Read Mising METIU 10 Bible Online

METIU 10 - Mising bible

METIU 10

¹Odokkc Bvkkolo:pc Bvk agomtadjvgla gvmvnnc tani: vyingkolang anyidc gva:to odokkc ilang-gvlangcm narc:ma:nc yalo kvdv:dcmyam bottcya:dopc bito, cdcmbulum mcnpakla:dopc, odokkc appvng kinamramnam odokkc mosimola:ma:namcm csa:mola:dukupc.

²Vyvngkolang anyi agom tadjvgla gvmvnnc tani:kvdv:dok aminkvdv:dc scmpc: minsa:po:pc, Simon, sc:kom Pitorcmna gogdonc, odokkc Andriwubv bvk bvrodc, Jakobbv Jebidi:kc awodc, odokkc Jo:nbv bvk bvrodc; Pilipbv odokkc Bartolmeubv;

³Tomas odokkc Metiubv migom murkong urkumsuncdc; Jakobbv Alpaeukc awodc, odokkc Taddaeubv;

⁴Simonbv Kannangolokkcdc, odokkc Judas Iskariotbv, sc:ko Bvm miru alaglo tolvgtonc.

⁵Cdc vyvngkolang anyidcm Jisubv mclvgto, scmpc bulum lulvgla, “Angu tani:kvdv:dok dungkolo:pc gvyoka, odokkc Samariang kvdv:dok oko tawonnoksin gvyoka.

⁶Cmpige:la cdcmyam Israelkc okumdok yognc me:r sobenkvdv:do:pc gvkang.

⁷Odokkc nolu gvdodcm lutadlang, scmpc lula, ‘Taycng among R:ncpvnckc migomdokodc pvnga:danka:bong.’

⁸Kinckvdv:dcm csa:molangkula, sinckvdv:dcm turmolangkuk, ngero: ro:namkvdv:dcm narc:molangkuk, uikvdv:dcm mcnpaklang. Nolu atv arcko bima:pc pa:to, atv arc bimangv:pc bilang.

⁹Oko arrcmsin, cdcmanggom murkongcm, cdcmanggom ta:mcmsin noluk tongali:kvdv:do ycbomyok;

¹⁰gvdodok lcgangc sogcn, cdcmanggom, galugcm bornyiko, cdcmanggom panoti:ycm, cdcmanggom kvgrasula gvnanc dangi:ycm bomyok; kapila:nc ager gernckvdv:dc donamcm pa:pa:do.

¹¹“Odokkc oko tawonlo cdcmanggom do:lu:lo nolu gva:ycnc sc:ko odo aipc du:jupnckonc magaplang, odokkc no gvkuma:sisscm oddung du:lang.

¹²No crangkolo gva:dodom, bvm aika:langka cmnang,

¹³odokkc cra:dc ainckomvlo, noluk mc:pomcnganc odo pvngangka:langka; ckvdaggom cdc ainc cra:ma:mvlo, noluk mc:posagpo nolukkolo:pc gvlatkangkulang.

¹⁴Odokkc sc:koiyc nolum tomrvgsuma:ycmvlo cdcmanggom noluk agomkvdv:dcm tadma:yc, noluk alckvdv:dokkcm koiyangkvdv:dcm dcmpu:sulvglang nolu cdc cra:dcm manggom tawondcm mcpakla gvdokudodcm.

¹⁵Aropakpc, ngo lubidung nolum, Sodomclang Gomurang amo:dokkcpci du:jcmla:ycpc bottcru:nc kcbang ba:do longcdcm cdc tawondcmyam!

¹⁶“Ka:toka! Ngo nolum me:r sobencmpc ra:miki: ara:lo:pc mclvgdung; cdcmpidag tabbcmpc mcngkin-sagkinnang odokkc pckkcmpc yayulang.

¹⁷Tani:kvdv:dcm ansulang; kapila:nc bulu nolum kcbangkvdv:do tolvgyc, odokkc buluk kumko okumdo nolum dcmyc.

¹⁸Odokkc ngok lcgangc bulu nolum amo:ru:tumkvdv:do:pc odokkc buluk migomkvdv:do:pc soa:bomyc, buluk kcra:lo odokkc angu tani:kvdv:dok kcra:lo lubisudopc.

¹⁹Cdvlo bulu nolum togc:ycnc, kapc nolu agom lupcnammcnc cdcmanggom okkom nolu lupcnammcnc odok lcgangc mc:dvryok, kapila:nc okodcm nolu lupcnammcnc cdcm nolum odo ayirdo biyc.

²⁰Kapila:nc cdc sc:ko ludagnc nolumang, cmpige:la cdc Yalodc noluk Abukc nolukkokki agom luncdc.

²¹Bvrro bvrrom sikolo:pc tolvgyc, odokkc abudc awodcm, ommangkvdv:dc anc abukvdv:dokki dakka:mvnsula odokkc bulum mokemoyeyc.

²²Odokkc nolum ngok amin lcgangc tayumyc. Ckvdaggom sc:kobv du:tcrdo:pc du:jcmna du:ycnc bvm moturyc.

²³Cdvlo nolum bulu tawon abangkolo ipusire:ycnc, akondo:pc duggcla gvlang; kapila:nc aropakpc, ngo nolum ludung, Israel tawon appv:do:pc nolu gvngabma:yc, tani: Awodc gvlatdokudo:pc.

²⁴“Agom tadjvgla gvmvnnc tani:akonc Bvk luyirdcm bottcya:ncmang, cdcmpcmanggom pagboakonc bvk ru:tumdcm bottcya:ncmang.

²⁵Agom tadjvgla gvmvnnc tani:dokkcpc bvk luyirncdcmpc inamdci pv:dag, odokkc pagbodc bvk ru:tumdcmpc inamdci pv:sepv:yedag. Bulu okum cra:dok ru:tumdcmci Belsobub cmyc, cddvk abayangko lubarla bulu cra:dok luggcm gcync!

²⁶“Cdcmpidag bulum pcsoyok; kapila:nc okkomsin takkomla lc:mang okodcm la:lenna lcngkanma:ycnc, cdcmanggom kinma:nammcm kinma:pc du:ma:ycpc.

²⁷Okkom nolum kcmolo lubidonc, pva:lo lubitok; odokkc okodcm nolu yeru:lo pvsv pasapc taddonc, okum talcngartokkc lutadla lubitok.

²⁸Odokkc sc:kobulu amvrcm mokedagnc ckvdaggom tani:lok yalodcm mokela:ma:nc bulum pcsoyok; cdcmyam bvm pcsotok sc:kobv amvrdcmlang yalo anyipakdcm uiamo:bo moke-moyela:dakkunc.

²⁹Paksurung pirnyikoncm amcr apiro:lok koma:lang? Odokkc odok apirkoncsin noluk Abukc mcngkamdcmpcma:mvlo amo: lo dc:yi:mang.

³⁰Ckvdaggom noluk tukkulok dumvt appv:dcm kvngapla lc:tag.

³¹Pcsoyok, cdcmpidag; nolu paksurungcmyam bojcrungko arc kaya:nc.

³²“Cdcmpila tani:kvdv:dok kcra:lo ngom lubisuncdcmci, ngo:sin ngok Abukc kcra:to lubisuyc. Sc:ko taycng amo:to du:nc;

³³ckvdaggom sckobvi ngom tani:kvdv:dok kcra:lo lupaksuycnc, ngo:sin taycngamo:tok du:nc Abukc kcra:lo lupaksuyc.

³⁴“Mcngkvyoka ngo mo:pvso mcngancm bikapc gvdung cmna; ngo mcngancm bikapc gvmang, cmpige:la yoksa bikapc gvdung.

³⁵Kapila:nc ngo tani:ycm bvk avkc abudokki, odokkc omcdcm ancdokki, odokkc yamc:dcm ayodokki tu:latpc agom luka:mvnsumopc cmna gvdung.

³⁶Odokkc tani:akolok mirudc bvk avkc crangv:dc iyc.

³⁷“Sc:kobv ngomyam avkc abudcm cdcmanggom ancdcm aiya:pc mc:ycnc bv ngokkcpc ipc arc kamang; odokkc sc:kobv ngomyam awodcm cdcmanggom omcdcm aipc mc:ya:ycnc bv ngokkcpc ipc arc kamang.

³⁸Odokkc sc:kobv avkc kurusdcm jo:la ngok lcdulo gvmvma:ycnc bv ngokkcpc ipc arckamang.

³⁹Sc:kobv turnamdcm pa:dagnc bv cdcm yogmoyc, odokkc sc:kobv ngok lcgangc turnamcm yogmoycnc bv cdcm pa:yc.

⁴⁰“Sc:kobv nolum torvgsudagnc bulu ngom torvgsudag, odokkc sc:kobv ngom torvgsudagnc bvm torvgsudag sc:ko ngom mclvgtagnc.

⁴¹Sc:kobv agom lungorla lunc tani:ycm agom lungorla lunnc cmna torvgsuycnc bv agom lungorla lunclok amancm pa:do, odokkc sc:ko dormokanc tani:ycm dormokanc cmna torvgsuycnc bv dormokanc tani:lok amancm pa:do.

⁴²Odokkc sc:ko sc adjionckvdv:sok akoncm ansv:nc asi bati:koi biycnc bv agomtadjvgla gvmvnnc tani:ycmla:yam, aropakpc, ngo nolum lubidung, bvk amancm bv yogmoma:yc.”