Read Mising JO:N 3 Bible Online

JO:N 3 - Mising bible

JO:N 3

¹Cdcmpidodcm Parisi: kvdv:dok Nikodimu cmna minnam tani: ako dungai, Jiwudi: kvdv:dok ru:tumpc incko.

²Cdc tani:dc Jisukolo:pc yumckoncm gva:to odokkc Bvm luto, “Rabbi, ngolu kindag jc no Ru:ncpvnckolokkc gvnc Luyirncko; kapila:nc sc:kosin sc nok kanggod kvdv:scm ila:mang, Ru:ncpvnbv Bvk lcdulo du:mvnma:mvlo.”

³Jisubv bvm lubito, “Aro-aroru:pc, ngo nolum lubidung, akoncm anupc otenkuma:-sisscm, bv Ru:ncpvnckc migom doko mo:pvdcm ka:begma:yc.”

⁴Nikodimu:bv Bvm lubito, “Kapcnu mvjvngka:bomvlo tani: akoncm otenyckuncm? Bv lckoda bvk ancdok aki: ara:bo dungge:la odokupc?”

⁵Jisubv lubito “Aro-aroru:pc, ngo nolum lubidung, akoncm asiloklang Yalodokki okuma:sisscm, bv Ru:ncpvnckc migom doko mo:pvdo:pc gva:a:ma:yc.

⁶Adinkokki adinc, odokkc Yalokokki onamdc yallo.

⁷Ngo ludag cmna nolu mc:la mcngapla:ma:pc iyoka, ‘Nolu anupc otenkosuru:pa:ycku.’

⁸Csarc okolopc yulv:dagji odopci yudag, odokkc nolu odok ngomnamdcm tadbegdag, cmpige:la cdc okolokkc yudagji nolu kinmang; cdcmv:pc yalodokki onam appv:dc cdcmpc idag.”

⁹Nikodimu:bv Bvm luto, “Kapc cdcmpc ila:ycn?”

¹⁰Jisubv bvm lubito “No Israeldok luyirncyc, odokkc cdcmpige:la:sinci cdcm mcngkinma:n?

¹¹Aro-aroru:pc, ngo nom lubidung, ngo okkom kindagji cdcm ludo, odokkc okodcm ngolu ka:tonc cdcm lukanbido; ckvdaggom no ngoluk lukanbinamcm torvgsumang.

¹²Ngo nom mo:pv agomcm lubidodcm odokkc no mc:jvgma:mvlo kapc ngo taycng among agomcm lubidodcm no mc:jvgycn?

¹³Sc:kosin taycng amo:pc gvsa:langkumang taycng amo:tokkc sc:kobv gvikaji: bv:ma:mvlo, tani:kc Awodc:ma:mvlo.

¹⁴Odokkc Mose:bv yumra:do tabvdcm darsa:to, cdcmv:pc tani:kc Awodcmsin la:sa:ru:pa:yc;

¹⁵odojen Bvm sc:kobvi mc:tinycnc turyarla du:nam turnamdcm pa:ycpc.”

¹⁶Kapila:nc Ru:ncpvncbv mo:pvscm cddvpcjc aipc mc:tonc Bv avkc atcr Awodcm bito, Bvm mc:jvgnc takamci sima:yc cmpige:la turyarla turla du:namcm pa:yc.

¹⁷Kapila:nc Ru:ncpvncbv Awodcm mo:pvso:pc mclvgto, mo:pvscm aimang cmna ludopcmang cmpige:la mo:pvscm jen Bvkkoki moturdopc cmna:mvn.

¹⁸Sc:kobv Bvm mc:jvgdonc aimang cmmang; sc:kobv Bvm mc:jvgma:nc kcba:lo aimang cmtoibong, kapila:nc bv Ru:ncpvnckc Awo atcrdok aminno mc:jvgtomang.

¹⁹Odokkc scmpcna kcbang ba:la lunamdc, jc pva:dc mo:pvso pvkang, odokkc tani:kvdv:dc pva:dcmyam kcmodcm aipc mcngkang, lcga:dc bulu buluk ager gernam kvdv:dc aimangai.

²⁰Kapila:nc sc:kobv aima:nc agercm gerycnc pvangcm tayumdag, odokkc pva:do:pc gva:mang, ckvma:mvlo bvk ager gernamkvdv:dc lenabyc.

²¹Ckvdaggom sc:kobv okodc arronc cdcm idagji pva:do:pc gva:dag, odomvlo bvk ager gernam kvdv:dcmjen aiyo:pc ka:begycpc cdcm Ru:ncpvnckc kangkolo ito cmna.

²²Odok lcdupc Jisubv odokkc Bvk agom tadjvgla gvmvnnc tani:kvdv:dc Judia:dok amo:pc gvkang; odo bv buluk lcdulo du:mvnto odokkc baptismongcm bito.

²³Jo:nbv:sin Ainundo:lang Salim anindok do:lu:do baptismongcm bila dungai, kapila:nc odo bojcrungko assc dungai; odokkc tani:kvdvngc gva:la baptismongcm la:dungai.

²⁴Kapila:nc Jo:nmc odopcsin makana:lo tummangada.

²⁵Cdcmpidodcm Jo:nkc agom tadjvgla gvmvnnc tani:kvdv:dc:la Jiwudi: akonc narc:monam agomko luka:mvnsula dungai.

²⁶Odokkc bulu Jo:nkodo:pc gva:to, odokkc bvm luto, “Rabbi, Sc:kobv Jordan kekonolo nok lcdulo dunganc, no sck agomcm lukanbikanc, Bv sc:na du:nc, baptismo bila, odokkc appvngc Bvkkolo:pc gvangamdung”

²⁷Jo:nbv lubito, “Sc:kobv:sin taycng amo:tokkc bima:mvlo okkomsin pa:ma:yc.

²⁸Nolu av avyc ngok agomcm lukanbidung, ngo:jc lukanc, ngo Kristobv:mang, cmpige:la ngom Bvmyam mcpo:lvgtag.

²⁹Sckkcpc yamncd du:nc cdc magbodc; magbodok yamgurdc, sc:kobv bvk kcra:do dagla lunamdcm taddagnc, magbodok agomdo airu:pc mc:podag; cdcmpidag sc ngok mc:ponamsc su:pak pvngka:bong.

³⁰Bv botta bottala gvpa:ru:yc, cmpige:la ngo adji:la gvpa:ru:yc.”

³¹Sc:kobv tayc:tokkc gvidonc Bv appvngcm bottcya:nc; sc:kobv mo:pvsokkcji bv mo:pvsokkc, odokkc mo:pvsok agomcm bv ludag; sc:kobv taycng amo:tokkc gvincnc bv appvngcm bottcya:nc.

³²Bv okodcm ka:tonc odokkc tadtonc cdcm lukanbidag, ckvdaggom sc:kosin Bvk lukanbinamdcm torvgsutomang;

³³sc:kobv Bvk lukamdcm taddagnc Bvk tubjeddcm scmpc tublvgdag, jc Ru:ncpvncbv arro.

³⁴Kapila:nc sc:kobvm Ru:ncpvncbv mclvgtagnc Ru:ncpvnckc lcgangc agom kvdv:dcm ludag, kapila:nc Bv kvla Yalodcm bimang;

³⁵Abudc Awodcm aipc mc:dag, odokkc appvng attarcm Bvk alaglo bito.

³⁶Sc:kobv Awodcm mc:jvgdagnc bvkkc turyartvla du:nam turnamdc dung; sc:kobv Awodok lunamdcm tadma:ycnc turnamcm ka:pa:ma:yc, cmpige:la bvkkolo Ru:ncpvnckc aglvngc du:yc.