Read Mising LU:KKC 2 Bible Online

LU:KKC 2 - Mising bible

LU:KKC 2

¹Odo ayirdo Kaesar Augustus kolokkc migom lulvgko lulennvgto jc mo:pvso appvngc amincm adgabampcnamc.

²Kuiriniusbv Siriangolo amo:ru:tumpc idodcm cdc amin adgabarpo:namai.

³Odokkc appvngc av avkc nogorpc amin adgabkapc gvngapkang.

⁴Odokkc Josepbv:sin Dawidkc nogor, Judia:dok, Betelehem cmnamdo:pc, Galildok Najaret nogordokkc gvkang, kapila:nc bv Dawidkc opvnclang ope:lokkai.

⁵Meri:mc aminadgabbosupc cmna, bvk tadpvrnamdcm, sckkc amvrro ko:ko dungaji.

⁶Odokkc bulu olo du:dodcm, bvkkc ko:dcm pa:nanc ayirc pvngangkang.

⁷Odokkc bvk pa:pongarnam awodcm oto odokkc kowao bonanc nvscgkokki bvm yetto, odokkc bvm so:bo ncsin kungkangkolo boyubto, Kapila:nc mibo dungko okumdo bulu:kkc dungko katomang.

⁸Odokkc odo mo:takdo arvglo me:r soben ka:sv:nckkc dungai, yumcdo buluk me:r sobenkvd:dcm du:yubsubomla.

⁹Odokkc Ru:tumkc taycng lutad luncko bulum lcngkansuto, odokkc Ru:tumkc ruadcm buluk dungong appv:do dorbu:moto, odokkc bulu airu:pc pcsso angkang.

¹⁰Odokkc taycng among lutad luncdc bulum luto, “pcsoyoka; kapila:nc ka:toka ngo nolum tadponc lutadcm airu:pc mc:popcnamcm bombitung okodc appvng tani:lo:pc gvngapycpc;

¹¹Kapila:nc noluk lcga:pc silo Dawidkc nogorolo Moturyangkunc ako oto sc:kobv Ru:tum Jisubv:nc.

¹²Odokkc scmpc noluk lcga:pc kanggodko pa:ycpc: nolu kowao ako ko:bonanc nvscgkokki yedge:la so:bo ncsin kungkangkolo boyubla lc:namcm ka:begycpc.”

¹³Odokkc vgcmpc cdc taycng lutad luncdok lcdulo taycng lutad lunnc yadkumsunc kcrcngkonc lenkang Ru:ncsa:ncmc aipai cmna odokkc scmpc lula: lula:

¹⁴“Appvngcm Oudaryangkoto Ru:ncsa:nckc Aipaiyc, odokkc, tani:amo:so Bvk aipc mc:lvgsunam tani:kvd:dok ara:lo mc:pomcnganc!”

¹⁵Cdc taycng lutad lunckvdv:dc taycngamo:pc gvkunammc, me:r soben ka:svnckvdv:dc akoncm akonc luka:mvnsuto, “Ru:tumbv ngolum okodcm lubitoji kajc ngolu Betelehempc gvla cdcmpc inamkvdv:dcm kangkai.”

¹⁶Odokkc bulu lomlagpisakla gvkang, odokkc Meri:mclang Josepmc mabegto, odokkc so:bo ncsin kungka:do ko:ako boyubla lc:namdcm.

¹⁷Odokkc bulu cdcmbulum kangge:la bulum ko:dok agom lubinamkvdv:dcm lungabbito;

¹⁸odokkc cdcm tadnc appv:dc me:r soben ka:svnckvdv:dok lunamkvdv:dcm tadla tadngaksukang.

¹⁹Cmpige:la Meri:bv cdc agom appv:dcm bvk asinbo mcnggabla lc:to.

²⁰Odokkc cdc me:rsoben ka:sv:nckvdv:dc, bulum lukamdcmpc, bulu tadbegla odokkc ka:begla Ru:ncpvncmc aipai cmna odokkc luyidcm lula: lula, gvladamkangku.

²¹Odokkc pi:nyi longc gvngapdodo, Bvm gadpukdodcm, Bvm Jisu cmna amincm minnvgto, Bvm aki:bo du:ma:dapcbong taycng among lutad luncdc minnam amindcm.

²²Odokkc Mose:kc lujvg-luro lukamdcmpc cdvlo angumonam ayirdc pvngangka:ji, bulu Bvm Jerusalempc Ru:tumkc kcra:do bikapc gvboto,

²³(cdcm Ru:tumkc lujvg-lurodo lunamdcmpc, “milbong opo:nam appv:dcm Ru:tumkc angunnc cmna luyc.”)

²⁴Odokkc Ru:tumkc lujvg-lurodo okkomna lutagji cdcmpc palvgnamko bipc cmna, “Pckv pirnyikomanggom, pirme:nc parong pirnyiko.”

²⁵Odo Jerusalemdo tani:ako dungai, Simion cmnamko, odokkc cdc tani:dc dormokanckai odokkc Ru:ncpvncmc kumnckai, Israeldcm mc:pomonamdcm ka:lv:la dungai, odokkc Angunnc Yalodc bvkkolo dungai.

²⁶Odokkc Angunnc Yalodokki bvm lcngkantungai jc Ru:tumkc Kristomc ka:ma:sisscm bv sinamcm sima:yc.

²⁷Odokkc Yalodc gvla:mola bvm kumko okumdo:pc gva:to; odokkc anc abudcm kowao Jisumc boa:bomnamc, lujvvg-lurodok adkamdcmpc bvm ikapc,

²⁸bvm alagso:nyidokki bosa:to odokkc Ru:ncpvncmc kumge:la luto:

²⁹“Ru:tuma, su:pak nok ager gerya:ncdcm no mc:po:pc mclvgtungkubong, nok agom lukamdcmpc;

³⁰Kapila:nc ngok avkc amiksc nok moturcm ka:begto

³¹Okodcm no appvng tani:kangkolo mosv:tonc,

³²Amiope:kvdv:dcm pvangcm odokkc nok tani: Israelkvdv:do amin gvdopc.”

³³Odokkc Bvk abudc:la Bvk ancdc Bvk agomcm okkomna lutoji tadla tadngaksukang;

³⁴Odokkc Simionbv bulum gerka:-pungka:lang cmto odokkc bvk anc Meri:mc luto, “Ka:toka, sc kowaoscm Israel ope:dok bojcru:lokkc aima:pc inamclang ainam lcgangc mclvtung, odokkc lugc-gcnamlok kanggotpc idopc

³⁵(odokkc matsvg asongkonc nok avkc yalodcmsin nvgkeycpc,) cdc bojcrung tani:lok mc:namkvdv:ngc lenycpc cmna.”

³⁶Odokkc agom lungornc nc:ng akonc dungai, Anna:bv, Panuelkc omcdc, Asherkc ope:lokkc; bv airu:pc mincdagabong, bvk mvmbvrdokkc dv:tak kvnvdko bvk milbo:dok lcdulo du:mvnna dungai,

³⁷odokkc tumbopc du:la bv dv:tak nyiyingkolang appikopc idagaboi. Bv kumko okumdokkc gvkumangai, menna dungge:la longgcmna: yummcm kumna.

³⁸Odokkc odo ayirardo bv Ru:ncpvncmc aipai bito, odokkc Bvk agomcm lungapbito sc:kobulu Jerusalemdok mopvtkunamcm toka:la dungaji.

³⁹Odokkc bulu Ru:tumkc lujvg-lurodcmpc ipcnam appv:dcm ingapnammc, bulu Galilpc gvlatkangku, buluk avkc nogor Najaretpc.

⁴⁰Odokkc ko:dc bottcla gvla kvnggv:sangkang, kinnc pa:ncpc ila; odokkc Ru:ncpvnckc ayang abbo Bvkkolo dungai.

⁴¹Cdcmpc inamc Bvk ancabudc dv:tak takkvscm Gvbo:la gvnamdok donamdcm dokapc Jerusalempc gvdo.

⁴²Odokkc Bv sv:la dv:tak tagyingkolang tagnyiko idodcm, bulu gvtcngitc:dcmpc gvkang;

⁴³odokkc donam tv:namdcm dongapdodcm, bulu gvlatdokudcm, ko: Jisubv Jerusalemdo du:tedkang. Bvk anc abudc cdcm kintomang,

⁴⁴Cmpige:la Bvk ajonkvdv:dok lcdulo gvmvndungkupc cmna mc:la bulu longc lo:bungko gvnamko gvtoku, odokkc bulu bvm buluk ope:ncgvngkvdv:dok odokkc kangkin tani:kvdv:dok mago:to;

⁴⁵odokkc bulu Bvm mala pangkuma:namc, bulu Jerusalempc gvlattoku, Bvm malangkula.

⁴⁶Longc lowum lcdulo bulu Bvm kumko okumdo pa:toku, lujvgluro poyirnc kvdv:dok lcdulo tedmvnna du:dopc, buluk agom kvdv:dcm tadla odokkc tawunam agomcm tadla: tadla;

⁴⁷odokkc sc:kobulu Bvk agomcm tadbegtoji tadngaksukang Bvk mcngkinna agom lulatsukunamdcm tadla.

⁴⁸Odokkc Bvm bulu ka:la mcngapla:tomang; odokkc Bvk ancdc Bvm luto, “Aowa, kapila no ngolum scmpc iton? Ka:toka, nok ba:bolang ngo nom dungu:-dunga:ma:pc mago:la du:nc.”

⁴⁹Odokkc Bv bulum luto, “Kapc cdcmpc nolu ngom maka:ncm? Nolu kinmanganci ngok Ba:bukc okumdo ngo du:pcnammc cmnamdcm?”

⁵⁰Cmpige:la bulu Bvk lunam agomkvdv:dcm tadkintomang.

⁵¹Odokkc Bv buluk lcdulo gvmvnkangku odokkc Najaretpc gvkangku, odokkc buluk agom lukamdcmpci tattoku; odokkc Bvk ancdc cdc appvng agomdcm bvk asinbo mcnggapla lc:to.

⁵²Odokkc Jisubv kinna:pa:la, sv:sa:bomna gvkang, odokkc Ru:ncpvnckclang tani: ka:pcsin ayang abbomsin pa:bomkang.