Read Mising JO:N 12 Bible Online

JO:N 12 - Mising bible

JO:N 12

¹Gvbo:la gvla dopun dojardok longc longkcng po:pcdo:bong, Jisubv Betani:pc gvto, okolo Lajaru:bv dungaji, sc:kom Jisubv sikolokkcm moturtokuji.

²Odo bulu Bvm donamtv:namko ibito; Marta:bv ila:sa:la bito, odokkc Lajarubv Bvk lcdulo tcbuldok domvnnc kvdv:dok akonai.

³Meri:bv airu:pc arc kanc namponc tulangko adcrkopc la:to odokkc Jisukc alcdo yonnvgto odokkc Bvk alcdcm bvk dumvddokki tidpu:bitoku; odokkc cdc okumdc tula:dok arrc nambungkang.

⁴Cmpige:la Juda Iskaroitbv, Bvk agom tadjvgla gvmvnnc tani:kvdv:dok akonc (sc:kobv Bvm mirupc tolvgpcnc dca:nc,) luto,

⁵“Kapila sc namponc tula:scm lvngko awum adoli:lok kotoma:n odokkc opankvdv:dcm bitoma:n?”

⁶Cdcm bv luto, bv:jc opankvdv:dcm ka:svmosv:ncla mangai cmpige:la bv:jc dopsonga:nc cdcmpilangc, odokkc bvkkc murkong sogcndc du:la:yam okodcmci odo lvgdonc cdcmci la:dungai.

⁷Jisubv luto, “Bvk atcrongcm, bvm cdcm ngok yudo longcdok lcngangc lc:motoka.

⁸Opankvdv:dc lo:dvscm noluk lcdulo dung, cmpige:la nolu lo:dvscm ngom du:bosumang.”

⁹Jiwukvdv:dok yadkumsunc bottcru:nc tani:kvdv:dc Bv odo dung cmnam cdvlo kintoji, bulu gva:to, Jisuo:mcmang cmpige:la Lajaru:mcsin kangkapc, sc:kom Bv sikolokkcm turmotokuji.

¹⁰Cdcmpinamc dormo ager gernckvdv:dok bottarya:nckvdv:dc Laja ru:mcsin mokepc cmna ru:suto,

¹¹kapila:nc bvggongkokki Jiwukvdv:dok bojcrungc gvyodla gvdungai odokkc Jisumc mc:jvgto.

¹²Longkondo bottcru:nc yadkumsunc tani:kcrcngkonc sc:kobulu doko tvngkodo:pc Jisubv:jc Jerusalempc gvdung cmnamdcm tadbegto.

¹³Cdcmpila bulu kajur vsv:lok annc kvdv:dcm la:to odokkc Bvm gvrvgsupc cmna jc:la: jc:la gvlenamkang, “Vrroi! Ru:tumkc aminno sc:ko gvdu:ji Bv aipainc, Israel dokkci migomc!”

¹⁴Odokkc Jisubv dorme:nc gadong gure: adorko pa:la odo sa:to; cdcm adla lc:namdcmpc,

¹⁵“Pcsoyok, Jionkc omma; ka:toka, gadong gure: awokolo sa:la, noluk migomdc gvdo!”

¹⁶Bvk agom tadjvgla gvmvnnc tani:kvdv:dc cdcm tada:danna tadkintomang; cmpige:la Bvm cdvlo Jisumc amin gvmotonc, odo bulu mc:patoku jc cdc Bvk agomcm adtungai odokkc Bvm gerbito.

¹⁷Bvk lcdulo yadkumsula du:nc tani:kvdv:dc cdvlo Lajarumc Bv agodokkcm goglenkaji odokkc sikolokkcm darobmotokuji lukancm lubito.

¹⁸Yadkumsunc tani:kvdv:dc Bvm rvgsukapc gvnam lcga:dc jc bulu Bv cdc kanggoddcm lcngkanto.

¹⁹Parisi:kvdv:dc odo akoncm akonc luka:mvnsuto, “Nolu ka:begdag jc nolu okkomsin ila:mang; ka:tok, rcngamsci Bvk lcdulo gvmvnamkang.”

²⁰Cdcmpidodcm cdc dopun dojar dodo tv:dodcm kumkapc gvnckvdv:dok akke Girikai.

²¹Cdcmpila cdcbulu Pilipkolo:pc gva:to, sc:kobv Galildok Betsaida dokka:ji, odokkc bvm luto, “Miganga, ngolu Jisumc ka:lv:dag.”

²²Pilipbv odokkc Andriumc lubito; Andriubv Pilipkc lcdulo gvmvnkang odokkc bulu Jisumc lubito.

²³Odokkc Jisubv bulum lubito, “Tani:kc Awodokkc amin gvmonanc ayirdc pvnga:du:bong.

²⁴Aroru:pc, aroru:pc, ngo nolum lubidung, geu a:m apirkonc amo:bo kcdledla sa:ma:sisscm, cdc apirongkopc ila du:dag; cmpige:la cdc simvlo, cdc bojcrungko a:yc e:dag.

²⁵Sc:kobv avkc turnamcm mc:bodagnc cdcm yogmodag, odokkc sc:kobv bvk turnamcm tayumycnc sc rcngamso turyarla turnam dokkcpc cdcm lc:dag.

²⁶Sc:koiyc ngok mcngkam agercm germvlo, bv ngok lcdulo gvmvnru:pa:yc, odokkc ngo okolo du:ycji, odo ngok ager gerya:nckvdv:dc:sin; sc:koiyc ngok agercm germvlo, Abubv bvm mcngcyc.

²⁷“Su:pakna ngokkc mc:pinmcngogcnc. Odokkc ngo okkomna luiya:ji? ‘Abba, sc ayirsokkcm ngom moya:tei cmycnci’? Ma: sok lcgangcmvn ngo sc ayirso:pc gvdu:n. Abba, nok amincm gvmotoka.”

²⁸Odo taycng amo:tokkc gomugkko bugyi:kang, “Ngo cdcm amincm gvmoto, odokkc ngo lckoda cdcm amincm gvmoyc.”

²⁹Odok dagla du:nc yadkumsunc tani:kcrcdc cdcm tatto odokkc cdc do:mvrko mvrkang cmna tatto. Akedc luto, “Taycng among lutad lunckonc Bvm luto.”

³⁰Jisubv lubito, “cdc gomugdc noluk lcgang bukkang, ngok lcga:mang.

³¹Su:pak sc mo:pvsok kcbangcm ba:dung, su:pak sc mo:pvsok migom donckvdv:dcm la:pagamyc;

³²odokkc ngo, cdvlo ngom mo:pvsokkcm la:sa:yckunc, appvng tani:ycm ngokkolo:pc la:sangamycku.”

³³Bv kapinc sinampc siycji cdcm lcngkanpc cmna cdcmpc luto.

³⁴Yadkumsunc tani: kvdv:dc Bvm luto, “Lujvg lurodokkcm ngolu tatto jc Kristobv lo:dvpc du:do. No kapc lula:don tani:kc Awodcm la:sa:ru:payc? Sc:kon cdc tani:kc Awodc?”

³⁵Jisubv bulum lubito, “Pva:dc noluk lcdulo asudowongkoda dung. Pva:dc du:dodcm gvgo:toka, ckvma:mvlo kcmodc nolum mokombomycpc; sc:kobv kcmolo gvgodagnc okolopc gvdagji bv kinmang.

³⁶Nolukkolo pva:dc du:dauso, pva:dcm mc:jvgtoka, odomvlo nolugom pva:dok omma:pc iycpc.” Jisubv cdcm luge:la, Bv gvpakkang odokkc bulukkolokkc avdc gvsisukang.

³⁷Buluk kangkolo Bv cddvkoi kanggodcm lcngkankagom, cmpige:la:sinci bulu Bvm mc:jvgtomang;

³⁸cdc lungor lunc Isaia:kc lunamdc lukamdcmpc iycpc cmna ikang: “Ru:tuma, sc:konu ngoluk lubinammcm mc:jvgton, odokkc sckkcpc Ru:tumkc alagcm lcngkanton?”

³⁹Cdcmpila bulu mc:jvgla:tomang. Kapila:nc Isaia:bv lckoda luto,

⁴⁰“Bv buluk amikkvdv:dcm migluammoto, odokkc asinkvdv:dcmsin tormoto, ckvma:mvlo bulu ka:pa:yc buluk amikkvdv:dokki odokkc buluk asinkvdv:dokki mcngkinyai, odokkc ngokkolo:pc gvlat yangkui bulum ka:pvtdokupc.”

⁴¹Isaia:bv cdcm luto kapila:nc bv Bvk amin gvnamcm ka:to odokkc bvk agomcm luto.

⁴²Cdcmpc idag imanggom bojcrungc migom donckvdvngc Bvm mc:jvgto, ckvdaggom Parisi:kvdv:dcm pcsola bulum cdcm lukansutomang, ckvma:mvlo bulu kumko okum okumkvdv:dokkcm mcnnennvgpckc cmna!

⁴³Kapila:nc bulu tani:kvdv:dok luitdcm mc:bodagai Ru:ncpvnckc luitdcmyam.

⁴⁴Odokkc Jisubv bottapc jc:la luto, “Sc:kobv ngom mc:jvgdonc, ngom mc:jvgmang cmpige:la Bvm mc:jvgdag sc:kobv ngom mclvgtagji.

⁴⁵Odokkc sc:kobv ngom ka:begdagji Bvm ka:begdung sc:kobv ngom mclvgtu:ji.

⁴⁶Ngo pva:pc ila mo:pvso:pc gvdung, jc sc:kobvi ngom mc:jvgycnc bv:jen kcmolo du:tvpc ima:yc.

⁴⁷Sc:koiyc ngok lunam agomkvdv:dcm tadyc odokkc cdcmbulum mcnggabla lc:ma:ycnc, ngo bvm kcbangcm ba:ma:yc; kapila:nc ngo rcngam kcba:bangkampc gvmang cmpige:la rcngamscm moturkapcmvn gvdu:n.

⁴⁸Sc:kobv ngom lupakycnc odokkc ngok agom lunamkvdv:dcm torvgsuma:ycnc kcbang ba:namko du:do; ngok lunam agomkvdv:dc:na du:tcr longcdo bvk kcba:pc iycku.

⁴⁹Kapila:nc ngok avkc ilang gvlangki ngo agomdcm lumang; Abudc sc:kobv ngom mclvgtagnc Bv avdci ngom lulvgcm lutag okkom lupcnamcji odokkc okko cmpcnammcji.

⁵⁰Odokkc ngo kindagjc Bvk lulvgnamdc turyarla du:nam turnamdc. Ngo okkom ludonc, cdcmpila, Abudc ngom lukamdcmpci ngo ludo.”