Read Mising MARKKC 9 Bible Online

MARKKC 9 - Mising bible

MARKKC 9

¹Odokkc Bv bulum luto, “Aropakpc, Ngo nolum lubidung, sc akke dagla dung bulu Ru:nckc migom dokodcm tornampc gvkunamcm ka:ma:dapc sinamcm sikuma:yc.”

²Odokkc longkcng lcdudo Jisubv Pitormclang Jakobmc odokkc Jo:nmc Bvk lcdulo gvbokang, odokkc bulumong owudnc adi:taycngkolo:pc re:sabokang; odokkc buluk kangkolo Bv dumsimigmo angukang,

³Odokkc unjvg jvrvgla pvangkang tong cmna kampokang, mo:pvso oko attar nvya:ncsin cdcmpc nvla kampomola:mang.

⁴Odokkc odo bulum Elija:bv Mose:kokki lcnagkansuto; odokkc bulu Jisukokki agom luposula dungai.

⁵Odokkc Pitorbv Jisumc luto, “Ru:tuma, ngolu so du:nam airungkang; kajc ngolu po:yub okum sowumko mopo:lai, asongko nok lcga:pc odokkc asongko Mose:kc lcgangc asongko Elija:kcpc.”

⁶Kapila:nc bv okkom lupcnammcnc kinmangai, Kapila:nc bulu dungkoycko kama:pc pcsso abakangai.

⁷Odokkc bulum mukkang atakkonc ugyumna yvngkomto, odokkc mukkang ara:dokkc gombugko buglenkang, “Sc ngok mc:bomsunam Aowo: Bvk agomcm tattoka.”

⁸Odokkc vgcmpc buluk dungkodok appv:dcm ka:toncm Jisukc atcrongcm ka:begtoku sc:komsin ka:begma:pc.

⁹Odokkc bulu adi:tayc:dokkc re:yi:dokudo, Bv bulum okkom ka:tonc cdcm Tani:kc Awodcm sikolokkcm turmokuma:dodo:pc lubiyoka cmna kvnggv:pc lutumto.

¹⁰Cdcmpila bulu agomdcm bulu bullong kinna lc:to, sikolokkc turkunam agomdc:nu okkon cmna tadka:mvnsu mvnsula.

¹¹Odokkc bulu Bvm tawuto, “Kapila ainc agom luyirnckvdv:dc Elija:bv gvpo:yckupc cmna ludang?”

¹²Odokkc Bulum lubito, “Elija:bv gvpongarlangkula appvngcm lckoda mopvdakku; odokkc tani:kc Awodok agomcm kapc adla lc:tang, jc Bv bojcrungko ipusire:ycm pa:yc odokkc ipusire:ycm iyc?

¹³Cmpige:la ngo nolum lubidung Elija:bv gvkabong, odokkc bulu okkomci ila ipodaganc bvm cdcmpc ito, bvk agomcm adla lcngkamdcmpci.”

¹⁴Odokkc cdvlo bulu agomtadjvgla gvmvnnc tani:kvdv:do:pc gvtokunc, bulu bottcru:nc yadkumsunc tani: kcrcngko ka:begto buluk dungo:ycgo:do, odokkc ainc agom luyirnckvdv:dc bulum agom svgka:mvnsula luto.

¹⁵Odokkc lomdanna yadkumsunc tani:appv:dc Bvm ka:begge:la, kvnggv:pc mc:lamcngapla:tomang, odokkc Bvkkolo:pc dugamkang odokkc Bvm kumrvgamsuto.

¹⁶Odokkc Bv bulum tawuto, “Nolu oko agomcm bulukkokki luka:mvnsukan?”

¹⁷Odokkc yadkumsunc tani:kcrc:dok akonc Bvm lubito, “Luyirna, ngok awodcm nokkoso:pc gvbotung, kapila:nc bvkkolo gomma:nc yaloko dung;

¹⁸Odokkc okoloi cdc bvm pa:dagnc, cdc bvm crtabdag; odokkc bvkkc a:put sa:dag odokkc bvk a:yckvdv:dcm dokcrcpsuge:la tornam kcng cmmodag; odokkc ngo nok agom tadjvgla gvmvnnc tani:kvdv:dcm cdcm mcnpakteika cmna luto, odokkc bulu mcnna:tomang.”

¹⁹Odokkc Bv bulum lubito, “C:i mc:jvg kama:nc ope:ya, cddv ayirkopc ngo noluk lcdulo du:mvnycncm? Cddvkonu ngo nolum mc:yinsula du:ycncm?

²⁰Bvm ngok kcra:so:pc gva:botok.” Odokkc bulu ko:dcm Bvk kcra:do:pc gva:boto; odokkc uidc Bvm ka:namci, vgcmpc cdc ko:dcm amvrcm tvrgvt turmatto, odokkc bv amo:do kcdangge:la kcdgong kcdgongkang, nappa:dok a:put rege:pc sa:la.

²¹Odokkc Jisubv Bvk abudcm tawuto, “Bvkkc scmpc inamc cddvkopc ika:bo:n?” Odo bv lubito, “Kowawdokkcbong.

²²Odokkc cdc bvm lckko lckko:lo vmvlo odokkc asilo mojv:lvgdag, bvm mokepc cmna; cmpige:la no o:kai ibila:mvlo, ngolum aya:tei odokkc atvko iteipcn.”

²³Odo Jisubv bvm luto, “No ila:dagmvlo:c! Sc:ko mc:jvgdonc appvngcmci ila:dag.”

²⁴Vgcmpc ko:dok abudc jc:sangkang odokkc luto, “Ngo mcjvgdag; ngok mc:jvgma:namcm la:paktei!”

²⁵Odokkc Jisubv ka:namc yadkumsunc tani:kcrcngko dugla gvdo, Bv cdc aima:nc uidcm aima:pc morvdla luto, cdcm scmpc lula, “C:i gomma:nc odokkc ru:benc uiya, Ngo nom ludung, bvkkolokkc gvlentok, odokkc bvkkolo cdvlosin gva:yokuk.”

²⁶Odokkc jcngo:sula kabla bvm kvnggv:pc tvrgvt-tvrmatge:la, cdc gvlenkang, odokkc cdc ko:dc sinncmpc ikang; cdcmpc ika:nc jc abaya:ngc lukang, “Bv sipakkang.”

²⁷Cmpige:la Jisubv bvm alagdok sogabge:la sosa:to, odokkc bv darobkang.

²⁸Odokkc Bv okum ara:do:pc gva:nammc, Bvk agom tadjvgla gvmvnnc tani:kvdv:dc Bvk atckpc tawuto, “Kapila ngolu cdcm mcnpakla:toma:song?”

²⁹Odo Bv bulum luto, “cdcmpinckvdv:dcm kumnamkima:mvlo mcnpakla:mang.”

³⁰Bulu odokkc gvtvla du:to odokkc Galildok gvko:la gvto. Odokkc Bv sc:komsin kinkosulv:mangai;

³¹Kapila:nc Bvk agom tadjvgla gvmvnnc tani:kvdv:dcm Bv luyirra: dungai, bulum scmpc lula, “tani:kvdv:dok alaglo tani:kc Awodcm togc:lvgyc, odokkc bulu Bvm mokeyc; odokkc Bvm mokedag lcdudo, lowum longc lcdulo Bv turycku.”

³²Ckvdaggom bulu lunamdcm tadkintomang, odokkc bulu Bvm tawupcsin pcsokangai.

³³Odokkc bulu Kapernaumpc gvto; odokkc bulu okumara:do du:dodcm Bv bulum tawuto, “oko do:yvngcm lambcdo kvkan?”

³⁴Cmpige:la bulu aso:pcdu:to; kapila:nc bulu lambcdo akoncm akonc sc:karbv bottcya:ncji cmna luka:mvnsuka.

³⁵Odokkc Bv tedangge:la vyvngkolang anyi agom tadjvgla gvmvnnc tani:kvdv:dcm goga:to; odokkc Bv bulum luto, “Sc:kai akonc gvpongarncpc ipcmvlo bv appvngcm lcddarnc pagbopc ipa:ru:yc.”

³⁶Odokkc Bv kowau ako langangge:la buluk pongkokdo bvm du:moto; odokkc bvm Bvk alagdo boge:la, Bv bulum lubito,

³⁷“Sc:kobvi scmpinc koakoncm ngok aminno torvgsuycnc ngom torvgsudag; odokkc sc:kobvi ngom torvgsudagnc, ngom torvgsumang cmpige:la sc:ko ngom mclvgtagnc Bvm torvgsudag.”

³⁸Jo:nbv Bvm luto, “Luyirna, nok amin minna uiycm mcnpaknc tani:ako ka:to, odokkc ngolu bvm mcpakto, Kapila:nc bv ngoluk lcdulo gvmvnmanggai.”

³⁹Cmpige:la Jisubv luto, “Bvm mcpakyok; kapila:nc sc:kosin bottcnc agerko ngok aminno gerncdc lomdanna ngom aima:nckop lula:mang.

⁴⁰Kapila:nc ngoluk ikolo incdc ngoluk ikolo ima:ncmang.

⁴¹Kapila:nc aropakpc, ngo bulum lubidung, sc:kobvi nolum asi bati:ko tv:dopc biycji nolukkolo Kristomc amin dungga:lok, bvk amancm kapcsin yogmoma:yc.

⁴²“Sc:kobvi sc adjionckvdv:sok akoncm sc:kobulu ngom mc:jvgdagnc pa:bcm imoycnc bvkkcpc bottcru:nc donam vnanc kiparko bvk lv:po:do raglvgsuge:la bv siycng asikolo sumbudsuiya:mvloi aiya:ycpc.

⁴³Odokkc nok alagc nom pa:bcm imoycmvlo, cdcm papansutoka;

⁴⁴nokkcpc lagbe:ge:la turnamdo:pc gva:namdci aiya:dag alag so:nyidcm dungge:la uiamo:pc gvkunamdcmpcyam, cdvlosin midkuma:nc vmvlo:pc gvangkunamdcmpcyam.

⁴⁵Odokkc nok alcdc nom pa:bcm imodagmvlo, cdcm papaksutoka;

⁴⁶nokkcpc lcbe:la turnamdo:pc gva:namdc aiya:dag alc so:nyiko kage:la uiamo:pc cra:lvgkosunamdcmyam.

⁴⁷Odokkc nok amigc nom pa:bcm imoycmvlo, cdcm karpaksutoka; Ru:ncpvnckc migom doko mo:pvdo:pc amik apirongko kage:la gva:namdc aiya:dag amik pirnyiko kage:la uiamo:pc cra:lvgkosunamdcmyam,

⁴⁸Okolo odokbuluk tapumkvdv:dc sima:nc, odokkc vmvdc ugngasumang.

⁴⁹Kapila:nc appvngcm allompinc vmvkokki romka:la ka:yc.

⁵⁰Allo aidag; cmpige:la alodok ti:namdc alodo kama:bo:mvlo, kapc cdcm nolu ti:moyckun? Nolukkolo allo dungka:lang, odokkc akoncm akonkokki mc:pomcnganna du:langka.”