Read Mising JO:N 21 Bible Online

JO:N 21 - Mising bible

JO:N 21

¹Odok lcdupc Jisubv lckoda avdc agom tadjvgla gvmvnnc kvdv:dcm Tiberia Siycng asi ru:yido lcngkansutoku; odokkc Bv avdc cdcmpc lcngkansuto.

²Simon Pitorbv, Tomamc Opem cmna lunamdc Kanandok Natanaelmc Galildo, Jebidi:kc awokvdv:dcm, odokkc Bvk agom tadjvgla gvmvnnc anyikoda lckopc dungai.

³Simon Pitorbv bulum luto, “Ngo ongo makapc gvdagbong.” Bulu bvm luto, “Ngolu nok lcdulo gvmvnyc.” Bulu gvlenkang odokkc ollu:do angkang cmpige:la odo yumcdo bulu okkomsin apirkosin crgabla:tomang.

⁴Rowc pvang pvsa:nammc, Jisubv siycng ru:yido dagkang; ckvdaggom agom tadjvgla gvmvnnc tani:kvdv:dc cdc Jisubv:ai cmna kinmangai.

⁵Jisubv bulum tawuto, “Ommang kvdv:nga, nolu onggom pa:toyc?” Bulu Bvm lubito, “Pa:mang.”

⁶Bv bulum luto, “Ollu:dok lagbvgpc csabdcm crrvgtoka, odo nolu asudowko pa:ycpc.” Cdcmpila bulu crrvgto, odokkc bulu cdcm sosa:la:tokumang, kapila:nc ongokvdv:dc bojcnamdokki.

⁷Cdc agom tadjvgla gvmvnnc tani:dcm sc:kom Jisubv aipc mc:dagnc Pitormc luto, “Cdc Ru:tumbv:mvn!” Cdvlo Simon Pitorbv tattoji cdc Ru:tumbv cmna, bvk attarcm gclvgsutoku, kapila:nc bv ager gernam lcgangc pvryinsula dungai, odokkc siycng asido:pc sumjvngkang.

⁸Cmpige:la ake agom tadjvgla gvmvnnc tani:kvdv:dc ollu: do angkang, onggo bi:nc csabdcm sola: sola:, kapila:nc bulu amo:dokkc mo:tc:manggai, cmpige:la lvngko go:j kvramko mo:tcngo:pc.

⁹Bulu tcmpvdo gvlendokudo, bulu mere:ycm vrga:pc parnam vmmcm pardopc ka:to, onggom odo ba:la lc:dopc, odokkc pitangcm.

¹⁰Jisubv bulum luto, “Noluk su:pagongkc crgabnam ongodok pirnyi pirumko boma:toka.”

¹¹Cdcmpila Simon Pitorbv ollu:do a:to odokkc csabdcm ru:yido:pc sowa:to, pirta pirtanc onggo bi:dandopc, cdc lvngko kolang yingo kolang pirumkai; odokkc cdc odokkvddvkodaggom, csabdc bettomang.

¹²Jisubv bulum luto, “Kajc rokom apinko dopo:lai,” Cdcmpidodcm agom tadjvgla gvmvnnv tani:kvdv:dok akoncsin Bvm tawupc saktabla:tomang, “No sc:kobv:n cmna?” Bulu kindagai cdc Ru:tumbvai.

¹³Jisubv gva:la rokom apindcm doto, odokkc cdcm bulum bito, cdcmv:pc ongokvdv:dcmsin.

¹⁴Cdc Jisubv agom tadjvgla gvmvnnc kvdv:dcm lcngkansunamdc Bvm sikolokkcm turmokunamdok lcdudokkc lcumka:boi.

¹⁵Bulu cdvlo rokom apindcm dongaptonc, Jisubv Simon Pitormc luto, “Simona Jo:nkc aowa, nolu scmbulumyam aiya:pc ngom mc:dagnci?” Bv Bvm luto, “C:v Ru:tuma; no cdcm kindag ngo nom aipc mc:dag.”

¹⁶Bv bvm luto, “Ngok me:r aowow sobenkvdv:dcm ka:sv:toka.” Lckoda Bv bvm tawuto, “Simona, Jo:nkc aowa, no ngom aipc mc:dang?” Bv Bvm luto, “Cv, Ru:tuma; no kindag jc ngo nom aipc mc:dag.” Bv bvm luto, “Ngok me:r sobenkvd:dcm ka:sv:mosv:toka.”

¹⁷Bv lckoda lcumnapc tawuto, “Simona, Jo:nkc aowa, no ngom aipc mc:dagyc?” Pitorbv mc:nyv:la mcngkang lcga:dc bvm “No ngom aipc mc:dang?” cmna lcwumkopc tawula:yam. Odokkc bv Bvm luto, “Ru:tuma, no appvngcm kindag; no kindag jc ngo nom aipc mc:dag.” Jisubv bvm luto, “Ngok bera sobenkvdv:dcm kanggabla dogo:molangka.

¹⁸Aroru:pc, aroru:pc, ngo nom lubidung, nolu cdvlo adji:la dunggaji, nok vgvngcm yc:rcgsuge:la no okolopc gvlv:daggaji gvto; cmpige:la no cdvlo mvjv:ycnc, nok alagcm laglenyc, odokkc akonc nom gvgabboyc odokkc no okolopc gvlv:ma:ji jo:bomna gvyc.”

¹⁹(Cdcm Bv kapinc sinamkokki bv Ru:ncpvncmc amincm gvmoycn cdcm lcngkanpc cmna luto.) Odokkc odok lcdupc Bv bvm luto, “Ngok lcdulo gvmvntok.”

²⁰Pitorbv nge:latsula buluk agom tadjvgla gvmvnncdcm ka:to sc:komc Jisubv aipc mc:dagaji, sc:kobv Bvk angkcng ru:yido dododcm kcgabkaji odokkc lukaji, “Ru:tuma, cdc sc:kobv:n nom jc tolvgpc cmna idu:nc?”

²¹Cdvlo Pitorbv bvm ka:tonc, bv Jisumc luto, “Ru:tuma sc tani:sok agomdc kapc iycn?”

²²Jisubv bvm lubito, “Cdcm mc:mvlo bv dungka:lang ngok gvlatkuma:sisscm, cdc nokkcpc kapc idang? Ngok lcdulo gvmvntok!”

²³Bvrrang kvdv:dok ara:lo cdc agomdc cdc ngombungkang jc cdc agom tadjvgla gvmvnna gvnc tani:dc sima:yc; cmpige:la Jisubv bvm lumangai jc bv sipcma:namc, cmpige:la, “Cdc ngok mc:namkomvlo bv ngo gvkuma:sisscm du:mvlo, cdc nokkcpc okopc iycn?”

²⁴Cdcna agom tadjvgla gvmvnncdc sc:kobv cdc agomkvdv:dok lukamcm lubidu:ji, odokkc sc:kobv agomkvdv:scm adtu:ji odokkc ngolu kindag jc Bvk lukanbinamdc arro.

²⁵Okodcmbulum Jisubv gerkaji ckvdaggom bojckoda agomc dung; cdc appv:dcm adya:mvlo, ngo mcngkvdag jc mo:pvsci avdc potindcm adko pv:ma:ya:pc cdcm adya:mvlo.