Read Mising LU:KKC 13 Bible Online

LU:KKC 13 - Mising bible

LU:KKC 13

¹Odo tani:ckkc dungai sc:kobulu Bvm lubitoji Galildok du:ncdagnc kvdv:dok agomcm sc:kobuluk i:ycm Pilatbv buluk palvgkokvdv:do yonnusutoji.

²Odokkc Bv bulum luto “Nolu mc:dagnci cdc Galildok du:nckvdv:dc ake Galildok du:nc kvdv:dcm aiya:ma:nc papi:yc cmna, bulu cdcmpc ipusire:ycm pangga:lok?

³Ngo nolum lubidung, Ma:; cmpige:la nolu asin mc:dvrra mc:latsukuma:mvlo nolusin cdcmv:pc singapyc.

⁴Cdcmpcmanggom cdc vyvngkolang anyikodok tayc:do Siloamdok owudnc moyetsunam okumdc dvrjcmkamdcmpc odokkc dvrketonc bulum, nolu mc:dagnci bulu Jerusalemdok du:nc ake appv:dcmyam aiya:ma:pc imur murnc cmna?

⁵Ngo nolum lubidung, Ma:; cmpige:la nolu asinc mc:dvrla mc:latsukuma:mvlo nolu appvngc cdcmv:pc singapyc.”

⁶Odokkc Bv sc kvkanbinam do:yv:scm kvbito: “Tani: akonc bvk angur ba:ri: ara:do tajvgamvngko letungai; odokkc bv a:yc mala pvrkapc gvnamc apvkosin pa:tomang.

⁷Odokkc bv angur ba:ri:dok ka:ya:ncdcm luto, ‘Ka:toka, sc dv:tak tagumscm ngo sc tajvg amv:sokkcm a:ycm mala gva:to, cmpige:la ngo apvkosin pa:tomang. Scm tc:paktok; kapila sc amo:scm du:bomna du:ycn?’

⁸Odo bvm bv lubito, ‘Scm du:po:motok, ru:tuma sc dv:takso:sin, ngo appv:dcm tagburra a:rko ilvgma:sisscm.

⁹Odokkc lungying sc a:yc e:mvlo, odo a:yc e:yc. Cmpige:la cdcmpc ima:mvlo, no cdcm tc:la:ycpc.’ ”

¹⁰Cdcmpc Yodla Ager germa:pc du:nam longckoncm Bv kumko okumkolo luyirra dungai.

¹¹Odo odokkc vyvngkolang pi:nyi dv:takkopc mola:ma:nc yalo pa:nam nc:ngkonc dungai; bv tungkuli:daggai odokkc avyc aiyo:pc dagtu:la:mangai.

¹²Odokkc cdvlo Jisubv bvm ka:begtoji, Bv bvm gogto odokkc bvm luto, “Ambvra, nok mosimola:ma:-namdokkc no aikangkubong,”

¹³Odokkc Bv bvm alagcm ri:yidto, odokkc oddung bvm vgcmna dagtu:motoku, odokkc bv Ru:ncpvncmc aipai cmto.

¹⁴Ckvdaggom kumko okumdok ka:sv:mosv:ya:ncdc, kvnggv:pc aglvng sangkang kapila:nc Jisubv ager germa:pc yodla du:nam longcdo csa:motoku, tani:kvdv:dcm lubito, “opta:do ager gerpcnanc longkcngko dung; odo longckvdv:do gvlangka odokkc csa:molangkuka, odokkc ager germa:pc yodla du:nanc longckvdv:do:mang.”

¹⁵Odo Ru:tumbv bvm lubito, “C:i agom lc:sula lunckvdvnga! Noluk appvng ager germa:pc yodla du:nanc longcdo ncsin doko kungka:lokkcm vbogo:romna: gadong gure:ycm rvnkolokkcm sarma:lang, odokkc cdcmbulum asscm tv:moma:lang?

¹⁶Odokkc sc nc:sc, Abrahamkc omcsc sc:kom uiyc tagyvngkolang pi:nyi dv:takkopc gagla lc:tagnc, ager germa:pc yodla du:do longcdo mopvtma:nci?”

¹⁷Bv cdcm lunamci, Bvk agom lukampc tadma:nc appv:dcm anyingamsumoto; odokkc tani:appv:dc Bvk bottapaknc mcngapla:ma:nam ager gernamkvdv:dokki airu:pc mc:pamkang.

¹⁸Cdcmpila:yam Bv luto, “Ru:ncpvnckc migom doko mo:pvdc kapc idang? Odokkc cdcm ngo okodokki luyv:suycn?

¹⁹Cdc tani:akonc pctu ammokoncm langge:la oyv: ba:rido pidlvgnammcmpc idag; odokkc cdc sa:la vsvngamv:pc ikang, odokkc do:mvrtok pcttangkvdv:dc odok rcngke:kvdv:do asubcm moto.”

²⁰Odokkc Bv lckoda luto, “Ru:ncpvnckc migom doko mo:pvdcm ngo oko kokki luyv:suyya:n?

²¹Cdc komirangcmpc idag, okodcm nc:ng akonc langge:la odokkc cdc appv:dcm go:sa:moma:sisscm adjio:nc gempa pvwumkolo lc:sutoji.”

²²Bv Bvk lambcdok gvtvla tawonloklang luyirra do:lung do:lu:lok gvkang, odokkc Jerusalempc gvka:la gvla.

²³Odokkc akonc Bvm tauto, “Ru:tuma, cdc mopvtnamkvdv:dc adjiongkoi iycn?”

²⁴Odo Bv bulum lubito, “Ponme:nc lambcdok gva:pc cmna kvnggv:pc gvke:-gvye:la gva:toka; kapila:nc bojcrungc, ngo nolum lubidung, gva:pc cmna mayc cmpige:la gva:la:ma:yc.

²⁵Cdvlo cdc okum ru:tumdc darobycji odokkc yabgodcm mokapycji nolu mo:ro:do dagla du:yc odok yabgodcm ranku:yc, scmpc lula, ‘Ru:tuma, ngolum moge:po:bitei.’ Bv nolum lubiyc, ‘Ngo kinmang nolu okolokkci gvdu:song.’

²⁶Odo nolu lurobbomyc, ‘ngolu nok ka:de:pc doto tv:to, odokkc no ngoluk nogor lambckvdv:do luyirka.’

²⁷Cmpige:la Bv luyc, ‘Ngo nolum lubidung, nolu okolokkc gvdu:song ngo kinmang; ngokkolokkc nolu gc:rkang, aima:nc ager gernc tani: appvngc!’

²⁸Odokkc noluk a:yckvdv:dcm dokcrcbamsuyc cdvlo nolu Abrahamkc, Isahakkc, Jakobkc odokkc Ru:ncpvnckc migom doko mo:pvdok lungor lunc appv:dc Ru:ncpvncmc ka:begyc odokkc nolu av avkvdv:dcm nv:lenlvgdopc ka:dodcm nolu kabyc.

²⁹Odokkc tani:kvdv:dc sanggatokkc odokkc owangbokkc, odokkc pckv:tokkclang pcya:bokkc gva:ycku, odokkc Ru:ncpvnckc migomdoko tcbuldo teda:ycku.

³⁰Odokkc ka:toka, akke lcddarpc sc:kobulu gvpongarpc iycji, odokkc akke gvpongarpc gcdung sc:kobulu lcddarpc iyckuji.”

³¹Odo ayirardo Parisi:ckkcnc gva:to, odokkc Bvm luto, “Sokkc gc:rkang, kapila:nc Herodbv nom mokepc cmna madung.”

³²Odo Bv bulum lubito, “gvkang odokkc cdc mensuru:dcm lubita:k, ‘ka:ta:ka, ngo uikvdv:dcm mcnpakdung odokkc silola: yampo kinamcm aimodungku, odokkc lowum longcdo ngo ngok gerpcnam agercm gerpvtyc.

³³Cdcmpc idaggom imanggom ngok lambcdok ngo silola: yampo gvtvpci iyc odokkc odok longkondo:sin; kapila:nc Jerusalem dokkcma:mvlo lungor lunnc yogpagmang.’

³⁴“Oh Jerusalem, Jerusalem, lungor lunckvdv:dcm mokenc odokkc nolukkolo:pc sc:kobulum mclvgtaganc cdcmbulum vlvngkokki: gckena! Cddvko lckko lckko:lo ngo anc porogc awokvdv:dcm alap kcvgbo lapkomna labribomna dungkampc du:lv:ton. Cmpige:la nolu lapkomkosumang;

³⁵ka:tok, noluk okumdcm mcpakdannampc ikang. Odokkc ngo lubidung nolum, ‘Ru:tumkc aminno sc:kobv gvdu:nc cdc gernc-pu:nc! Cmna luma:sisscm nolu ngom ka:begma:yc.’ ”