Read Mising AGER KVDVNG 1 Bible Online

AGER KVDVNG 1 - Mising bible

AGER KVDVNG 1

¹Adpo:nam potindo, O Tiopilu, ngo Jisukc gerbomnam odokkc luyirnam appv:dcm adto,

²cdvlo Bvm tayc:pc la:sa:tokunc odo longcdo:pc, Bv Agunnc Yalodokki lulvg luge:la Bv sc:kobulum balentagaji mclvgnam ager gernckvdv:dcm.

³Bulum Bvavdcturrangkula Bvk du:g kostom gvdag lcdudo bojcrung lcngkansubinam kvdv:dokkc Bv lcngkansuto, bulum yi:pi longcdok ara:do lcngkansudokudo, odokkc Ru:ncsa:nckc migom doko mo:pvdok agomcm lubi lubila.

⁴Odokkc odo buluk lcdulo du:dodcm Bv bulum Jerusalemdcm mcge:la gvpakma:dopc luto, cmpige:la Abudok pesubinamdok lcgangc toya:la du:dopc luto, okodcm, Bv luto,

⁵“Nolu ngokkolok tadtobong, kapila:nc Jo:nbv asikokki baptismongcm bito, cmpige:la bojc longcko ima:dapc nolum Angunnc Yalokokki baptismongcm biyc.”

⁶Cdcmpila cdvlo bulu lckopc gvkumsutonc, bulu Bvm tawuto, “Ru:tuma suk ayirv:soi no Israeldok migom dokodcm la:lenbiyckun?”

⁷Bv bulum luto, “Nolukkcpc cdc oko ayirdc cdcmanggom oko po:lodcm Abudc ru:la lc:tagnc Bvk avkc ilanggvlangki cdcm kinpcnammang.

⁸Cmpige:la nolu tornamcm pa:ycpc Angunnc Yalodc cdvlo noluk tayc:lo:p pvnga:ycji, odokkc nolu ngok lukanbincpc ilangka Jerusalemdo odokkc Judiang appv:do odokkc Samariangdo odokkc mo:pvsok du:tcrpc.”

⁹Odokkc Bv cdvlo cdcm lutonc, bulu ka:la du:dodcm, Bvm tayc:pc la:sa:to, odokkc mukkang atakkonc Bvm ka:pv:langkuma:dopc dc:pakbomkangku.

¹⁰Odokkc bulu taycngpc Bvk dc:pakkunamdcm ka:sa:tvla du:dodcm, ka:toka, tani: anyikonc buluk kcra:do kamponc attar gcge:la dagangkang, odokkc luto,

¹¹“Galildok Tani:kvdvnga, nolu kapila tayc:to:pc ka:sa:tvla du:n? Cdc Jisumc, sc:kom nolukkolokkcm taycngpc gvbokangkunc, cdcmv:pc lckoda gvlatycku nolu kapc tayc:pc dc:dokupc Bvm ka:tonc.”

¹²Odokkc bulu Jerusalemdo:pc Olib cmnam adi:dokkc gvlattoku, okodc Jerusalemdok anindagaji, ager germa:pc du:do longgcm gvnam kvddongko motc:dagai;

¹³odokkc cdvlo bulu gva:tokuji, bulu taycngkc du:nc okum soyardo:pc gvsa:to, okolo bulu dunggaji, Pitorbv, Jo:nbv, Jakobbv odokkc Andriwubv, Piliplang Tomabv, Bartolmiwulang Matiubv, Jakobbv Alpaeukc awodc odokkc Simonbv Lckolakkoma:ncdc odokkc Jakobbv Juda:kc awodc.

¹⁴Cdc appv:dc av avkvdv:dc asin mc:nam lckko:pc mc:to nc:ng kvdv:dokki kumnamno lckko:pc odokkc Jisukc anc Meri:bv, odokkc bvk bvrokvdv:dokki.

¹⁵Odo longckvdv:do Pitorbv bvrokvdv:dok ara:do dagrobto (tani:kvdv:dc lckko:pc lvngkokolang yi:nyikai,) odokkc luto,

¹⁶bvrokvdvnga astrong agomdcm potindo adkamdcmpci ipcnammc, okodcm Angunnc yalodc po:pcbong Dawidkc nappa:dokki lutoji, Juda:kc agomcm, sc:kobvm sc:kobulu Jisumc ycnggabtonc lcngkanbincpc ika:ji.

¹⁷Kapila:nc bv ngoluk ara:so kvtc:nammai, odokkc bv ipcnammcm sc lutad ager gernamso bitungai.

¹⁸(Cdcmpidodcm tani:dc bvk germur ager gerla pa:nam mo:takko rcto; odokkc mittukdc tu:yi:la kcdledla bv kvdvsukodo odadsula dadporkang odokkc bvk aki:dok rokki: appv:dc budsurra lengkang.

¹⁹Odokkc cdc Jerusalemdok du:nc appvngc kinabto, odoyam cdc among intagdcm i: mo:tagc cmto.)

²⁰“Kapila:nc cdcm ni:tom potindo adtak, ‘Bvk dungko-dakkodcm mongkumotoka odokkc odo sc:kosin du:ma: dagma:pc ika:langka;’ odokkc ‘Bvk Ru:tumkc agerdcm ammem la:motoka.’

²¹“Cdcmpila tani:kvdv:dok akonc sc:kobv ngoluk lcdulo lckopc gvmvnkanc ru:tum Jisubv ngoluk gvlen gva:dodo

²²Jo:nkc baptismo bidodokkc gvrobbomna Bvm tayc:pc ngolukkolokkcm gvbodoku longcdo:pc sidc tani: kvdv:dok akonc bvk sikolokkc turkunamdok lukan lubincpc ipc iyc.”

²³Odokkc bulu anyiko la:lento, Josepmc Barsabba cmnamdcm, sc:kom Justu cmna minyotla mintungaji, odokkc Mettiabv,

²⁴Odokkc bulu kumge:la luto, “Ru:tuma, sc:kono tani: appv:lok asincm kinabdagji,

²⁵sc anyisok sc:komc no balentang sc ager gernamso idopc odokkc mclvgnam ager gerncpc idopc okodokkc Juda:bv gvyotla gvpakka:ji, bvk avkc mo:di:do:pc.”

²⁶Bulu avkvdv:dc lotari: ku:la ka:namc kanggabnamdc Mettiakolo angkang; odokkc bvm vyvngkolang akodok lcdulo lckopc amindcm adlvgto.