Read Mising MARKKC 13 Bible Online

MARKKC 13 - Mising bible

MARKKC 13

¹Odokkc Bv kumko okumdokkc gvlenkunamc, Bvk agom tadjvgla gvmvnnc tani:kvdv:dc Bvm luto, “Ka:toka, Luyirna, kapc kangkanna kangaksula du:nam vlvngcnc odokkc okum monancnc!”

²Odo Jisubv luto, “No bottapaknc sesa:namkvdv:scm ka:begdagyc? Sido yoppakma:nam vlvng akosin du:ma:yc akon talc:lo akoncm tvla lc:dopc.”

³Odokkc Bv olib Adi: tayc:do tednamc kumko okum kekon kesakpc Pitormclang Jakobmc odokkc Jo:nmclang Andriwubulu Bvm atckpc tawuto,

⁴“Ngolum luteipcn, cdcbulu cdvlo iycji, odokkc kapinc kanggodc lenycn cdvlo cdc appv:dc lenapdodcm?”

⁵Odokkc Jisubv bulum lurobbombikang, “Ansulangka jc sc:kosin nolum angu lambcko gvbopc imangka:lang.

⁶Ngok aminno bojcrungc gvyc, scmpc lula, ‘Ngo Bv!’ Odokkc bulu bojcrungcm lambcm gvyodboyc.

⁷Odokkc cdvlo mimag monamcm nolu tadbegycnc odokkc mimag monamlok lubonna lunam agomcm, tadlomsuyoka; cdcm ipci iyc, ckvdaggom du:tcrdungapdc pvnga:ma:da.

⁸Kapila:nc opvnkvdv:dc opvnkvdv:dokki pakkeka:mvnsuyc, odokkc migom donc amongc migomdonncm moka:mvnsuyc; mo:di: mo:di:lo tarcmo:tonc tonyc, dobegtv:begma:namc lenyc; cmpige:la cdc ommang pa:dom kinamlok kisango:nammc.

⁹“Cmpige:la nolu avkvdv:dc ansulangka; kapila:nc bulu nolum kcba:lo tolvgyc; odokkc nolum kumko okumkvdv:do dcmyc; odokkc nolu amo: ru:tumnoklang migomkvdv:dok kcra:lo dakkansuyc ngok lcgangc, buluk kcra:lo lukansubidopc.

¹⁰Odokkc tadponc do:yv:dcm appvng opvnlo lungappo:pa:ru:yc.

¹¹Odokkc cdvloi bulu nolum kcba:lo soabomycnc odokkc nolum topakycnc, nolu okkom lupcnammcnc mcngkesula siyoka; cmpige:la odo ayirdo okkomci biycji cdcmci lulangka, kapila:nc cdc luncdc nolumang, cmpige:la cdc Angunnc Yalodc.

¹²Odokkc bvrro bvrrom sikolo:pc tolvgyc, odokkc abudc awodcm, odokkc ommangkvdvv:dc anc abukvdv:dokki dakka:mvnsuyc odokkc bulum sikolo:pc mclvgyc;

¹³Odokkc nolum appvngc tayumyc ngok lcgangc. Ckvdaggom sc:kobvi mentumsula du:ycnc bv turyc.

¹⁴“Cmpige:la cdvlo nolu cdc tayumpcnam mokemoyencdcm okolo du:pcma:namcji odo du:dopc ka:begycnc ponckvdv:dcm mcngkinmotok, odo Judia:dok du:nckvdv:dcm adi:kvdv:do:pc dugammolangka;

¹⁵sc:kobv okum mv:dumto du:nc gvimokupc mc:yoka, cdcmpcmanggom bvk okumpc gva:moyokuka, atv attarko langkakupc;

¹⁶odokkc arvgolo sc:kobv du:nc bvk gasorgaluk la:dokupc gvlatmoyokuk.

¹⁷Odokkc hai hai odo sckkc sckkc amvrro du:ycnc odokkc sc:ko anyuk sunna du:ycnc bulukkc mc:dvrpcnamc!

¹⁸Kumtoka cdc dvgvnno imangka:langka cmna.

¹⁹Kapila:nc odo longckvdv:do cdcmpc kelegc lenycnc lendo a:dodokkc su:pakpc lenkvmangada Ru:ncsa:nckc ru:namkvdv:dokkc odokkc, cdvlosin lema:ycku.

²⁰Odokkc Ru:tumbv cdc longc kvdv:dcm andcmomangamvlo, oko tani:ycsinci turra:ma:yapc; cmpige:la agom tadjvla gvmvnnc tani:kvdv:dok lcgangc, sc:kom bulum Bv mc:la balentonc, Bv longckvdv:dcm andc:moto.

²¹“Odokkc sc:koiyc nolum atvko luycmvlo, ‘ka:toka, sc:na Kristobv dung cmna!’ Cdcmanggom ‘ka:toka, clc Bv dung!’ Cdcm mc:jvgyoka.

²²Lume:lun Kristokvdv:dc odokkc lume:la lungor lunc tani:kvdv:dc lenyc odokkc mcngapla:ma:nam kanggodcm lcngkanyc, gvyodbola gvbopcmna, pagmvlo, cdc balennam kvdv:dcmsin.

²³Ckvdaggom ansuka:sulangka; ngo nolum appvngcm luno:la lubitu:bong.

²⁴“Cmpige:la odo longckvdv:do, cdc asin mc:pinsudo dokkc, do:nyitcm kcmomoyc, odokkc, po:lok pvang pvma:yc,

²⁵odokkc takarkvdv:dc taycng amo:tokkc kcdledamyc, odokkc do:mvrtok kvnggv:pc mcnggcsunamkvdv:dcm yonkukyc.

²⁶Odokkc odo bulu Tani:kc Awodcm mukkangkvdv:dokki bottaru:nc mcnggcsunamki odokkc amin gvla gvidokupc ka:begyc.

²⁷Odokkc Bv taycng among lutad lunckvdv:dcm melenamlvgyc, odokkc rcngansok appv:lokkcm Bvk agom tadjvgla gvmvnnc tani: kvdv:dcm langkumsuycku, mo:pvsok du:tcr appv:-dokkcm taycng among du:tcrdo:pc.

²⁸“Tajvg vsvng amv:dokkcm odok poyirnamko tadyv: sutoka: odok rcngke: appv:dc rcmagla annckvdv:dc jarsa:bo:mvloi, nolu kindag dviyc anindu:bong.

²⁹Cdcmv:pc, cdvlo nolu cdcbulu lendu:bong cmna ka:begycnc, nolu kindag jc Bv aninka:bong, yabgo ru:yid pvnga:du:bong.

³⁰Aropakpc, ngo nolum lubidung, cdc appv:dc lenapma:dapc sc opvnsc yogma:yc.

³¹Do:mvrtc odokkc mo:pvsc yogpakyc, cmpige:la ngok agomkvdv:dc yogpakma:yc.

³²“Cmpige:la cdc longcdcm cdcmanggom cdc ayirdcm sc:kosin kinmang, taycng amo:tok lutad lunckvdv:dc:sinci, cdcmanggom Awodc:sin, cmpige:la Abudcwong.

³³Ansutoka, darra du:lang; kapila:nc cdvlo ayirdc pvnga:ycsong nolu kinmang.

³⁴Cdc tani:akonc okum mcge:la okolai gvnamcmpc idag, bvk okumdcm bvk ager gerya:nckvdv:dcm ka:sv:ycpc imoge:la, buluk ayv ayvkc agerkvdv:dokkcm, odokkc yabgo ka:ya:ncdcm ka:ya:la darra du:dopc lulvgto.

³⁵Darra ka:ya:la du:tok cdcmpiga:lok — Kapila:nc cdvloi okumdok ru:tumdc gv:yckusong nolu kinmang, yumcayirdoisong, cdcmpcmanggom yumc kvdvsuddoisong, cdcmanggom porogkokdoisong, cdcmanggom ro:doisong —

³⁶ckvma:mvlo Bv vgcmpc gvlangkula nolum yubla du:dom gagycku.

³⁷Odokkc nolum ngo okkom ludu:nc ngo appvngcm ludung: toya:la du:toka.”