Read Mising AGER KVDVNG 16 Bible Online

AGER KVDVNG 16 - Mising bible

AGER KVDVNG 16

¹Odokkc bv Derbi:do:pclang Listra:do:pcsin gvto odo agom tadjvgla gvmvnnc tani: ako dungai, Timoti: cmnamko, Jiwu nc:ng akodok awokonc sc:kobv mc:jvgnc tani:ka:ji; cmpige:la bvk abudc Girikkai.

²Listra:do:lang bvrokvdv:dc bvm aipc aincko cmna lunamkai.

³Poulbv Timoti:mc bvm gvjonsudopc mato; odokkc bvm bv goga:to odokkc odok mo:takdok Jiwukvdv:dok lcgangc bvm gadpukto, kapila:nc bulu appv:dc kindagai jc bvk abudc Girikkai.

⁴Bulu nogordok buluk gvtc:dok gvbomnammc, bulu bulum kangkvycpc cmna ru:lennamkvdv:dc lubito okodcm mclvgla ager germonam kvdv:dokkilang abv:nc kvdv:dokki sc:kobulu Jerusalemdo dungaji.

⁵Cdcmpila mondoli: kvdv:dcm mc:jvgkokki kvnggv:moto, odokkc bulu longgcm longgcm bojcbomkang.

⁶Odokkc bulu Pirgiangclang Galatiang mo:takvkvdv:do gvgo:to Asiado agomdcm lubinamdcm Angunnc Yalodokki lutumla:yam.

⁷Odokkc cdvlo bulu Misia:dok kekonpc gvtoji, bulu Bitinia:pc gva:pc cmna kangkvto, cmpige:la Jisukc Yalodc bulum gvmotomang;

⁸cdcmpila, Misia:dok gvpatla gvla, bulu Troa:pc gvtokto.

⁹Odokkc yumcdo Poulmc kangorkonc lcngkansuto: Makedonia:dok tani:konc dagge:la bvm kumna:sola gogto odokkc scmpc lula, “Makedonia:so:pc gvtok odokkc ngolum ka:dumsuteika.”

¹⁰Odokkc cdvlo bv kangordcm ka:toji oddung ngolu Makedonia:pc gvpc cmna mato, Ru:tumbv ngolum tadponc lutaddcm bulum lubita:ka cmna gogtung cmna ru:scgge:la.

¹¹Troa:dokkc ko:la gvla:yam, ngolu yvggcmpc Samotra:spc ko:la gvto, odokkc odok longkondo Neapoli:pc,

¹²odokkc Pilippi:pc, okodc Makedonia jiladok bottcya:nc nogorcji, odokkc Roman Pa:m dokka:ji. Ngolu nogordo lowum lo:pi:ko du:tedto.

¹³Odokkc ager germa:pc yodla du:do longcdo gvlenna mo:ro:pc a:nc ru:yido:pc gvto, okolo ngolu mc:dungaji kumko mo:takko du:pc cmna, odokkc ngolu teda:la lckopc gvkumsunc nc:ngkvdv:dcm luto.

¹⁴Noluk agom tadnckvdv:dok akonc Tiatira nogordok Lidia cmnam nc:ngkai, ba:yomcmpc genc attarcm konckonc, sc:kobv Ru:ncpvncmc kumncka:ji. Ru:tumbv bvk asindcm Poulbv okodcm lubitoji cdcm tadgapdopc kuge:moto.

¹⁵Odokkc bvm cdvlo baptismo bitoji, bvk crang appv:dokki lckopc, bv ngolum kumna luto, scmpc lula, “Nolu ngom Ru:tummc mc:jvgla mc:ncko cmna mc:tomvlo, ngok okumpc gvla du:ta:ka.” Odokkc bv ngolum airu:pc lutvto.

¹⁶Ngolu kumko okumdo:pc gvla du:namc, ngolum pagnc ko:ncngkonc rvgsuto sckkc aima:nc ager gernc yaloko dungaji odokkc bvk ru:tumdcm uiagomcm lula aipc arrcm pa:modungaji.

¹⁷Bv Poulkclang ngoluk lcdu lcdulo gvmvnto, scmpc jc:la lula: lula, “Sc tani:kvdv:sc Appvngcmyam Owudyangkodo Du:ncdok Ru:ncpvnckc ager gerya:nc, sc:kobulu turnamdok lambcdcm nolum lutadla lubidu:ji.”

¹⁸Odokkc cdcm bv bojcrung longcko lutvto. Cmpige:la Poulmc lugo-luroto, odokkc ngengkutsula yalodcm luto, “Ngo lurvdla ludung nom Jisu Kristokc aminno gvlentok.” Odokkc cdc odo ayirardo gvlenkang.

¹⁹Ckvdaggom bvk ru:tumdc cdvlo ka:toji jc buluk pa:barra pa:pcnamdc gvpakkang, bulu Poulmclang Sila:mc ycnggabto odokkc bulum attar kokodo:pc sobomna gvkang migom donckvdv:dok kcra:pc;

²⁰odokkc cdvlo bulum kcba: ba:dom tadya:nc odokkc lulvg luncdok kcra:do:pc bulum boma:toji bulu luto, “Sc tani:kvdv:sc Jiwuc odokkc bulu ngoluk nogorscm urusare:modung.

²¹Bulu itcng gvtcngcm luyirdag okodc ngolu Romankvdv:dokkcpc lujvg lurodok lukampc torvgsula:mang cdcmpcmanggom iyitgvyitmang.”

²²Cdc yadkumsunc tani:kvdv:dc bulum dcmkodo dcmtc:mvnto; odokkc kcba: ba:dom tadya:nc odokkc lulvg lunc tani:dc bvk gcnam attarkvdv:dcm petsotsuto odokkc bulum yogvr danggi:koki dcmdopc lulvgto.

²³Odokkc bulum makana:lo tumto, makana:dok kanggabya:ncdcm bulum aiyo:pc lc:dopc lurvdlvgla luge:la.

²⁴Bv cdc lurvdnamdokki, bv bulum arangkc makana:do tumto odokkc buluk alckvdv:dcm yc:jonna lc:nancdo yc:jonna lc:to.

²⁵Cmpige:la yumc kvdvsudodo Poulbv:lang Sila:bv Kumna:la Ru:ncpvnckolo:pc ni:tom mola dungai odokkc makana:dok tumnam kvdv:dc buluk monamdcm tadla dungai,

²⁶odokkc vgcmpc bottc:ru:nc tarcmo:tonko odo tonkang, cdcmpc tonka:nc jc makana:dok mogabnanc kvdv:dci cngunkang; odokkc oddung yabgo appv:dc kugeyamkang odokkc appvngkc ikoli:kvdv:dc oge:yamkang.

²⁷Makana:dcm kanggabya:ncdc cdvlo kinsuka:ji odokkc ka:to jc makana:dok yabgodc moge:la dung, bvk yoksadcm bv sadlenge:la bv avdc nvgkesula sipc cmna ito, makana:dok tumna lc:namkvdv:dc dugamkangku cmna mc:la.

²⁸Cmpige:la Poulbv bottapakpc jc:la lusangkang, “No avyc mokesuyoka, kapila:nc ngolu sc appvngc dung.”

²⁹Odokkc bv saki:ko mala koto odokkc duga:to, odokkc pcsola jinna Poulkcla: Sila:kc kcra:do bv kcdangkang,

³⁰odokkc bulum la:lenbomge:kula luto, “Tani:kvdvnga, ngo o:karko ipcnammcn?”

³¹Odo bulu luto, “Ru:tum Jisukolo mc:jvgtoka, odo no turycpc, no:lang nok okum crangc.”

³²Odokkc bulu Ru:tumkc agomdcm bvm lubito odokkc bvk okumdok du:nc appv:dcm.

³³Odokkc bv odo yumc ayirv:do bulum gvbokang, odokkc buluk dcmjognam kvdv:dcm vrpu:bito, odokkc bvm bagcmpc baptismo bvk crang appv:dokki lckko:pc bito.

³⁴Odokkc bv bulum bvk okumdo:pc gva:botoku, odokkc bulum donam tv:namcm bito; odokkc bvk okum cra:dok appv:dokki bv mc:pomcnganto bv:jc Ru:ncpvnckolo mcjvgto cmna.

³⁵Ckvdaggom cdvlo pva:la longcka:ji, kcba: ba:dom tadya:ncdc sipai kvdv:dcm scmpc lula mclvgto, “Cdc tani:kvdv:dcm gvmotokuka.”

³⁶Odokkc makana:dcm kanggabya:ncdc cdc agomdcm Poulmc lubito, scmpc lula, “Kcba: ba:dom tadya:ncdc nolum gvmodokupc mclvgtok; su:pak cdcmpila mcnganna gvlenna gvkangka.”

³⁷Cmpige:la Poulbv bulum luto, “Bulu ngolum appvngkc ka:pc dcmto, aimang cmna luma:nam tani:kvdvngcm, sc:kobulu Roman tani:ycji, odokkc ngolum makana:lo tumto; odokkc bulu ngolum su:pak lc:silai mclvgyckun? Ma: bulum avkvdv:dcm gvmotok odokkc ngolum la:lenmotokuk.”

³⁸Sipaikvdv:dc cdc agomkvdv:dcm kcbang agom tadya:ncdcm lubitoku, odokkc bulu Roman amo:lok tani:yc cmna tadla bulu pcsokang;

³⁹cdcmpila bulu gvla bulum lude:suto odokkc bulu bulum la:lenge:la nogordokkc gvlenna gvdokupc luto.

⁴⁰Cdcmpila bulu makana: dokkc gvlenna gvkangku, odokkc Lidia:dcm gvla ka:to, bulu bulum aipc luyirto odokkc gvpakkang.