Read Mising LU:KKC 24 Bible Online

LU:KKC 24 - Mising bible

LU:KKC 24

¹Cmpige:la opta:dok dunga:po:do longcdo, rokom-ta:sukpc, bulu agodo:pc gvkang, buluk mosolang mosv:la lc:namdcm bomna.

²Odo bulu vlv:dcm agodokkc kurge:la lc:dopc ka:to,

³Ckvdaggom cdvlo bulu gva:toji bulu sima:dcm pa:tomang.

⁴Bulu cdcm mcngapla:ma:pc ila du:dodcm, ka:toka, tani: anyikonc buluk kcra:do dagangkang unjvg ungvgnc attar gcge:la;

⁵odokkc bulu pcsola amo:bo pogbumamkang, tani:dc bulum luto, “Nolu kapila turnc tani:dcm sinc tani: ara:do mago:du:n?

⁶Kapc Bv nolum lutungaji mc:pa:lang, Galilolo Bv du:dodcmci,

⁷Tani:kc Awodc:jc pa:p kanc tani:kvdv:dok alaglo tolvgru:yc, odokkc kuruslo pvtkeyc, odokkc lowum longcdo turycku.”

⁸Odo bulu Bvk agom kvdv:dcm mc:pa:toku,

⁹odokkc agodokkc gvlatge:kula bulu vyvngkolang akodcm odokkc ake appv:dcm bulu lubitoku.

¹⁰Cdcbulu Magdalini Meri:bvai odokkc Joana:bv odokkc Jakobkc anc Meri:bv odokkc ake nc:ngkvdv:dc buluk lcdulo dunggai sc:kobulu ager gerta:ka cmna mclvgnamkvdv:dcm lubikaji.

¹¹Cmpige:la cdc agomkvdv:dcm bulu:kkcpc lume: agomcmpc idagai, odokkc bulu bulum mc:jvgtomang.

¹²Cmpige:la Pitorbv darobge:la agodo:pc dukkang; tungkungge:la ngenga:la kangge:la, bv riaki sumnam gasorong kvdv:dcm ka:begto; odokkc bv okumpc okko kapc ika:ji mcngapla:ma:la gvkangku.

¹³Odo longgardo bulukkolok anyikonc Immau cmnam do:lungkolo:pc gvdungai, Jerusalemdokkc mail kvnvdkopc idagai,

¹⁴odokkc akondcm akondc luka:mvnsula oko okko ika:ji cdc appv:dok agomcm lula gvdungai.

¹⁵Bulu lula: lula: agomdcm lckopc luka:mvnsula gvdodcm, Jisubv avdci kcra:do:pc gva:to odokkc buluk lcdulo gvmvnkang.

¹⁶Cmpige:la buluk amikkvdv:dcm Bvm kangkinma:dopc lc:to.

¹⁷Odokkc Bv bulum luto, “Lambc gvtung gvtu:la okkom nolu luka:mvnsudu:n?” Odo bulu kvg cmna aso:pc, mc:dvrra ka:la dagkang.

¹⁸Odokkc buluk akonc, Klepas cmnamkonc, Bvm lubito, “Jerusalemso:pc kangkapc gva:nc nowwoi silomclo oko okko idu:ji cdcm kinma:ncdc?”

¹⁹Odo bv bulum tawuto, “Okko kapika:n?” Odo Bv bulum luto, “Najaretolok Jisukc agomcmna, sc:kobv Ru:ncpvnckc kangkolo:lang appvng tani: kangkolo agerlo:la agomlok, lungor lunna:ji

²⁰odokkc kapc ngoluk dormo ager gernckvdv:dok bottarya:nc kvdv:dc:lang migom kvdv:dc mokedopc tolvgtoji, odokkc Kuruslo Bvm moketoji.

²¹Cmpige:la ngolu mc:tintagai Bv Israeldcm mopvtpcncdcai. C:, odokkc odo appv:dcmyam, silo cdcmpinamc lowumko ika:bong.

²²Odokkcsin, ngoluk nc:ng ajonckkonc ngolum mc:la mcngapla:ma:pc imoto. Bulu agodo rokompc dungai odokkc Bvk sima:dcm pa:tomang;

²³Odokkc bulu scmpc lula gvlattoku jc bulu taycng among lutad lunckomvnc kangorpc ka:begto, sc:kobv lubitonc jc Bv turra dung.

²⁴Ngoluk akke agodo:pc gvka, odokkc nc:ng tani:kdv:dc lukamdcmpc ka:ot; cmpige:la bulu ka:begtoma.”

²⁵Odo Bv bulum luto, “C:i monba:-ba:nc tani:kvdvnga, lungor lunc appv:dc lunam kvdv:dcm aso-aso:pc mc:jvgnc kvdvnga!

²⁶Kristobv cdc ipusire: kvdv:dcm pa:pcnam mangalang odokkc Bvk ungjvgkolo dungkupcnamai?”

²⁷Odokkc Mose:kolokkclang lungorlunc kvdv:dokkc lurobbomna Bv Ru:nckc agom adgab appv:dcm lukur lule:la lubito Bvk agom lunamdcm.

²⁸Cdcmpila bulu do:lung kcra:do:pc gva:to bulu okolopc gvdungaji. Bv gvbarpc cmna ikangai,

²⁹ckvdaggom bulu Bvm ke:ke:mo:re:pc, scmpc lula gogtumto, “Ngoluk lcdulo du:tobong, kapila:nc su:pak yumc ayirka:bong odokkc longgc gvngapka:bong.” Cdcmpila Bv buluk lcdulo du:mvnkapc gvkang.

³⁰Bv buluk lcdulo tcbuldo du:mvndodcm, Bv pita:dcm la:sa:to odokkc aipai cmto, odokkc cdcm bulum bito.

³¹Odo buluk amik kvdv:dc darabkang odokkc bulu Bvm kangkinto; odokkc Bv buluk kangkodokkc yokkang.

³²Bulu akoncm akonc luka:mvnsuto, “Ali: lambcdo ngolum agom ludodo ngoluk asin ara:bo gua:manggalang Bv ngolum Ru:nckc agom adgabdcm tamge:la pokurpole:la pobidodo?”

³³Odokkc bulu odo ayirv:do darobla Jerusalempc gvlattoku; odokkc bulu vyvngkolang akodcm gvkumsula du:dopc pa:to odokkc buluk lcdulo du:mvnnc kvdv:dc, sc:kobulu ludaganc,

³⁴“Ru:tumbv aroru:pc darobkangku, odokkc Simonmc lcngkansuto!”

³⁵Odo bulu ali:lambcdo kapc ika:ji bulum lubito odokkc pitangcm penpordodcm kapc Bvm kangkintoji bulu lubito.

³⁶Bulu cdcm lula du:dodcm, Jisubv avdc buluk pongkokdo dagkansuto.

³⁷Cmpige:la bulu pcssamna jintakkang, odokkc bulu yaloko ka:begto cmna mc:paklvgto.

³⁸Odokkc bv bulum luto, “Nolu kapila mc:dvrdang, odokkc kapila noluk asinkvdv:dc tawunam agomc lendang?

³⁹Ka:tok ngok alakkvdv:scmna: alckvdv:scm, ngowyvng sidc; ngom gakkvtoka, odokkc ka:tok;

⁴⁰“Kapila:nc yalodokkc adinclang alongc kamang ngokkcm nolu ka:begnamdcmpc.

⁴¹Odokkc ckvdaggom mc:popc mc:jvgtoma:nc, odokkc mcngapla:ma:pc ika:ji, Bv bulum luto, Nolukkc o:kai sc dopcnamko du:nci?”

⁴²Bulu Bvm a:sannam ongo intungko bito,

⁴³odokkc Bv cdcm la:to odokkc buluk kangkolo doto.

⁴⁴Odo Bv bulum luto, “Sc-bulu ngok agomkvdv:dc ngo nolum oko okodcm ludu:ji ngo noluk lcdulo du:mvndodo:bong, jc ngok agomcm Mose:kc lujvg lurodo odokkc lungor lunamkvdv:do odokkc ni:tomkvdv:do adkamdcmpc ingapru:pa:yc.”

⁴⁵Odo Bv Ru:ncpvnckc agom adgabnam kvdv:dcm mcngkindopc buluk asinkvdv:dcm mcngkinmoto,

⁴⁶odokkc bulum luto, “cdcmpila scmpc attak, jc Kristodc ipusire:ycm pa:pa:do odokkc lowum longcdo sikolokkc darobkupcnammc,

⁴⁷odokkc tani: rcngam appv:so pa:plokkcm mc:yinsukunammcm lutadam bipcnammc, Jerusalemdokkc lurobbomna.

⁴⁸Nolu sc appv:sok lukanbiya:nc.

⁴⁹Odokkc ka:toka, ngo ngok Ba:bukc pesula lunamcm nolukkolo tolvgdung; cmpige:la sc nogorso du:tedpo:toka, nolum tayc:tokkc ilang gvla:nanncm moru:lvgma:sisscm.”

⁵⁰Odo Bv bulum mo:tcngkc Betani:pc gvbokang, odokkc Bvk alagcm lagsangge:la Bv bulum aipai bito.

⁵¹Bv bulum aipai bila du:dodcm, Bv bulukkolokkc mcpansuto, odokkc taycngamo:pc gvbokangku.

⁵²Odokkc bulu Jerusalempc airu:pc mc:pola gvlattoku,

⁵³odokkc kumko okumdo lo:dvscm Ru:ncpvnckc aipai pa:la du:tvto.