Read Mising METIU 7 Bible Online

METIU 7 - Mising bible

METIU 7

¹“Ammem tadjvgtarrom tadyoka, nolumsin tadjvg-tarrom tadma:dopc.

²Kapila:nc noluk tadjvgtarro tadnam agomv:dokki nolumsin tadjv tarrom tadycku; odokkc nolu oko kvnanckokki kvycnc nolusin cdc kvnancdcm pa:yc.

³No kapila nok bvrodok takotdcm ka:don, cmpige:la nok avkc amikdok du:nc vsvng sv:po:dcm ka:suma:pc?

⁴Cdcmanggom, no kapc nok bvrodcm lulangkan, ‘nok takotdcm la:pakpo:biso cmna,’ nok avkc amikdo vsvng sv:pongko du:motu:la?

⁵Nolu agom lc:sula lunnc, nok amikdok vsvng sv:po:dcm la:pakpo:tok, odokkc odopak no aiyo:pc ka:begycpc nok bvrodok amikdo du:nc vsvng sv:po:dcm la:pakpc.

⁶“Iki:kvdv:dcm okko angundagnc cdcm biyoka, odokkc e:g kcra:lo noluk mukuta: doksori:ycm cryilvgyoka, ckvma:mvulo bulu lctvkokki cdcm bulum sanggc:yc odokkc nolum gampc cmna duga:yc.

⁷“Kotoka, odokkc cdcm nolum biycpc; matoka, odokkc nolu pa:yc; piku:toka, odomvlo nolu moge:biycpc.

⁸Kapila:nc sc:kobvi koycnc pa:dag, odokkc sc:kobvi madonc pa:dag, odokkc piku:ncdcm moge:biyc,

⁹Cdcmanggom nolukkolok oko tani:dc, awodc bvkkolok pitangko koycmvlo, bvm vlvngko bido cmna?

¹⁰Cdcmmanggom ongo apirko koycmvlo, tabv adorko bidocmna?

¹¹Odomvlo nolu, sc:kobulu aisi:ma:ncnc, kapc ainc amancm noluk ommangkvdv:dcm bikindagnc, cdcmyam cddvko noluk taycng amo:tok Abukc ainc attarcm kanckvdv:dcm biycnc!

¹²Cmpila tani:kvdv:dc nolum kapci inamdcm aipc mc:dagnc, bulum ila:sa:langka cdcmv:pc, kapila:nc cdcna lujvglurodc:lang lungor lunckvdv:dok agomc.

¹³“Ponme:nc yabgodok gva:toka; kapila:nc pontanc yabgodc odokkc gvponc lambcdc, appvngc singapkolo:pc gvbodag odokkc odok gvnctani:kvdv:dc bojcrungko:

¹⁴Kapilainc yabgodc ponme:la odokkc lambcdc gvnyi:ncdc, turkolo:pc gvbodag, odokkc cdcm pa:nckvdv:dc adji:ko.

¹⁵“Lume:ycm lungorla lunc tani:kvdv:dcm ansuka:sulangka, sc:kobulu nolukkolo:pc bera soben galugcm gcge:la gva:dagnc cmpige:la asin ara:bo gamke:nc ra:m iki:ycnc.

¹⁶Nolu buluk a:yckvdv:dcm ka:la kangkinyc. Ta:ngkanc vsv:lokkcm angura:ycm pvrdolang, cdcmanggom sa:lenowonc ta:ng vsvng amv:lokkcm tajvg a:ycm pvrdolang?

¹⁷“Cdcmpidag, appvng ainc vsvngc ainc a:ycm e:dag, cmpige:la aima:nc vsv:dc aima:nc a:ycm e:dag.

¹⁸Ainc vsvngc aima:nc a:ycm e:la:mang, cdcmpcmanggom aima:nc vsv:dc ainc a:ycm e:la:dolang.

¹⁹Ainc a:yc e:ma:nc vsvng appv:dcm tc:tapdo odokkc vmvlo cra:lvgla rompakdo.

²⁰Cdcmpc idag nolu cdcmbulum buluk aiyckvdv:dokki kangkinnang.

²¹“Ngom ‘Ru:tuma, Ru:tuma,’ cmnc appv:dci taycngamong migom dokodo:pc gvangkuma:yc, cmpige:la sc:kobvi taycng amo:tok du:nc ngok Abukc mcngkamdcmpc agercm gerycnc bv:ong gva:ycku.

²²Odo longcdo bojcrungkonc luyc ngom, ‘Ru:tuma, Ru:tuma, ngolu nok aminno lungorla lunam agomcm lubigo:ma:lang, odokkc nok aminno uikvdvngcm mcnpagmangalang, odokkc bottc bottcnc agercm bojcrungko nok aminno germangalang?

²³Odo bulum ngo appvng kindopc lutadla lubiyc, “Ngo cdvlosin nolum kinmangai; ngokkolokkc gc:ramkang, nolu aisi:ma:nc ager gernckvdvnga.”

²⁴“Appvngc cdcmpila sc:koi sc ngok agomkvdv:scm taddonc oddokkc cdcmbulum lukamdcmpc agercm gerdonc cdc kinncpa:nc tani:koncmpc iyc sc:ko bvk okumdcm rakud adi: taycngkolo modagnc;

²⁵Odokkc pcdong okang, pu:mi: assc tclubkang, odokkc csarc yula cdc okumdcm nvnga:to, ckvdaggom cdc dvrpentomang, kapila:nc cdcm vlvng tayc:lo motungai.

²⁶Odokkc sc ngok agom appv:scm tadnc odokkc cdcmbulum lukamdcmpc ima:ycnc cdc monsimonba:nc tani:koncmpc innc sc:kobv bvk okumdcm sulli:lo modonc;

²⁷odokkc pcdo:dc owangkang, pu:mi: asidc tclubbomkang, odokkc csardc sara:la cdc okumdcm nvnga:to, odokkc cdc dvrpenkang; odokkc cdc mosv:langkuma:dopc dvrmvg dvrsvgkang.”

²⁸Odokkc Jisubv sc agom appv:scm cdvlo lungaptonc, yadkumsunc tani:kvdv:dc Bvk luyirnam agomkvdv:dcm tadla mcngapla:tomang,

²⁹Kapila:nc Bv bulum aipc kinnc-pa:ncdcmpc luyirto, odokkc buluk poyirnckvdv:dcmpc imangai.