Read Mising JO:N 6 Bible Online

JO:N 6 - Mising bible

JO:N 6

¹Odok lcdupc Jisubv Galil siycng asidok kekondo:pc gvkongka okodc Tiberiang siycnga:ji.

²Odo tani:yc bojcrungkonc Bvk lcdulo gvmvnkang, kapila:nc bulu cdc kinam ka:nc tani:kvdv:do mcngapla:ma:nam ager gernam kvdv:dcm ka:to.

³Jisubv adi: talc:pc re:sangkang, odokkc odo Bvk agom tadjvgla gvmvnnc kdv:dokki lckopc tedbosuto.

⁴Cdcmpidodcm gvbo:la gvnamdok, Jiwudi: kvdv:dok dopun-dojardcm donamdc pvngangkangaboi.

⁵Bvk amigcm bcrasa:la, odo, odokkc tani:yc bojcrungkopc Bvkkolo:pc gva:namdcm ka:la, Jisubv Pilipmmc luto, “Kapc iycn ngolu pitangko rcmvlo, sc tani:kvdv:sc doycpc?”

⁶Cdcm Bv bvm anka:la ka:pc cmna luto, kapila:nc Bv okkom iycji avdci kindagai.

⁷Pilipbv Bvm lubito, “Lvngko anyi adoli: arckopc pitangcm rcdaggomci buluk appv:dokkcpc adji: adji:opci pa:dopc pv:ma:yc.”

⁸Bvk agom tadjgla gvmvnnc tani:akonc, Andriwubv, Simon Pitorkc bvrodc, bvm luto,

⁹“Ko:ako sc dung sckkc anyak pitang borngokolang ongo pirnyiko du:ji; cmpige:la cddo:bulu okopc iycn siddvnc tani:kvdv: sokkcpc?”

¹⁰Jisubv luto, “Tani:kvdv:dcm tedtu:motok.” Cdcmpinamc odo bojcrungko ncsinc dungai; cdcmpila tani:kvdv:dc tedamkang, kvnamlok lv:ying anggo kvramkopc.

¹¹Jisubv odokkc pita:dcm la:sa:to, odokkc Bv cdcm aipai bitonc, Bv cdc tedla du:nc kvdv:dcm orto; cdcmv:pc ongodcmsin, bulu cddvkoi kodagaji.

¹²Odokkc cdvlo bulu dotv:namko dotoji, Bvk agom tadjvgla gvmvnnc kvdv:dcm luto, “Orngo:la mcpaknam kvdv:dcm langkumsutok, adjiokosin onyokma:dopc.”

¹³Cdcmpila bulu cdcmbulum gempa pvyingkolang pvnyikopc anyak pitang borngodok orngo:dcm tvkumsuto, cdc sc:kobulu dongatla mcpaktoji.

¹⁴Cdvlo tani:kvdv:dc cdc kanggod lcngkannamdcm ka:toji, bulu luto, “Sc:ru:bongkc aropakpc mo:pvso:pc gvpcnc lungor luncdc!”

¹⁵Bulu Bvm ke:ke:mo:re:p langa:la buluk migompc mopc cmnamdcm kinna:yam, Jisubv atcro:dc adi:pc gvpakkang.

¹⁶Yumc ayirnammc, Bvk agom tadjvgla gvmvnnc tani:kvdv:dc siycng asido:pc gvikang, ollungkolo angkang,

¹⁷odokkc Kapernaumpc kongkongkang. Odo yumckangaboi, odokkc Jisubv bulukkodo:pc odosin gvpv:mvnmangada.

¹⁸Siycng asidc lu:sangkangai kapila:nc bottcru:nc csarko sarsangkangai.

¹⁹Bulu mail awum appi:ko ko:tobong, bulu Jisumc siycng asido lambc gvdopc odokkc buluk ollung kcra:do:pc gva:dopc ka:to. Bulu pcsokangai, cmpige:la Bv bulum luto,

²⁰“Sc ngo:mvn; pcsoma:pcka.”

²¹Odo bulu Bvm ollung ara:do a:bopc mc:pokang, odokkc oddung ollu:dc tcmpvdo konga:to bulu oko amo:do:pc ko:dungaji.

²²Longkondo kekondo du:paknc tani:kvdv:dc ko:nam ollung asongko odo du:pakkang, odokkc, Jisubv ollu:do Bvk agom tadjvgla gvmvnnc tani:kvdv:do gva:mvnmangai, cmpige:la agom tadjvgla gvmvnnc tani:kvdv:do atcrongc gvpakkang.

²³Cdcmpidaggomsin, Tiberia:dokkc ollungc pv:do oko mo:takdo Ru:tumbv aipai bige:la buluk pitangcm dokaji.

²⁴Cdcmpila tani:kvdv:dc ka:to jc Jisubv odo kamangai, Bvk agom tadjvgla gvmvnnc tani: kvdv:dc:singom, bulu av avyc ollung kvdv:do a:to odokkc Kapernaumpc, Jisumc mala gvkang.

²⁵Bulu kekondo Bvm pangkunammc, bulu Bvm luto, “Rabbi, no cdvlo so:pc gvton?”

²⁶Jisubv bulum lubito, “Aropakpc, aroru:pc, ngo nolum lubidung, nolu ngom mcngapla:ma:nam kanggodcm ka:begnamkokkimang, cmpige:la nolu pv:namkopc pitangcm dola:mvn madu:n.

²⁷Yogpakpcnc donam tv:namdok lcgangc agercm geryoka, cmpige:la oko donamdc turyarla turnamdokkcpc du:tvdagnc odok lcga:pc ilangka, okodcm tani:kc Awodc nolum biycji; kapila:nc bvkkolo Abu Ru:ncpvncbv bvk muorcm tubjedlvgdag.”

²⁸Odo bulu Bvm tawuto, “Ru:ncpvnckc ager gerpcnammvlo ngolu okkarcm ipcnammcn?”

²⁹Jisubv bulum lubito, “Ru:ncpvnckc agerdc scmpcna, jc sc:kom Bv mclvgtagji nolu Bvm mc:jvgtoka.”

³⁰Cdcmpila bulu Bvm tawuto, “cmpcmvlo no oko kanggodcm lcngkanycn, ngolu ka:dopc, odokkc nom mc:tindopc? No oko agercm gerdon?

³¹Ngoluk abukvdv:dc yumra:do mannangcm doka; cdcm adla lc:namdcmpc, ‘Bv bulum taycng amo:tok pitangcm dodopc bika.’ ”

³²Odo Jisubv bulum lubito, “Aroru:pc, aroru:pc, ngo nolum lubidung, taycng amo:tokkcm sc:kobv pitangcm bikaji cdc Mose:bv:mangai, ngok Abubv:mvn nolum aro pita:dcm taycng amo:tokkcm bidang.

³³Kapcnc Ru:ncpvnckc donamdc taycng amo:tokkc oleddag, odokkc mo:pvscm turnamcm bidag.”

³⁴Bulu bvm luto, “Ru:tuma, ngolum lo:dcm cdc pita:dcm bi:ka.”

³⁵Jisubv bulum lubito, “Ngo:na cdc turkunamdok pita:dc; sc:kobv ngokkolo:pc gva:ycnc bv kcno:ma:yc, odokkc sc:kobv ngom mc:jvgycnc bv cdvlosin tv:lv:ma:yc.

³⁶Ckvdaggom ngo nolum ludung jc nolu ngom ka:begto odokkc ckvdaggom mc:jvgmang.

³⁷Abukc ngom binam appv:dc ngokkolo:pc gva:yc; odokkc ngokkolo:pc gva:ncdcm ngo cdvlosin mcnpakma:yc.

³⁸Kapila:nc ngo taycng amo:tokkc gvidung, ngok avkc mcngkamdcmpc gerkapcmang, cmpige:la sc:kobv ngom mclvgtagnc Bvk mcngkamcm gerkapc;

³⁹odokkc scmpc Bvk mcngkamdc ngom sc:kobv mclvgtagnc, jc ngo cdc ngom binam appv:dcm akosin yogmopcma:nammc, cmpige:la du:tcr dungapdo la:sangam-kupcnammc.”

⁴⁰Kapila:nc sc ngok Abukc mcngkamdc jc sc:kobvi Awodcm ka:doji odokkc mc:jvgdoji Bvm bvkkolo turyarla turnamdcm pa:yc; odokkc bvm ngo du:tcr longcdo sosa:ycku.

⁴¹Jiwudi: kvdv:dc odo bvn-bvnaitakkang Bvm, kapila:nc Bv luto, “Ngo cdc taycng amo:tok olednc donamdc.”

⁴²Bulu luto, “Sc Josepkc awo Jisubv:ma:lang, sck ancdcmlang abudcm ngolu kindagji? Kapc Bv cmpcm su:pak, ‘Ngo taycng amo:tokkc gvidung cmna luycn’?”

⁴³Jisubv bulum lubito, “Nolu av avkvdv:dc bvnbvnaiyok.

⁴⁴Sc:kosin ngokkolo:pc gva:la:mang Abudc sc:ko ngom mclvgtagji bvm mc:bomola gva:moma:mvlo; odokkc bvm ngo du:tcr dungap longcdo turmoycku.

⁴⁵Cdcm lungorlunam kvdv:do adla lc:tag, ‘Odokkc bulum Ru:ncpvnc kokki luyircm lubiyc.’ Sc:kobv Abudokkcm tadla tadyirsutonc ngokkolo:pc gva:dag.

⁴⁶Sc:kobv Ru:ncpvnckotokkc mclvgnammcnc bv:ma:mvlo sc:kosin Abudcm kangkvmang; Bv Abudcm kangkvtak.

⁴⁷Aroru:pc, aroru:pc, ngo nolum lubidung, sc:kobv mc:jvgdagnc turyarla turnamc dung. Ngo:na turnamsok donamdc.

⁴⁸Noluk abukvdv:dc yumra:do mannangcm doka,

⁴⁹odokc bulu sikang.

⁵⁰Cdc taycng amo:tok gvinc donamc, tani: akonc cdcm domvloi sima:yc.

⁵¹Ngo:na turnc donamdc okodc taycng amo:tokkc gvidu:ji; sc:koiyc akonc sc donamscm domvlo, bv lo:dvscm turyc: odokkc mo:pvsok lcgangc turnam bipcnam donamdc ngok adinc.”

⁵²Jiwudi: kvdv:dc odo buluk buluk ara:lo scmpc lula luker-luyer mvnsukang, “Sc tani:sc Bvk adincm dodopc bila:ycn?”

⁵³Jisubv bulum luto, “arorupc nolu tani:kc Awodok adindcm doma:sisscm odokkc Bvk i:dcm tv:ma:sisscm, nolukkc avkc turnamc kamang;

⁵⁴sc:kobv ngok adincm doycji odokkc ngok i:ycm tv:ycji turyarla turnamc dung, odokkc ngo bvm du:tcr dungap longcdo turmoycku.

⁵⁵Kapila:nc ngok adinsc aropakpci donamc odokkc ngok i:dc aropakpci tv:namc.

⁵⁶Sc:kobv ngok adincm doycji odokkc ngok i:ycm tv:ycji ngok dungkodo lcdulo du:mvn-dagmvndag, odokkc ngo:sin bvk dungkolo du:mvndo.

⁵⁷Turra du:nc Abudc kapc ngom mclvgtoji, odokkc ngo Abukc lcgangkokki turdu:nc, cdcmpc sc:kobv ngom doycnc ngok lcgangkokki turyc.

⁵⁸Sc:na donamdc okodc taycng amo:tokkc gvidu:nc, abukvdv:dc doge:la sinamdcmpinc mang; sc:kobv sc donamscm doycnc lo:dvscm turyartvla du:yc.”

⁵⁹Scm Bv kumko okumlo lubika, Kapernaumdo Bv luyirla du:dodcm.

⁶⁰Agom tadjvgla gvmvnnc tani:kvdv:dok bojcrungkonc, cdcm cdvlo tattoji, luto, “Sc tornc agomko; cdcm sc:ko tadla:ycncm?”

⁶¹Jisubv cmpige:la, Bvk agom tadjvgla gvmvnnc kvdv:dc cdcm bvnbvnaila ludung cmna kinna, bulum luto, “Nolu cdcm tadnyi:pci taddang?

⁶²Cmpcmlo tani:kc Awodcm Bv po:pc okolo dungaji dc:sa:dokupc ka:mvlo kapc iyya:n nolu?

⁶³Cdc yalodc:mvn turnamcm bincdc, adindc oko arrcsin kamang; ngok noluk agom lunamkvdv:dc yallolang turnamc.

⁶⁴Cmpige:la noluk ara:lo sc:kobulu mc:jvgdagji dung.” Kapila:nc Jisubv lua:dan-dokkoboi kindagai sc:kobulu cdc mc:jvgma:nc kvdv:dca:ji, odokkc cdc sc:kobva:ji cdc Bvm mirupc tolvgpcncdc.

⁶⁵Odokkc Bv luto, “Cdcmpila:na ngo nolum lubitonc jc Abudc:ma:mvlo sc:kobv:sin ngokkolo:pc gva:la:mang Abudc togcsuma:mvlo.”

⁶⁶Odok lcdudokkc bojcrungko agom tadjvgla gvmvnnc kvdv:dc gvladamkangku odokkc Bvk lcdulo cdvlosin gvmvntokuma:bong.

⁶⁷Jisubv vyvngkolang anyidcm luto, “Nolusinyc gvpaklv:dakkun?”

⁶⁸Simon Pitorbv bvm lubito, “Ru:tuma, ngolu sckkolopcn gvycn? Nokkc lo:dvscm turyarla turnamdcm binc gomugdc dung,

⁶⁹Odokkc ngolu mc:jvgtobong, odokkc ngolu kintobong jc no Ru:ncpvnckc angunncdc.”

⁷⁰Jisubv bulum lubito, “Ngo nolum bala balenmangalang, vyvngkolang anyidcm, odokkc nolukkolo akonc uiyc?”

⁷¹Bv Simon Iskariotkc awo Judangkc agomcm luto, kapila:nc bv, vyvngkolang anyidok akkai, Bvm sc:ko miru alaglo tolvgpcncdcaji.