Read Mising LU:KKC 19 Bible Online

LU:KKC 19 - Mising bible

LU:KKC 19

¹Bv Jeriko:pc gva:to odokkc gvbadla gvdungai.

²Odo Jakkaeu cmnam tani: ako dungai; bv migom murkong urkumsunc kvdv:dok bottarya:nai, odokkc mircmdagai.

³Odokkc Jisubv sc:koji bv ka:pc cmna mato, cmpige:la ka:la:tomang, yadkumsunc tani:kvdv:dokki, kapila:nc bv etedu:dagai.

⁴Cdcmpila bv kcra:pc dugpongka odokkc tajvg vsvngkolo Bvm ka:pc cmna barsangkang, kapila:nc Bv odo lambcdok gvbatla gvpcnammai.

⁵Odokkc cdvlo Jisubv odo dungkodo:pc pv:toji, Bv nge:sa:la ka:to odokkc bvm luto, “Jakkaeua, mcna:pc gvitok odokkc; kapila:nc silo ngo nok okumolo du:ycrung.”

⁶Cdcmpila bv lomdanna gvitoku odokkc, odo Bvm mc:po:pc torvgsuto.

⁷Odokkc bulu cdcm kangge:la bvnbvnaitakkang, “Bv pa:p kanc tani:kolokki mibopc ikapc gvkang” cmna.

⁸Odokkc Jakkaeu:bv dagrobge:la Ru:tummc luto, “ka:tok, Ru:tuma, ngok attarkvdv:dok orpongko opankvdv:dcm biyc; odokkc sc:kaiycm yadgo-mogo:la atvko langkamvlo, ngo odokyam lcppi:ko bojcya:pc bilatycku.”

⁹Odokkc Jisubv bvm luto, “Silo turnamc sc okumso:pc pvnga:dung, bv:sin Abrahamkc awopc ila:yam.

¹⁰Kapila:nc Tani:kc Awodc yogncdcm makakupc odokkc moturkakupc gvdung.”

¹¹Bulu cdc agomkvdv:dcm tadla du:dodcm, Bv kvkanbila kvnam do:yngko kvbipc kvrobbomkang, kapila:nc Bv Jerusalem aninpc dungai, odokkc lcga:dc bulu mc:dungai Ru:ncpvnckc migom donam mo:pvdc oddung lendungaboi.

¹²Bv cdcmpila luto, “Bottcnc tani: akonc migom doko mo:pvko torvgsukapc mo:tcpc gvge:la gvlattoku.

¹³Bvk ager gerya:nc tani: vyvngdcm gogangge:la, bv bulum vyvngkolang pi:nyiko anvr murkongcm bito, odokkc bulum luto, ‘Sokki rcnam-konamko ilang ngo gvlatkuma:sisscm.’

¹⁴Cmpige:la Bvk avkc mo:di: tani:kvdv:dc bvm tayumto odokkc bvk lcdudo lutad luncko scmpc lula mclvgto, ‘Ngolu sc tani:scm ngoluk migompc idopc imolv:mang.’

¹⁵“Cdvlo bv gvlattokuji, migom dokodcm torvgsuge:la, bv cdc ager gerya:nc kvdv:dcm lulvgto, sc:kobulum bv murkongcm bikaji, bulu cddvkopc rcnam konamdokki pa:toji kinna:dopc, bvkkolo:pc goga:moto.

¹⁶Gogpongarnamdc bvk kera:do:pc, scmpc lula gva:to, ‘Ru:tuma, nok vyvngkolang kvnvd anvr murko:dc vyvngkopcda bojcyangkopc murkongcm imoto.’

¹⁷Odo bv bvm luto, ‘Aincko ito, ainc ager gerya:nc! Kapila:nc no aipc adjioloksin mc:dap-darapncko, no nogor vyvngkolok migom doncpc iycpc.’

¹⁸Odokkc akondc gva:la, scmpc luto, ‘Ru:tuma, nok vyvngkolang kvnvd amcrdcm anggokoda bojcya:moto.’

¹⁹Odo bv bvm luto, ‘Odokkc no nogor anggolok migom doncpc iycpc.’

²⁰“Odokkc akonkoda, scmpc lula gva:to, ‘Ru:tuma, sc nok anvr murko:dc, okodcm ngo dumcrkolo ycngnula lc:tungaji;

²¹kapila:nc ngo nom pcsodungai, kapila:nc no aipakpc sangitnc amiko; no okodcm lc:mangaji no cdcm la:sa:dag, odokkc okodcm pidmangaji cdcm gaddag.’

²²Bv bvm luto, ‘Ngo nok nappa:dok agomdokkiyci nom aimang cmna kcbangcm ba:yc, ci aima:nc ager gerya:na! Ngo tornc tani:yc cmna kindagnci, ngo okodcm lc:yi:mangaji cdcm la:sa:mvlo odokkc okkom pidmangaji cdcm gaddagku cmna?

²³Kapila:nc cmpcmvlo no ngok anvr amcrdcm be:ngkolo lc:toma:n odokkc ngok gvlatdokudo odok lc:rcdcmsin la:tc:la langkupai?’

²⁴“Odokkc bv kcra:dok du:nckvdv:dcm luto, ‘Bvkkolokkcm anvr murko:dcm la:tokuk, odokkc sckkc vyvngkolang kvnvt anvr murkong pirnyiko du:nc bvm cdcm bitok.’

²⁵Odokkc bulu bvm luto, ‘Ru:tuma, bvkkc vyvngkolang kvnvd anvr murkong pirnyiko dung!’

²⁶‘Ngo nom lubidung, jc sckkc sckkci du:nc bulumci biyc; cmpige:la sckkc kama:nc, okodc du:nc cdcmsinci la:pakycku.

²⁷Cmpige:la sc ngok mirukvdv:dok lcga:pc, sc:kobulu buluk migompc ngom itoka cmna mc:ma:ycji, bulum so:pc gva:boge:la ngok ka:de:pc papagamtoka.’ ”

²⁸Odokkc cdvlo Bv cdcm lutoji, bv gvgcla, Jerusalempc gvka:la gvbomkang.

²⁹Betpagi:yclang Betani: aninpc pvnga:nammc, Olib cmnam adi:do, Bvk agom tadjvgla gvmvnnc tani: anyiko Bv mclvgto, scmpc lula,

³⁰“Clc kcrangkc do:lungolo:pc gvkang, nolu gva:dodcm gado: gure:ko rvnna lc:namko pa:ycpc, okolo sc:kosin sangkvma:daji; cdcm sarge:la so:pc sobomlangkuk.

³¹Sc:kaiyc nolum, kapila cdcm rvnnamdcm sardu:n cmna tawuycmvlo nolu scmpc lulang, ‘Ru:tumbv cdcm madag.’ ”

³²Cdcmpc sc:kobulum mclvgtagaji gvla cdcm pa:to Bvk lulvgkamdcmv:pc.

³³Bulu gadong gure:dcm sardodcm, odok ru:tumdc bulum tawuto, “Kapila gadong gure:dcm sardu:n?”

³⁴“Odo bulu lubito, Ru:tumbv scm madag.”

³⁵Odokkc bulum cdcm Jisukolo:pc sobomtoku, odokkc buluk gasorkvdv:dcm gadong gure:tayc:do pulvgamge:la bulu Jisumc odok tayc:do sa:moto.

³⁶Odokkc Bv sa:la gvdodcm, bulu buluk gasorkvdv:dcm ali:lambcdo pulvgamto.

³⁷Bv cdcmpc idodcm aninpc pvnga:nammc, Olib Adi: re:yiko mo:di:dok ru:yido, yadkumsunc tani: appv:dc Ru:ncpvncmc rc:batlvgla jc:la aipai birobbomkang bottcnc ager gernam appv:dcm bulu kangge:la, scmpc lula, “Ru:tumkc aminno gvnc Migomdc gernc-pu:nc!

³⁸Taycng amo:to mc:pomcnganc odokkc taycngaryangkoto aipc aipaiyc ika:langka!”

³⁹Odokkc yadkumsunc tani: kcrcdok Parisi:ckkc Bvm luto, “Luyirna, nok agom tadjvgla gvmvnc tani:kvdv:dcm ge:rvdtokai.”

⁴⁰Bv bulum lubito, “Ngo nolum lubidung, sc:bulu aso:pc dungapmvlo, vlvngkvdv:ru:dci jc:ya:pc.”

⁴¹Odokkc Bv cdvlo aninpc pvnga:la nogordcm ka:begtoji nogordok lcganc Bv scmpc lula kapkang,

⁴²“Silokc longcso no mc:pomcnganc okkonc cdcm kinya:mvlo! Cmpige:la nok kangkolokkcm su:pak cdcm lc:sutag.

⁴³Kapila:nc longckvdv:dc nokkolo pvnga:yc cdvlo oko mirukvdv:dc nok dunggo:ycgo: appv:lok yellubla amongcm gcyetyc; odokkc appv:lok nom yadribomyc,

⁴⁴odokkc nom amo:lo gctabyc, nomna: nok ommangkvdv:dcm, odokkc bulu vlvngcm akon tayc:do akoncm lc:ma:yc; kapila:nc no palvg lvgnamdok ayirdcm kintomang.”

⁴⁵Odokkc kumko okum ara:do gvangge:la sc:kobulu attar kola dunggaji, scmpc lula mcnnenam bomkang,

⁴⁶“Scmpc attak, ‘Ngok okumdcm kumko okumpc iyc;’ cmpige:la nolu cdcm rotkudnc kvdv:dok dungko koru:pc ito.”

⁴⁷Odokkc Bv lo:dvscm kumko okumdo luyirra dungai. Dormo ager gernclok bottarya:nc kvdv:dc odokkc tani: kvdv:dok ru:tum tani: kvdv:dc Bvm mokepc cmna mago:to;

⁴⁸cmpige:la bulu atvkosin ila:tomang buluk ilv:namdcm ipc, kapila:nc tani:appv:dc Bvk agomkvdv:dcm airu:pc mcnga:namkokki.