Read Mising MARKKC 12 Bible Online

MARKKC 12 - Mising bible

MARKKC 12

¹Odokkc Bv kvkanbinam do:yvngkokki bulum lurobbomkang. “Tani:akonc angur arvgko itungai odokkc cdcm lu:ri:ycm ngunge:la ba:ri:ycm petkomamto, odokkc alang kedlennanc arungcmsin ngunto, odokkc kanggapnanc po:yubcmsin molvgto, odokkc cdcm arvg inc kvdv:dcm togc:lvgto, odokkc akon dungko amongkolo:pc gvkang.

²Cdvlo ayir angkangkunc, bv ager gerya:nc tani: akoncm arvg inc tani:kvdv:do:pc mclvgto, bulukkolok angur a:yc asudo:ko pa:pc cmna.

³Odokkc bulu bvm sogapge:la bvm dcmto, odokkc bvm alag anggara:pc mclvgtoku.

⁴Odokkc lckoda bulukkolo:pc akon ager gerya:ncko mclvgto, odokkc bulu bvm mittukdok dcmjogto, anyi:sudopc bvm ipusire:ycm ito.

⁵Odokkc bv akonko mclvgto, odokkc bulu bvm moketo; odokkc cdcmv:pc bojcrungcm ito, akkem bulu dcmto odokkc akkem bulu moketo.

⁶Bvkkc ckvdaggom akoda dungai, airu:pc mc:bomsunam awoko; lcddardo bvm bulukkolo:pc mclvgto, scmpc lula, ‘Bulu ngok awoscm mcnggcru:ycpc;’

⁷Cmpige:la cdc arvg inckvdv:dc akoncm akonc luka:mvnsuto, ‘Sc:bo:yam lcdupc attarcm pangkonsupcncdc; gvtok, kajc bvm mokelai ngolu, odokkc lcdupc attarcm pangkonsunamdc ngolukkcpc iyc.’

⁸Odokkc bulu bvm sobomna moketo, odokkc angur arvgdokkcm crrennvgto.

⁹“Arvgdok ru:tumdc okkom iycsong? Bv gvla arvg inckvdv:dcm mokkeyamyc, odokkc angur arvgdcm ammem bipakyc.

¹⁰Nolu sc Ru:ncpvnckc agom potin scm pokvma:nci: ‘Okum monckvdv:dc oko vlvngardcm aimang cmna mcpaktonc cdc sungkendok ncrkvgpc ikang;

¹¹Cdc Ru:tumkc inamai; odokkc cdc ngoluk amikki ka:pc kangak sunamai.’ ”

¹²Odokkc bulu Bvm ycnggappc cmna anka:la ka:to, cmpige:la yadkumsunc tani: kcrc:dcm pcsokang, kapila:nc bulu mcngkinsuto jc buluk birudi:pc kvkanbinam do:yvdcm kvbito; cdcmpila bulu Bvm mcto odokkc gvkangku.

¹³Odokkc bulu Bvkkolo:pc Parisi:kvdv:dok akkem odokkc Herodkc tani:kvdv:dok akkem mclvgto, Bvk agom lukolok Bvm lukeleppc cmna.

¹⁴Odokkc bulu gvla Bvm luto, “Luyirna, ngolu kindung no arro cmna, odokkc oko tani:ycmsin pcsomang; kapila:nc no tani:lok nappangcm ka:mang, cmpige:la aropakpc Ru:ncsa:nckc lambcdcm lcngkandag. Kaesarmc dorpcnam murko:dcm dornamdc lujvgluro adnamdcmpc bipa:doyc bipa:ma:yc?

¹⁵“Ngolu bulum dorpa:don, cdcmanggom ngolu dorpa:ma:nci?” Cmpige:la buluk lc:sula lunam agomdcm kinge:la, Bv bulum luto, “Kapila ngom anka:la ka:dang? Ngom anvr poisangko boma:tei, odokkc cdcm ngom ka:motei.”

¹⁶Odo bulu apirko boma:toncm Bv bulum luto, “Sc sckkcmpc arnamcn?” Bulu Bvm lubito, “Kaesarkcmpc.”

¹⁷Jisubv bulum luto, Kaesarmc bipcnam attarkvdv:dcm Kaesarmc bitok, odokkc Ru:ncpvnckc attarkvdv:dcm Ru:ncpvncmc bitoka.” Odo bulu mc:la mcngapla:tomang cdcm.

¹⁸Odokkc Saddusi: kvdv:dc Bvkkolo:pc gva:to, sc:kobulu lckoda turkunammc kama:bong cmna ludagnc; odokkc bulu Bvm tawunam agomko tatto, scmpc lula,

¹⁹“Luyirna, Mose:bv ngolum adbito jc tani:akolok bvrokonc siycmvlo odokkc nc:ngko mcpakycmvlo, cmpige:la ko:kang akosin mcma:mvlo, cdc tani:dc cdc nc:dcm la:pcru:nammc, odokkc bvk bvrodok lcgangc ommangcm usa:yc.

²⁰Bvrrang kvnvdko dungai; abvngarncdc yamncko la:tungai, odokkc cdvlo sika:ji ommangc akosin katomang;

²¹Odokkc cdcm ame:ncdc bvm la:toku, odokkc sikang, ommang akosin kama:pc; odokkc odok anyidok lcdudokkcsin;

²²odokkc kvnvdnapcncdc:sin ommang akosin katomang.

²³Lcddarpc cdc nc:dc:sin sikang. Lckoda turdokudo bv sck nc:pc iyckusong? Kapila:nc cdc kvnvdpakdc bvm nc:pc langka.”

²⁴Jisubv bulum lubito, “Cdcmpila:ma:lang nolu imurgvmurdu:nc, nolujc dormo potindcmsin cdcmanggom Ru:ncpvnckc ilang gvlangnamdcm kinma:la?

²⁵Kapila:nc cdvlo bulu sikolokkc turyckunc bulu lckoda midangcm mokuma:yc cdcmanggom mida:pc bima:yckubong, cmpige:la taycngamo:tok lutad lunckvdv:dcmpc ingapycku.

²⁶Odokkc sinckvdv:dcm turmokunamdcm, Mose:kc potindcm nolu pokvma:nci, jarrubnc vsvngamv:dok agomdcm, Kapc Ru:ncsa:ncbv bvm lutonc, ‘Ngo Abrahamkc Ru:ncpvnnc, odokkc Isahakkc Ru:ncpvnnc, odokkc Jakobkc Ru:ncpvnnc?’

²⁷Bv sinckvdv:dok Ru:ncsa:ncmang, cmpige:la turnckvdv:dokkc; nolu aiyo:pc lumurc.”

²⁸Odokkc ainc agom luyirnc gva:la bulum akoncm akoncm luka:mvnsudopc tadge:la, odokkc Bv bulum aiyo:pc lubila:to cmna kangge:la, Bvm tawuto, “Lulvgnam agomkvdv:dok okkardc lupo:namdcn?”

²⁹Jisubv lubito, Lupo:namdc, “Tattoka, O Israel: Ru:tumdc ngoluk Ru:ncsa:ncbv, cdc Ru:tumdc akkongko;

³⁰Odokkc nok appvng asinangkokki nok cd Ru:tum Ru:ncpvncmc aipc mc:langka, odokkc nok appvng turnamki, nok appvng mc:namsagnamki, odokkc nok appvng tornamki.

³¹Akondc scmpc, ‘Nok kumrvko:rv tani:ycm noggvngkcmpc aipc mc:langka.’ Scmbulumyam bottcya:nc lulvgnam agomc okkosin kamang.”

³²Odokkc ainc agom luyirnckvdv:dc Bvm luto “No aropc ludung, Luyirna; no aroru:pc luto jc Bv ako, odokkc Bvkkcmyam sc:kosin kama:bong;

³³odokkc Bvm appvng asinangki aipc mc:dopc odokkc appvng mcngkin sakkinnamdokki, odokkc appvng ila:sa:la:namkokki, odokkc avkc akonkc kumrvko:rcm avyarkcmpc aipc mc:dopc, cdc appvng romlvgla palvgnam boli:ycmsin bottaya:nc.”

³⁴Odokkc Jisubv ka:namc bv aiyopc lubito, Bv bvm luto, “No Ru:ncpvnckc migom doko amo:dokkc motc:mang.” Odokkc odok lcdupc oko tannam agomcmsin Bvm tadpc saksa:la taula:tomang.

³⁵Odokkc Jisubv kumko okumdo luyirra du:namc, Bv luto, “Kapc ainc agom luyirnckvdv:dc lula:dang jc Kristobv Dawidkc aowocmna?

³⁶Dawidbv avdc, Angunnc Yalodokki lula:nammcm pa:la, lulento: ‘Ru:tumdc ngok Ru:tummc luto Ngok lagbvk alakpc tedtoka Nok mirukvdv:dcm alckcvgbo lcngap-ma:sisscm.’

³⁷“Dawidbv avdci Bvm Ru:tumcmna gogdag; cdcmpidag kapc Bv Bvk awopc iycn?” Odokkc bojcrung tani:yc Bvk agomcm mc:po:pc tadto.

³⁸Odokkc Bvk luyirdodo Bv luto, “Ainc agom luyirnckvdv:dcm ansuka:sulangka, sc:kobulu arai arainc attarcm gcge:la gvlv:dagnc, odokkc kumko okumkvdv:do aiyangarnc dungkom,

³⁹odokkc donam tv:nam bikokvdv:do aiyangarnc mcnggcm,

⁴⁰sc:kobulu tumbonc:ngkvdv:dok okumcm rodkutdagnc odokkc tadycpc cmna arai araipc kumdag. Bulu bojcya:pc mokemomarcm pa:ycku.”

⁴¹Odokkc Bv murkong kumsu:do murkong lvgnamkvdv:dcm ka:la du:to. Mircmnc tani: bojcrungc bojc bojcpc lvgdungai.

⁴²Odokkc opannc tumbonc:ngkonc gva:to, odokkc ta:m poisang pirnyiko lvga:lvgto, okodcmbulum lckoycmvlo sortiangkopc idagaji.

⁴³Odokkc Bvk agom tadjvgla gvmvnnc tani:kvdv:dcm Bvkkolo:pc goga:to, odokkc bulum luto, “Aropakpc, ngo nolum ludung, cdc opannc tumbo nc:dc murkong kumsu:do sc:kobulu lvgkanc cdc appv:dcm bojcyangko lvgya:to.

⁴⁴Kapila:nc bulu appv:dc buluk ngadnc murkong lokkcm lvgto; cmpige:la bv:dan bv opantu:la bvkkc okko dunggaji appv:dcm lvgto, bvk turnapcnan appv:dcm.”