Read Mising JO:N 15 Bible Online

JO:N 15 - Mising bible

JO:N 15

¹“Ngo:na aro angur amv:dc, odokkc ngok Abubv:na angur arvg incdc.

²Ngok a:yc e:ma:nc rcngke: appv:dcm, Bv papagamdag, odokkc a:yc e:nc rcngke: appv:dcm Bv papu:lvgdag, odomvlojen cdc bojcrungko a:yc e:ycpc cmna.

³Nolum ngok lubinam agomkvdv:dokki narcngcimotobong.

⁴Ngok dungkolo du:mvnnangka, odokkc ngo nolukkolo du:mvnyc. Rcngke:dc avyc kapc a:yc e:sula:ma:nc, angur amv:lo cdc sanggabmvnna du:ma:sisscm, nolusin e:la:mang, ngokkolo nolu du:ma:mvlo. Ngo angur amv:dc, nolu rcngke:kvdv:dc.

⁵Sc:kobv ngokkolo du:mvnycnc, odokkc ngo bvkkolo du:mvnmvlo, bv:na cdc bojcrungkopc a:yc e:ncdc, kapila:nc ngo:ma:mvlo nolu okkomsin ila:mang.

⁶“Tani: akonc ngokkolo du:ma:mvlo, bvm rcngke:ko papaknammcmpc papakdag odokkc sanpakdag; odokkc rcngke:kvdv:dcm sokumsudag, vmvlo cra:lvgla rompakdag.

⁷Nolu ngok dungkolo du:mvnmvlo, odokkc ngok gomung kvdv:dc nolukkolo du:mvnmvlo, nolu okkomci madoji kotoka, odo cdcm noluk lcgangc ibiycpc.

⁸Odokki ngok Abubv amin gvdag, odomvlo nolu bojcrungko a:yc gcdopc cmna, odokkc ngok agom tadjvgla gvmvnnc tani:yc cmna lcngkancm ibiyc.

⁹Abudc ngom kapc aipc mc:ton, cdcmv:pc ngo:sin nolum aipc mc:to; ngok aipc mc:namdo du:langka.

¹⁰Nolu ngok lulvgnam agomkvdv:dcm mcnggabla tadmvlo, nolu ngok aipc mc:namdo du:tvyc, ngok Abukc lulvgnam agomkvdv:dcm mcnggabla tadkamardcmpc odokkc Bvk aipc mc:namdo du:do.

¹¹Sc agomkvdv:scm ngo nolum lubitu:bong, odomvlo ngok mc:podc noluk lcdulo du:mvndopc cmna, odokkc odomvlo noluk mc:podc:jen pv:dandopc cmna.

¹²“Sc:na ngok lulvgnam agomcnc, jc nolu akoncm akonc aipc mc:mvnsulangka ngo nolum aipc mcngkamdcmpc.

¹³Tani:akonc bvk ajondok lcgangc turnamcmci tolvgbinamcmyam, bottcya:pc aipc mc:namc kamang.

¹⁴Nolu ngok ajonc ngok lulvgnam kvdv:dcmpc tadla nolu imvlo.

¹⁵Lckoda nolum ager gerya:nc cmna lukuma:bong, kapila:nc ager gerya:nc kvdv:dc okkom Buluk ru:tumdc ila du:ji kinmang. Cmpige:la ngo nolum ajonkvdvngc cmna gogtobong, kapila:nc ngo Abukolok tadnam appv:dcm ngo nolum kinabmotobong.

¹⁶Nolu ngom balenmangai, cmpige:la ngo nolum balento odokkc agercm gerdopc lugablvgto odomvlo gvla a:yc e:dopc cmna odokkc noluk a:yckvdv:dc du:mvnna du:dopc cmna; odomvloyam nolu ngok aminno Abudcm okodcmci koycnc, Bv cdcmci nolum biycpc cmna.

¹⁷Scm ngo, nolu akonc akoncm aipc mc:mvnsudopc cmna lulvgdung.

¹⁸“Rcngamsc nolum tayumycmvlo, kinna:bongka jc nolum tayumma:dapci cdc ngom tayumpo:to.

¹⁹Nolu rcngamsokka:mvlo, rcngamsc avkcdcm aipc mc:ya:pc; cmpige:la nolu rcngam sokkcma:la:yam, cmpige:la rcngamsokkcm ngo nolum balenna:yam, cdcmpila:yam rcngamsc nolum tayumdag.

²⁰Ngok nolum lunam agomkvdv:dcm mcpa:lang, ‘Ager gerya:nc tani:konc bvk ru:tumdcm bottaya:mang.’ Bulu ngommci ipusire:ycm itomvlo, bulu nolum ipusire:ycm iyc; bulu ngok agomcm tadgabla lc:mvlo, nolukkcmsin tadgabyc.

²¹Ckvdaggom bulu cdc appv:dcm ngok lcgangong iyc, lcga:dc bulu sc:ko ngom mclvgtagji kinmang.

²²Ngo gvmangamvlo odokkc bulum lubimangamvlo, bulu pa:bvm ima:ya:pc; cmpige:la su:pak bulukkc buluk pa:pkvdv:dok lcgangc mc:yinsunamc kama:ycbong.

²³Sc:kobv ngom tayumdagnc ngok Abubv:sin tayumdag.

²⁴Ngo sc:kosin ima:nam agerko buluk ara:lo gertomvlo, bulu pa:bcm ima:ya:pc; cmpige:la su:pak bulu ka:tobong odokkc ngomna: Abumc anyipagcm tayumto.

²⁵Cdc buluk lujvglurodcm adla lcngkamdcmpc inamdok lcgang, ‘Bulu ngom atv lcgang kama:pc tayumto.’

²⁶“Cmpige:la cdvlo Luyirncdc gviycnc, sc:kom ngo nolukkolo:pc Abukodokkc mclvgycnc, cdc arodok Yalodcmcina, sc:kobv Abudokkc gvlendagnc, Bv ngok agomcm lukanbiycpc;

²⁷odokkc nolusin lukanbinckvdvngc, kapila:nc nolusin ngok lcdulo lena:dokkc du:mvndung.