Read Mising LU:KKC 18 Bible Online

LU:KKC 18 - Mising bible

LU:KKC 18

¹Odokkc Bv bulum kvkanbinam do:yvngko kvbito, bulujen lo:dvscm kumdopc odokkc asinc adji:pc mc:suma:ycpc cmna.

²Bv luto, “Nogor akolo kcba: ba:ncko dungai sc:kobv Ru:ncpvncmcsin pcsomangai odokkc cdcmanggom tani:ycmsin pcsomangai;

³odokkc tumbonc:ngko dungai odo nogordo sc:kobv bvkkolo:pc gva:tvla dungge:la, ‘ngom imur inc mirudokkcm mopvttei cmna lutvto,’

⁴Bv asudowko lupaksuto; ckvdaggom lcdupc bv avdc avdcm lusuto, ‘Ngo Ru:ncpvncmc manggom tani:lok lukamdcmpc tadmang, ckvdaggom sc tumbo nc:sc ngom lutvga:lok,

⁵ngo bvm motuyc, ckvma:mvlo bv gvtv-gvtvla ngom kvgpckc.’”

⁶Odokkc Ru:tumbv luto, “Tattok dormokama:nc kcba: ba:ncdc kapc ludagji.

⁷Odokkc Ru:ncpvncbv Bvk malennam kvdv:dcm, sc:kobulu Bvm longc-yumcpc kumna gognc kvdv:dcm motuma:yclang? Bv buluk lcgangc bojcpakko toya:la du:ma:yclang?

⁸Ngo nolum lubidung Bv bulum imurnclokkcm mcna:pc moturyc. Ckvdaggom, cdvlo tani:kc awodc gviyckunc, Bv mo:pvso mc:jvgcm pa:yckusong?”

⁹Bv sc kvkanbinam do:yv:scmsin kvbito sc:kobulu akedc avc avycm dormokannc cmna mc:sudagai odokkc ammem yodpakdungai:

¹⁰“Tani: anyikonc kumko okumpc kumkapc gvkangai, akonc Parisi:kai odokkc akondc migom murkong urkumnnckkai.

¹¹Parisi:dc dagrobge:la avdc scmpc kumsuto, ‘Ru:ncpvnna, ngo nom aipai cmdung jc ngo amitani:ycmpc imang, yadla attar lango:binckvdv:dcmpc, kaboma:pc kcba:ba:nc, aminc:ng langgo:nc, odokkc sc migom murkong urkumsunc scmpcsinci imang.

¹²Ngo longc kvnvddo lcnyikopc apin doma:pc yoddo, ngok pa:nam appvng attarrokkcm vyvngcm pa:namcm bido.’

¹³Cmpige:la migom murkong urnckvdv:dc, mo:tc:pc dagge:la, taycng amo:pci amigcm nge:sa:ma:pc, cmpige:la bvk angkc:dcm kvgsu kvgsula, scmpc lula: lula:, Ru:ncpvnc, ngo papi:scm ayang-abotei cmto.

¹⁴Ngo lubidung, sc amisc aidag cmna lunampc ila akondcmyam aiya:la gvkangku; kapila:nc sc:kobvi avyc bottapc lubonsuycnc bvm adji:moyc, cmpige:la sc:kobvi adji:ycnc bvm bottcmoyc.”

¹⁵Cdcmpidodo bulu kowaw kvdv:dcmsinci Bvkkolo:pc gvangamboto Bv:jen bulum ri:yidbiycpc cmna; cmpige:la cdvlo agom tadjvgla gvmvnnc tani:kvdv:dc cdcm ka:toji, bulum bulu ge:rvdto.

¹⁶Cmpige:la Jisubv bulum Bvkkolo:pc, scmpc lula goga:to, “Kowawkvdv:dcm ngokkolo:pc gva:motok, odokkc bulum lutumyok; kapila:nc bulu:kkcmpinc kvdv:dokkcpc Ru:ncpvnckc migom doko mo:pvdc idag.

¹⁷Aropakpc, ngo nolum lubidung, sc:kobvi Ru:ncpvnckc migom doko mo:pvdcm kowawkoncmpc torvgsuma:ycnc odo gva:ma:yc.”

¹⁸Odokkc ya:me:opc migom donckonc Bvm tawuto, “Airu:nc Luyirna, turyarla turnamdcm pa:pc ngo o:ko ipcnammcn?”

¹⁹Odokkc Jisubv bvm luto, “No kapila ngom airu:nc cmna gogdon?

²⁰Sc:kosin Ru:ncpvnckc atcrma:mvlo aincmang. No lujvgluro kvdv:dcmbulum kindag: ‘aminc:ng la:biyoka, tani:ycm mokeyok, dopso:yoka, lume:pc amikc agomcm kcba:lo lukanbiyoka, nok ba:bomna: owycm mcnggclangka.’ ”

²¹Odokkc bv luto “cdc appv:dcm ngo ya:me:dokkcbong lukamdcmpci ila dung.”

²²Odokkc cdvlo Jisubv cdcm tattoji, Bv bvm luto, “Ager abangko su:paggom no pv:ramdu:da, nokkc oko okko du:nc appv:dcm kopaktok odokkc opankvdv:dcm ortok, odokkc taycng amo:to nokkc murkongc du:yc; odokkc gvtok, ngok lcdu lcdulo.”

²³Cmpige:la cdvlo bv cdcm tattoji bv mc:dvrrobbomkang, kapila:nc bv airu:pc mircmdagai.

²⁴Jisubv bvm kangge:la luto, “Cddvkojc tordagnc sc:kobulu:kkc mitcmircmc du:ji Ru:ncpvnckc migom dokodo gva:pc!

²⁵Kapila:nc mircmnc tani:akonc Ru:ncpvnckc migom doko do gvangkunam dcmyam u:tgure: adorkonc pcsiarungkolo gvkurnam dci gvkur poya:ycpc.”

²⁶Cdcm sc:kobulu tattoji luto, “cmpcmvlo sc:ko moturcm pa:la:dan?” Cmpige:la Bv luto,

²⁷“Okodc tani:kcpc ila:ma:nampc idagnc Ru:ncpvnckcpc ila:nampc idag.”

²⁸Odokkc Pitorbv luto, “Ka:toka, ngoluk okumcm ngolu mcngapge:la nok lcdu lcdulo gvmvndu:bong.”

²⁹Odo Bv bulum lubito, “Aropakpc, ngo nolum ludung, oko tani:ycsin kamang sc:ko okumcm, cdcmanggom ancabbom cdcmanggom ommangcm mcge:la, Ru:ncpvnckc migom doko mo:pvdok lcgangc,

³⁰aipc bojcrungko su:pakkc ayirso, odokkc angkupcnc du:yarnc ayirdo sc:kobv turyarla turnamdcm pangkuma:ycji.”

³¹Odokkc vyvngkolang anyi agom tadjvgla gvmvnnc tani:kvdv:dcm gvbola, Bv bulum luto, “Ka:tok, ngolu Jerusalempc gvdag, odokkc Tani:kc awodok agomcm lukam appv:dcmpc lungor lunckvdv:dok lunamkvdv:dc aroamyc.

³²Kapila:nc Bvm Ru:ncmc kinma:nc opvnkvdv:do togc:lvgyc, odokkc takircm sugrumyc;

³³bulu Bvm sabukkokki dcmyc; odokkc Bvm mokeyc, odokkc lowum longcdo darobycku.”

³⁴Cmpige:la bulu odok apirkosin tadkintomang; cdc agomdcm bulukkolokkcm lc:sula lc:tagai, odokkc okkom lutoji bulu tadgabla:tomang.

³⁵Bv Jeriko aninpc pvnga:nammc, miglunc tani:konc ali: lambc ru:yi kolo tedge:la kogo:la dungai;

³⁶odokkc odok yadkumsunc tani: kcrcngkonc gvpatdopc tadla, kapila gvdagji cmna bv tadto.

³⁷Bulu bvm lubito, “Najaretolok Jisubv gvpatdag,”

³⁸Odo bv jc:sangkang, “Jisua, Dawidkc Aowa, ngom ayaitei!”

³⁹Odokkc buluk kcra:pc cdc dagnckvdv:dc bvm ge:rvdto, aso:pc du:toka cmna lula; cmpige:la bv jc:barra gvkang, “Dawidkc Aowa, ngom aya:tei!”

⁴⁰Odo Jisubv du:tedto, odokkc Bvkkolo:pc bvm goga:dopc lulvgto; odokkc bvm cdvlo aninpc gva:toji, Bv bvm tawuto,

⁴¹“Ngo nom okkom ibiteika cmna mc:dang?” Bv luto, “Ru:tuma, ngok ka:begma:namcm ngom ka:begmoteikuk.”

⁴²Odo Jisubv bvm luto, “No ka:pangkangkulangka; nok mc:jvgnamdc nom aimotoku.”

⁴³Odokkc vgcmpc bv ka:begkangku odokkc Bvk lcdu lcdulo gvmvnkang, Ru:ncpvncmc ainc cmnang cmna; odokkc tani:appv:dc cdcm kangge:la, Ru:ncpvncmc aipai cmto.