Read Mising JO:N 19 Bible Online

JO:N 19 - Mising bible

JO:N 19

¹Odo Pilatbv Jisumc gvbokang odokkc dcmmoto.

²Odokkc mimag monc kvdv:dc ta:ngkokki dumlupko poto odokkc cdcm Bvk mittukdo kublvgto, odokkc Bvm ba:yomcmpc genc gcnam attarki moru:lvgto;

³bulu Bvkkodo:pc, scmpc lula: lula gva:to, “Ci Jiwukvdv:dok migoma!” Odokkc buluk alakkvdv:dokki Bvm pito.

⁴Pilatbv lckoda gvlenkang, odokkc bulum luto, “Ka:toka, ngo Bvm nolukkolo:pc gvlenbotak, ngo Bvm oko imurcmsin pa:tomang cmna nolu kinycpc cmna.”

⁵Cdcmpila Jisubv ta:ngkokki ponam dumlupdcm gcge:la gvlento, odokkc ba:yomcmpc genc attardcm gcge:la. Pilatbv bulum luto, “Ka:toka tani:scm!”

⁶Dormo ager gernckvdv:dc odokkc migom agergernckvdv:dc cdvlo Bvm ka:toji, bulu jc:robbomkang, “Bvm Kuruslo moketok, Kuruslo moketok!” Pilatbv bulum luto, “Bvm nolu avyc gvbosukang odokkc Bvm kuruslo moketa:ka, kapila:nc ngo Bvm oko imur gvmurcmsin pa:tomang.”

⁷Jiwukvdv:dc Bvm luto, “Ngolukkc lujvgluroko dung, odokkc cdc lujvglurodok adkampc Bv sipa:do, kapila:c Bv avdc avycm Ru:ncpvnckc Awopc lusuto.”

⁸Pilatbv cdc agomkvdv:dcm tadge:la, bv pcsoyangkang;

⁹bv kcba: moko lottado:pc lckoda gvangkang odokkc Jisumc luto, “No okolokkcn?” Cmpige:la Jisubv okkomsin lutomang.

¹⁰Pilatbv cmpila Bvm luto, “No ngom lubima:ycnci? No kinma:nci ngokkc nom mclennvglangkunanc ilang gvlangc dung cmna, odokkc nom kuruslo mokela:nam ilang gvlangc?”

¹¹Jisubv Bvm lubito, “Taycng amo:tokkc bimangamvlo nokkc ngokkolo oko ilang gvlangcsin kama:ya:pc; cdcmpidag sc:kobv ngom nokkolo tolvgtonc bvkkc bottaya:nc pa:bc dungkang.”

¹²Odokokki Pilatbv Bvm mclennvgkupc cmna mato, cmpige:la Jiwukvdv:dc jc:robbomkang. “No sc tani:scm mclennvgkumvlo, no Kaesarkc aipc mc:nc ajoncimang; sc:ko avyc migompc mc:suycnc Kaesarkc agom lukampc tadma:pc incpc idag.”

¹³Pilatbv cdvlo cdc agomkvdv:dcm tattonc, bv Jisumc moro:pc gvlenboto odokkc kcbang moddom tedko vlvng kungke:kolo tedkang, odokkc Hibriulo, Gabbata cmna lunamkolo.

¹⁴Cdcmpc inamc cdc Gvbo:la gvnamdok dopun dojar donam tv:namdok lcgangc mosv:sunanc longcdcai; odo ayirc akkcngko ikangaboi. Bv Jiwukvdv:dcm lubito, “Ka:tok noluk Migomdcm!”

¹⁵Bulu jc:robkang, “Bvm gc:rbokang, Bvm gc:rbokang, Bvm kuruslo moketok!” Pilatbv bulum luto, “Ngo noluk migomdcm kuruslo mokeycnci? Dormo ager gernc bottarya:nc kvdv:dc lubito, Ngolukkc Kaesarbv:ma:mvlo migomc kamang.”

¹⁶Odo bv Bvm bulum Kuruslo mokedopc togc:lvgto.

¹⁷Cdcmpila bulu Jisumc gvbokang, odokkc bv moro:pc gvlenkang, Bvk avkc kurusdcm jo:bomla, tukku kulong mo:tak cmnam mo:takdo:pc, okodcm Hibriulo Golgota cmna ludagaji.

¹⁸Odo bulu Bvm kuruslo moketo, odokkc Bvk lcdulo anyikoda, kekonkesakdo ako akopc Jisumc buluk pongkokdo.

¹⁹Pilatbv lulvgnamkosin adto odokkc cdcm kurusdo ilvgto; cdcm podagai, “Najaretdok Jisubv, Jiwukvdv:dok migomc.”

²⁰Jiwukvdv:dok bojcrungc cdc amin adlvgnamdcm poto, kapila:nc Jisumc okolo kuruslo mokekanc cdc nogordok anindagai; odokkc cdcm Hibriulo adtungai, Latinno, odokkc Giriklo.

²¹Jiwukvdv:dok dormo ager gernclok bottarya:nckvdv:dc odo Pilatmc luto, “Jiwukvdv:dok Migomdc cmna adyok, cmpige:la, ‘Sc tani:sc ludagai, ngo Jiwukvdv:dok Migomc.’”

²²Pilatbv lubito, “Okodcm ngo attobo:nc ngo attobong.”

²³Mimag monckvdv:dc Jisumc cdvlo kuruslo moketonc bulu Bvk gcnam attar kvdv:dcm la:to odokkc cdcm mimag monc akodo aborko pa:dopc, tagpi:kop serpansuto; odokkc Bvk galugdcmsin. Cmpige:la cdc galugdc omangkowc kamangai, tayc:tokkc kcvgbo:pc sumtagai;

²⁴cmpila bulu akoncm akonc luka:mvnsuto, “Kai scm petsotyobongka, cmpige:la sckkcpc sc iycji siti:ko ku:lai.” Cdc astrong agomdcm lukamdcmpc idopc ikang. “Bulu ngok gcnam attarkvdv:dcm buluk ara:lo petpansuto, odokkc ngok attarkvdv:dcm bulu siti:pc ku:to.”

²⁵Cmipge:la cdc mimag monc kvdv:dc cdcm ito. Cmpige:la Jisukc kurus ruido Bvk ancdc dagla dungai, odokkc Bvk ancdok bvrmcdc, Meri:bv Klopagkc nc:dc, odokkc Meri: Magdalini:bv,

²⁶Cdvlo Jisubv Bvk ancdcm ka:toji, odokkc Bvk agom tadjvgla gvmvnnc tani:dcm sc:kom Bv aipc mc:dagaji kcra:do dagla dunganc, Bvk ancdcm Bv luto, “C:i nc:nga, ka:toka, nok awwom!”

²⁷Odokkc Bvk agom tadjvgla gvmvnnc tani:dcm Bv luto, “Ka:toka, nok ancdcm!” Odokkc odo ayirdokkc cdc agom tadjvgla gvmvnnc tani:dc bvk okumpc bvm gvbokangku.

²⁸Odok lcdupc Jisubv, appv:dcm su:pak ingabtobong cmna kinsuge:la, luto (astrong agomdcm lukamdcmpc idopc,) “Ngo tv:lv:dung.”

²⁹Soriang bi:nckopc ku:sugnc alangc odo dungai jo:sa:to; cmpige:la tagpor asongko bi:ncko ku:sugnc alangcm hissop asongkolo darsa:to odokkc cdcm Bvk nappa:do:pc tva:lvgto.

³⁰Cdvlo Jisubv ku:sugnc ala:dcm tv:tonc, Bv luto, “Cdcm gerpvttobong;” odokkc Bvk mittukdcm dummapto odokkc Bvk yalodcm topaklvgtobong.

³¹Cdc mosv:sunam longcpc ila:yam, simang kvdv:dcm kurus tayc:lo du:paknamdcm la:pakpc cmna Jiwukvdv:dc Pilatkolok ager germa:pc yodla du:nam longcdo koto buluk alckvdv:dcm dcmsodamdopc, (kapila:nc cdc bottcru:nc longgai,) odokkc bulumjen la:pakdopc cmna.

³²Cmpige:la mimag monckvdv:dc gva:to odokkc mokkearpo:nam dokkcm dcmsotto, odokkc akondokkcm sc:kobulum Bvk lcdulo moketoji;

³³cmpige:la cdvlo blu Jisukolo:pc gva:tonc odokkc ka:to jc Bv odo sikangcibong, bulu Bvk alckvdv:dcm dcmsottomang.

³⁴Ckvdaggom mimagmonckvdv:dok akonc gvdvngkokki Bvk angketdok nvgjogto, odokkc oddung i:yclang assc lenkang.

³⁵Sc:ko cdcm ka:tonc lukanbila luto — bvk lukanbinamdc arro, odokkc bv kindag jc bv arodcm ludag — nolusin jen mc:jvgycpc.

³⁶Kapila:nc odokbuluk lcgangc cdcmpc ikang astrong agomdc:jen aropc iycpc, “Along asongkosin jen dvrsotma:ycpc.”

³⁷Odokkc lckoda astrong akoncda ludag, “Bulu Bvm ka:yc sc:kom bulu mc:jvgdagji.”

³⁸Odok lcdudcm Arimatia:dok Josepbv, sc:kobv Jisukc agom tadjvgla gvmvnna:nc, ckvdaggom kinmango:pc tadna:ji Jiwukvdv:dcm bv la:yila:ycnci cmna tawuto, odokkc Pilatbv bvm la:yidopc lulvgto. Cdcmpila bv gvto odokkc Bvk sima:dcm jo:pakbomkang.

³⁹Nikodimu bv:sin, sc:ko po:pcbong sc:ko gvanggar po:dodcm yummcm gva:pongkaji, namponc tulang molusunamko bomna gvto odokkc lvngko poundko i:dnc ogorungcm.

⁴⁰Bulu Jisukc sima:dcm jo:to, odokkc ho:n onnoki sumnam gasorki cdcm yedto mosolang kvdv:dcm yettc:la, Jiwukvdv:dok agolo lcngkamdcmpc.

⁴¹Cmpila Bvm okolo Kuruslo moketonc odo mo:takdo ba:ri:ko dungai, odokkc ba:ri:do anu agoko dungai okolo sc:komsin cdvlosin lcngkvmangaji.

⁴²Cmpige:la Jiwukvdv:dok Mosv:sunanc longcpc inamc, cdc agodc kcrangv:do du:la:yam, bulu Jisumc odo lc:to.