Read Mising AGER KVDVNG 26 Bible Online

AGER KVDVNG 26 - Mising bible

AGER KVDVNG 26

¹Agrippa:bv Poulmc luto, “nokkc agom lupc avyc lula:do.” Odo Poulbv bvk alagcm laglento odokkc bvk lurasunamcm luto:

²“Ngo avyc avkanckopc mc:sudo jc nok kcra:lo dung, Migom Agrippanga, ngo Silo Jiwukvdv:dok appvngkc lugc:lvgnam kvdv:dcm lurasupc,

³Kapila:nc no anguru:pc Jiwukvdv:dok itcng-gvtcng kvdv:dcm odokkc ajcng jc:mvnsunam kvdv:dcm kinabdag; cdcmpidag ngo nom kumna ludung ngom mc:mila tadtei.

⁴“Ngok turra du:namdc ngok ya:me:dodokkcbong, Jerusalemdo ngok tani:kvdv:do, Jiwu appv:dc kinabdag.

⁵Bulu cdvlaikcbong kindag, bulu lukanbili:mvlo, jc ngoluk dormo ager gernckvdv:dok kvnggvngarya:pc gagnckvdv:dcmpc ngo Parisi:pc ila du:to.

⁶Odokkc ngo su:pak sido kcba: bangkoso dagla dung ngoluk abukvdv:dcm Ru:ncpvnckc Pesubinamdcmpc,

⁷okodo:pc ngoluk vyvngkolang anyi ope:kvdv:dc pv:pc cmna mc:la du:dagji, bulu yumc-ro:pc kumna:yam. Odokkc cdc mc:namdok lcgangc ngom Jiwukvdv:dc lugcngko ludag, O Migom!

⁸Kapila cdcm nolukkolok akoncsin mc:ton jc Ru:ncpvncbv sinckvdv:dcm turmodakkulang cmna?

⁹“Ngo avycsin mc:sudungai jc Najaretdok Jisukc amindcm birudi:pc ngo ipcnammc.

¹⁰Odokkc ngo cdcmv:pc Jerusalemdo ito; ngo bojcrungko aipc kumnc tani:kvdv:dcm makana:lo tummangongai, kumnam ager gernc kvdv:dok bottarya:nckvdv:dok ilang gvla:namdok do:jvgkokki, cmpige:la cdvlo bulum mokedungaji ngok asincm buluk birudi:pc tolvgka.

¹¹Odokkc kumko okum okumkvdv:do kvnggv:pc bulum dcmto-moto odokkc bulum imur incpc cmna ankvla kangkvto; odokkc buluk birudi:pc kvnggv:pc ipusire:la aglvngcm lv:to, ngo bulum amikc amo:lo:sin mogvtmomatto.

¹²“Cdcmpila ngo Damasku:do:pc gvla kumnam ager gernckvdv:dok bottarya:nc kvdv:dok ilang gvlangcmnang lulvgdcm langge:la gvto.

¹³Longc kvdvsudodcm, O Migom, ngo lambcdo tayc:tokkcm ruadko ka:begto, do:nyitcmyam pva:ya:ncko, ngok dunggo:ycgo:dcm dorrubncko odokkc cdc ngok lcdulo gvmvnnc kvdv:dcmsin.

¹⁴Odokkc cdvlo ngolu appvngc amo:bo kcttabka:ji, ngom Hibriu agomlok lunc gomugko ngo tadbegto, ‘Soula, Soula, ngom kapila no ipusire: idu:n? No jamncm tumvlo tunvgsudag.’

¹⁵Odokkc ngo luto, ‘No sc:kobvn, Ru:tuma?’ Odo Ru:tumbv luto, ‘ngo Jisubv no sc:kom ipusire:du:ji.

¹⁶Cmpige:la nok alcdokki dagrobtoka; kapcnc ngo odok lcgangc nom lcngkansuto, nom togclvgpc ngokkolo oko okkom ka:begtoji cdcmbulum lukanbidopc odokkc nokkokki cdc sc:kobulum ngo lcngkansuycji;

¹⁷nom Angu tani: kvdv:dokkcm la:pakla odokkc nom sc:kobulukklo:pc mclvgycji buluk amikkvdv:dcm moge:dopc,

¹⁸jc bulu kcmolokkc pva:lo:pc gvdopc odokkc Satandok ilanggvla:dokkc Ru:ncpvnckc ilanggvla:do:pc gvlatdokupc, jc bulu pa:plok mc:yinsunamcm pa:dopc odokkc ngom mc:jvgnc kvdv:dok dungkodo pa:dopc.’

¹⁹“Cdcmpidag, O Migom Agrippa, ngo taycngtok ka:namdcm lukamdcmpc gvma:pc ila:mang,

²⁰cmpige:la Damasku:dokkc kvdv:do:pc lutadbipo:to odokkc, odokkc Jerusalemdokkc kvdv:do:pc odokkc Judia:dok dunggong do:lung appv:do, odokkc Angu tani:appv:do, bulu jen asinc mc:dvrra mc:latsulangkula Ru:ncpvnckolo:pc gvlatyckupc odokkc buluk mc:dvrra mc:latsukunamdcmpc agercm gerycpc.

²¹Kapila:nc odok lcga:pc Jiwukvdv:dc ngom kumko okumdo ycnggabto odokkc ngom mokec cmna ito.

²²Silo longcso:pc Ru:ncpvnckolokkc pa:nam gvdumsunamcm pa:to, odokkc cmpila ngo sido adji:ncla bottcnc appv:lo lukanbila dagdung, okkomsin luma:pc cmpige:la Mose: lungor lunckc oko lunamkvdv:dc lukamdcmpci iycbo:ji cdcmong lula:

²³jc Kristobv ipusire:ycm pa:pcru:nammc, odokkc jc, odokkc turnckvdv:dok turpongarkuncpc ila:yam, bv tani:kvdv:do:pc odokkc Angu tani:kvdvdvng anyipakdo:pc pvangcm lutadbiyc.”

²⁴Odokkc bv cdcmpc lurasunamc, Pestu:bv bottapakpc jc:la luto, “Poula, no simaddu:nci; nok kvnggv:pc kinnamdc nom simad modung.”

²⁵Cmpige:la Poulbv luto, “Ngo simadmang, airu:pc mcnggcnam Pestua, cmpige:la ngo aipc mcngkinnam aro agomcmmvn ludu:n.

²⁶Kapila:nc migomcsin sc agomkvdv:scm kindag, odokkc bvm ngo ka:de:pc ludo; kapila:nc ngom lulvgtag jc sc agomkvdv:sok akosinci bvk kangkolokkc lc:sumang, kapila:nc scm sungkenkolo germangai.

²⁷Migom Agrippa, no lungor lunam kvdv:dcm mc:jvgdon? Ngo kindag jc no mc:jvgdag.”

²⁸Odokkc Agrippa:bv Poulmc luto, “su:pakkc atcrci no ngom Kristanpc badmopc cmna mc:du:n!”

²⁹Odokkc Poulbv luto, “su:pakdagba: aso:pcdagba, ngo Ru:ncpvnckolo:pc kumdung jc nowyo:mang cmpige:la silokc longcsok cdc tadnc appv:dcm ngokkcmpc iycpc cmnasc ikoli:sokki yc:namscm mcge:la.”

³⁰Odo cdc migomdc darobkang, odokkc odo sc:kobulu tedla buluk lcdulo dungaji, odokkc bulu cdvlo gvpakkangkuji,

³¹bulu akoncm akonc luka:mvnsuto, “Sc sipcnamko cdcmanggom makana:lo tumpcnam agerko germang.” Odokkc Agrippabv Pestu:mc luto,

³²“sc tani:scm mclennvgyangkupc bv Kaesarmc kumna:sola lusumangamvlo.”