Read Mising METIU 17 Bible Online

METIU 17 - Mising bible

METIU 17

¹Odokkc longc longkcng lcdulo Jisubv Bvk lcdulo Pitormc odokkc Jakobmc odokkc bvk bvro Jo:nmc gvbokang, angupc gvngula adi:taycngkolo:pc.

²Odokkc buluk kangkolo Bvk dumsimigmodc angukang, odokkc Bvk nappa:dc do:nycmpc unjerkang, gcnam-bomnam kvdv:dc pvangcmpc kampokang.

³Odokkc ka:toka, odo bulum Mose:bvlang Elija:bv lcngkansuto, Bvkkoki agom luposula.

⁴Pitorbv Jisumc luto, “Ru:tuma, so ngolu du:namsc aidung, no mc:mvlo, ngo sido po:yub okum sowumko moyc, nok lcgangc asongko odokkc Mose:kc lcgangc asongko odokkc Elijangkc lcgangc asongko.”

⁵Bv agom luposula du:dodcm, ka:toka cdvlo, kamponc mukkang atakkonc bulum yv:lubto, odokkc mukkang ara:dokkc gomugko lukang, “Sc ngok mc:bomsunam Aowo, sc:kom ngo aipc mc:lvgsudagnc; Bvk agomcm tattoka.”

⁶Cdvlo Bvk agom tadjvgla gvmvnnc tani:kvdv:dc cdcm tattonc, bulu otabla pogbumamkang, odokkc pcssotcmtcmkang.

⁷Cmpige:la Jisubv gva:la bulum gakkvto, scmpc lula, “Darobtok odokkc pcsoyoka.”

⁸Odokkc bulu amikvdv:dcm cdvlo bcrsa:la kangaptonc, bulu sc:komsin ka:begtokumang ckvdaggom Jo:nmc ka:begto.

⁹Odokkc bulu adi:dokkc re:yidokudo, Jisubv bulum lulvgto, “sc:komsin cdc lcngkansunamdcm lubiyok, tani:kc Awodcm sikolokkcm turmokuma:dodo:pc.”

¹⁰Odokkc agom tadjvgla gvmvnnc tani:kvdv:dc Bvm tawuto, “Cmpcmvlo kapila porinckvdv:dc ludang Elija:bv:jc gvpo:ycku cmna?”

¹¹Bv lubito, “Elija:bv gvycku odokkc bv appvng attcm po:pckc lcngkolo lcngapycku;

¹²ckvdaggom ngo nolum lubidung Elija:b gvdungcibong, odokkc bulu bvm kintomang, ckvdaggom bulu okkom ilv:daganc bvm cdcmpc ito. Cdcmv:pc tani:kc Awodc:sin buluk alaklo ipusire:ycm pa:yc.”

¹³Odo agom tadjvgla gvmvnnc tani:kvdv:dc mcngkinto Bv:jc Jo:n Baptismo binckc agomcm ludung cmna.

¹⁴Odokkc bulu yadkumsula du:nc tani:kvdv:do:pc cdvlo gvlattokunc, tani:akonc Bvkkolo:pc gva:to odokkc bvk kcra:do lcbvng tuma:la luto,

¹⁵“Ru:tuma, ngok awodcm aya:tei, kapila:nc bv simad uiyc pa:namko odokkc bv airu:pc pcsokanpc kidag; Kapila:nc lckko lckko:lo bv vmvlo oba:sudag, odokkc lckko lckko:lo asilo.

¹⁶Odokkc bvm nok agom tadjvgla gvmvnnc tani:kvdv:do:pc ngo boma:to, odokkc bulu bvm aimola:tokunang.”

¹⁷Odokkc Jisubv lubito, “C:i mc:jvg kama:nc odokkc gvmursula gvnc opvna, ngo cddvlongcko noluk lcdulo du:mvnycn? Cddvko ngo nolum mc:yinsuycncm Bvm so:pc ngokkoso:pc boma:tei”

¹⁸Odokkc Jisubv uidcm morvdto, odo cdc uidc bvkkolokkc gvlenkang, odokkc cdc ko:dcm oddung aimotoku.

¹⁹Odo agom tadjvgla gvmvnnc tani:kvdv:dc Jisukolo:pc atckpc gva:to odokkc luto, “Ngolu kapila cdcm mcnpakla:toma:ncm?”

²⁰Bv bulum luto “Noluk mc:jvgnammc adj:iola:na.

²¹Kapila:nc aropakpc, ngo nolum ludung, nolukkc pctu ammo apir kvddong kogomci mc:jvgc du:mvlo, sc adi:scm ‘Sokkc olu:pc gvkang,’ cmmvlo odo cdc gvyc, odokkc okodc:sin nolukkc ila:ma:nam kama:yc.”

²²Bulu Galildo gvkumsudodcm, Jisubv bulum luto, “tani:kvdv:dcm tani:kc Awodcm togclvgyc,

²³Odokkc bulu bvm turmoycku.” Odokkc bulu kvnggv:pc mc:dvrmc:songkang.

²⁴Bulu cdvlo Kapernaumpc gvtokunc, adoli:ko migom murkong urkumnckvdv:dc Pitorkolo:pc gva:to odokkc luto, “Noluk luyirncdc migom murkong dorpcnamdcm bima:nci?” Bv luto, “C:”

²⁵Odokkc cdvlo Bv okumpc gvtokuji, Jisubv bvmmar lupo:to, scmpc lula, “Okko cmna mc:dang, Simona? Okolokkcm mo:pvsok migomkvdv:dc migom murkongcm cdcmanggom soiycm la:dang? Buluk avkc ommang kvdv:dokkcmyc ma: amikolokkcm.”

²⁶Odo bv luto, “Amikolokkcm,” Jisubv bvm luto, “Cmpcmvlo ommangkvdv:dc dorpcnam kamang.

²⁷Ckvdaggom, bulum imursuma:dopc siycngpc gvkang odokkc boroki:ko ku:ta:ka, odokkc ku:sangarpo:nam ongodcm sogaplang, odokkc odok nappa:dcm kingkamvlo no adoli: apirko pa:ycpc; cdcm la:lang odokkc bulum ngok lcga:pc odokkc nok lcga:pc bilang.”