Read Mising LU:KKC 10 Bible Online

LU:KKC 10 - Mising bible

LU:KKC 10

¹Odok lcdupc Ru:ncpvnck Agom lutadbigo:nc Nv:yingko Ru:tumbv lutad agom lugo:bidopc lulvgto, odokkc Bvm gvpo:la gvdopc bulum mcpo:lvgto, anyi anyipc, tawon appv:lo:pc gvdopc Bv avdc oko okolo:pc gvpcnamma:ji.

²Odokkc Bv bulum luto, “Arvgc bojcrungko, cmpige:la ager gernckvdv:dc adjiongko; cdcmpidag arvgdok Ru:tumdcm Bvk arvgpc ager gerncm mclvgdopc kumtok.

³Noluk lambckvdv:dok gvkang; ka:toka, ngo nolum bera sobencm iki: tammempc gcnc sumyo ara:lo:pc mclvgamdung.

⁴Oko murkong sogcncmsin bomyoka, sogcncm, lcyugcmbulum; odokkc ali:lambcdo sc:komsin kumrvgsuyoka.

⁵Oko okumnoi nolu gva:donc, luangarpo:la, ‘Sc cra:sc mc:pomcnganka:langka!’ Cmna lulang:

⁶Odokkc mc:po-mcngannok awokonc odo du:mvlo, noluk mc:pomcngandc bvkkolo du:yc; cmpige:la cdcmpima:mvlo, cdc nokkolo:pc gvlatycku.

⁷Odokkc odo okumv:do du:lang, okkomci bulu biycji dola:tv:lang, kapila:nc ager gerncdc bvk gerrckvdv:dcm pa:pa:do; Okum akonlokkc okum akonlo:pc gvyoka.

⁸Cdvloi nolu tawonkolo:pc gva:donc odokkc bulu nolum torvgsuycnc, okodcmci noluk kcra:do biycji cdcmci dolang;

⁹Odok du:nc kinc-ramnc tani:kvdv:dcm csa:molangkuka odokkc bulum lulang, ‘Ru:ncpvnckc migom doko mo:pvdc noluk kcra:pc pvnga:du:bong.’

¹⁰Ckvdaggom cdvloi nolu tawonkolo:pc gva:ycnc odokkc bulu nolum torvgsuma:ycnc, odok bottcnc ali: lambckvdv:do:p gvlang odokkc lulang;

¹¹‘Noluk tawonsok ngoluk alckvdv:so a:nc koiyang among kvdv:scmsinci, ngolu noluk mcngkamma:pc pipu:sudung; ckvdaggom scm kintoka, jc Ru:ncpvnckc migom doko mo:pvdc noluk kcra:do pvnga:du:bong.’

¹²Ngo nolum lubidung, odo longcdo Sodomdokkcpci torasula:ya:ycpc cdc tawondcmyam.

¹³“Nolu:kkcpc mc:dvrpcnamc, Korajina! Nolu:kkcpc mc:dvrpcnamc, Betsaidanga! Kapila:nc nolukkolo bottcru:pc gernam agerkvdv:dcm Ti:rdo:lang Sidondo gerya:mvlo, cdvlaibong bulu asinc mc:dvrra mc:latsuiyangkupc, aima:nc gain attarcm gcge:la odokkc mcdbulo tedla du:la.

¹⁴Cmpige:la kcbang ba:dokudo nolu:kkcmyam Ti:rdc:lang Sidondokkcpc torasula:ycpc.

¹⁵Odokkc no, Kapernauma, no taycng amo:pc la:sangkunampc iyclang? Nom Uiamo:pc yobyi:lvgnampc iyc.

¹⁶“Sc:kobv noluk agom taddagji bv ngok agomcmsin taddag, odokkc sc:ko nolum lupaksuycji ngomsin lupakdag, odokkc sc:ko ngom lupaksudagnc ngom mclvgncdc sc:konc Bvm bv lupakdag.”

¹⁷Cdc nv:yingdc mc:pola, scmpc lula: lula: gvlattoku, “Ru:tuma, nok aminno uikvdv:dc:sinci ngoluk agomcm tadla kcyvgpc ingapkang!”

¹⁸Odokkc Bv bulum luto, “Ngo taycngamo:tokkc yari:cmpc Satandcm kcdleddopc ka:to.

¹⁹Ka:toka, ngo nolum tabbclang take-tabvkvdv:dcm sa nggcmla:dopc, odokkc appvng miru tayc:lo ilang gvlangcm bitu:bong; odokkc okkosin nolum mojogmorokla:ma:yc.

²⁰Ckvdaggom uikvdv:dc:jc noluk kcyvgpc ingapkang cmna mc:poyoka, cmpige:la noluk aminkvdv:dcmjc taycng amo:tc adgabla lc:tak cdcmpila:pak mc:polang.”

²¹Odo ayirdo Bv angunnc Yalodokki mc:pokang odokkc luto, “Ngo nom aipai bidung, Abba, taycng amongcla: mo:pvsok Ru:tuma, no sc agomkvdv:scm kinnc-pa:nc kvdv:dokkcmlang mcngkinnc kvdv:dokkcm lc:suto odokkc kowawkvdv:dcm lcngkan to; c: Abba, kapila:nc cdcmpinna:ncna nok aipc mc:namdok mcngkamdc.

²²“Appvng attarcm ngom bitung ngok Ba:bukokki; odokkc Abudc:ma:mvlo sc:kosin Awodcm kinmang, cdcmpcmanggom Abudc sc:kosong Awodcma:mvlo odokkc sc:komci lcngkanlv:dagnc Awodc bvm lcngkan dag.”

²³Odokkc Bvk agom tadla gvmvnnc tani: kvdv:do:pc nge:latsuge:la Bv lc:sula luto, “Nolu okkom ka:begdu:nc cdcm ka:begnc amikkvdv:dc gernc-pu:nc.

²⁴Kapila:nc ngo lubidung nolum jc lungor lunc bojcrung odokkc migomkvdvngc nolu okkom ka:du:nc cdcm ka:lv:dagai, odokkc cdcm ka:begtomang, odokkc nolu okodcm taddu:nc cdcm tadlv:dagai, odokkc cdcm tadbegtomang.”

²⁵Odokkc ka:toka lujvgluro lunc akonc luka:la kangkvpc cmna darobkang, scmpc lula, “Luyirna, turyarla du:nam turnamdcm pa:pc ngo okkom ipcnammcn?”

²⁶Bv bvm lubito, “Lujvg lurodc okkomna adtang? No kapc podon?”

²⁷Odo bv lubito, “No Ru:tummc aipc mc:langka nok Ru:ncpvncmc nok asin appvngkokki, odokkc nok appvng yalokokki, odokkc nok appvng ilang gvlangkokki, odokkc nok appvng mc:namsagnamkokki; odokkc nok kumrvko:rcm nok avyvngkcmpc mc:sulang.”

²⁸Odo Bv bvm lubito, “No aropc lugabto; cdcm itok, odokkc no turycpc.”

²⁹Cmpige:la bv, avdc avdcm aidag cmna lusupc cmna, Jisumc luto, “Odokkc ngok kumrvko:rvkvdv:dc sc:kon?”

³⁰Jisubv lubito, “Tani: akonc Jerusalemdokkc Jeriko:do:pc gvdungai, odokkc bvm rodkudnc kvdv:dc pa:to, sc:kobulu pamvnsula dcmto, odokkc mcpakla gvkangku, bvm sikvramdopc mcge:la.

³¹Cdcmpc idodcm odo lambcdok dormo ager gergurnc tani:konc gvpatto; odokkc bvm ka:begsunamc bv kekondok gvyodla gvkang.

³²Cdcmv:pc Lebiang akoncsin, bv odo mo:di:do:pc gvpvngge:la ka:begge:la:sin, kekondok gvyotla gvkang.

³³Cmpige:la Samariang akonc, bv gvla du:namc, bv okolo dungaji gvpv:to; odokkc bv cdvlo bvm ka:begtoji, bv ayang-abopc mcngkang,

³⁴odokkc bvkkodo:pc gva:to odokkc bvk dcmjokko kvdv:dcm ycngkabambito, tulangcmna: odokkc angur alangcm pvlvgbige:la; odokkc bvk avkc simvn tayc:do sa:moge:la bvm mibo dungko okumkolo:pc gva:boto, odokkc bvm ka:sv:mosv:to.

³⁵Odokkc longkondo bv adoli: murkong pirnyiko la:lenge:la cdcm mibo okumdok ru:tumdcm bito, scmpc lula, ‘bojcyangkoda murkong gvycmvlo ngo nom dorkupc cdvlo ngo gvlatyckunc.’

³⁶Cdc awumdok sc:kom, no mc:dang, rodkutnc tani:dok alaglo gvpa:sunc tani:dok kumrvko:rcmna?”

³⁷Bv luto, “Sc:kobv bvm ayangabbom lcngkantoji cdcna.” Odo Jisubv bvm luto, “Gvkangkuka odokkc cdcmv:pc ita:kuka.”

³⁸Cdcmpc buluk lambcdok gvtvla du:namc, Bv do:lungkolo gva:to; odokkc Marta cmnam nc:ngkonc bvk okumdo:pc Bvm goga:to.

³⁹Odokkc bvkkc Meri: cmnam bvrmcko dungai, sc:kobv Ru:tumkc alc ru:yido tedangkaji odokkc bvk luyirnam kvdv:dcm tadla dungkangai.

⁴⁰Cmpige:la Marta:bv bojcrungko ila:sa:la bikolo idvrsisongkang; odokkc Bvkkolo:pc gvangge:la bv luto, “Ru:tuma, no ka:mi:ma:nci ngok bvrmcdc ngog atcrongcm ila:sa:la bidopc mcpaknamcm? Cdcmpila bvm ngom idumsudopc lulvgteipcn.”

⁴¹Cmpige:la Ru:tumbv bvm lubito, “Martanga, Martanga, no bojcrung atv lcgangc mc:dvrdung.

⁴²Pa:pcnamdc akkongko. Meri:bv ainc atakdcm balenna la:to, okodcm bvkkolokkcm la:pakkuma:ycji.”