Read Mising MARKKC 16 Bible Online

MARKKC 16 - Mising bible

MARKKC 16

¹Odokkc yodla du:nam longcdc gvngapnammc, Magdalini Meri:bv odokkc Jakobkc anc Meri:bv, odokkc o:ri: attarcm rcto, Bvm gvla bulu amvrdo yonnvgkapc cmna.

²Odokkc longc kvnvddok a:pongarnc longcdo rokompc bulu agodo:pc gvkang do:nyc sa:lendodo.

³Odokkc bulu akoncm akonc luka:mvnsukang, “Ngolum sc:ko vlv:dcm kurpakbiycn agodok yabgodokkcm?”

⁴Odokkc bcrsa:la ka:namc cdc vlv:dcm kcdpakla lc:namdcm bulu ka:begto — cdc aipc pvtadagai.

⁵Odokkc agodok ara:do gva:nammc, bulu lagbvgpc ya:me:tani:ko tedla du:dopc ka:begto, kamponc attar gcncko; odokkc bulu kangaksukang.

⁶Odo bv bulum luto, “Kangaksuyoka; nolu Najaretolok Jisumc madung, sckom kuruslo pvtketonc. Bv darobkangku, Bv sc kamang; bulu okolo Bvm lc:taganc cdc mo:takdcm ka:ta:ka.

⁷Cmpige:la gvkangkuk, Bvk agom tadjvgla gvmvnnc tani:kvdv:dcm lubita:kuk odokkc Pitormc Bv:jc nolum gvpong gvpongo:la Galilpc gvyc cmna; olo Bvm nolu ka:begycpc, Bv nolum lukamdcmpc.”

⁸Odokkc bulu gvlentoku odokkc agodokkc dukkangku; kapila:nc bulukkc jinnamc odokkc mc:la mc:ngapla:ma:nampc ikang; odokkc bulu sc:komsin okkomsin lutomang, kapila:nc bulu pcsokangai.

⁹Bv cdcmpc longc kvnvddok a:pongarnc longcdo turlangkula, Bv Magdalini Meri:yarmc lcngkansuto, sckkolokkcm Bv kvnvdkopc uiycm mcnpakkaji.

¹⁰Bv gvkangku odokkc bvk lcdulo du:mvnnc kvdv:dcm lungapbitoku, bulu mc:dvrra odokkc kabla du:dodcm.

¹¹Cmpige:la bulu Bv turradung odokkc bv ka:to cmna tadbegnammc, bulu cdcm mc:jvgtomang.

¹²Odok lcdupc angupc badge:la buluk anyidcm lcngkansuto, bulu do:lu:do:pc gvdokudodcm.

¹³Odokkc bulu gvlattoku odokkc akedcm lubitoku, ckvdaggom bulu mc:jvgtomang.

¹⁴Odok lcdupc Bv vyvngkolang akodcm lcngkansuto bulu bullong tcbuldo dodotv:dom; odokkc Bv bulum luka:la luto buluk mc:jvgma:nam kvdv:dokki odokkc asinkvdv:dok tornamkvdv:dokki, lcga:dc bulu Bvk turnamdcm kangge:la:sin mc:jvgtomang.

¹⁵Odokkc Bv bulum luto, “Mo:pvsok appv:lo:pc gvkangka odokkc ru:nam appv:dcm tadponc lutaddcm lutadta:ka.

¹⁶Sc:kobv mc:jvgycnc odokkc baptismongcm la:ycnc bv moturnam pa:yc; cmpige:la sc:ko mc:jvgma:ycnc, sika:langka cmna tolvgyc.

¹⁷Odokkc mc:jvgnckvdv:dok lcdulo sc: kanggodkvdv:sc gvmvnycpc; ngok aminno bulu uiycm mcnpakyc; bulu anu ayoki agomcm luyc;

¹⁸bulu tabbcm gagsa:la:yc, odokkc bulu tvngkesula sipcnamko tv:mvlogom, cdc bulum tv:nvgsumoma:yc; bulu mola:ma:nc tani:kvdvdcm alagcm riyitbiyc bulu csa:ycku.”

¹⁹Cmpige:la Ru:tum Jisubv, bulum Bv lungapdodcm taycng amo:c bompakkangku, odokkc Ru:ncsa:nckc lagbvgpc tedkang.

²⁰Odokkc bulu gvngapkang odokkc appv:lo lutadbigo:to, Ru:tumbv buluk lcdulo germvnto odokkc lutad lunamdcm arro cmna odok kanggodkvdv:dokki lcngkanamto. Amen.