Read Mising LU:KKC 14 Bible Online

LU:KKC 14 - Mising bible

LU:KKC 14

¹Ager germa:pc yodla du:nam longcdo Bv gvla migom donc tani:akolok okumkolo sc:kobv Parisi:anc doddom, bulu bvm ka:la dungai.

²Odokkc ka:toka, Bv kcra:do bv:nam kinam kanc tani:ko dungai.

³Odokkc Jisubv lujvgluro kinnckvdv:dcmlang Parisi:kvdv:dcm luto, scmpc lula, “Yodla ager germa:pc du:do longcdo kinamcm csa:mopa:dakkuyc, csa:mopangkuma:yc?”

⁴Cmpige:la bulu aso:pc du:pakkang. Odokkc Bv bvm langange:la csa:motoku, odokkc bvm gvmotoku.

⁵Odokkc Bv bulum luto, “Nolukkolok sc:kobv, awoko dungge:la cdcmanggom vbo go:ruko sirurgkolo owa:ycmvlo ager germa:pc du:do longcdo mcna:pc sosangkuma:n du:n?”

⁶Odo bulu cdcm lulatsubila:tomang.

⁷Cdcmpidodcm sc:kobulum gogtungaji Bv kvkanbinam do:yvngko kvbito, cdvlo Bv mcnggc kanc dungkokvdv:do du:pc cmna manamkvdv:dcm kapc madagaji kangge:la, scmpc bulu luto,

⁸“Nolum cdvloi sc:kaiyc midangkolo donamtv:nam lcgangc gogycji, mcnggc kanc dungkolo du:yoka, ckvma:mvlo nomyam mcnggc kaya:nc tani:ycm bv gogycpc;

⁹odokkc sc:ko nom gokkanc gogncdc:la nomyam mcngc kaya:ncdc anyidc gva:la nom luyc, ‘Sc tani:scm dungkoko bitoka,’ odo no anyi:sula etedyangko dungkodo tedpa:ycku.

¹⁰Cmpige:la cdvlo nolum gogycnc, gva:la appvngcmyam adji:yangko dungkodo du:lang, odomvlo nolum ila:sa:la bincdc gva:dodcm bv nolum luycpc, ‘Ajona, bottcya:nc dungkolo:pc gvkang’; odo noluk tcbuldok du:nc kvdv:dok dungkodo nolum lckopc iycpc.

¹¹Kapila:nc sc:ko avyc avycm bottcpc mc:suycnc bvm adji:pc mc:sumoyc, odokkc sc:kobv avyc avdcm adji:pc mc:suycnc bvm bottcncpc imoyc.”

¹²Bvm gognc tani:dcmsin bv luto, “Cdvlo nolu donamtv:namko iycnc, nok ajonkvdv:dcm gogsuyoka cdcmanggom nok bvrokvdv:dcm cdcmanggom nok ope:ncgvng kvdv:dcm cdcmanggom mirucmnc kumrvko:rvkvdv:dcm, ckvma:mvlo bulusin nolum tu:latsula gogsuycku, odokkc pangkupcnam pa:ycku.

¹³Cmpige:la cdvlo nolu bottcnc donam tv:namko biycnc, opankvdv:dcm gogsulang, lcbe:nckvdv:dcm,

¹⁴miglunc kvdv:dcm odokkc odo nolu aipaiycm pa:yc, kapila:nc bulu nolum bilatsulangkuma:yc. Aropc ainckvdv:dc sige:la lckoda turlangkula kcbang ba:dokudodo nom bigangcm biyckupc.”

¹⁵Tcbuldok tednc tani:kvdv:dok akonc cdvlo cdcm tadbegtoji, bv Bvm luto, “Ru:ncpvnckc migomdokodo sc:kobv pitangcm doyckunc bv gerncpu:nc!”

¹⁶Cmpige:la Bv luto, “Tani: akonc lckoncm bottcpakpc donamtv:namko bito,

¹⁷odokkc, bojcrungko gogsuto; odokkc dodotv:do ayirdo bvk ager gerya:nckvdv:dcm sc:kobulum gogtungaji gogdopc mclvgto, ‘Kajc; kapila:nc su:pak appvngcm yv:let-roblettakbong.’

¹⁸Cmpige:la bulu appv:dc akon lukamo:pc lupaksurobbomkang, Lupongarncdc bvm luto, ‘Ngo arvg among inyopkoncm rcto, odokkc ngo cdcm gvla ka:pci iyc; Ngo nom kumdung, ngom mcteibong.’

¹⁹Odokkc akonc luto, ‘Ngo vbo go:ru a:l anggoko rcto, odokkc ngo cdcmbulum anka:la kangkvpc gvdag; Ngo nom kumdung, ngom mcteibong.’

²⁰Odokkc akonc luto, ‘Ngo yamncko la:tung, odokkc cdcmpila ngo gvla:mang.’

²¹“Cdcmpidodcm ager gerya:ncdc gvlatlangkula bvk ru:tumdcm lubitoku. Odo cdc okumdok ru:tumdc aglvng sa:la bvk ager gerya:ncdcm luto, ‘Mcna:pc clc nogorolok ali: lambcpc odokkc adji adjionc lambckvdv:do:pc gvkang, odokkc opankvdv:dcm odokkc lagbe:nckvdv:dcm miglunckvdv:dcm odokkc lcbe:nckvdv:dcm gogta:ka.’

²²Odokkc ager gerya:ncd luto, ‘Ru:tuma, no okkom lulvgtonc cdcm itobong, odokkc su:paksin dungko dung.’

²³Odokkc ru:tumdc ager gerya:ncdcm luto, bottcnc ali: lambcpc gvkang odokkc arvg lambckvdvngolo:pc gvkang, odokkc tani:kvdv:dcm gvdandopc gogta:ka, ngok okumso bi:dopc.

²⁴Kapila:nc ngo nom lubidung, cdc gognam tani:kvdv:dok akosin ngok donam tv:namsok dopodowanscm dobegma:yc.”

²⁵Cdcmpidodcm bojcrungko tani:yc yadkumsula Bvk lcdu lcdulo gvmvnkang; odokkc Bv ngengkutsuge:la bulum luto,

²⁶“Sc:koiyc ngokkolo:pc gva:mvlo odokkc bvk avkc abudcm, ancdcm, nc:dcm, ommangkvdv:dcm, bvrrangkvdv:dcm odokkc bvrmangkvdv:dcm, c:, odokkc bvk avkc turnamdcmsinci aimang cmna mc:ma:mvlo bv ngok agom mc:jvgla gvmvnnc tani:pc ila:ma:yc.

²⁷Sc:kobvi avkc kuruscm jongge:la ngok lcdu lcdulo gvmvnma:ycnc bv ngok agom tadjvgla gvmvnnc tani:pc ila:ma:yc.

²⁸“Kapila:nc nolukkolok sc:kobv, owudtangkvtnc poka okumko molv:ncdc, tedtungge:la cddvko murkongcm ilvgpcnamcji mcngka:la ka:po:ma:nc, bvkkc cdcm mongapla:nanc du:ji: kama:ji cmna?

²⁹Cdcma:mvlo, cdvlo mosa:namdcm mogabycji, odokkc mopvnma:mvlo, cdcm ka:nc appv:dc bvm moki:moatrobbomyc, scmpc lula,

³⁰‘Sc amisc mosa:to, odokkc mopvntomang.’

³¹“Cdcmpcmanggom oko migomdc, mimag mokolo akon migomdcm momvnsukapc gvpc, tedtungge:la bvk lv:ying vyvng mimagmonckvdv:dokki lv:ying vyvng anyidc moa:dodcm mopvsula:ycnci mopvsula:ma:ycnci mc:mi:la ka:ma:nc du:n?

³²Odokkc cdcmpc ima:mvlo, cdc akondc mo:tc:pc du:dodoi bv lutad luncko mclvgla odokkc mimag moma:pc du:mvnsunam agomko tadmvnsudag.

³³Cdcmpidag, nolukkolok sc:kobvi appvngcm mcpagamma:ycnc bv ngok agom tadjvgla gvmcnnc tani:pc ila:ma:yc.

³⁴“Allo aidag; cmpige:la alodok ti:namdc kama:ycbo:mvlo, odok ti:namdcm kapc pa:latyckun?

³⁵Cdc amo:lokkcpc cdcmanggom a:rpcsinci aikumang; tani:yc cdcm yoppakdag. Sckkc tadnanc yerungc du:nc, bvm tadmotoka.”