Read Mising JO:N 20 Bible Online

JO:N 20 - Mising bible

JO:N 20

¹Cdcmpinamc longc kvnvddok a:pongarnc longcdo Meri: Magdalini:bv gvgordanna agodo:pc gvkang, kcmola du:dodcmci, odokkc vlv:dcm agodokkcm kurpakla lc:dopc ka:begto.

²Cdcmpila bv dugkangku, odokkc Simon Pitorkolo:pc gvkang odokkc agom tadjvgla gvmvnnc tani:akonc, sc:kom bv aipc mc:dagaji, odokkc bulum lubito, “Bulu Ru:tummc agodokkcm la:pakto, odokkc okoloi Bvm lc:tosong ngolu kintomang.”

³Pitorbv odo agom tadjvgla gvmvnnc ake tani: akondcm gvjonna gvkang odokkc bulu agodo:pc gvkang.

⁴Bvnyik anyidc dukkang, cmpige:la Pitormc agom tadjvgla gvmvnnc tani: akondc dugbadla dukkang odokkc dugpv:po:to;

⁵odokkc kanga:pc cmna bcrvgla kanga:to, bv odo ho:n onnoki sumnam gasordcm ka:begto, cmpige:la bv gva:tomang.

⁶Odo Pitorbv dugpv:to, bvk lcdudo dugla, odokkc agodok ara:pc gva:to; bv ho:n onnoki sumnam gasorkvdv:dcm sarra lc:dopc ka:to, odokkc dumcrdcm,

⁷okodcm Bvk mittukdo yc:tungaji, ho:n gasordok dungkodo lckopc du:mangai cmpige:la angupc yella dungai mo:takkolo.

⁸Odo agom tadjvgla gvmvnnc tani:akondc sc:kobv agodo:pc dugpv:pongkaji, bv:sin ago ara:do:pc gva:mvnto, odokkc bv ka:la mc:jvgto.

⁹Kapila:nc bulu astrong agomdcm odosin kinmangada; Bv:jc sikolokkc turkupcnamc.

¹⁰Odokkc cdc agom tadjvgla gvmvnnc tani:kvdv:dc buluk okumpc gvngapkangku.

¹¹Cmpige:la Meri:bv agodok mo:ro:do kabla dungkang, odokkc bv kabtungv:la bv agodo:pc ngenga:la ka:to;

¹²odokkc bv kamponc attargcnc taycng among lutad lunc anyiko ka:begto, Jisumc okolo lc:tungaji odo tedla dungai, akonc alc lckodo odokkc akonc mittuk dumkodo.

¹³Bulu bvm luto, “Nc:nga, kapila no kabla du:n?” Bv bulum lubito, “Kapila:nc bulu ngok Ru:tummc bompakkangku, odokkc bulu okolo Bvm lc:toji ngo kinmang.”

¹⁴Cdcm luge:la, bv ngengkutsuto odokkc Jisumc dagla du:dopc ka:beg to, cmpige:la bv kinmangai cdc jc Jisubv cmna.

¹⁵Jisubv bvm tawuto, “C:i nc:nga kapila no kabdu:n? Sc:kom no madu:n?” Ba:ri ka:svya:ncdc cmna mc:la, Bvm bv luto, “Miganga, no Bvm jo:pakbomkamvlo, ngom lutei no okolo Bvm lc:ton, odokkc ngo Bvm jo:bomkupc.”

¹⁶Jisub bvm luto, “Meri:a.” Bv nge:latsuto odokkc Bvm Hibriu agomlo, “Rabboni!” (Cdcmpc lunamdc Luyirnc)

¹⁷Jisubv bvm luto, “ngom gagkvyok, kapila:nc su:paksin ngo Abukoto:pc pv:sangkuma:da; cmpige:la ngok bvrrang kvdvngolo:pc gvkangkuk odokkc bulum lulangka, ngo Abukoto:pc dc:sang dungkubong odokkc noluk Abukodo, ngok Ru:nc sa:nclang noluk Ru:ncsa:nc koto:pc.”

¹⁸Meri: Magdalini:bv gvkangku odokkc agom tadjvgla gvmvnnc kvdv:dcm lubitoku, “Ngo Ru:tummc ka:begto;” odokkc bv bulum lubito jc Bv bvm cdc agom kvdv:dcm lulvgto.

¹⁹Odo longcdok yumcayirdo, kvnvd longcdok a:pongarnc longcdo, agom tadjvgla gvmvnnc tani:kvdv:dc yabgo kvdv:dcm mokabamsula dungai bulu okolo dungaji, Jiwu kvdv:dcm pcsola, Jisubv gva:la buluk ara:do dagkang odokkc bulum luto, “Nolukkolo mc:po mcnga:nc dungka:langka.”

²⁰Bv cdcm lunamc, Bvk alag kvdv:dcmnang angketdcm lcng kanto. Odo agom tadjvgla gvmvnnc tani:kvdv:dc Ru:tummc ka:begnammc mc:pokang.

²¹Jisubv lckoda bulum luto, “Nolukkolo mc:pomcnganc dungka:langka. Abubv kapc ngom mclvgtonc, cdcmv:pc ngo:sin nolum mclvgdung.”

²²Odokkc Bv cdvlo cdcmpc lutonc, Bv bulum ngalvgla luto, odokkc bulum luto, “Angunnc Yalodcm torvgsutoka.

²³Nolu sc:kaikc pa:bcm mc:yinsumvlo, bulum mc:yinsutobong; nolu sc:kaikc pa:bcm mctvmvlo, cdcbulu du:dag.”

²⁴Cdcmpinamc Tomabv, vyvngdok akonc, opem cmna gognamdc, buluk lcdulo du:mvnmangai cdvlo Jisubv gva:toji.

²⁵Cdcmpila agom tadjvgla gvmvnnc tani:kvdv:dok akonc bvm lubito, “Ngolu Ru:tummc ka:to.” Ckvdaggom bv bulum luto, “Bvk lakpodok gojal pvdkodcm ka:ma:sisscm, odokkc ngok lakke:ycm gojal pvtkodo suda:ma:sisscm odokkc ngok alagcm Bvk angketdok suda:la ka:ma:sisscm, ngo mc:jvgma:yc.”

²⁶Pi:nyi longc lcdulo, Bvk agom tadjvgla gvmvnnc kvdv:dc lckoda odo okumdo dungai, odokkc Tomabv buluk lcdulo du:tc:dungai, cmpige:la Jisubv gva:la buluk pongkokdo dagmvnto, odokkc luto, “Nolukkolo mc:po mcnganc dungka:langka.”

²⁷Odo Bv Tomamc luto, “Nok lakke:dcm suda:toka, odokkc ngok alagcm ka:toka; odokkc nok lakke:dcm sadlentokuka, odokkc nok alakdcm ngok angketsok pika:tok; mc:jvg kama:ncpc iyoka, cmpige:la mc:jvgtoka.”

²⁸Tomabv Bvm lubito, “Ngok Ru:tumclang ngok Ru:ncpvnna!”

²⁹Jisubv Bvm luto, “Ngom ka:begla:yc no mc:jvgdu:n? Sc:kobulu ka:begmangge:langgom mc:jvgdagnc bulu aipai pa:nc.”

³⁰Cdcmpc Jisubv bojcrungko agom tadjvgla gvmvnnc tani:kvdv:dok ka:de:pc gerkanbila gernam agercm gerto, okodcmbulum sc potinso adma:ji;

³¹ckvdaggom scmbulum Jisu Kristomc mc:jvgycpc cmna adto, Ru:ncpvnckc Awodcm, odokkc mc: jvgla nolu jen Bvk aminno turnamcm pa:ycpc cmna.