Read Mising AGER KVDVNG 21 Bible Online

AGER KVDVNG 21 - Mising bible

AGER KVDVNG 21

¹Odokkc cdvlo bv bulukkolokkc gvpansutoji odokkc ko:la gvpakka:ji, ngolu yvg cmna Ko:spc ko:to, odokkc odok longkondo Rodespc, odokkc Patara:pc.

²Odokkc Poenikia:pc ko:nc ja:j ollungko pa:la, ngolu a:to, odokkc ko:la gvto.

³Ngolu cdvlo Sipru:dcm ka:begtoji, cdcm lakkepc mcge:la ngolu Siria:pc ko:to, odokkc Ti:rdo gvito; kapila:nc odo ja:j ollu:dc rcbbomnam attarcm rcbyi:la bipcnammc dungai.

⁴Odokkc agom tadjvgla gvmvnnc tani:kvdv:dcm mala, ngolu odo longc kvnvdko du:tedto. Bulu Yalodokki Poulmc Jerusalempc gvyoka cmna luto.

⁵Odokkc cdvlo odo ngoluk du:namcm dungaptoji, ngolu gvpakkunc odokkc gvpckolo:pc gvtvto; odokkc bulu appv:dc, nc:ngkvdv:dc ko:kang kvdv:dokki, ngoluk lambcdo:pc gvlennvgto nogordok moro:do:pc gvpv:lvgla; odokkc siycng ru:yido lcbvng tumge:la ngolu kumto odokkc akoncm akonc lutcrsuto.

⁶Odokkc ngolu ja:j ollungdo sa:toku, odokkc bulu okumpc gvlatkangku.

⁷Cdvlo ngolu Ti:rdokkc siyc:dok ko:la kongasuto, ngolu Ptolemaido:p pv:to; odokkc ngolu bvrokvdv:dcm aipai cmrvgsuto odokkc longcko buluk lcdulo du:to.

⁸Longkondo ngolu gvpaktoku odokkc Kaesaria:do:pc gvto; odokkc ngolu Pilipkc okumdo:pc tadponc lutad agom lubigo:nc kodo:pc gva:to, sc:kobv kvnvdokk akoa:ji, odokkc bvk lcdulo du:mvnto.

⁹Odokkc bvkkc amilo gvma:nc omc appi:ko dungai, sc:kobulu lungor agomcm ludungaji.

¹⁰Ngolu longc asudko du:namc, Agabu cmnam lungor luncko Judia:dokkc gvdo.

¹¹Odokkc ngolukkoso:pc gvge:la bv Poulkc tongali:dcm langge:la bvk avkc alcdo:lang alakdo yc:lvgsuto, odokkc luto, “Cdcmpc Angunnc Yalodc ludag, ‘Cdcmv:pc Jerusalemdok Jiwukvdv:dc cdc tani:dcm ycnggabyc sc:ko sc tongali:scm bomdagji odokkc Angunnc tani:kvdv:dcm bvm bipakyc.’ ”

¹²Cdvlo bv cdcm tadtoji, ngolulang odok tani:kvdv:dc bvm Jerusalempc gvyoka cmna kumna:sola lutumto.

¹³Odo Poulbv luto, “Nolu okkom idu:n, ngok asinscm kabla bedmodu:nci? Kapila:nc ngo makana:lo tumkosuppong cmnai mosv:sumang cmpige:la Ru:tum Jisukc amin lcgangc Jerusalemolo sipcsincimvn mosv:sutung.”

¹⁴Odokkc cdvlo bvm ludaggom tadmang, ngolu lungasuge:la luto, “Ru:tumkc mcngkamdcmpci ika:langka.”

¹⁵Odo longckvdv:dok lcdudo ngolu mosv:suto odokkc Jerusalempc gvto.

¹⁶Odokkc Kaesaria:dok agom tadjvgla gvmvnnckkc ngoluk lcdulo gvmvnto, ngolum Sipru:dok Mnasonkc okumdo:pc gva:boto odokkc, po:pclok agom tadjvgncko, ngolu sck lcdulo du:yubsupcnamma:ji.

¹⁷Cdvlo ngolu Jerusalempc gvpv:toji, bvrokvdv:dc ngolum mcpo:pc torvgsuto.

¹⁸Odok longkondo Poulbv ngoluk lcdulo Jakobkolo:pc gva:mvnto; odokkc abv:nc appv:dc dungai.

¹⁹Bulum torvgsuge:la, bv ako akko:pc Ru:ncpvnckc ager gernam kvdv:dcm Angu tani:kvdv:dok ara:lo bvk agerkokki inamkvdv:dcm kvbito.

²⁰Odokkc bulu bvm luto, “Nolu ka:tok, bvrra, Jiwukvdv:dok ara:lo cddv lvngkokopc mc:jvgtoji; bulu appv:dc lujvg lurodok lcgangc dvgdag,

²¹odokkc nok agomcm bulu lubidag jc no Angu Tani: opvnkvdv:dok ara:lo du:nc Jiwukvdv:dcm Mose:mc mcpagdopc luyirdag, buluk ko:kang kvdv:dcm gadpukma:dopc luyirdag cdcmanggom lekekcbong igot gvgodcm iyoka cmna.

²²Okkom cmpcmvlo ipcnammcn? Bulu no gvdung cmna tadbegru:yc.

²³Ngolu okodcmci luycnc cdcmpidag cdcmci itok. Ngolukkc appi:ko tani:yc dung sc:kobulu pesunamdcmpc du:ji,

²⁴sc tani: appv:scm gvbola buluk lcdulo avyc no narc:mosuta:ka odokkc buluk inamgvnamdokkcm arrcm bitok, odomvlo bulu buluk mittukkvdv:dcm rakutsuycpc. Odomvlo appvngc kinycpc jc nok agomcm lunam appv:do okosinmang jc no avdci lujvg-lurodok lukampc du:dag.

²⁵Cmpige:la Ru:ncmc kinma:nc tani:kvdv:dokkcpc sc:kobulu mc:jvgtoji, ngoluk mcngkampc do:jvgkko mclvgto jc bulu murti:lo palvgnammcm dopcma:namc lv:podok yumkenam kvdv:dcm odokkc amikc nc:ngcm aima:si:ma:nc agercm germa:pc du:dopc.”

²⁶Odokkc Poulbv tani:kvdv:dcm goga:to, odokkc longkondo avdc buluk lcddu:lo mopu:suto odokkc kumko okumpc gva:to, cdvlo mopu:sunanc longcdc a:pvtoji lutadbikapc odokkc buluk appv:dok lcga:pc cmpc binam amindcm.

²⁷Cdvlo cdc longc kvnvddc gvngappc cmna ika:ji, Asia:dok Jiwukvdv:dc, sc:kobulu bvm kumko okumdo ka:begtoji, yadkumsunc tani: appv:dcm nvgur-nvgbarlvgto, odokkc bulum alagcm lagsa:la, jc:la luto,

²⁸“Israelsok tani:kvdvnga, ka:dumsuipcn! Sc:na tani:dc sc:kobv appv:lo tani:kvdv:dok lukam tadma:pc odokkc lujvglurodoklang sc mo:taksok lukam tadma:pc luyirncdc; cdcmsinyam bv Girikcmsin kumko okumdo:pc gva:boto, odokkc bv sc angunnc mo:takscm narc:ma:pc imoto.”

²⁹Kapila:nc bulu po:pcbong Ipesu:dok Tropimu:mc nogordo ka:to, odokkc bulu mc:to jc Poulbv bulum kumko okumdo:pc gva:boto.

³⁰Odo nogor appv:dc dagrobkang, odokkc tani:kvdv:dc lckko:pc dugkang; bulu Poulkmc sogabto odokkc kumko okumdokkcm tvglennvgto, odokkc vgcmpc yabgokvdv:dcm mokabamlvgto.

³¹Odokkc bulu cdvlo bvm mokepc cmna idungaji, lv:yi:lok mimagmonclok gvgcncdc tadtojc Jerusalem appv:dc murkang.

³²Bv vgcmpc mimagmonc kvdv:dc odokkc lvngkolok gvgcnckvdv:dcm gvboto, odokkc bulukkodo:pc dugkang; odokkc cdvlo bulu kcba:ba:nclok ru:tumdcmlang mimag monckvdv:dcm ka:begtoji, bulu Poulmc dvngasuto.

³³Odo kcba:ba:ncdc gva:la bvm ycnggabto, odokkc bvm ikoli: so:nyikokki koggabdopc lulvgto. Bv bv sc:koji odokkc bv okkom itoji cdcm tawuto.

³⁴Yadkumsunc tani:kvdv:dok akedc o:kaiko tawuto, akedc anguko; odokkc bv jcnggumnamdokki ncrkvg agomdcm kinna:ma:la:yam, bv mimag monclok dungko okumdo:pc boma:dopc lulvgto.

³⁵Odokkc cdvlo ko:ba:do sanga:dodcm, bv aropakpci mimagmonckvdv:dc jo:sa:bomkang yadkumsunc tani: kvdv:dok urratla modv:morv:namkokki;

³⁶kapcnc yadkumsula dcmnc tani:kvdv:dc yadmvnkangai, “Bvm moketok” cmna jc:la: jc:la.

³⁷Poulmc mimag monckvdv:dok dungkodo:pc boma:pc cmna inamc, bv kcba:ba:ncdcm luto, “Ngo o:kaiko nom lula:ycnci?” Odokkc bv luto, “No Girik agomcm kindaglang?

³⁸No cdc Igipt tani: dc:ma:lang, odokkc mclokonnong pamvnsunamko iboncdc odokkc lv:ying appi:ko tani:ycm Assa:ssindokkcm yumrangolo:pc gvbotonc?”

³⁹Poulbv lubito, “Ngo Jiwuko, Kilikia:dok Tarsu:dokkc, cmmum nogorlok tani:mang; ngo nom kumna ludung, tani:kvdv:dcm agomko ngom lumotei.”

⁴⁰Odokkc cdvlo bv bvm agomdcm lumotonc, Poulbv, ko:ba:do dagge:la, tanikvdv:dcm alagcm lagsa:la lagclagkurto; odokkc aso:pc dungabnammc, bv bulum Hibriu agomki lurobbomkang: