Read Mising LU:KKC 8 Bible Online

LU:KKC 8 - Mising bible

LU:KKC 8

¹Odok lcdupc Bv nogorkvdv:do:lang do:lung kvdv:do:pc gvkang, luyir luyirgo:la odokkc Ru:nckc Migomdokolok tadponc lutaddcm lugo:bito. Odokkc cdc vyvngkolang anyidc Bvk lcdulo du:mvndungai,

²Odokkc nc:ng ckkcsin sc:kobulum aima:nc uilokkom mcnpagge:la odokkc kinamramlokkcm esa:motungakuji: Meri:bv, Magdalini cmna gognamdc,

³odokkc Joanna:bv, Kuja:kc nc:dc, Herodkc okum ka:sv:mosv:ncdc, odokkc Susanna:bv, odokkc bojcrungkoda akke, sc:kobulu buluk lcgangc buluk attarkokki ila:sa:la bikaji.

⁴Odokkc bottcru:nc tani:kcrcngkonc lckopc gva:tonc odokkc tawon tawonlokkc tani:kvdv:dc Bvkkolo:pc gva:tonc, Bv kvkanna kvbinam do:yvngki kvbito:

⁵“Amni: pidnc tani:konc bvk amni:kvdv:dcm pidkapc gvlenkang; Bv pidbomna gvnamc, akke lambc ru:yido dcyi:kang, odo alckokki sanggcmto, odokkc do:mvrtok pcttangkvdv:dc cdcm pala dopagamto.

⁶Odokkc akedc vlvng tayc:lo dcngangkang; odokkc cdcbulu sangkang, cdcbulu sanpakkang, kapila:nc cdc jumangai.

⁷Odokkc akedc ta:ngalcglo dcngangkang; ta:ngkvdv:dc odokbuluk lcdulo sa:mvnkang odokkc cdcm sa:rumna sangkeyamto.

⁸Odokkc akedc ainc amo:lo dc:yingkang odokkc sangkang, odokkc lvngko anyikopc a:yc engkang.” Bv cdcm luge:la, Bv jc:la luto, “Sckkc tadnanc yerungc du:nc, bvm tadmotoka.”

⁹Odokkc cdvlo Bvk agom tadjvgla gvmvnnc tani:kvdv:dc cdc kvkanbila kvnam doyv:dc okkoji Bvm tawutonc, Bv lubito,

¹⁰“Nolum Ru:ncpvnckc Migom doko mo:pvdok lc:sula lc:nam agomdcm bitu:bong; cmpige:la akelokkcpc cdc bulu kvkanbila kvnam do:yv:lo dung, odomvlo bulu ka:tu:la:sin ka:begma:ycpc, odokkc tattu:la:sin bulu mcngkinsuma:ycpc.

¹¹“Su:pak cdc kvkanbila kvnam do:yv:dc sc:na: amni:dc Ru:ncpvnckc agomdc,

¹²lambc ru:yidok dc:yi:nckvdv:dc cdc sc:kobulu tadtoji; odo aima:nc uidc gva:do odokkc buluk asin kvdv:dokkcm la:pagamdag, bulujen mc:jvgma:la turma:ycpc cmna.

¹³Odokkc vlvngtayc:dok dcnga:nckvdv:dc cdcbulu, cdvlo bulu agomdcm taddagnc, mc:po:pc cdcm torvgsudag; cmpige:la odokbulu:kkc appvrc kamang, asudowwongko bulu mc:jvgdag odokkc ankang kangkvdo ayirro bulu mcpakdag.

¹⁴Odokkc ta:ng alcgolok dcnga:nc kvdv:dc kapc ika:nc, buluk lambclo gvtvla du:la turra du:dosok mitcmircmcm odokkc mc:pomcngancm mcnggo:la mc:motsula du:dag, odokkc buluk a:yckvdv:dc jv:mang.

¹⁵Odokkc ainc amo:do dc:yi:nckvdv:dokkcpc, bulu cdc sc:kobulu, agomdcm taddagnc, cdcmbulum aiyo:pc asinbo mc:jupla lc:dagnc, odokkc mcnggaptvla du:namki a:ycm e:modag.

¹⁶“Sc:kosin saki:ycm runotge:la kurumnanc attarkokki kurumna lc:mang, cdcmanggom cdcm asubkcyvglo lc:mang, cmpige:la cdcm lc:nanc taycngkolo lc:dag, odomvlo cdc gva:nc appv:dc pva:dcm ka:begycpc cmna.

¹⁷“Lcngkampcnam okkomsin lc:sila lc:ma:yc, cdcmanggom oko attarcmsin kinma:pc odokkc pva:pc la:lenammanamc kama:yc.

¹⁸Ansutoka cdcmpila kapc taddoji; kapila:nc sckkc du:nc bvm bojcyangkoda biyc, odokkc sckkc kama:nc, bvkkc okodc dung cmna mc:dagnc cdcmsinci la:pakycku.”

¹⁹Odo Bvk ancdc odokkc Bvk bvrokvdv:dc Bvkkolo:pc gvto, cmpige:la yadkumsunc tani:kvdv:dokki Bvm rvgsula:tomang.

²⁰Odo Bvm lubito, “Nok owyclang bvrokvdv:dc mo:rongclc nom rvgsulv:la dagla dung.”

²¹Ckvdaggom Bv bulum lubito, “Ngok ancdc odokkc ngok bvrrangkvdv:dc cdcbulu sc:kobulu Ru:ncpvnckc agomcm tadge:la lukamdcmpci idagji.”

²²Longckoncm Bv ollung arangkolo Bvk agom tadjvgla gvmvnnc tani:kvdv:dokki lckopc a:to, odokkc Bv bulum luto, “Kajc siycng pa:tang kekonpc kongko:la gvkai.” Cdcmpila ko:robbomkang, odokkc bulu ko:la gvdodcm Bv yummi:la yubkang.

²³Odokkc siycng pa:ta:do bottcnc csarko sarsangkang, odokkc bulu assc kaga:bomla airu:pc pcsopcnampc ikang.

²⁴Odo bulu Bvm gva:la urrobto, scmpc lula, “Ru:tuma, Ru:tuma ngolu singapycbong!” Odokkc Bv darobla csardcmlang lu:nc asidcm morvdto, odo cdcbulu sarngasukang, odokkc aso:pc dungkangku.

²⁵Bv bulum luto, “Noluk mc:jvgkvdv:dc okolon?” Odo bulu pcssamkang, odokkc mc:la mcngapla:ma:pc ikang, akonc akoncm luka:mvnsula, “Sc:kon sc cmpcmvlo, Bv:jc csardcmna: asidcmsin lulvgdagnc, odokkc cdcbulu Bvk lunamdcm taddagnc?”

²⁶Odokkc bulu Gerasene kvdv:dok dungko amo:do:pc gvpv:to, Galildok kangko:pc,

²⁷Odokkc Bv tcmpvdo alcdcm tusa:nammci, nogordok uipa:nam tani:konc Bvm rvgsuto; bojckopc bv attarcm gcma:bommangai, odokkc bv okumno du:mangai cmpige:la ago golungkvdv:do du:dungai.

²⁸Bv Jisumc ka:begdannamci, bv jc:sangkang odokkc Bvk kcra:do kcdangka, odokkc bottapakpc jc:la luto, “No ngokkokki okkom ipcnammc du:n, Jisua, Airu:pc Tayc:tok Ru:ncpvnckc Aowa? Ngo nom kumla ludung, ngom mogvtmomatyoka.”

²⁹Kapila:nc Bv cdc narc:ma:nc yalodcm cdc tani:dokkcm gvlendopc lulvgto. (Kapila:nc bojcrung ayirko cdc bvm motapto; bvm ka:bomsula lcngka, odokkc yogvr ikoli:ki odokkc rvbvkokki yc:la lc:tungai, ckvdaggom bv yc:namkvdv:dcm edsotsuto odokkc uidokki sulli: amo:pc dugdungai.)

³⁰Jisubv odo bvm tawuto, “Nok amincm okko cmtang?” Odo bv lubisuto, “kcrcngko,” kapila:nc bojcrungko uiyc bvkkolo gvangkang.

³¹Odokkc bulu opv:ma:nam aru:bo:pc mcilvgyoka cmna kumna luto.

³²Cdcmpidodcm adi:ru:yido e:g kcrcngko dogo:mola lc:tungai; odokkc bulu odobulu gva:motei cmna Bvm kumna luto. Cdcmpila Bv bulum gvpakmoto.

³³Odo cdc uikvdv:dc cdc tani:dokkc gvlenamkang odokkc e:gkvdv:do gvangamkang, odokkc cdc kcrc:dc siycng pa:ta:dok owudnc ragodo:pc dugamla dugbologamsula singapkang.

³⁴Kanggapya:nc kvdv:dc kapc ika:ji cdcm kangge:la, bulu dukkangku, odokkc cdcm nogordo odokkc do:lu:do lubitoku.

³⁵Odo tani:kvdv:dc okko kapc ika:ji kangkapc gvlenamkang, odokkc bulu Jisukolo:pc gva:to, odokkc oko tani: dokkc ui kvdv:dc gvpagamka:ji Jisukc alc ru:yido tedla du:dopc ka:begto, attarcm aipc gcla:bomla du:dopc; odokkc bulu pcssamkang.

³⁶Odokkc sc:kobulu cdcm ka:toji bulum lubito kapc bvm uiyc pa:tungaji odokkc aimotokuji.

³⁷Odo Gerasenedo dungo:ycgong do:lungkvdv:dok tani:kvdv:dc Bvm bulukkolokkc gvpakkangkuka cmna luto; kapila:nc bulu kvnggv:pc pcssamkang; cmpige:la Bv ollu:do a:toku odokkc gvlattoku.

³⁸Sckkolokkcm uikdv:dcm mcnpakbitonc cdc tani:dc Bvk lcdulo gvmvnpc cmna kumna luto; cmpige:la Bv bvm scmpc lula mclvgtoku,

³⁹“Nok okumpc gvkangkuka, odokkc Ru:ncpvncbv nok lcgangc cddvkojc bottcnc agercm gerbitonc cdcm lubiyamta:kuk.” Odokkc bv gvlangkula, nogor appv:do lutad-go:bila Jisubv bvm cddvkojc bottanc agercm gerbito cmna.

⁴⁰Cdcmpc Jisubv gvlatkunamc, yadkumsunc tani:kvdv:dc Bvm mc:pola torvgsutoku, kapila:nc bulu Bvm toya:la ka:la dungai.

⁴¹Odokkc Jairu cmnam tani:ko odo gva:do, kumko okumlok ka:sv:mosv:nckonc; odokkc Jisukc alcdo tunga:la kumna Bvm bvk okumpc gvtoka cmna gogto,

⁴²Kapila:nc bvkkc omc atcrongkonc, vyvngkolang anyi dv:takkopc ika:bongai, sipc sipc cmna idungai. Bv gvdodcm, tani:kvdv:dc bvm yadlupbomkang.

⁴³Odokkc nc:ng akonc sckkc vyingkolang anyi dv:takkopc i:yc bidla dunganc odokkc sc:kosin ka:pvtlangkumanganc, Bvk lamkudok gva:to,

⁴⁴odokkc Bvk gcnam attardok tu:bvdcm gakkvto; odokkc oddung bvk i:dc bidngasukang.

⁴⁵Odo Jisubv luto, “Sc:kan cdc ngom gakkvncdc?” Cdcm appv:dc lupaksunamc, Pitorbv luto, “Ru:tuma, yadkumsunc tani:kcrc:dc nom appv:lokkc yadlupbomdung odokkc nom nv:rumbomdung!”

⁴⁶Cmpige:la Jisubv luto, “Sc:kaiyc ngom gakkvto; kapila:nc ngo anpa:suto ngokkolokkc tornamc gvlenkang.”

⁴⁷Odokkc cdc nc:dc bv:jc lc:sumang cmna ka:namc, bv jinna gva:to, odokkc Bvk kcra:do owa:la tani:kangko appv:do lutadsuto bv kapila Bvm gakkvkaji, odokkc bv kapc vgcmpc aikangkuji.

⁴⁸Odo Bv bvm luto, “Omma, nok mc:jvgdc nom csa:motoku; mc:po:pc gvkangkuka.”

⁴⁹Bv agom lula du:du:dom, tani: akonc migom doncdok okumdokkc gvla luto, “Nok omcdc sikang; Luyirncdcm gvdvrgvso:moyobong.”

⁵⁰Cmpige:la cdcm tadge:la Bvm Jisubv lubito, “Pcsoma:pcka; mc:jvgtoka, odokkc bv aiyckupc.”

⁵¹Odokkc Bv okumdo:pc gvpv:nammc, Bvk lcdulo sc:komsin gva:mvnmotomang, Pitormclang Jo:nmc odokkc Jakobo:mc gva:moge:la, odokkc ko:nc:dok abudcmlang ancdcm.

⁵²Bvk lcga:pc appv:dc kabla odokkc kaban banna dungai; cmpige:la Bv luto, “kabyok; kapila:nc bv simang cmpige:la yubla dung.”

⁵³Odokkc bulu Bvm yvrka:to, bv sika:ru:bong cmna kinna.

⁵⁴Cmpige:la bvk alagcm sogapage:la Bv scmpc lula gogto, “Ko:ncnga, darobtok.”

⁵⁵Odokkc bvk yalodc a:langkula, bagcmpc darobkang; odokkc Bv bvm atvko dodopc bitoka cmna lulvgto.

⁵⁶Odokkc bvk anc abudc mc:la mcngapla:tomang; cmpige:la Bv okko kapc ika:ji sc:komsin lubiyoka cmna lutumto.