Read Mising METIU 6 Bible Online

METIU 6 - Mising bible

METIU 6

¹“Ansulangka noluk Ru:ncpvncmc kumnamcm tani:kvdvngc ka:ycpc cmna kumma:pcka; kapila:nc odomvlo noluk taycng amongkc Ba:bukolok amancm pa:ma:yc.

²“Cdcmpidag nolu cdclo ammem atvko cmpc biycnc, noluk kcra:lo oko dumdumcmsin mango:yoka, agom lc:sila lunckvdv:dc kumko okumno odokkc nogorlok lambc lambclo, tani:kvdvngc bulum luyitycpc cmna kumgo:dag. Aropakpc, ngo nolum lubidung, bulu buluk amancm pa:toibong.

³Cmpige:la nolu cdvlo cmpc binamcm bidonc, noluk lagbvg alagdc okkom idu:nc noluk lakkek alagdcm kinmoyok,

⁴Odomvlo noluk cpv:pc binamdc kinmango:pc binampc iyc; odokkc noluk Abudc sc:kobv kinmango:pc ka:dagnc amancm biycpc.

⁵“Odokkc cdvlo nolu kumdonc, nolu agom lc:sila lunckvdv:dcmpc iyorungka; kapila:nc bulu kumko okum okumno odokkc nogorlok lambckvdv:dok r:uyi ru:yilo dagsa:la kumnamcm kumnv:dag, bulum tani:kvdv:dc ka:ycpc cmna. Aropakpc, ngo nolum ludung, buluk amancm bulu pa:toibong.

⁶Cmpige:la cdvlo nolu kumdonc, noluk soyarlo:pc gva:lang odokkc yabgom mokapsulang odokkc noluk Abudcm kumnang sc:kobv kinmango:pc du:dagnc; odokkc noluk Abubv kinmango:pc ka:ncdc nolum amancm biycpc.

⁷“Odokkc kumdom Angu tani:kvdv:dcmpc bojcrungko atvma:nc agom lugodcm lukumsuyoka; kapila:nc buluk bojcru:pc agom gompir pirnamdokki tadycpc cmna bulu mc:dag.

⁸Bulukkcmpc iyoka, kapila:nc noluk Abudc noluk koma:dapc okkom nolu madagnc kindag.

⁹Cdcmpidag scmpc kumtoka: Ngoluk taycng amo:tok du:nc Abba, Nokkc amincm kumnampc ika:langka.

¹⁰Nok migom dotcngc pvngangka:langka, tani:mo:pvso:sin taycngamo:tok ikampc nok mc:namdcmpc ingapka:langka.

¹¹Silo ngolum lo:dcm donamdcm bi:ka;

¹²Odokkc ngoluk narnam mc:yinsuteika, Ngolusin ngoluk narnckvdv:dcm kapc mc:yinamsutonc;

¹³Odokkc ngolum ka:bomc:bokolo:p gvboyoka, cmpige:la ngolum aima:nc yalodokkcm moya:langka.

¹⁴“Kapila:nc nolu tani:kvdv:dcm buluk imursiyarcm mcyinsumvlo, noluk taycng amo:tok Abubv:sin nolum mc:yinsuyc;

¹⁵Cmpige:la nolu tani:kvdv:dok buluk imursiyarcm mc:yinsuma:mvlo, noluk Abubv:sin noluk imursiyarcm mc:yinsuma:yc.

¹⁶“Odokkc cdvlo nolu menna doma:pc du:donc, nappangcm napvnarc:ma:pc kangkosuyoka, agom lc:sula lunckvdv:dcmpc, kapila:nc bulu dumsi migmom ka:nyi:modag buluk menna du:namdcm tani:kvdv:dc ka:begycpc cmna. Aropakpc, ngo nolum lubidung, buluk amancm bulu pa:toibong.

¹⁷Cmpige:la nolu cdvlo menna doma:pc du:donc, tukkudo tulangcm yonsulang odokkc nappangcm mopu:sulang,

¹⁸nok menna doma:pc du:namdcm tani:kvdv:dc ka:begmaycpc ckvdaggom nok Abubv ka:begycpc sc:ko kinmango:pc ka:la du:nc; odokkc nok Abubv sc:kobv kinmango:pc ka:dagnc nom amancm biycpc.

¹⁹“Mo:pvso avkc lcgangc murkongcm lcngkumsuyoka, okolo tapumclang argomc dopakdagnc odokkc dopsongkvdv:dc:sin gvala dopso:dagnc,

²⁰Cmpige:la nok lcga:pc taycng amo:to murkongcm mckumtoka, okolo tapum manggom argomc domang odokkc okolo dopsongc gva:mang odokkc dopso:mang.

²¹Kapila:nc okoloi nok murkongcm mckumsuycnc, oddoi nok asindc:sin du:yc.

²²“Amigdci amvrdok sakiyc. Cdcmpidag nok amigdc aimvlo, nok amvr appv:dc pvangc dorrubyc,

²³nok amikdc aiyo:la du:ma:mvlo, nok amvr appv:dc kcmmo-jv:jv:yc. Cdcmpc odo nok saki:dc kcmomvlo, cddvko kcmmo-jv:jv:ycsong!

²⁴“Sc:kosin ru:tum anyilok agom tadla agercm gerbila:mang; bv akoncm tayumyc odokkc akondcm aipc mc:yc, cdcmanggom akondc aipakpc mc:yc odokkc akondcm aima:pc mc:la mcpakyc. Nolu Ru:ncpvncmc odokkc murkong uidok agercm lckko:pc gerra:mang.

²⁵“Cdcmpidag ngo nolum lubidung, noluk turra du:nam lcgangc mc:dvryoka, nolu okkom dodonc cdcmanggom okkom tv:ycnc, cdcmpcmanggom noluk amvr lcgangc, okkom gcycn cmna. Turra du:namdc donamdcmyam bottaya:ma:lang, odokkc amvrdc gasor-galugcmyam bottaya:ma:lang?

²⁶Do:mvrtok dcnggo:nc pcttangkvdv:dcm kangkvtoka: bulu pidmang cdcmanggom gadmang cdcmanggom kumsu:lo:sin jongkumsumang, odokkc ckvdaggom noluk taycngamo:tok Abubv bulum domodag. Nolu bulumyam arc kaya:ma:lang?

²⁷Odokkc nolukkolok sc:ko mc:dvrra avkc turnamcm lagdukopci turyarmola:dang?

²⁸Odokkc nolu kapila galuk-gasor lcgangc mc:dvrdang? Arvgolok elug appunkvdv:dcm kangkvtoka, kapc bulu punsa:dagnc; bulu cdclosin atv agercm germang onnomsin momang;

²⁹Ckvdaggom ngo nolum lubidung, Solomonkc amin gvdo appv:do:sinci odokbuluk apunkoncmpcsin moru:lvgmangai

³⁰Ckvdaggom Ru:ncpvncbv arvgolok ncsinkvdv:dcm cdcmpc galuk-gasorcm molvgdagmvlo, okodc silo turra dung cmpige:la yamporom mcramnok vmvlo cra:lvgdonc, Bv nolum bojcru:yangko attarcm moru:lvgma:yclang, c:i adji:ko mc:jvgnc tani:kvdvnga?

³¹Cdcmpiga:lok mc:dvr mc:so:yoka, scmpc lula, ‘Ngolu okkom doyya:ncm?’ ’ Cdcmanggom ngolu okkom tv:ya:ncm?’ cdcmanggom ‘Ngolu okkom gcycbomya:ncm?’

³²Kapila:nc Angu tani:kvdv:dc cdc appv:dcm madag; odokkc noluk taycng amongkc Abubv kindag nolum cdc appv:dcmci madag cmna.

³³Cmpige:la maa:danna Bvk migom dokodcm mapo:lang odokkc Bvk dormo agomdcm odokkc cdc appv:dcm nolum biycpc.

³⁴“Cdcmpidag yamporomkc lcgangc mc:dvryoka, kapila:nc yampodc avkcpc yampo mc:suycpc. Longcdok mc:dvrdcm longcdokkcpc pv:motoka.