Read Mising AGER KVDVNG 18 Bible Online

AGER KVDVNG 18 - Mising bible

AGER KVDVNG 18

¹Odok lcdupc bv Etendcm mcto odokkc Korintodo:pc gvto.

²Odokkc bv Akuilla cmnam Jiwuko rvgsuto, Pontu:dok tani:ako, lcdupakpc Itali:dokkc bvk ncng Prisilla:mc gvbola gvnnc, kapila:nc Klaudiubv lulvgkko luto jc Jiwuappv:dc Romdcm mcpakla gvpa:yc. Odokkc bv bulum kangkapc gvkang;

³odokkc bv c:mo:pinc rcnam-konam ager gerla:yam buluk lcdulo bv du:mvnto, odokkc bulu agercm gerto, kapila:nc bulu rcnam-konam agerlok bulu tombu omnai.

⁴Odokkc bv longgcm longgcm kumko okumdo ager germa:pc yodla du:do longc appv:do agomcm svkka:mvnsuto, odokkc Jiwucmnang Girikcm mcnggapdopc luto.

⁵Cdvlo Sila:bv:lang Timoti:bv Makedonia:dokkc gvpv:tonc, Poulbv lutad lubila lumi-miri:la dungai, Kristobv:jc Jisubvai cmna Jiwukvdv:dcm lukan lubila dungai.

⁶Odokkc cdlo bulu bvm lunamdcm lutumtoji odokkc aima:si:ma:pc lutoji, bvk gcnam attarkvdv:dcm bv pvtto odokkc bulum luto, “Noluk i:yc nolukkolo dungka:langka! Ngo okkomsin kintc:mang. Su:pakkolokkc ngo Angutani: ope:kvdv:do:pc gvycbong.”

⁷Odokkc bv cdcm mcto Titu Justu cmnam tani:kolok okumkolo:pc gvkang, Ru:ncpvnckc kumnckonc; bvk okumdc kumko okumdok kcrangardcvai.

⁸Kripu:bv, kumko okumdok migom doncdc, Ru:tummc mc:jvgto, bvk okum crang appv:dokki lckopc; odokkc Korintodok kvdv:dok bojcrungc Poulkc lunam kvdv:dcm tadtvla mc:jvgto odokkc baptismongcm la:to.

⁹Odokkc Ru:tumbv Poulmc luto yumckoncm kangor ka:namkolo, “Pcsoma:pcka, agomcm lutok odokkc aso:pc du:yoka;

¹⁰kapila:nc ngo nok lcdulo dung, odokkc oko tani:ycsin nom moa:la:ma:yc nom motappc cmna; kapila:nc sc nogorsc ngokkc bojcrungko tani:yc dung.”

¹¹Odokkc bv odo dv:tak akolang po:lo pvkcngko du:to, bulum Ru:ncpnckc agomcm luyirbila.

¹²Cmpige:la Akaia:dok mo:tak akolok migomdoncpc cdvlo Galliobv ila dungaji, Jiwukvdv:dc Poulmc lckko:pc moa:to odokkc bvm kcba:bangkodo:pc boma:to,

¹³scmpc lula, “Sc tani:sc lujvg lurodok lukamdcmma:pc Ru:ncpvncmc kumdopc tani:kvdv:dcm luyirra mc:jvgammodung.”

¹⁴Cmpige:la Poulbv cdvlo nappang kosa:la agom lupc cmna idungaji, Gallio:bv Jiwukvdv:dcm luto, “Cdc germurnam agerka:mvlo cdcmanggom kvnggv:pc ager germurka:mvlo, ngo noluk agomdcm tadla mc:yinsupcnammai,

¹⁵C:i Jiwukvdvnga; cmpige:la scm agomclang aminnok tawunam agompc inamc odokkc noluk avkc lujvgluropc inamc, nolu cdcm avyc ka:sutoka; ngo odok buluk kcba:ba:bincpc ila:ma:yc.”

¹⁶Odokkc bv bulum kcba: bangkodokkcm mclenamlvgtoku.

¹⁷Odokkc bulu appv:dc Sostini:mc sogabto, kumko okumdcm kanggabla migomdoncdcm, odokkc kcba:dok ka:ngkodo bvm dcmto. Ckvdaggom Gallio:bv cdcm kangka: tadka:tomang.

¹⁸Odok lcdupc Poulbv bojcru: longckoda du:tedto, odokkc odo bvrrang kvdv:dcm mcge:la Siria:pc ko:la gvkang, odokkc bvk lcdulo Prisilla:bv:lang Akui:lla:bv:sin Kenkriaedo bvk dumvdcm bv scpto, kapila:nc bvkkc Pesunamko dungai.

¹⁹Odokkc bulu Ipesu:pc gvto, odokkc bv bulum odo mcpakto; cmpige:la bv avdc kumko okumdo:pc gvto odokkc Jiwukvdv:dokki agom svkka:mvnsuto.

²⁰Cdvlo bulu bvm bojc ayirkopc du:dopc luto, bv lupaksuto;

²¹cmpige:la bulukkolokkc mcpakla gvtungkula bv luto, “Ngo nolukkoso:pc Ru:ncpvnckc mcngkammvlo gvlatycku,” odokkc bv Ipesu:dokkc ko:la gvkang.

²²Cdvlo Kaesaria:do, gvitonc, bv gva:to odokkc mondoli:dcm lutadsuto, odokkc bv Antiokdo:pc gvto.

²³Odo ayir asudkopc dungge:la bv gvpakkang odokkc mo:taklokkc mo:taklo:pc gvkang Galatiangclang Prigiang dunggo:-ycgo:do:pc, agom tadjvgla gvmvnnc kvdv:dcm kvnggv:mola.

²⁴Cdcmpidodcm Apollo: cmnam Jiwukonc, Alekjandria:dok du:nckonc, Ipesu:do:pc gvto. Bv aipc agom lujo:nc tani:kai, astrong agom aipc kinnckai.

²⁵Bvm Ru:tumkc lambcdok agomcm luyirtungai; odokkc yalodo kvnggv:pc udpinna, bv Jisukc lcga-o ngcm luto odokkc aiyo:pc begdopc luyirto, bv Jo:nkc baptismongcm kindagagom.

²⁶Bv kumko okumdo asin bottapc lurobbomkang; cmpige:la cdvlo Prisilla:bv:lang Akuilla:bv bvm tadbegto, bulu bvm langa:to odokkc Ru:ncpnckc lambcdcm aiya:pcda lukurlule:la lubito.

²⁷Odokkc bv cdvlo Akkaia:dop kongko:pc cmna mc:to, bvrrangkvdv:dc bvm lusv:lvgto, odokkc agom tadjvgla gmvnnckvdv:do:pc bvm torvgsudopc adlvgto. Cdvlo bv gvpv:toji, sc:kobulu ayangkokki mc:jvgtoji bv aipakpc ka:dumsuto;

²⁸Kapila:nc astoro:dok agom kvdv:dcm lcngkanna Kristobv jc Jisubvai, kvnggv:ru:pc Jiwukvdv:dcm ka:de:pc aromang cmna lupakto.