Read Mising JO:N 16 Bible Online

JO:N 16 - Mising bible

JO:N 16

¹“Ngo nolum imursiyarkolokkcm motumpc cmna sc appv:scm lubitobong.

²Bulu nolum kumko okumnokkcm mcnnenlvgyc; ncrkvgpc, ayirdc pvnga:du:bong cdvlo sc:kobv nolum mokeycnc bv Ru:ncpvncmc agerko gerbidung cmna mc:yc.

³Odokkc bulu cdcm iyc lcga:dc bulu Abudcm kintomang, cdcmanggom, ngomsin.

⁴Ckvdaggom ngo sc agomkvdv:scm nolum lubidung, jc cdvlo buluk ayirc pvnga:ycnc nolu mc:pa:ycpc jc ngo buluk agomcm nolum lubika. “Ngo lua:dodokkcbong sc agomkvd:scm lubitomang, kapila:nc ngo noluk lcdulo dungai.

⁵Cmpige:la su:pak ngo Bvkkolo:pc gvdakku sc:kobv ngom mclvgkkaji; ckvdaggom nolukkolok akosinci ngom tawumang, ‘no okolopc gvdang cmna?’

⁶Cmpige:la ngok scmbulum nolum lunamki, noluk asinkvdv:dc mc:dvrc bingkang.

⁷Cdcmpidaggom imanggom ngo nolum lubidung: Cdc nolukkcpc idag jc ngo gvdagku, kapila:nc ngo gvkumvlo, Luyirncdc nolukkolo:pc gvyc; cmpige:la ngo gvkumvlo, Bvm ngo nolukkolo:pc mclvgbiyc.

⁸Odokkc cdvlo Bv gvycnc, Bv rcngamscm pa:p agomcm mcjvgmoyc odokkc dormopc du:namcmcmnang kcba:ba:nam agomcm:

⁹Pa:p agomcm, lcga:dc bulu ngom mc:jvgmang; dormopc du:namcm,

¹⁰lcga:dc ngo Abukotopc gvdakku, odokkc nolu ngom lckoda ka:begma:ycbong;

¹¹kcba: ba:nam agomcm, lcga:dc sc rcngamsok migom doncdcm kcbangcm ba:takbong.

¹²“Ngokkc ckvdaggom nolum bojcrungko lupcnammc dung, cmpige:la nolu cdcmbulum su:pak torvgsula:mang.

¹³Cdvlo arodok yalodc gvycnc, Bv nolum appvng arodo:pc gvyirboyc; kapila:nc Bv avkc ilang gvlangkokki agomcm luma:yc, cmpige:la oko okkomci tadycji Bv luyc, odokkc Bv nolum a:pcnc atv agomkvdv:dcm lukanna lubiyc.

¹⁴Bv ngom amincm gvmoyc, kapila:nc Bv okodc ngokkcnc la:yc odokkc cdcm nolum lukanna lubiyc.

¹⁵Abudokkc du:nc appv:dc ngokkc; cdcmpidag ngo luto jc Bv la:yc okodc ngokkcji odokkc nolum lukanna lubiyc.

¹⁶“Ayir adjio:kobo:mvlo, odokkc nolu ngom ka:begkuma:ycbong; lckoda adjio:koda, odokkc nolu ngom ka:begyc.”

¹⁷Bvk ake agom tadjvgla gvmvnnckvdv:dc akoncm akonc luka:mvnsuto, “Bv:jc ngolum lutonc, cdc okkon, ‘Ayirc adjio:ko, odokkci nolu ngom ka:begma:yc; odokkc lckoda ayir adjio:ko, odokkc odokkci nolu ngom ka:begyc;’ odokkc, kapila:nc ngo Abudo:pc gvdagkku?”

¹⁸Bulu luto, “Okkomna Bv ludang ‘adjioko cmnamdcm?’ Bv okkom ludu:song nolu kinmang.”

¹⁹Jisubv kindagai jc bulu Bvm tawupc cmna mc:dagai; cdcmpila Bv bulum lubito, “Ngo okkomna lutoji, cdcmyc nolu av avkvdv:dc tawuka:mvnsudu:n, ‘Ayir adjio:koda, odokkc nolu ngom ka:begma:yc, odokkc lckoda ayir adjio:koda, odokkc nolu ngom ka:begycku?’

²⁰Aroru:pc, aroru:pc, ngo nolum lubidung, nolu kabyc odokkc v:tombangki:la kabyc, cmpige:la rcngamsc mc:poyc; nolu mc:dvryc, ckvdaggom noluk mc:dvrc mc:popc iycku.

²¹Cdvlo nc:ng akonc kowcm pa:pc cmna idonc odo mc:dvrdag, lcga:dc bvk ayirdc pvnga:dag; cmpige:la bv cdvlo ko:dcm pa:dagnc, bv cdvlosin menna:ma:nam kinamdcm mc:pangkumang, kapila:nc rcngamso kowaoko pa:namdok mc:poki.

²²Cdcmpila nolukkc su:pak mc:dvrc dung, cmpige:la ngo nolum lckoda ka:begycku odokkc noluk asinkvdv:dc mc:poyc, odokkc sc:kosin nolukkolokkcm mc:podcm la:pakma:yc.

²³“Odo longckvdv:do nolu okkomsin ngokkolokkcm ma:ma:yc. Aroru:pc, aroru:pc ngo nolum lubidung, nolu atvko Abudokkcm mamvlo, Bv cdcm ngok aminno biyc nolum.

²⁴Su:paklo:pc nolu okkomsin ngok aminno koma:da; kotoka, odokkc nolu pa:ycpc, odomvlo noluk mc:podc pv:ycpc.

²⁵“Ngo scmbulum nolum kvyv:sula kvnam agomki lubitobong; cdvlo ngo lckoda nolum kvnam agomki nolum lukuma:ycbo:nc ayirdc pvnga:du:bong cmpige:la Abudok agomcm tadkindandopc luscgpc lubiyc nolum.

²⁶Odo longcdo nolu ngok aminno koyc; odokkc ngo luma:yc jc ngo Abudcm noluk lcgangc kumyc;

²⁷kapila:nc avdci nolum aipc mc:dag, lcga:dc nolu ngom aipc mc:to odokkc ngo Abukotokkc gvdung cmna mc:jvgto.

²⁸Ngo Abukotokkc gvdung odokkc rcngamso:pc gvdung; lckoda, ngo rcngamscm mcpakdu:bong odokkc Abukoto:pc gvdagkkubong.”

²⁹Bvk agom tadjvgla gvmvnnc tani:kvdv:dc luto, “Oh, su:pakna no tadkindandopc agomdcm ludu:nc, kvkanna kvma:pc!

³⁰Su:pak ngolu kindagjc no appvngcm kindag, odokkc sc:kosin nom tawunam agomko tadpcnam kama:bong; odokki ngolu mc:jvgdagjc no Ru:ncpvnckotokkc gvka.”

³¹Jisubv bulum lubito, “su:pak nolu mc:jvgdagyc?

³²Ayirdc pvnga:du:bong, aropakpc cdc pvnga:du:bong, cdvlo nolum mcnpitmcnyitycnc, appvng taniycm bvkkc okumno; odokkc ngom atcrongcm mcpakyc; ckvdaggom ngo atcro:ma:yc, kapila:nc Abudc ngok lcdulo dung.

³³Ngo scm nolum lubitu:bong, ngokkolo mc:pomcnganc nolukkcjen du:ycpc. Rcngamso nolukkc kvnggv:pc mc:dvrc dung; ckvdaggom aipc mc:potoka, ngo rcngamscm mopvto.”