” iluk yakulnikhunem nasuk holhi.

¹⁷Itithogon holhirik oba nen, yabokane kuda inom, akhuni apot oba yasukhogon meke inom, na'bikaka baga lakhigi. It iti su inamigoak oba thin ikharek iti hak ugu werekma hisigi. Itithogon hisigi iti, it aperek inasu elokhoken hetu amulok hakene meke ugu, nen, it aperek, inasu pogot elokhoken mirli hakene meke ugu, nen, it aperek inasu elokhoken wei aberok hakene meke ugu, nen inakuda emenogo inukuloak yeke helo yeke etaga singa iti meke ukuloak hakene. Nen, inapema nen, hetu inom, thode inom, hotali al hakene obasi weak meke etaga belerang iti meke inom, dukhi aga laga.

¹⁸Itithogon hetu inom thode inom, belerang obasi weak meke iti inom, ebe 3 weagarinakherek meke iti, inapema nen dukhi aga dogolik, akhuni inebe 3 oba mikirlogo 'bisalok, pere here'isekhe dogolik, aperek inebe pike motok inarik lageikha hisigi.

¹⁹It inapema nen itithogon inakhik, nen, inaga therle warlo ukuloak werek meke hakene itithogonat inakhik, hagakhe lageikha hisigi. It kuda iti inobatne, inape inom, inaga therle inom, itiatma, akhuni inebe itithogon yi aik ti aik inoba 'bilik inakhe lageikha iti.

²⁰Itithogon mekeat he, it akhuni ebetlake inakhidek meke iti nen, mokat obabut weak meke oba hakotdiluk dogolik, iniki nen kaneke emas meke inom, perak meke inom, tembaga meke inom, helekit meke inom, o meke inom, hagarogo 'begarek iti. Itithogon hagarogo 'begarek iti, it kaneke iti nen, inileken hisegarek degat, inasuk holharek degat, holak lageikharek degat, mekeat he, itithogon hagarogo 'biluk,

²¹akhuni inebe inakhik, elo degat inakhik, param ha'isigik, iniki abusak waganhik, hagakhe lageikha meke here'isalok inobabut hebelageidek dogolik, weak hunik motok hagakhe lageikha hisigi o.