Read Mising LU:KKC 9 Bible Online

LU:KKC 9 - Mising bible

LU:KKC 9

¹Odokkc Bv vyvngkolang anyidcm lckopc gogkumsuto odokkc bulum ilang-gvlangcm odokkc appvng uikvdv:dcm mcnpagla:dopc, kinamkvdv:dcm csangammola:dokupc,

²odokkc Bv bulum Ru:ncpvnckc migom doko mo:pvdok agomcm lugo:bidopc. Odokkc csa:modokupc tornamcm bila mclenamlvgto.

³Odokkc Bv bulum luto, “Noluk lambc gvdodok lcgangc okkomsin bomyoka, oko kvgrasunamcm sogcncmsin, pitangcmba:, murkongcm; odokkc galugcm bornyiko bomyoka.

⁴Odokkc nolu oko okumloi gva:donc, odo du:lang, odokkc gvlangkuka.

⁵Okoloi bulu nolum torvgsuma:ycnc, nolu cdvlo cdc nogordcm mcla gvyckunc noluk alckvdv:dokkcm koiyang kvdv:dcm danpu:sulangka buluk lulatla lukanbinampc.”

⁶Odokkc bulu do:lu do:lungkvdv:dok, tadponc do:yv:dcm lugo:bila gvngapkang odokkc appv:loi kinamcm csa:molangkula.

⁷Cdcmpc idodcm Herod mo:tak appi:lok migom doncbv cdc ager inam appv:dok agomcm tadbegto, odokkc bv mcngkin-sakkintomang, kapila:nc cdcm sc:kai lubito jc Jo:nbv sikolokkc turkangku,

⁸akke luto jc Elija:bv lendungku, odokkc akke luto jc lekekc lungor lunckvdv:dok akonc turdungku.

⁹Herodbv luto, “Jo:nmc ngo mittugcm papvrto; cmpige:la sc: sc:kon ngo scmpc taddu:nc?” Odokkc Bvm ka:pc cmna bv mago:to.

¹⁰Agom taddjvgla gvmvnnc tani:kvdv:dc oko okkom itoji gvlatlangkula Bvm lubitoku. Odokkc Bv bulum angupc gvpakla gvbokang Betsaida cmnam nogorkolo:pc.

¹¹Yadkumsunc tani:kcrc:dc cdcm kinge:la, bulu Bvk lcdulo gvmvnkang; odokkc Bv bulum mc:po:pc torvgsuto odokkc Ru:ncpvnckc migom doko mo:pvdok agomdcm bulum lubito, odokkc sc:kobulum kinam ka:bipcnama:ji csa:motoku.

¹²Cdcmpidodcm longc lo:tu:dagabong; odokkc vyvngkolang anyidc gva:la Bvm luto, “Yadkumsunc tani: kcrc:scm mclvgamtokuk, do:lung pomkon pomkonno dungapdokupc, dungko dakkoko odokkc donamatvko pa:dopc; kapila:nc ngolu sido ronggamnc mo:di:lo dung.”

¹³Cmpige:la Bv bulum luto, “Nolu bulum o:kai donamko bitoka.” Bulu luto, “Ngolu:kkc pitang borngokolang ongo pirnyidokkc kamangngolu gvla sc appvng tani:kvdv:sok lcgangc donamko rcma:mvlo.”

¹⁴Kapila:nc tani:yc odo Lv:ying Anggokvramko dungai. Odokkc Bvk agom mc:jvgla gvmvnnc tani:kvdv:dcm luto, “Bulum lcko lckko:pc du:motoka, yingo yi:ngokvramko re:m akodo.”

¹⁵Odo bulu cdcmv:pc ito, odokkc bulu appv:dcm tedtungammoto.

¹⁶Odokkc pitang borngodcmlang ongo pirnyidcm langge:la Bv taycngamo:pc ka:sa:to, odokkc cdcmbulum aipai bito odokkc cdcmbulum pentungamto, odokkc yadkumsunc tani:kvdv:dcm ordopc agom tadjvgla gvmvnnc tani:kvdv:dcm bito.

¹⁷Odokkc appv:dc dola dotvngamsukang, odokkc gempa pvyvngkolang pvnyiko pentu:penyu:nammcm, dongatkvdv:dcm jo:sa:suto.

¹⁸Longckoncm cdcmpc ika:nc jc Bv atcrc kumna du:dom agom tadjvgla gvmvnnc kvdv:dc Bvk lcdulo du:mvndungai; odokkc Bv bulum tawuto, “Ngo sc:kobv cmna tani:kvdv:dc ludang?”

¹⁹Odo bulu luto, “Jo:n Baptismo bincbv;, odokkc akke ludag, lekekc lungor lunckvdv:dc akonc sikolokkc turdungku.”

²⁰Odo Bv bulum luto, “Cmpige:la nolu sc:kobv cmna ngom mc:dang?” Odo Pitorbv lubito, “Ru:ncpvnckc Kristobv.”

²¹Ckvdaggom Bv cdcm sc:komsin lubiyoka cmna bulum kvnggv:pc lutumko luto, scmpc lula,

²²“Tani:kc awodc bojcrungko ipusire:ycm pa:ycrung, odokkc abv:nc kvdv:dokki aima:nc cmna mcpakkosuyc odokkc dormo ager gernckvdv:dokkc ainc agom luyirnckvdv:dc, odokkc mokekosuyc, odokkc lowum longcdo sikolokkcm turmoycku.”

²³Odokkc Bv appvngcm luto, “tani: akonc ngok lcdulo gvmvnmvlo, bvm avyc avdcm cmmumc cmna lupaksumotok odokkc longgcm longgcm kurusdcm jo:motoka odokkc ngok lcdulo gvmvnmotok.

²⁴Kapila:nc sc:kobvi bvk turnamdcm motursuycnc bv yogmoyc; odokkc sc:kobvi ngok lcga:pc bvk turnamcm yogmoycnc, bv cdcm motursuyc.

²⁵Kapila:nc tani: akolokkcpc oko arrc kadang mo:pvscm bv pangge:la avyc cdcm yogmomvlo cdcmanggom mokesumvlo?

²⁶Kapilanc sc:kobvi ngomna: odokkc ngok agomkvdv:dcm lubisupcnam anyi:ycnc, bvmsin tani:kc Awodc cdvlo Bvk amingvnamki gvyckuji odokkc Abukclang angunnc taycng among agom lutadnc kvdv:dok amin gvnamki gvyckuji anyi:ycku.

²⁷Cmpige:la ngo nolum aroru:pc lubidung, sc akke dagla dung sc:kobulu Ru:ncpvnckc migom doko amo:dcm ka:begma:sisscm sima:yc.”

²⁸Cdcmpc pi:nyi longcdok lcdulo cdcmbulum luge:la Bvk lcdulo Pitormclang Jo:nmc odokkc Jakobmc Bv gvbola adi:pc kumkapc gvkang.

²⁹Odokkc Bv kumna du:namc, Bvk ka:pa:nam dumsimigmodc angukangai, odokkc Bvk gcnam attarkvdv:dc kampotiti:pc unjvgkangai.

³⁰Odokkc ka:toka, tani: anyikonc Bvk lcdulo luposuto, Mose:bv:lang Elisa:bv,

³¹sc:kobulu unjvgla lcngkansutonc odokkc Bvk gvkunamdcm lutonc, okodcm Bv Jerusalemdo ipvtgvpvtycnc.

³²Cdcmpidodo Pitorlang cdc sc:kobulu Bvk lcdulo du:mvnnc kvdv:dc kvnggv:pc yubmi:kangai, odokkc cdvlo bulu kinsutokunc bulu Bvk unjvgdcm odokkc Bvk lcdulo dagmvnnc anyidcm ka:to.

³³Odokkc tani:kvdv:dc Bvkkolokkc gvpansudokudodcm, Pitorbv Jisumc luto, “Ru:tuma, ngolu so du:namsc aidung; kajc po:yub sowumko mopo:lai, nok lcga:pc asongko odokkc Mose:kcpc asongko odokkc asongko Elisa:kcpc” bv okkom ludungaji kinma:ru:pc.

³⁴Bv cdcm lula du:dodcm, mukkang atakko dc:yingkang odokkc bulum yv:titto; odokkc bulu mukkang ara:do a:dodcm pcsokang.

³⁵Odokkc mukkang ara:dokkc gombugko bugkang, scmpc lula, “Sc ngok Aowo, ngok Balennammc; Bvk agomcm tadlangka!”

³⁶Odokkc gombugdc bugnamc, Jisukc atcrcm ka:begtoku, Odokkc bulu aso:pc dungapkang odokkc bulu okkom ka:toji sc:komsin odo longckvdv:do lubitokumang.

³⁷Longckoncm, bulu adi:talc:dokkc gvidokudom, bottcru:nc yadkumsunc tani:kcrcngko Bvm rvgsuto.

³⁸Odokkc ka:toka, tani:kcrc:dok ara:dokkc tani: akonc jc:sangkang “Luyirna, ngok awodcm ka:teika cmna ngo kumdung, kapila:nc bv ngok awo atcrc;

³⁹Odokkc ka:toka, uikonc bvm gagla:ycm bv vgcmpc jc:sa:dag; cdc bvm kvnggv:pc tvrgvt-tvrmatdag a:put sa:ma:sisscm, odokkc mogcrcpge:la bvm mcpakla gvdakku, odokkc bvm airu:pc kimoge:la mcla gvdagku.

⁴⁰Odokkc ngo nok agom mcjvgla gvmvnnckvdv:dcm cdcm mcnpakteika cmna kumna luto, cmpige:la bulu mcnna:tomang.”

⁴¹Jisubv luto, “C:i mc:jvgma:nc odokkc gvnyoksunc ope:kvdvnga, ngo cddv longckopc noluk lcdulo du:mvnycn odokkc nolum ka:dumsuycn? Nok awodcm so:pc langa:tok.”

⁴²Bv gva:dodcm, uidc bvm tvrtapto odokkc tvrgvt-tvrmatto. Cmpige:la Jisubv aima:nc uidcm morvdto, odokkc ko:dcm csa:motoku, odokkc bvk abudcm bvm bilattoku.

⁴³Odokkc Ru:ncpvnckc cddvnc ilang-gvlang migangcm ka:la kangagsukang.

⁴⁴Cmpige:la Bvk inam appv:dcm bulu kangagsula du:dodcm, Bvk agom tadjvgla gvmvnnc kvdv:dcm Bv luto, “Scm noluk yerungkvdv:do a:motoka; kapila:nc tani:kc Awodcm tani:kvdv:dok alagdo tolvgpcnamc.”

⁴⁵Cmpige:la bulu cdc lunam kvdv:dcm tadkintomang, odokkc cdcm bulukkolokkcm lc:sula lc:tungai, bulujen cdcm mcngkinma:ycpc cmna; odokkc bulu cdc lunam kvdv:dcm tadpcnammcm pcsokang.

⁴⁶Odokkc bulukkolok sc:karbv bottarya:ncnc cmna luka:mvnsunamko lenkang.

⁴⁷Cmpige:la Jisubv cdvlo buluk asinkvdv:dok mc:namkvdv:dcm kintonc, Bv kowawko langange:la Bvk kcra:do lc:to,

⁴⁸Odokkc bulum luto, “Sc:kobului ngok aminno sc kowawscm torvgsuycnc ngom torvgsudag, odokkc sc:kobvi ngom torvgsudagnc ngom mclvgncdcm torvgsudag; kapila:nc sc:kobv noluk ara:lo adjiyar-ya:ncnc cdc bottar-ya:ncdc.”

⁴⁹Jo:nbv luto, “Ru:tuma, tani:akonc nok amindokki uiycm mcnpaknamdcm ngolu ka:to, odokkc bvm mclvgtoku kapila:nc bv ngoluk lcdulo gvmvnmang.”

⁵⁰Cmpige:la Jisubv bvm luto, “Bvm mclvgyokuk; kapila:nc sc:kobv noluk lcdulo gvmvnge:mang cmna luma:ycji bv nolugkkc.”

⁵¹Cdvlo Bvm tayc:pc la:rvgsuku longcdc aninka:bongaji, Bv Jerusalempc toka:la ngengkangkang.

⁵²Odokkc Bv lutad lubincm Bvm mcpo:lvgla mclvgto, sc:kobulu Samariang kvdv:dok do:lungkolo gvangka:ji, Bvk lcgangc mosvngkapc;

⁵³Cmpige:la tani:kvdv:dc Bvm torvgsutomang, kapla:nc Bv Jerusalempc gvka:to.

⁵⁴Odokkc Bvk agom tadjvgla gvmvnnv Jakoblang Jo:nbv cdvlo cdcm ka:toji, bulu luto, “Ru:tuma, no ngolum do:mvrtokkcm vmmcm gogyi:dopc lulvgla odokkc bulum ugpakmotoka cmna mc:dagnci?”

⁵⁵Cmpige:la Bv ngengkutsuge:la bulum ge:rvdla luto.

⁵⁶Odokkc bulu do:lung pomkonlo:pc gvkang.

⁵⁷Bulu lambcdok gvtvla du:dodcm, tani:akonc Bvm luto, “No oko okoloi gvycnc ngo gvmvnyc.”

⁵⁸Odokkc Jisubv Bvm luto, “Mensurung kvdv:dokkc dungko arungc dung, odokkc do:mvrtok pcttangkvdv:dokkcsin asubc dung; ckvdaggom tani:kc Awodokkc okolosin Bvk tukkudcm lcngko kamang.”

⁵⁹Akon koncm Bv luto, “Ngok lcdu lcdulo gvmvntoka,” Cmpige:la bv luto, “Ru:tuma ngok ba:bumc gvlangkula yupo:moteikuk.”

⁶⁰Cmpige:la Bv bvm luto, “Sinckvdv:dcm buluk avkc sinckvdv:dc yudopc lc:tok; ckvdaggom noluk lcga:pc, gvkang odokkc Ru:ncpvnckc Migom doko mo:pvdok agomdcm lutadbigo:ta:ka.”

⁶¹Akodan luto, Ru:tuma “Ngo nok lcdu lcdulo gvmvnyc; cmpige:la ngok okumkc du:nckvdv:dcm lutcrsupo:moteikuk.”

⁶²Jisubv bvm luto, sc:kosin nangoldo laggabdcm pigabge:la ngengkutsuycmvlo bv Ru:ncpvnckc mi gomdoko mo:pvdokkcpc du:jubmang.