Read Mising LU:KKC 23 Bible Online

LU:KKC 23 - Mising bible

LU:KKC 23

¹Odo ajon appv:dc dagrobamkang, odokkc Bvm Pilatkc kcra:do:pc gva:boto.

²Odokkc Bvm bulu imur murncko cmna lurrobbomkang, scmpc lula: lula, “Ngolu sc tani:scm ngoluk amongkc ope:scm aima:pc ibodopc pa:to, odokkc Kaesarmc murkong bima:dopc lulvgdag ngolum, odokkc ludag Bv avdci Kristo migombv.”

³Odo Pilatbv Bvm tawuto, “Nowvi Jiwukvdv:dok migomdc?” Odo Bv bvm lubito, “Nowcina cdcmpc ludagnc.”

⁴Odokkc Pilatbv dormo ager gernckvdv:dok bottarya:nc kvdv:dcm luto, “Ngo sc tani:scm oko imurkosin idopc pa:mang.”

⁵Cmpige:la bulu airu:pc scmpc lula lomkang, “Bv tani:kvdv:dcm luwurlvgdag, Judiang appv:do luyirgo:la, Galildokkc so amo:so:pci.”

⁶Pilatbv cdvlo cdcm tattoji, bv tani:dc Galildokkcnci olokkcma:yc tawuto.

⁷Odokkc Bv Herodkc amo:du:tc:dokkc cmna bv kinna:yam, bv Bvm Herodkolo:pc mclvgto, odo ayirdo avdci Jerusalemdo dungai.

⁸Cdvlo Herodbv Jisumc ka:begtoji, bv airu:pc mc:pokang, kapila:nc bv cdvlailokkcbong Bvm ka:lv:la dungai, kapila:nc Bvk agomcm bv tadla dungai, odokkc bv Bvk gernam kanggodko ka:pc cmna mc:la dungai.

⁹Cdcmpila bv Bvm tawunam agomko asudkopc tawuto; ckvdaggom Bv okkomsin lulatsutomang.

¹⁰Dormo ager gernckvdv:dok bottarya:nc kvdv:dc odokkc agom adgabnc kvdv:dc kcra:do dagla dungai, Bvm kvnggv:pc aimang cmna lubila.

¹¹Odokkc Herodbv bvk mimag monc kvdv:dokki Bvm aima:n cmna luto odokkc ipusire:la ito; odokkc Bvm kvnggv:pc kangkanpc gcnam bomnamcm moru:-moba:lvgdopc lulvgge:la, Pilatkolo:pc mclatlvgtoku.

¹²Odokkc, Herodbv:la Pilatbv anyidc ajonkumsupc odo longcpakdokkc ikang, kapila:nc odo longcdok po:pcdo buluk akondc akondokki mirupc imvnsula dungai.

¹³Pilatbv odo dormo ager gernckvdv:dok bottarya:nc kvdv:dcm lckopc gokkumsuto odokkc tani: kvdv:dok migom donckvdv:dcm,

¹⁴odokkc bulum lubito, “Nolu sc tani:scm ngokkolo:pc sc:ko tani:kvdv:dcm aima:pc imurko ila gvbonckoncmpc gva:botak; odokkc noluk kangkolo luka:la kangge:la, ka:tok noluk lugc:lvgnam atv imurkosin Bvkkolo pa:tomang;

¹⁵Herodbv:sinci pa:tomang; kapila:nc bv ngolukkolo:pc Bvm mclatlvgtakku ka:toka, Bv sipcnam lcgangc oko imurkosin imang;

¹⁶Ngo cdcmpila Bvm dcmge:la mclennvgycku.”

¹⁷Cdcmpidodcm porobdo bv buluk lcga:pc tani:ako mclennvgbikupcnammai.

¹⁸Cmpige:la bulu appv:dc lckko:pc jc:sangkang, “Sc tani: scm la:paktok, odokkc ngolum Barabba:mc” mclennvgteikuka

¹⁹tani: ako sc:ko nogordok migom agom tadma:pc imur inam lcgangc, odokkc tani:ko mokega:lok makana:lo tumtungaji.

²⁰Pilatbv lckoda bulum luto, Jisumc mclennvgkupc cmna;

²¹Cmpige:la bulu jc:robbomkang, “Kuruslo moketok, kuruslo Bvm moketok!”

²²Lcwumkoda bv bulum luto, “Kapila, oko imurcm Bv iton? Ngo Bvm sipcnam oko imurcmsin Bvkkolo pa:tomang; ngo Bvm cmpidag dcmge:la mclennvgycku.”

²³Cmpige:la bulu kvnggv:pc lomkangai, bottapc jc:batla Bvm Kuruslo moketoka cmna lula jcngkang. Odokkc buluk jc:namkvdv:dc jcnggumbomkang.

²⁴Cmpige:la Pilatbv lunamko luto jc buluk manamdcm bipcnammcbong.

²⁵Bv migom ager imurge:la:la tani: mokela:yam makana:lo lvgnam tani:dcm mclennvgtoku odokkc, sc:komc bulu makaji; cmpige:la Jisumc buluk makamdcmpc bulukkolo tolvgto.

²⁶Odokkc bulu Bvm gvcrbomna gvnamc, bulu Sireneolok Simom cmnamko sogabto, sc:kobv do:lu:dokkc gvdungaji, odokkc bvk tayc:do kurusdcm jonggc:lvgto, Jisukc lcdulo cdcm jo:bomna gvdopc.

²⁷Odokkc odopc bottcru:nc tani:kcrcngko Bvk lcdulo yadmvnna gvkang, odokkc nc:ng tani:kvdv:dc sc:kobulu kaban banna Bvk lcgangc v:tombangki:la kabka:ji.

²⁸Cmpige:la Jisubv bulum nge:latsuge:la luto, “Jerusalemdok omckvdvnga, ngok lcgangc kabyoka, cmpige:la noluk avkc lcgangc odokkc noluk ommang kvdv:dok lcgangc kaptoka.

²⁹Kapila:nc ka:toka, longckvdv:dc pvnga:yc cdvlo bulu luycji, ‘Ommangcm oma:nc kvdv:dc gernc-pu:nc, odokkc cdc cdvlosin ommang oma:nc kvdv:dc, odokkc cdc cdvlosin anyuk sunma:nc kvdv:dc!’

³⁰Odo bulu adi:kvdv:dcm lurobbomyc, ‘Ngoluk tayc:lo orumbomteika;’ odokkc adji:nc adi:kvdv:dcm luyc, ‘Ngolum pukombomtei.’

³¹Kapila:nc cdvlo vsvngkvdv:dc le:ycnc bulu cdcm imvlo, cdc sandodcm bulu okkom iycn?”

³²Anyikoda, migom ager sc:kobulu imur inna:ji, Bvk lcdulo mokekapc gvboto.

³³Odokkc Mittuk Tublong cmko mo:di:do:pc cdvlo bulu gvpv:toji, odo bulu Bvm Kuruslo pvtketo, odokkc imur inckvdv:dcm, ako lagbvgpc odokkc ako lakkepc.

³⁴Odo Jisubv luto, “Abba, bulum mc:yinsutoka; kapila:nc okkom idu:song bulu kinmang.” Odokkc bulu Bvk gcnam attarkvdv:dcm orpansupc cmna ko:riycm crto.

³⁵Odokkc dagla du:nc tani:kvdv:dc, ka:la dungai. Cmpige:la migom donckvdv:dc Bvm yvrka:la luto, scmpc lula, “Bv ammem moturto; cmpige:la Bvm avycm motursumotok, Bv Ru:ncpvnckc Kristobv:mvlo, Bv balennamdc:mvlo!”

³⁶Mimagmonc kvdv:dc:gom Bvm luyoluka:to, gvangge:la Bvm siroka:ngcm bige:la, odokkc scmpc lula,

³⁷“No Jiwudi:kvdv:dok Migomcmvlo, no avyc motursukvtoka!”

³⁸Bvk tayc:to abvgkosin pvdlvgtungai, “sc:na Jiwudi:kvdv:dok Migomdc.”

³⁹Imur incdok akonc sc:kom ragjonna lc:tungaji Bvm tawuto, “Novng Kristobv:ma:lang? No avyc motursutoka odokkc ngolumsin!”

⁴⁰Cmpige:la akondc bvm morvdla scmpc lula luto, “Ru:ncpvncmc no pcsoma:nci, nom lckko:pc mokemotu:la?

⁴¹Odokkc ngolum aropakpci mokeru:pcnampc kcba: banggapto; kapila:nc ngoluk inam lcgangc ngolu pa:pcnamdcm pa:dung; cmpige:la sc tani:sc okkomsin imurmang.”

⁴²Odokkc bv luto, “Jisua, ngom no cdvlo migom dokodo gva:yckuji mc:pa:langka.”

⁴³Odokkc Bv bvm luto, “Aroru:pc, ngo nom lubidung, sillung no ngok lcdulo taycng amo:to du:mvnyckupc.”

⁴⁴Odo ayir akkcng dagabong, odokkc mo:pv among appv:dc konang ayirdo:pc, do:nyc ka:lenma:la;

⁴⁵odokkc kumko okumdok sorkomnam gasordc tagnyikopc bedkekang.

⁴⁶Odo Jisubv, bottcru:pc jc:la kabla luto, “Ba:bow nok alaglo ngok yallom tolvgdung!” Odokkc Bv cdcm luge:la Bv ngatcrsuto.

⁴⁷Cdcmpidodcm mimag monc lvngkolok gvgurboncdc kapc ika:ji cdcm kangge:la, bv Ru:ncpvncmc aipai bito, odokkc luto, “Aropakpc sc tani:sc imurkama:nckkai!”

⁴⁸Odokkc cdcm ka:nc yadkumsunc tani: appv:dc, kapc ika:ji bulu kangge:la, okumpc buluk angkcngkvdv:dcm kvgsukvgsula gvpakkangku.

⁴⁹Odokkc bvk kangkin-tadyin appv:dc odokkc Galildokkc Bvk lcdulo gvmvnnc nc:ngkvdv:dc mo:tcngo:pc dagla du:to odokkc appv:dcm ka:to.

⁵⁰Cdcmpidodcm Josep cmnam tani:ko Jiwudi:kvdv:dok nogor Arimotia:dokkc dunggai. Bv kcba:lok tani:kai, odokkc ainc dormokanc tani:kai,

⁵¹sc:kobv buluk mc:namclang agerkvdv:do tolvgmanggai, odokkc bv Ru:ncpvnckc migom doko mo:pvdcm toya:la dungai.

⁵²Cdc tani:dc: Pilatkodo:pc gva:to odokkc Jisukc sima:dcm koto.

⁵³Odokkc bv cdcm la:yige:la cdcm gasorki yetto, odokkc Bvm vlvngcm pvtkora:nam agokolo lc:to, okolo sc:kosin cdvlosin lcngkvmangai.

⁵⁴Cdc Mosvsunanc longgai, odokkc yodla ager germa:pc du:nanc longcdc a:dungaboi.

⁵⁵Bvk lcdudo Galildokkc gvmvnnc nc:ngkvdv:dc gvmvnto, odokkc agodcm ka:to, odokkc kapc Bvk sima:dcm lc:toji,

⁵⁶Odokkc bulu gvlattoku, odokkc yonnam tulangcm mosv:to. Lulvg lukamdcmpc bulu yodla ager germa:pc du:do longcdo du:tedla du:to.