Read Mising AGER KVDVNG 20 Bible Online

AGER KVDVNG 20 - Mising bible

AGER KVDVNG 20

¹Cdc jcngka:mvnsunamdc gvbatnammc, Poulbv agom tadjvgla gvmvnnc kvdv:dok lcgangc mclvgto odokkc bulum luyirge:la bulum mcto odokkc Makedonia:pc gvkang.

²Odo mo:takdo:pc bv cdvlo gvtonc odokkc bulum airu:pc lusv:lvgnamcm lutonc, bv Girikpc gvto,

³Odo bv po:lo pvwumko du:to, odokkc Jiwukvdv:d bvk birudi:pc ru:suko ru:tonc bv Makedonia:dok gvlatla gvkupc cmna mc:scgto.

⁴Biroia:dok Sopaterbv, Pirhuskc awodc, bvm gvjonto; odokkc Tissaloniang kvdv:dok, Aristarku:bv odokkc Sekundu:bv; odokkc Derbi:dok Gaiu:bv, odokkc Timoti:bv; odokkc Asiang kvdv:dc, Tikiku:bv odokkc Tropimu:bv.

⁵Troa:do cdcbulu cdcmpc ibomkang odokkc.

⁶Cmpige:la ngolu Pilippi:do:pc konggcto Komirang Ilvgma:pc monam Pitang dododok lcdudo, odokkc longo lcdulo ngolu bulukkodo:pc Troa:do:p gvto, okolo ngolu longc kvnvdkopc du:tedtoji.

⁷Longc kvnvddok a:pongarnc longcdo, cdvlo ngolu lckopc pita:dcm penporkapc gvkumsuto, Poulbv bulum luposuto, longkondo gvpakkupc cmna mc:la; odokkc yumc kvdvsudodo:pc bvk agomdcm lutvto.

⁸Taycngkc soyar dungkodo okolo ngolu gvkumsula dungaji bojcrungko saki:yc dungai:

⁹Odokkc ya:me: ko:ako Iutiku cmna amin minnamko kiriki:do tedla dungai. Poulbv odosin agom lutvla lubarla du:dodcm bv kvnggv:pc yubla yubngaksukang; odokkc yubla yubmotsula:yam, bv awumko tola mosa:nam tayc:dokkc kcdledkang odokkc sidopc la:sa:toku.

¹⁰Ckvdaggom Poulbv gvikang odokkc bvk tayc:do ogcmto odokkc bv gongabge:la luto, “Nolu kabyok, kapila:nc bv turra dung.”

¹¹Odokkc cdvlo Poulbv gvsangkangkuji odokkc pitangcm penporge:la dotonc, bv buluk lcdulo bojc ayirkopc luposuto, pvang pvkuma:sisscm, odokkc cdcmpc gvkangku.

¹²Odokkc bulu cdc ko:dcm turpc gvbokangku, odokkc kvnggv:pc mc:pomcngankang.

¹³Cmpige:la siycng ollu:do:pc gvlenna gvla ngolu Asso:do:pc ko:la gvto, Poulmc olo gva:mopc cmna mc:la; kapila:nc bv cdcmv:pc mosv:sutagai, avdc amo:dok gvpc cmna.

¹⁴Odokkc cdvlo bv Asso:do ngolum rvgsutonc, ngolu bvm a:moto odokkc Mitilene:pc gvto.

¹⁵Odokkc odokkc ko:la gvla ngolu longkondo Kio:dok kekondo:pc pv:to; longkondo ngolu Samo:do:pc konggapto; odokkc odok longkondo ngolu Miletu:pc gvto.

¹⁶Kapila:nc Poulbv Ipesu:dcm mcge:la ko:la gvpc cmna mc:to, odomvloyam Asia:do ayircm gvdopc dungge:mang cmna; kapila:nc Jerusalemdo dungkupc lomdvlomra:la idungai, gvla:mvlo, yingo longc dopun-dojardo.

¹⁷Odokkc Miletu:dokkc Ipesu:do:pc tani:ycm mclvgla mondoli:dok abv:nc kvdv:dcm goglvgto.

¹⁸Odokkc cdvlo bv bvkkolo:pc gva:toji, bv bulum luto: “Nolu avkvdv:dc kindag jc Asia:so:pc allcm tua:do longcdokkc kapc du:to-dagtoji,

¹⁹Ru:tumkc agercm asin ansvngo:la gerla odokkc migsi dvla odokkc Jiwu kvdv:dok ru:la ru:sula inam ager kvdv:dokki ngokkolo pa:la;

²⁰kapc ngo ainc av kanc agomko lugo:bipc nolukkolokkc ngedsuksutoma:ji, odokkc appvngkc kangkolo odokkc noluk okum okumlo gvgo:la luyirtonc,

²¹Jiwucmnang Girik kvdvng anyipaklo Ru:ncpvnc kolo:pc asinc mc:dvrra mc:latsukunammcm nang Ru:tum Jisu Kristokolo mc:jvgnammcm.

²²Odokkc su:pak ka:toka, ngo Jerusalempc gvdag, Yalodok gvbokammcmpc gvla, ngokkc kapci iycsong olo cdcm kinma:pc;

²³Angunnc Yalodc ngom nogor appv:lo makana:lo tumnamcmlang ipusire:yc toya:la dung cmna lubinamdcmma:mvlo.

²⁴Cmpige:la ngok turnamscm ngo atv arckanckopc kvsumang cdcmanggom ngokkcpc kvnggv:pc aincko cmna, ngo gerpcnamdcm gerra:mvloi odokkc Ru:tum Jisukolok pa:nam inam-sa:nam agerdcm, Ru:ncpvnckc ayang abodok tadpon lutaddcm lukanbipc.

²⁵Odokkc su:pck, ka:toka ngo kindag jc migom doko mo:pvdok agomdcm sc:ko noluk ara:lo lutadgo:bitonc ngok migmom lckoda ka:begkuma:ycbong.

²⁶Cdcmpidag ngo silo longcso nolum lukanbidung jc ngo noluk appvngkc i:lokkc narc:nc,

²⁷kapila:nc ngo Ru:ncpvnckc appvng ru:su-pa:sunammcm nolum lubinamdcm ngedkud sutomang. Nolu avkvdv:dc avkvdv:dok lcgangc ansulangka odokkc noluk appvng kcrc:dok lcgangc,

²⁸okodo Angunnc Yalodcm nolum kanggabya:ncpc itu:ji, Ru:ncpvnckc mondoli:dcm ka:sv:mosv:dopc okodcm bv Avkc Awodok i:kokki pa:tokuji.”

²⁹Ngo kindag jc ngok gvpakdoku lcdulo aima:nc ra:ng ikiyc noluk ara:lo duga:ycpc, kcrc:dcm aima:ru:pc iycpc;

³⁰odokkc nolukkolok avyvngkolokkc tani:kvdvngc lenna tu:ladnc agomcm luyc, buluk lcdulo:pc mc:jvgnc gvmvnnc tani:kvdv:dcm gvpakdopc cmna.

³¹Cdcmpidag ansu-ka:sutoka, ngo:jc dv:tak tagumkopc yummcm longgcm appvngcm migsidvla ainc agomcm luyirka cmnam mc:pa:tvla.

³²Odokkc Bvk ayang abonamdok agomdo:pc tolvgdung, okodc nolum mosa:pc mosa:ladagji odokkc nolum sc:kobulum narc:pc mopu:tonc buluk du:tcngcm du:bomdopc imola:dagji.

³³Ngo sc:kkai murkongcmba: avncmba: ainc gcnam attarcm ka:bo-mc:bomang.

³⁴Nolu avdc av avkvdv:dc kinsudag jc sc ngok alagsc ngoluk manam kvdv:dcm la:lenamto, odokkc cdcm ngok lcdulo du:mvnnc kvdv:dok lcgangc.

³⁵Cdc appvng agerdo ngo nolum lcngkanto jc cdcm ager gertu:la akonc opanncdcm ka:dumsupa:ru:do, Ru:tum Jisukc agomkvdv:dcm mc:pa:la, kapc Bv lutoji, “Torvgsunamdcmyam binamdc ayang pa:ya:nammc.”

³⁶Odokkc cdvlo bv cdcmpc lutoji, bv lcbvng tuma:to odokkc buluk appvngdok lcdulo kumto.

³⁷Odokkc bulu appv:dc kapto odokkc Poulmc gongabto odokkc dosukto bvm,

³⁸appv:dc:i mc:dvrra bvk agom lunamkvdv:dok lcgangc jc bulu lckoda cdvlosin bvk migmom ka:begkuma:bong cmna. Odokkc bulu bvm ja:j ollu:do:pc gvlennvgto.