Read Mising METIU 12 Bible Online

METIU 12 - Mising bible

METIU 12

¹Odo ayirdo Jisubv yodnam longcdo arvg arangkolok gvto; Bvk agom tadjvgla gvmvnnc tani:kvdv:dokkc kcnong sangkang, odokkc bulu arvgdo a:yc ckkcm dopc cmna pvrto.

²Cmpige:la Parisi:kvdv:dc cdcm kangge:la, bulu Bvm luto, “Ka:tok, nok agom tadjvgla gvmvnnc tani:kvdv:dc yodnam longcdo lujvglurodo okkom ipcma:namc cmna lutagnc idung.”

³Bv bulum luto, “Dawidbv okkom ikaji nolu poma:nci, bv cdvlo kcnongkangaji, odokkc sc:kobulu bvk lcdulo du:mvndungaji:

⁴Kapc bv Ru:ncpvnckc okumlo gvangkanc odokkc lcngkansunam pita:dcm dotonc, okodc Ru:ncpvnckc lulvgnamdcmpc imanganc bvkkcpc cdcmanggom bvk lcdulo gvmvnnckvdv:dokkcpcsin, ckvdaggom kumko okumnok kumnam agergernckvdvngo:dokkai.

⁵Cdcmanggom nolu ru:nckc lulvgnamdo pokvma:nci kapc yodla du:nam longcdc kumko okumdok kumnam ager gernckvdv:dc narcma:pc imotonc, odokkc imurkama:ncpc ika:nc?

⁶Ngo nolum lubidung kumko okumdcmyam bottaya:ncko sc dung.

⁷Odokkc cdc okkomdagnc kinya:mvlo, ‘Ngo aya:pc mc:namcm mado, odokkc palvgnammcm mamang,’ nolu imurkama:ncdcm imurkannc cmna lukelumarma:yai.

⁸Kapila:nc tani: Awodc Yodnam longcdoksin Ru:tumc.”

⁹Odokkc Bv gvtvla gvto, odokkc buluk kumko okumdo gva:to.

¹⁰Odokkc ka:toka, laksannc tani:akonc odo dungai. Odokkc bulu Bvm tawuto, “Yodla du:nam longcdo csa:mokunamdc Ru:nckc agom jvggabnamdcmpc gernamci? Cdcmpc bulu Bvm aima:pc lupa:pc cmna luto.”

¹¹Bv bulum lubito, “Nolu kapin tani:ycn, tani: akolokkc me:r soben adorko dungge:la cdc arungkolo yodnam longcdo owa:ycmvlo, cdcm sogabla sosangkuma:yclang?

¹²Me:r soben adorkoncmyam tani: akonc cddvko arrc kaya:dang! Cdcmpidag yodnam longcdo agercm gerpa:do.”

¹³Odo Bv tani:dcm luto, “Nok alagdcm laglentok.” Odo tani:dc cdcm laglento, odokkc aimotoku, lakkonardcmpc idokupc.

¹⁴Cmpige:la Parisi:kvdv:dc gvlentoku odokkc Bvm kapc mokepcikc cmna, bulu kcvgpc ru:suto.

¹⁵Jisubv, cdcm ansula, odokkc gvpakto. Odokkc bojcrungc Bvk lcdulo gvmvnto, odokkc bulu appv:dcm Bv csa:motoku,

¹⁶odokkc appvngcm kindopc Bvm lugo:biyoka cmna kvnggv:pc luyirla lutumto.

¹⁷Cdc Ru:ncpvnckc agom lungor lubinc Isaia:bv okodcm lutaganc cdcmpci iycpc cmna ikang:

¹⁸“Ka:toka, ngok ager gerya:ncdcm sc:kom ngo malentonc, ngok aipc mc:bomsunamdcm sckkolo ngok yalosc aipc mc:lvgsudagnc. Ngo ngok yallom bvkkolo mca:lvgyc, odokkc bv Angutani: ope:kvdv:dcm arokcbangagomcm lutadbiyc.

¹⁹Bv pamvnsuma:yc cdcmpcmanggom bottcpc jc:ma:yc, cdcmanggom sc:kosin Bvk gomugcm nogorlok ali: lambclo tadbegma:yc;

²⁰Odokkc Bvk aminno Angu tani: ope:kvdv:dok mc:tincm mc:ma:sisscm Bv dcmpornam dorbumcm tvrsotma:yc cdcmanggom mikki yv:la du:nc saki:ycm momitma:yc,

²¹Bv arokcbangcm mopvdopc ima:sisscm.”

²²Odo miglunc: odokkc agom lula:ma:nc uipa:nam tani:ko Bvk kcra:do:pc gva:boto, odokkc Bv bvm aimotoku, cdc agom lula:ma:nc lula:dokupc odokkc ka:begdokupc.

²³Odokkc tani: appv:dc mc:lamcngapla:tomang, odokkc luto, “Sc Dawidkc Awopc ila:dolang?”

²⁴Cmpige:la cdvlo Parisi:kvdv:dc tattonc bulu luto, “Cdc Beeljebulkc igurkokkimvn, uikvdv:dok migom awodokki, cdc tani:dc uiycm mcnpakla:dang.”

²⁵Buluk mc:namkvdv:dcm Bv kinna:yam, Bv bulum luto, “Avkc lukam tadma:pc angusunc migom mo:pv appv:dc yogpakdag, odokkc oko nogordc:sin cdcmanggom okumdc avkc lukamdcmpc tadma:pc avyc dagrobmvlo du:ma:yc;”

²⁶odokkc Satanc Satancm mcnpakmvlo, bv avycm avyc angusudag; kapc cmpcmvlo bvk migom mo:pv du:ycn?

²⁷Odokkc ngo Beeljebulki uiycm mcnpakmvlo, noluk awokvdv:dc odokki bulum mcnpakdon? Cdcmpidag bulu noluk kcba:ba:ncpc iyc.

²⁸Cmpige:la cdc Ru:nckc Yallomvlo ngo:jc uiycm mcnpaknadonc, odomvlo Ru:nckc migom mo:pvdc nolukkolo:pc pvnga:du:bong.

²⁹Cdcmanggom kapc tornc tani:akolok okumkolo:pc gva:la bvk ainc attarkvdv:dcm langkutycn, tornc tani:dcm ycnggappo:danma:mvlo? Odomvlo aropakpc bvk okumdcm gingkutla:yc.

³⁰Sc:kobv ngokkolo du:mvnma:nc bv ngok agom tadma:pc innc, odokkc sc:kobv ngokkoki gingkumsuma:ycnc bv pitpakdag.

³¹Cdcmpidag ngo nolum lubidung, imur appvngcm odokkc luyola lunamkvdv:dcm tani:kvdv:dokkcm mc:yinsuyc, ckvdaggom Yalodok lukamdcmpc tadma:pc luyotnammcm mc:yinsuma:yc.

³²Odokkc sc:koi agom apirko tani: Awodok lukampc tadma:pc luycnc bvm mc:yinsuyc; ckvdaggom Angunnc Yalodok birudi:pc luncdcm mc:yinsuma:yc, su:pak du:do-ycdoscm cdcmanggom a:pcnc du:do-ycdokvdv:domsin.

³³“Vsv:dcmci aimotoka, odokkc odok a:ycdc aiyc; cdcmpcma:mvlo vsvdcm aima:pc imotoka, odokkc odok a:ycdc aima:ycpc; kapcnc vsv:dcm odok a:ycdokki kinna:dag.

³⁴Nolu angupc dvgnc tabv opvnc! Nolu kapc ainc agomcm lula:ycn, nolu aima:pila du:tula? Kapcnc asinbo pv:namko mc:nam du:la:mvn nappa:dc ludang.

³⁵Ainc tani:dc bvk ainc kumsu:dokkcm aincm la:lendag, odokkc aima:nc tani:dc bvk aima:nc kumsu:dokkcm aima:ncm la:lendag.

³⁶“Ngo nolum lubidung tani:kvdv:dc ka:ma:tadma:pc lunam appvng gompirkvdv:dokkcm bottcru:nc kcba:ba:do longcdo kvnamcm kvkanbipa:ycku.

³⁷Kapcnc noluk gompirkvdv:dokki nolum aidag cmyc, odokkc noluk agomkvdv:dokki nolum aimang cmyc.”

³⁸Odo poyirnckvdv:dc odokkc Parisi:kvdv:dok akke Bvm luto, “Poyirna, ngolu nokkolok kanggod ako ka:lv:dag.”

³⁹Cmpige:la Bv bulum lubito, “Aima:sv:ma:nc odokkc amikc nc:ng lango:nc opvnc kanggod ako madag; cmpige:la agom lungorla lunc Jonangkc kanggoddok angupc oko kanggodcmsin bima:yc.

⁴⁰Kapila:nc Jona:bv lowumkolang yumumko Timi: ongo aki: ara:do dungai, cdcmv:pc tani:lok Awodc mo:pv among ara:bo lowumkolang yumumko du:yc.

⁴¹Ninewe:dok tani:kvdv:dc bottanc kcbang ba:dodo sc opvnsok lcdulo dagrobyc odokkc bulu aimang cmna luyc; kapila:nc bulu Jonangkc lutad ludodcm asinc mc:dvrra mc:latsutoku, odokkc ka:toka, Jona:mc bottaya:nc ako sc dung.

⁴²Pcyang mongkvbo Migom nc:dc dagrobyc bottapc kcba: ba:dodcm sc opvnsok lcdulo, odokkc bulu aimang cmna luyc; kapila:nc bv mo:pv du:tcrlokkc Solomonkc ainc agom tadkapc gvka, odokkc ka:toka, Solomonkcmyam bottaya:nc akonc sc dung.

⁴³“Narc:ma:nc Yalodc tani: akolokkc gvpakycmvlo, bv asi kamangko mo:di:lopc dungko mago:la gvdag, ckvdaggom bv dungko akosin pa:mang.

⁴⁴Odo bv ludo, ‘Ngo ngok okumpc gvlatycku okolokkc ngo gvlentungaji.’ Odokkc bv gva:dokudo bv cdcm okkosin kama:dopc, pctpu:la lc:dopc, odokkc aiyo:pc mosv:-momola lc:dopc gvbegsudakku.

⁴⁵Odo bv gvla odokkc bvm aiya:ma:nc yalo kvnvdko bvk lcdulo gvbodakku, odokkc bulu odo gva:do odokkc du:do; odokkc cdc tani:dok lcddarkc du:namdagnamdc po:pckcmyam cmpcsin aiya:ma:pc idag. Cdcmv:pc sc aima:nc opvnsokkc iyc.”

⁴⁶Tani:kvdv:dcm lula du:du:dcm, ka:toka,

⁴⁷Bvk ancdc odokkc bvrrang kvdv:dc mo:ro:do daga:to, Bvm luposupc cmna.

⁴⁸Cmpige:la sc:ko tani:dc Bvm lubitonc bvm Bv luto, “sc:kon ngok ancdc, odokkc sc:kobulu:n ngok bvrrangkvdv:dc?”

⁴⁹Odokkc Bvk agom tadjvgla gvmvnnc tani:kvdv:do:pc laglenge:la Bv luto, “Scbulukkoi anckvdv:dc odokkc ngok bvrrangkvdv:dc!

⁵⁰Kapila:nc sc:koi ngok taycng among abukc mcngkamdcmpc idogvdonc bvci ngok bvrro, odokkc bvrmc, odokkc annc.”