Read Mising MARKKC 11 Bible Online

MARKKC 11 - Mising bible

MARKKC 11

¹Odokkc cdvlo bulu Jerusalem aninpc pvnga:tonc, Betpagi: odokkc Betani:pc, Olib Adi:do:pc, Bvk agom tadjvgla gvmvnnc tani:anyiko Bv mclvgto, odokkc bulum luto,

²“Noluk kcrangkc do:lungolo:pc gvkang, odokkc nolu olo gva:danycmvloi gado: gure: awo adorko rvnna lc:namko pa:ycpc, sc:kosin cdcm sangkvma:namko; cdcm sa:rge:la go:bomlangkuka.

³Sc:koiyc nolum ‘Kapila nolu cdcmpc idu:n?’ Cmna luycmvlo lulang, ‘Ru:tumbv cdcm madag odokkc lomdanna cdcm so:pc mclatlvgycku.’ ”

⁴Odokkc bulu gvkang, odokkc yabgo moro:lo ali:lo rvnna lc:nam gado: gure: awo adorko gvla pa:to; odokkc bulu cdcm sarto.

⁵Odokkc sc:kobulu odo dagla dungaji bulu luto, “Nolu okkom idu:n, gado gure: awodcm sarla?”

⁶Odo bulu bulum lubito Jisubv okodcm lukaji; odokkc bulu bulum gvmotoku.

⁷Odokkc bulu gado: gure: awodcm Jisukolo:pc go:bombitoku, odokkc bulu gcnam gasor attarkvdv:dcm odok tayc:do pulvgamto; odokkc odok tayc:do Bv sa:to.

⁸Odokkc bojcrungko buluk gasor attarkvdv:dcm ali: lambcdo pungapbito, odokkc akke annc kanc vsvng rcngke:ycm pulvgamto okodcm bulu arvglokkcm pakaji.

⁹Odokkc Bvm gvpo:la gvnckvdv:dc odokkc Bvk lcdu lcdulo gvmvnnckvdv:dc jc:robbomkang, “Kumtoka! Pu:pojarpa:ncdc Bv sc:kobv Ru:tumkc aminno gvdu:nc!

¹⁰Pu:pojarpa:nc ngoluk abu Dawidkc migom dotcngc pvnga:dobonc! Appvngcmyam owudyangkoto kumnamc!”

¹¹Odokkc Bv Jerusalemdo gva:la kumko okumdo:pc gvto; odokkc cdvlo appv:dcm kanggongamtonc, do:nyc kamangabo:la, Bv vyvngkola: anyidcm Betani:pc gvbola gvkang.

¹²Odok longkondo, bulu Betani:dokkc cdvlo gvtokunc, Bv Kcnongkangai.

¹³Odokkc motcngo:pc tajvg amvngko annckadopc ka:la, Bv o:kaikoba: pa:ycji cmna cdcm kangkapc odopc gva:nammc, Bv okkomsin ka:begma:pc annc anggara:dcm ka:begto, kapila:nc odo tajvg a:yc e:dvmangai.

¹⁴Odokkc Bv cdcm luto, “Nokkolokkcm lckoda sc:kosin a:ycm domangka:langka.” Odokkc Bvk agom tadjvgla gvmvnnc tani:kvdv:dc cdcm tatto.

¹⁵Odokkc bulu Jerusalempc gvtoku. Odokkc kumko okumdo:pc gvangge:la sc:kobulu kumko okumdo attarcm rcnam-konam idunganc cdcmbulum mcnnenam robbomkang, odokkc Bv murkong olainckvdv:dok tcbulkvdv:dcm kuladam bito odokkc parong konckvdv:dok dungkokvdv:dcm;

¹⁶Odokkc Bv sc:komsin kumko okum ara:dok okkomsin bommotomang.

¹⁷Odokkc Bv luyirto, odokkc bulum luto, “Cdcm adla lc:ma:lang, ‘Ngok okumdcm appvng opvnlok kumko okumc cmna luyc?’ Cmpige:la nolu ccdcm rotkudnckvdv:dok dungkopc ito.”

¹⁸Odokkc kumnam ager gernckvdv:dok bottarya:nckvdv:dc odokkc ainc agom luyirnckvdv:dc cdcm tatto odokkc Bvm mokenanc lambcko mago:to; kapila:nc bulu Bvm pcsokang, kapila:nc yadkumsunc tani:appv:dc Bvk luyirnamdcm mc:la mcngapla:ma:pc ikang.

¹⁹Odokkc yumc ayir a:namc nogordokkc gvpaktoku.

²⁰Ro:dcm bulu gvbatbomnamc, bulu tajvg amv:dcm appvrdokkcbong sanpakla du:dopc ka:begtoku.

²¹Odokkc Pitorbv mc:pa:toku odokkc Bvm luto, “Ru:tuma, Kangkvka! Nok pelvgnam tajvg amv:dc sanpakkang.”

²²Odokkc Jisubv bulum lubito, “Ru:ncsa:ncmc mc:jvgsutoka.

²³Aropakpc, ngo nolum lubidung, sc:kobvi sc adi:scm, ‘Benyakla kukpakka:langka odokkc siycng asilo ojvngka:langka,’ cmna luycnc, odokkc bvk asinbo mc:moko kama:yc, cmpige:la bv okodcm lutonc cdcmpci iyc, cdcm bvkkcpc ibiyc.

²⁴Cdcmpiga:lok ngo nolum lubidung, nolu okodcmci kumdom koycnc, mc:jvglangka jc nolu cdcm pa:tobong cdcm, odokkc cdc nolukkcpc iycpc.

²⁵Odokkc cdvloi nolu kumdom dagrobdonc, mc:yinsulang nokkc sc:kaikc mcngkamdcmpc mc:ma:namko du:mvlo;

²⁶odomvlo noluk taycng amo:tok du:nc Abubv:sin noluk imursiyarlokkc mc:yinsuycpc.”

²⁷Odokkc bulu lckoda Jerusalempc gvtoku. Odokkc Bv kumko okumdo gvgo:la olo-tolopc gvi-gvsa:la du:namc, kumnam ager gernc bottarya:nc kvdv:dc odokkc ainc agom luyirnckvdv:dc odokkc mvjvgkvdv:dc Bvkkolo:pc gva:to, odokkc bulu Bvm luto,

²⁸“No oko ilang-gvla:namki scmbulum idu:n, cdcmanggom sc:ko nom ilang-gvlangcm cdcmbulum idopc bitang?”

²⁹Jisubv bulum luto, “Ngo nolum tawunam agom ako tadyc; ngom lutei, odokkc ngo nolum lubiyc oko ilang-gvlangki ngo scmbulum idoji.

³⁰Jo:nkc Baptismo binamdc taycng amo:tokka:nci cdcmanggom tani:kvdv:dokka:nci? Ngom lutei.”

³¹Odo bulu akonc akoncm luka:mvnsuto cdcmpc cdcmpcmang cmna, “‘Taycng amo:tokkc,’ cmna ngolu lumvlo, Bv luyc, ‘Kapila nolu cmpcmvlo Bvm mc:tinsutoma:n?’ ”

³²Ckvdaggom ngolu luycnci, “Tani:kvdv:dokkc cmna?” bulu tani:kvdv:dcm pcsokang, kapila:nc appvngc taddagai Jo:nbv aroru:pc agom lungornai.

³³Cmpige:la bulu Jisumc lubito, “Ngolu kinmang.” Odo Jisubv bulum lubito, “Ngo:sin nolum lubige:mang oko ilang-gvla:namkokki ngo scmbulum idagji.”