Read Mising METIU 5 Bible Online

METIU 5 - Mising bible

METIU 5

¹Yadkumsunc tani:kvdv:dcm ka:la, Bv adi: tayc:do:pc re:sa:to, odokkc Bv teda:nammc Bvk agom tadjvgla gvmvnnc tani: kvdv:dc Bvkkodo:pc gva:to.

²Odokkc Bv bulum agompc lula luyirbomkang, scmpc lula:

³“Asinbo opanc cmna mc:sunckvdv:dc aipc luitpcnamc, kapila:nc Ru:ncpvnckc dungko taycngamo:dc bulukkc.

⁴“Mc:dvrra du:nckvdv:dc aipc luitpcnamc, kapila:nc bulum mc:pomoycku.

⁵“Ansv:nc asinang gcnckvdv:dc aipc luitpcnamc, kapila:nc bulu tani: rcngamscm dunggc daggcbomyc.

⁶“Ru:ncpvnckc agomdcmpc inam gvnam lcgangc kcno:nc odokkc tv:lv:nckvdv:dc, aipc luitpcnamc, kapila:nc bulu dotvng tv:tvngyc.

⁷“Ayangabonc kvdv:dc aipc luitpcnamc, kapila:nc bulu ayangcm pa:yc.

⁸“Narc:nc asin gcnc kvdv:dc aipc luitpcnamc, kapila:nc bulu Ru:ncpvncmc ka:begyc.

⁹“Lckomokunc kvdv:dc aipc luitpcnamc, kapila:nc bulum Ru:ncpvnckc aowangc cmna gogycku.

¹⁰“Ru:ncpvnckc agomdcmpc inam gvnam lcgangc sc:kobulum ipusire:tagnc bulu aipc luitpcnamc, kapila:nc Ru:ncpvnckc taycngamong migom dokodc bulukkc.

¹¹“Nolum aipc luitpcnamc cdclo tani:kvdvngc nolum ngok lcgangc luka:la luycnc, ipusire:la iycnc odokkc lume:pc appvng aima:nc agomcm jc:la luycnc odo.

¹²Mc:polangka odokkc mc:yumsutoka, kapila:nc taycng amo:tc noluk amanc bojcrungko dung. Kapila:nc cdcmv:pc tani:kvdv:dc agom lungorla lunckvdv:dcm ipusire:la ika noluk po:pcbong.

¹³“Nolu mo:pvsok allo; cmpige:la alodok ti:namdc yogmvlo kapc odok alo ti:namdcm pa:la:yckun? Cdc atv attar lcga:pcsin aikuma:bong mo:rongolo yoppakpcnamma:mvlo odokkc tani:yc alcki sanggcmpc iyc.

¹⁴“Nolu mo:pvsok pvangc. Adi: taycngkolo du:nc nogorc lc:sisula:mang.

¹⁵Cdcmpcmanggom tani:yc saki:ko romnotge:la gempa kcvglo lc:dolang, cdcmang saki: tvgcngko taycngkolo:mvn, odokkc cdc okum appv:dcm pvangcm pvmodag.

¹⁶Noluk pvangcm tani: kvdv:dok kangkolo pva:motoka, odomvlo bulu noluk ainc agerkvdv:dcm ka:begycpc odokkc taycngamo:tok du:nc noluk Abumc bottaru:nc cmna kumycpc.

¹⁷“Nolu mc:yoka ngo lujvg lurrom odokkc lungorla lunam agom kvdv:dcm la:pakkapc gvdung cmna; ngo cdcmbulum la:pakkapc gvmang cmpige:la buluk lukamdcmpci imopc cmna gvdung.

¹⁸Kapila:nc aroru:pc, ngo nolum lubidung, taycng amo:tc odokkc mo:pvsc yogpakma:sisscm, i: abvg akosin, lujvglurodokkc lukamdcmpc ingapmma:-sisscm yogma:yc.

¹⁹Sc:kobvi cdcmpila sc lujvgla lunamkvdv:sok adjio:nc abangkogom tadma:ycnc odokkc tani:kvdv:dcm cdcmv:pc luyirycnc, cdcmv:pc bvm taycngamo:tok migom dungkodo adjiarya:nc cmycku, cmpige:la sc:kobv cdcmbulum luyirycnc taycng amo:tok migom dungkodok bottcru:nc cmna luycku.

²⁰Kapila:nc ngo nolum lubidung, noluk Ru:ncpvncmc kumgotdc potin adnckvdv:dcmla, Parisi:kvdv:dcmyam, aiya:ma:mvlo, nolu cdvlosin taycngamong migom dungkodo:pc gva:lankuma:yc.

²¹“Nolu tatto jc scmpc leketo:dcm tani:kvdv:dcm lubitungai, ‘Nolu tani:ycm mokeyoka; odokkc sc:kobvi mokeycnc bvm aro-lume:ycm kcba:lo tadpcnampc iyc.’

²²Cmpige:la ngo nolum lubidung jc sc:kobvi avkc bvrodcm aglvng sa:ycnc bvmsin tadjvgtarrom kcba:lo tapcnampc ido; sc:kobvi avkc bvrodcm aisi:ma:nc cmna luycnc bvm bottaru:nc kcba:lo tadjvgtarrom tadpcnampc iyc.

²³Cdcmpidag nolu Ru:ncpvncmc kumdodo amancm bidodcm, odokkc odo nok bvrodc atvko nokkolo asin lckoma:namko dung cmna mc:pa:ycmvlo,

²⁴nok amancm kumko amo:do mclangka odokkc gvlang, nok bvrodokki lckopo:langkuk.

²⁵Lomdanna nom lugc:lvgnc tani:dokki ajonpc ilang, no tadjvg tarro okumdo:pc gvdodo:boi, ckvma:mvlo nom lugclvgncdc aro-lume: tadjvg tarro tadya:nc tani:dcm togc:lvgyc, odokkc cdc arolume: tadjvgtarrotadya:ncdc tekenlangcm togclvgyc, okokkc nom makana:lo tumyc;

²⁶aropakpc, ngo nolum lubidung, no dorpcnam murko:dcm lcddarkc amcrdcm dorabma:sisscm kapcsin gvlennangkuma:yc.

²⁷“Nolu scmpc lunamdcm tatto, ‘Nolu amikc nc:ngcm la:biyoka.’

²⁸Cmpige:la ngo nolum ludung jc sc:koi nc:ng akoncm ka:bola ka:ycnc asinbo oddu:boi bvkkoki la:nampc ika:bong.

²⁹Nok lagbvkkc amikdc pa:bcm imodagmvlo, cdcm karrensutok odokkc cdcm yoppaktoka; nok amvr appv:dcm uiamo:pc cra:lvgkosunamdcmpcyam amvrdok abangko mcpaknamdc aiya:dag.

³⁰Odokkc nok lagbvkkc alagdc nom pa:bcm imodagmvlo, cdcm tcgtu:sutoka; odokkc nok amvrdok abangko mcpaknamdci aiya:dag nok amvrappv:dc uiamo:pc gvnamdcmpcyam.

³¹“Scmsin lutagai, ‘Sc:kobvi avkc nc:ngcm mcpakyckunc, bvm mcpakkunamdok do:jvg adnam aborko bimotoka.’

³²Cmpige:la ngo nolum ludungkc sc:kobvi avkc nc:ngcm mcpakdokunc, aima:nc ka:bo-mc:bomvnsunamlok ma:mvlo, bvm amikc milbongkokki la:mvngvmvnsumonampc idag; odokkc sc:kovi mcpakkunam nc:ngcm la:donc, amikc nc:ngcm bv:sin la:nampc idag.

³³“Lekekc tani:kvdv:dcm nolu scmpc lckoda lunamdcm tatto, ‘Nolu lume:pc lula pesuyoka, cmpige:la okodcm pesutonc Ru:tumkcpc ipvtlangka.’

³⁴Ckvdaggom ngo nolum ludung, Nolu cmpcsin pesudanyoka, taycngamongcm suttomna, kapila:nc tclc Ru:ncpvnckc migompc ila dungko,

³⁵cdcmanggom mo:pvscmsin lutomma:pcka, kapila:nc sc Bvkkc alclcgcngc, cdcmanggom Jerusalemdok aminno:sinmang, kapila:nc clc bottaru:nc Migomkc nogorc.

³⁶Odokkc nok mittugcm pigapsula pesuyoka, kapila:nc no dumvt asongkosin kampomola:sinmang, yakamola:sinmang.

³⁷No okkom ludonc cdc ‘Cdcmpc’ cdcmanggom cdc cdcmpcmang cmtoka; odokkc lubarnam atv appv:dc papi:nckvdv:dokkc lendo.

³⁸“Scmpc lunamcm nolu tattungai, ‘Amik apir lcgangc amik apirc odokkc a:yc asong lcgangc a:yc asongko.’

³⁹Cmpige:la ngo nolum ludung, Aima:ncdcm nv:tumyoka. Ckvdaggom sc:kaiyc nolum lagbvkkc migmodok piycmvlo, bvm akondcmsin tokanbilang;

⁴⁰odokkc sc:kaiyc kcbangcm ba:ycm odokkc nok galungcm la:ycmvlo, bvm nok bottapaknc galugdcmsin mclvgbilang;

⁴¹odokkc nom sc:kaiyc mail ako gvpa:ru:yc cmna gvmoycmvlo, bvk lcdulo mail anyikopc gvlangka.

⁴²Sc:ko nolukkolok kowa:ycnc bvm bilang, odokkc nokkolok nara:nc tani:ycm bima:pc mclvyokuka.

⁴³“Nolu tatto jc scmpc lutungai, ‘Noluk kumrvko:rcm aya:mvnsulangka odokkc noluk mirucm tayumlangka.’

⁴⁴Cmpige:la ngo nolum ludung, noluk ka:ruka:mangcm aya:mvnsulangka odokkc sc:kobulu nolum ipusire:la idagnc buluk lcgangc kumnangka,

⁴⁵odomvlo nolu taycng among Abukc omma:pc iycpc; kapila:nc Bv Bvk do:nycm aima:nclang ainckc lcga:pc ka:modag, odokkc ainc ager gernckclang aima:nc ager gernc anyipaklok lcgang pcdongcm omodag.

⁴⁶Kapila:nc nolum aipc mc:nongkvdvdcm nolu aipc mc:mvlo nolukkc oko amanc du:ycn? Migom murkong urnckvdv:dci cdcmv:pc ima:lang?

⁴⁷Odokkc noluk bvrrongkvdv:dcm nolu kumrvgsudomvlo, amikcmyam okodcm nolu ibadya:du:n? Angu tani:kvdv:dok ope:kvdv:dci cdcmpc ima:lang.

⁴⁸Nolu, cdcmpidag, appvngcm kinbvnpa:danyc, noluk taycng amongkc Abukc kinnbvnkammarcmpc.