Read Mising MARKKC 15 Bible Online

MARKKC 15 - Mising bible

MARKKC 15

¹Odokkc rokomdannamci dormo ager gernckvdv:dok bottarya:nc kvdv:dc, bottcnc tani:kvdv:dc odokkc ainc agom luyirnckvdv:dc, odokkc kcbang appv:dc ru:supa:suto; odokkc bulu Jisumc ycnggapge:la gvlenboto odokkc Pilatkolo togc:lvgto.

²Odokkc Pilatbv bvm tawuto, “No Jiwukvdv:dok migomdci?” Odo Bv bvm lubito, “No:na cdcmpc ludu:nc.”

³Odokkc dormo ager gergcnc kvdv:dok bottarya:nckvdv:dc Bvm bojcrungko okkoi okkoiycm aima:pc luto.

⁴Odo Pilatbv lckoda Bvm tawuto, “Nokkc lupcnam kama:nci? Kangkvtoka cddvko bulu nom lujcmna ludu:nc.”

⁵Cmpige:la Jisubv oko agomcmsin odokkc lulatsutoma:bong, cdcmpila Pilatbv mc:la mcngapla:tomang.

⁶Cdcmpinamc bv donam tv:nam porobdo bv bulum makana:lo lvgnam tani:ako mclennvgbidoku sc:kom bulu koycji.

⁷Makana:do lvgnam imur ager inckvdv:dok, migom agom tadma:pc tani:mokencko, Barabbas cmnam tani:ko dungai.

⁸Odokkc cdc yadkumsunc tani:kvdv:dc Pilatmc korobbomkang bvk aginpc iyit-gvyitnamdcmpc bulum ibidopc.

⁹Odokkc Bv bulum lubito, “Nolu Jiwukvdv:dok migomdcm nolukkcpc mclennvgteikuk cmna mc:dagnci?”

¹⁰Kapila:nc bv kindagai jc ncla:yam dormo ager gernckvdv:dok bottarya:nckvdv:dc Bvm yc:lvgto.

¹¹Cmpige:la dormo ager gernclok bottarya:nckvdv:dc yadkumsunc tani:kvdv:dcm Bvmma:pc Barabbasmcdan mclennvgdokupc luurlvgto.

¹²Odokkc Pilatbv lckoda bulum tawuto, “Cmpcmvlo nolu sc:kom Jiwukvdv:dok Migom cmna ludu:nc cdc tani:dcm ngo kapc iycn?”

¹³Odokkc bulu jc:robbomkang lckoda, “Bvm Kuruslo pvtketok.”

¹⁴Odo Pilatbv bulum luto, “Kapila, oko aima:n agerko bv iton?” Ckvdaggom bulu jc:baddanna jc:to, “Bvm kuruslo pvtketok.”

¹⁵Cdcmpila Pilatbv, yadkumsunc tani:kvdv:dcm mc:lvgsumopc cmna, buluk lcga:pc Barabbasmc mclennvgbitoku; odokkc Jisumc sabukkokki dcmage:la kuruslo pctkedopc tolvgto.

¹⁶Odokkc sipaikvdv:dc migom dungko okum ara:dok kcbang bangkodo:pc Bvm gva:boto; odokkc bulu sipai appvngcm gokkumsuto.

¹⁷Odokkc bulu Bvm ba:yomcmpc yalv:nc migom gcnam olubnc attarcm molvgto; odokkc bulu ta:ng dumlupko poge:la bulu Bvm molvgto.

¹⁸Odokkc bulu Bvm selam-bomrobkang, “Motcngo:pc dungge:la, Jiwukvdv:dok Migoma cmna jc:yosuto?”

¹⁹Odokkc bulu Bvk mittukdok dorbumko langge:la dcmto, odokkc Bvm takircm sukkamto, odokkc bulu Bvm lcbv:tuma:la mcnggcsula kumto.

²⁰Odokkc Bvm bulu moki:moatge:la, bulu ba:yomcmpc yalv:nc migom gcnam olubnc galugdcm pvtpakto, odokkc Bvk avkc gcnam attarkvdv:dcm molvgtoku. Odokkc bulu Bvm kuruslo pvtkekapc gvlenbokang.

²¹Odokkc bulu lambclok gvpatnc tani: ako, Sirene dok Simonmc do:lu:dokkc gvddom, Alekjandarkclang Rupuskc abudcm, Kurusdcm jo:dopc lujcmlvgto,

²²Odokkc bulu Bvm Golgatha cmnam mo:di:do:pc gvboto okodcm tublong dungko cmdagnc.

²³Odokkc bulu Bvm gondok alangcm molusunam angur alangcm bito; cmpige:la Bv cdcm tv:tomang.

²⁴Odokkc bulu Bvm Kuruslo pvtketo, odokkc Bvk gcnam attardcm bulu orpansuto, bulukkolok sc:ko pa:ycji cmna do:jvgki kungka:mvnsuto, sc:ko okodcm la:mvlo aiycji cmna.

²⁵Odokkc odo awumko ayirc idagaboi, Bvm kuruslo pvtkedodo.

²⁶Odokkc Bvk agomcm aimang cmna adlvgnamdc scmpc podagai, “Jiwukvdv:dok Migomdc.”

²⁷Odokkc Bvk lcdulo rodkutnnc anyiko moketc:to, akoncm Bvk lagbvgpc odokkc akoncm Bvk lakkepc.

²⁸Odokkc Ru:nckc agom jvggabla lc:namdcmpci ikang okodc ludagji, “Bvm imur-gvmurnc tani:kvdv:dok lcdulo kvtc:to.”

²⁹Odokkc odok gvpatnckvdv:dc Bvm yvrka:to, buluk mittuk kvdv:dcm dumkv dumkvla, odokkc scmpc lula: lula, “C:i kumko okumdcm mopenge:la cdcm lowumno mokuncdci,

³⁰no avycm motursutoka, odokkc kurusdokkc gvitokuka?”

³¹Cdcmv:pc dormo ager gernckvdv:dok bottarya:nckvdv:dc:sin akonc akonki Bvm yvrka:to ainc agom poyirnc kvdv:dokki lckopc, scmpc lula: lula, “Bv ammem moturto; Bv avdcm motursula:mang.

³²Kristodcm, Israel dok Migomdcm Kurus talc:dokkcm gvimoteikupcn, ngolu ka:begdopc odokkc mc:jvgdopc.” Bvk lcdulo Kuruslo pvtkenam kvdv:dc:sin Bvm aima:pc luto.

³³Odokkc ayir akkcngko inamc, among appv:do kcmokang ayir konangko ima:dodo:pc.

³⁴Odokkc ayir konangko idodcm Jisubv bottaru:pc bc:dopc jcngkang, “Eloi, Eloi lama sabakta:ni?” Odok agomdc, “O ngok Ru:ncpvnc, ngok Ru:cpvnc, Kapila no ngom mcpakton?”

³⁵Odokkc ru:yidok dagla du:nckvdv:dok akke cdcm tadge:la luto, “Ka:tok, Bv Elija:mc gogdung.”

³⁶Odokkc akonc dugla asi mu:nc sponjakolo bi:ncko sirokangcm dorbumkolo nvggablvgge:la bvm tv:dopc bito, scmpc lula, “Toya:po:toka, Elija:bv Bvm gva:la la:yi:yckuji: la:yi:kuma:ycji.”

³⁷Odokkc Jisubv bottcru:pc jcngkang, odokkc Bv topvnkang.

³⁸Odo kumko okumdok tonkomnam gasordc tagnyikopc betkekang, tayc:tokkc kcyvgbo:pc.

³⁹Odokkc sipai lvngkolok ru:tumdc, ru:yido Bvkkolo:pc ka:la du:namc, Bv topvnkang odo, bv luto, “Aroru:pc sc tani:sc Ru:ncpvnckc Aowai!”

⁴⁰Odo mo:tc:lokkc ka:la du:nc nc:ngckkcsin dungai, odokbuluk ara:do dungai Magdalini Meri:bv:lang Jakobkclang Josepkc anc Meri:bv, Salomi:bv, sc:ko,

⁴¹Bv Galilolo du:dodcm lcdulo gvmvnkanc, odokkc Bvm ka:svmosvngkanc; odokkc bojcrungko nc:ngc sc:kobulu Bvk lcdulo Jerusalempc gvmvnkaji.

⁴²Odokkc yumc ayir a:namc, cdc Mosv:sunamlok longcla:yam, cdc, Yodladu:namdok po:pckc longcdo,

⁴³Arimatiadok Josepbv, kcba:ba:ncdok mcnggcnam memborkvdv:dc, sc:kobulu Ru:ncpvnckc migom donamdcm mago:la dunganc, saktapla Pilatkolo:pc gva:to, odokkc Jisukc sima:dcm koto.

⁴⁴Odo Pilatbv mc:la mcngkintomang bv aropc sidanka:bo:nci cmna; odokkc sipai lvngkolok ru:tumdcm gogangge:la, bv bvm tawuto bulu sima:dcm ka:toibo:nci cmna.

⁴⁵Odokkc mimag monclok lvngkolok ru:tumdokkcm Bv sika:bong cmnamdcm kinto bv Josepmc sima:dcm bito.

⁴⁶Odokkc bv hon onnoki sumnam simang takkomnanc gasorko rcto, odokkc Bvm la:yi:ge:la, Bvm sima:yennanc hon gasordokki yetto, odokkc agokolo lc:to okodcm vlvngcm pvtkorangge:la nguntungaji; odokkc agodok yabgodcm kcdkapdopc vlvng apvko kctkaplvgto.

⁴⁷Magdalini Meri:bv odokkc Josepkc anc Meri:bv okolo lc:toji cdcm ka:to.