Read Mising AGER KVDVNG 17 Bible Online

AGER KVDVNG 17 - Mising bible

AGER KVDVNG 17

¹Cdcmpc bulu cdvlo Ampipolisdo:lang Apollonia:dok ko:la gvtoji, bulu Tissalonika:do:pc gvto, okolo Jiwukvdv:dokkc kumko okumko dungaji.

²Odokkc Poulbv gva:to, bvk agin gvkamv:pc, odokkc kvnvd longc awumkopc buluk lcdulo bv agomcm svgka:mvnsuto astro:dok lcganc,

³Kristokcpc ipusire: pangge:la sikolokkc turkupcnamai cmnamdcm lulen-lua:la lubila, odokkc scmpc lula, “Sc Jisuscm sc:kom ngo nolum lutadcm lubidu:ji, bv:na Kristodc.”

⁴Odokkc bulukkodok akedcm lula mcnga:moto odokkc Poulkclang Sila:kc lcdulo lckokang; Girik kvdv:dok mcnggab garabnc kvdv:dc odokkc nc:ng kvdv:dok bottc bottcnc kvdv:dc.

⁵Cmpige:la Jiwukvdv:dc ncdagai odokkc tani:kcrc:dok aima:n ajonckkc jonsuge:la, bulu tani:kvdv:dcm kcrcngkopc yadkumsumoto, nogorpakdcm jcnggumna jc:moto, odokkc Jasonkc okumdcm moa:bomkang, bulum tani:kvdv:dok kangkolo:pc la:lenpc cmna mala.

⁶Odokkc bulu bulum mabegla:ma:la:yam, bulu Jasonmc:lang bvrrangkvdv:dok akkem nogordok migomdonc kvdv:dok kcra:lo:pc tvglenamto, scmpc jc:la, “sctani:kvdv:sc sc:kobulu mo:pvscm kukup-kulab-modu:nc so:pcsin gvdung,

⁷odokkc Jasonbv bulum torvgsuto; odokkc bulu appv:dc Kaesarkc lulvgnamdcm tadma:pc agercm idung, scmpc lula jc migom akoda dung Jisu cmnamko.”

⁸Odokkc nogordok migom donckvdv:dc:lang tani:kvdv:dc cdcm tadge:la mcngkin-mc:para:tomang.

⁹Odokkc bulu Jasonkolok odokkc akedok atvkosin ima:nam agomdcm pa:toji, bulu bulum mclvgtoku.

¹⁰Bvrrangkvdv:dc lomdanna Poulmclang Sila:mc yumcdo Birea:pc mcgcnnvgla mclvgto; odokkc cdvlo gvpv:toji bulu Jiwu kvdv:dok kumko okum kvdv:do gva:to.

¹¹Cdcmpc inamc cdc Jiwukvdv:dc Tissalonika kvdv:dok Jiwukvdv:dcmyam asin aiya:dagai, kapcnc bulu airu:pc longgcm longgcm astorong agomkvdv:dcm lukamdcmpc idagji ima:ji cmna ka:la tadtvla agomdcm torvgsuto.

¹²Bulukkolok bojcrungc cdcmpila mc:jvgto, Girikkvdv:dok nc:ng ckkc amin gvnnc odokkc milbong ckkcsin.

¹³Ckvdaggom cdvlo Tissalonika:dok Jiwukvdv:dc kintoji Birea:do:sin Poulbv Ru:ncpvnckc agomdcm lutadbito, bulu odopcsin gvto, nvgur nvgbarlvgla odokkc yadkumsunc tani:kvdv:dcm lubonnvgla.

¹⁴Odo bvrokvdv:dc lomdanna Poulmc siycngpc mclvgto, cmpige:la Sila:lang Timoti:bv odo du:pakkang.

¹⁵Cdc sc:kobulu Poulmc gvlenbotoji Etenpc pv:lenboto; odokkc Sila:bv:lang Timoti:mc bvkkolo:pc gvdopc cddvko lomna gvla:dagji gvdopc lulvgnamdcm tadge:la gvpakkangku.

¹⁶Cdcmpidodcm Poulbv Etendo bulum toya:la du:dodcm, bvk yalodc bvm lubito jc cdc nogordc murti:yc bi:la dung.

¹⁷Cdcmpila kumko okumdo Jiwu kvdv:dokki agom svgka:mvnsuto odokkc ainc agom aipc mc:nc tani:kvdv:dokki, odokkc attar kokorcko mo:takkvdv:do longgcm longgcm sc:kobulum odo rvgsutoji.

¹⁸Ipikuriang kvdv:dokkclang Istoik kvdv:dok mc:lenna agom lunckvdv:dc bvm rvgsuto. Odokkc akke luto, “Sc belbelaincsc okkom ludagji?” Akke luto, “Bv ami mongkvlok taycng among agom lutadbinc koncmpc idag — ” kapila:nc bv Jisumclang Bvk sige:la turkunamdcm lutadbidag.

¹⁹Odokkc bulu bvm sogabge:la Are-opagu:pc boma:to, scmpc lula, “Ngolu nok sc anu luyir lubinamscm kinna:ycnci?

²⁰Kapcnc no ngoluk yeru:so anu agomko tadbegmodung; ngolu cdcmpidag sc luyirsc okko cmdagji kinnv:dung.”

²¹Cdcmpidodcm Eteniang appv:dc odokkc ami amo:lok tani:kvdv:dc sc:kobulu odo dunggaji cmmumpc buluk ayircm o:kaiko luma:pc manggom atv anuko tadma:pc gvmomangai.

²²Cdcmpila Poulbv, Are-opagu:dok pongkokdo dagge:la, luto: “Etensok tani:kvdvnga, ngo ka:to jc nolu appvng agerlo dormo kadag.

²³Kapcnc ngo gvgo:la gvnamc odokkc noluk kumnam attarkvdv:dcm ka:namc, ngo scmpc adnam kumgcngko gvpa:suto, ‘Kinma:nam Uikolo:pc.’ Nolu cdcmpila okodcm kinma:pc kumdonc, cdcm ngo nolum lutadbidung.

²⁴Ru:ncpvncbv sc:ko mo:pvscm motoji odokkc odok du:nc appv:dcm, tayctokkclang mo:pvsok Ru:tumpc ila, tani: monam uikumko okumlo du:mang,

²⁵cdcmanggom tani: alakkoki ila:sa:la binammang, bv atvko madaggomci bvci appvng tani:ycm turnamcm bidag odokkc nganamcm odokkc appvngcm.

²⁶Odokkc Bv appvngcm opvncm ako tani:olokkcm mo:pvsok appv:so du:dopc moto, buluk du:nam ayirkvdv:dcm ru:bila, jc bulu Ru:ncpncmc mapa:do,

²⁷bulu Bvk mcngkampc mc:mvnycpc cmna odokkc Bvm pa:ycpc cmna mc:la. Ckvdaggom Bv ngoluk appvnglokkc mo:tc:mang

²⁸kapcnc, “ ‘Bvkkolo ngolu turdo odokkc gvgo:do odokkc ngolu turra du:namdcm pa:do;’ noluk kobitang adnckvdv:dc:sin lunamdcmpc, “‘Kapila:nc ngolu aropakpci Bvkkolokkc lennc.’

²⁹“Ru:nc pvnckolokkc lenncpc ige:la, ngolu mc:pa:mang jc taycngtok Ru:ncpvncdc avncmpc idag cmna, cdcmanggom silborcmpc; cdcmanggom vlvngcmpc, modun mola molennamdc dunggc:bila odokkc tani:lok mc:len mcngangai,

³⁰kinma:pc du:nam ayirdcm Ru:ncpvncbv mc:yinsutobong, cmpige:la su:pak appv:lo Bv tani: appvngcm asin mcdvrla mc:latsutokuka cmna lulvgcm ludag,

³¹kapila:nc Bv mo:pvscm bvk mclvgnam tani: akokokki dormokokki kcbangcm bangkupc cmna longcko mctung, odokkc odokki Bv tani: appvngcm aroru:dcm lubitung bvm sikolokkcm darobmolangge:kula.”

³²Cdcmpidodcm cdvlo bulu sinc tani:yc turkunamdcm tadtoji, akedc yirka:la luto; ckvdaggom akedc luto, “Ngolu lckoda sok agomcm tadycku.”

³³Cdcmpila Poulbv bulukkolokkc gvlenna gvpakkang.

³⁴Ckvdaggom tani: akke bvk lcdulo gvmvnkang odokkc mc:jvgto, odokbuluk Dionisiubv Are-opagdokkc odokkc Damari cmnam nc:ngkonc odokkc buluk lcdulo akkeda.