Read Mising AGER KVDVNG 11 Bible Online

AGER KVDVNG 11 - Mising bible

AGER KVDVNG 11

¹Cdcmpidodcm mclvgla ager germonam kvdv:dc:la bvrokvdv:dc sc:kobulu Judia:do dunganc Angunc ope:kvdv:dc:sin Ru:ncpvnckc agomcm torvgsuto cmna tadbegto.

²Cdcmpila Pitorbv cdvlo Jerusalempc gvlattokuji, gatpuknam kcrc:dc bvm lujcglurcgla luto, scmpc lula,

³“Kapila no gatpukma:nam tani:kvdv:do:pc gvkan odokkc buluk lcdulo domvnkan?”

⁴Cmpige:la Pitorbv bulum akon lcdulok akonpc lulen lua:la lurobbombikang:

⁵“Ngo Joppa nogordo kumna dungai; odokkc ngo kinsuma:pc singakla du:dom ngo kangorko ka:to, okkaiko oleddopc, bortapaknc gasorkoncmpc, taycng amo:tok su:k appi:lokkc ledyi:dopc; odokkc cdc ngokkolo:pc pv:yi:do.

⁶Cdcm ka:namc appvng simvnclang sirrc dcmpetla donamc odokkc amo:bo ngcnggo:nc odokkc do:mvrtok pcttangcbulu.

⁷Odokkc ngom lunc gomugko tadbegto, ‘Darobtok, Pitora; dcmkela dotok.’

⁸Cmpige:la ngo luka, ‘Ma:, Ru:tuma; kapila:nc cmmumcmpinncm manggom narcma:ncm cdvlosin ngok nappa:sokki dokvmang.’

⁹Ckvdaggom cdc gomugdc lckoda taycng tokkc lutvto, ‘Ru:ncpvncbv okodcm mopu:tobo:nc no cdcm cmmum cmpcru:ma:yc.’

¹⁰Cdcmpc lcwumkopc ikang, odokkc appv:dcm taycngpc la:sangamtoku.

¹¹Odo ayirardo odo okumdo:pc tani: awumko gvpv:do okolo ngolu dunggaji, ngokkolo:pc Kaesaria:dokkc mclvgnammc.

¹²Odokkc Yalodc ngom buluk lcdulo gvmvndopc luto, o:kosin angupc mc:mvnsuma:pc. Sc bvro akkc:sc:sin ngom gvbosuka, odokkc ngolu cdc tani:dok okumdo:pc gva:to.

¹³Odokkc kapc taycng among lutad luncdc bvk okumdo dagge:la ludagaji ngolum lubito, ‘Joppa:pc Mclvgla Simonmc Pitor cmnamdcm gogmotok.

¹⁴Bv nolum lutadko lubiycpc odokkci no:lang nok okum crang appv:dc turycpc.’

¹⁵Ngo agomdcm lurobbomnamc, Angunnc Yalodc buluk tayc:lo dc:yi:kang ngolukkolo dc:yingarpo:dodcm ikamardcmpc.

¹⁶Odokkc ngo Ru:tumkc agomdcm mc:pa:toku, kapc bv lukaji, ‘Jo:nbv asilo baptismongcm bika, cmpige:la nolum Angunnc Yalodokki baptismongcm biyc.’

¹⁷Ru:ncpvncbv c:mo:pinc amancm ngolum bikamv:pc bulumsin bidagmvlo ngolu Ru:tum Jisu Kristomc cdvlo mc:jvgtonc, ngo:nu sc:kon cmpcmvlo Ru:ncpvncmc motumpc!”

¹⁸Cdvlo bulu cdcm tadtoji bulu aso:pc dungapkang odokkc bulu Ru:ncpvncmc amincm gvmoto, scmpc lula, “Cmpcmvlo Angu opvnkvdv:dcmsin Ru:ncpvncbv turnamcm pa:dokupc asin mc:dvrra mcngkutsunamcm bitu:bong.”

¹⁹Cdcmpidodcm sc:kobulu dugpitsuka:ji Stipenmc ipusire:ycm ila mokedodokkc Poenisialang Sipru appv:pc odokkc Antiokpc gvngapkang.

²⁰Cmpige:la odokbuluk akke tani:yc dungai, Sipru dokkclang Sirene dokkc sc:kobulu Antiokdo:pc gvla Girikkvdv:dcmsin lutadto, Ru:tum Jisumc lutad luyirbila.

²¹Odokkc Ru:tumkc alagc bulum lagribomna dungai, odokkc odok bojcrungc mc:jvgnc kvdv:dc Ru:tumkolo:pc gvlattoku.

²²Odok lutaddc Jerusalemdo du:nc mondoli:pc pvngkang, odokkc bulu Barnaba:mc Antiokpc mclvgto.

²³Cdvlo bulu gvla Ru:ncpvnckc ayangcm ka:begtoji, bv mc:pokang; odokkc Ru:tummc mc:jvgla du:ncpc idopc luyircm luto lo:dvscm mc:la gvangkunamdcmpc du:dopc;

²⁴Kapila:nc bv ainc tani:kai, Angunnc Yallolang mc:jvgc bi:danpc du:nc. Odokkc bottaru:nc mc:jvgnc kcrcngkonc Ru:tumkolo:pc gvsedangkang.

²⁵Odokkc Barnaba:bv Soulmc makapc Tarsupc gvka;

²⁶odokkc bvm cdvlo pa:toji, bvm bv Antiokpc gvbotoku. Dv:takpagdo bulu mondoli:dok lcdulo du:mvnto, odokkc tani:kvdv:dok bottcru:nc kcrcngcm poyirto; odokkc Antiokardo agom tadjvgla gvmvnnckvdv:dcm Kristanc cmna gogpo:to.

²⁷Cdcmpidodcm odo longckvdv:do Lungor Lunckvdv:dc Jerusalemdokkc Antiokpc gvngapkang.

²⁸Odokkc odokbuluk Agabu cmnamkonc dagrobla Yalodokki luno:bito jc mo:pvso bottcru:pc dopa:tv:pa:ma:namko lenyc; odokkc cdcmpc Klaudiukc ayirdo ikang.

²⁹Odokkc agom tadjvgla gvmvnnckvdv:dc, appvngc av avkc ilang gvla:nammcmpc, Judia:dok du:nc bvrrang kvdv:do:pc dogangcm bisupc cmna ru:sula mclvgto;

³⁰odokkc bulu cdcmv:pc ito, abv:nc kvdv:do:pc Barnaba:kclang Soulkc alaklo mclvgla.