Read Mising AGER KVDVNG 27 Bible Online

AGER KVDVNG 27 - Mising bible

AGER KVDVNG 27

¹Odokkc cdvlo ngolu Itali:pc ko:la gvpcnammc cmna mc:to bulu Augustan Kohort mimag monc lvngkolok gvgcncmc, Julius cmnamko Poulmclang makana:lo tumnam tani:ckkc togc:lvgto.

²Odokkc Adramittium do:pc ko:pcnc ja:j ollungkolo, okodc kongganko kvdv:do:pc ko:la gvpc cmna idungaji Asia:dok siycng ru:yidok, ngolu siycngpc gvlento, Aristarku:mc gvjonna, Tissalonika:dok Makedoniang tani:ko.

³Longkondo ngolu Sidonpc pvnga:to; odokkc Juliubv Poulmc aiyo:pc ka:sv:mosv:to, odokkc bvk ajonkvdv:do:pc ka:sv:mosv:dopc mclvgto.

⁴Odokkc ngolu siycngpc gvlenge:la ngolu Sipru:pc yuka:nc csardok ko:to, kapila:nc csardc yulatla yudagai.

⁵Odokkc cdvlo ngolu siyc:dcm kongko:la gvtoji okodc Kilikiadokkc odokkc Pampilia:dokkc ko:paktoji, ngolu Likia:dok Mirado:pc.

⁶Odo lvngko mimag moncdok gvgcncdc Itali:pc ko:nc Alekjandria:dok ja:j ollungko pa:to, odokkc ngolum odo a:moto.

⁷Ngolu aso: aso:pc bojcrung longcko ko:la gvto, odokkc Knidu:do:pc kapci kapci dada-kaddapc konga:to, odokkc ngolum csardc yutumla:yam, ngolu Kriti:pc Salmonei kcra:pc yuka:la yunc csardo ko:to.

⁸Odok ru:yi ru:yidok dada:-kadda:pc ko:yirra ko:la Kangkannc Taycng among cmnam mo:takko pa:to, okodok kcra:do Lasia nogordc dungaji.

⁹Odokkc bojcrungko ayircm gvpakmola odokkc siycngdok ko:la gvnamdc airu:pc pcsopcnampc inamc odokkc doma:pc menna du:nam longgc gvbatnamc,

¹⁰Poulbv bulum scmpc luyirla luto, “mcngcsupcnam tani:kvdvnga, siycngsok ko:la gvnamsc ko:nyoksuyc odokkc kvnggv:pc yogycpc ngo lubidung, cdc arc bila rcbbomnam attarkvdv:dcmnang ja:j ollungo:dcmang, cmpige:la ngoluk turra du:namkvdv:dc:sin.”

¹¹Cmpige:la cdc lvngko mimag monclok gvgcbncdc siycng ollu:dok ko:bomncdok gvgcboncdcmnang odokkc ru:tumdok agomdcm Poulbv okodcm ludagaji cdcmyam tadya:to.

¹²Odokkc cdc konga:la dungkodc dvgvnno du:pc aimangala, bojcya:ngc siycngpc ko:lenpc lulvgto, cdcmpc kangkvto jc bulu Poenikpc ko:pv:la:ycji cmna, Kriti:dok kongganna dungkokolo, pckv:to:pclang pcya:bo:pc kangge:la, odokkc odo dvgvnna.

¹³Odokkc pcya:bokkc cdvlo dagtok csardc aso: aso:pc yusangka:ji, bulu mcngkvto jc buluk mcngkamdcmpc gvpa:du:bong, bulu longgordcm la:sa:to odokkc Kriti:pc ko:to, siycng among ru:yi ru:yidok.

¹⁴Cmpige:la lomdanna kvnggv:nc csarko, pckv:-sangga cmna lunamdc, tcmpvdokkc nv:yi:kang;

¹⁵odokkc cdvlo ja:j allu:dcm nv:rumbomka:ji odokkc csardcm torasula:toma:ji, ngolu cdcm mcpaklvgto odokkc nv:bomkang.

¹⁶Odokkc Kauda cmna adjo:nc siycng pongkok among kolo:pc yuka:nc csarkolo yumvnna, ngolu konggung konga:ma:namki ollu:dcm ko:rasuto;

¹⁷cdcm rvngapge:la, bulu ja:j ollu:dcm nv:tumsupc cmna kangkvto; odokkc bulu Sirtisdo:pc gvpckc cmna pcsola, bulu pa:l tonbornamdcm rcmagmoto odokkc cdcmpila nv:bomkosuto.

¹⁸Ngolum kvnggv:ru:pc bottcnc csardc yugo yugo:bomtonc, bulu longkondo rcbbomnam attar kvdv:dcm ollung ara:dokkcm crpagambomkang;

¹⁹odokkc lowum longcdo buluk avkc alagkvdv:dcm bulu ja:j ollu:dcm sotumsupc cmna ankvla ka:to.

²⁰Odokkc cdvlo do:nycmnang takarcm bojcrung longckopc ka:begtomang, odokkc adjo:nc csarc ngoluk tayc:lo yutomang, appvngc ngoluk gvpvtsuyc cmnamdcm lcddarpc mcpaktungaboi.

²¹Odokkc bulu bojcrungko donam tv:nam kama:pc dungai, Poulbv odo buluk ara:do:pc gvangge:la luto, “Tani:kvdvnga, nolu ngok agomcm tadpcnammai, odokkc Kriti:dokkc ko:lenna gvpcma:namai scmpinc ko:nvg-kongkorcm odokkc yognamcm lenma:dopc.

²²Ngo nolum su:pak ludung mcnggabtoka; kapila:nc nolukkolokkc tani:yc yogma:yc, cmpige:la ja:j ollungo:dc yogyc.

²³Kapila:nc siyumkc yummarso Ru:ncpvnckc taycng lutad luncko ngok kcra:so dagkangai sc:kokcpc ngo idoji odokkc sc:kom ngo kumdoji, odokkc bv luto, ‘Pcsoyoka, Poula:

²⁴no Kaesarkc kcra:do dagsa:ru:pa:yc odokkc ka:toka, Ru:ncpvncbv noluk lcdulo ko:mvnnc appv:dcm tolvgbitung.’

²⁵Cdcmpidag, ansutoka tani:kvdvnga, kapila:nc ngokkc Ru:ncpvncmc mc:jvgc dung jc cdc ngom lukamardcmpc iyc.

²⁶Cmpige:la ngolu okolai siycng ara:lok amongkolo:pc ko:rasupa:yc.”

²⁷Cdvlo vyvngkolang lo:pi: yumcdc pvngangkang, Adria siycngdok ngolum yuka:bomna gvkang, ko:bomnckvdv:dc mc:mokang jc bulu siycng ara:lok among kcrangkolo:pc pvnga:dung.

²⁸Cdcmpila bulu kvka:la ka:to odokkc lagdu vying anyikopc o:rv:dopc; odokkc odok adjioko gvbarnammc bulu lckoda kvka:la ka:to odokkc vyingkolang anggo lagduko o:rv:dopc pa:to.

²⁹Odokkc ngolu vlvngkvdv:dok dugla gvpakpckc cmna pcsola, bulu longgor so:pi:ko siycng ollung lamkubokkc cryi:lvgto, odokkc pva:do:pc toya:la du:to.

³⁰Odokkc ko:bomnc kvdv:dc ja:j ollu:dokkc mclennvgnamc, longgor kvdv:dcm ku:dumdokkc crpakletpc cmna ito.

³¹Poulbv lvngko mimag monclok gvgcboncdcmnang mimag monc kvdv:dcm luto, “Sc tani:kvdv:sc ja:j ollu:do du:ma:mvloi, nolu turra:ma:yc.”

³²Odo mimagmonckvdv:dc ollu:dok rvbvkvdv:dcm pakvnamlvgto, odokkc cdcm yubommoto.

³³Longcpvang pvlenpc cmna inamc, Poulbv bulu appv:dcm donam dodopc scmpc lula luto, “Silo lo:yingkolang lo:pi:ko ika:bong nolu doma:pc du:namc, okkomsin doma:pc.

³⁴Cdcmpidag ngo nolum apin asudko dotoka cmna mc:dag; nolum cdc tormoyc, nolukkolok akolokkcsin dumvd asongkosin yogma:yc.”

³⁵Odokkc cdvlo bv cdcm lutoji, bv pitangcm doto, odokkc Ru:ncpvncmc aipai bige:la appvngkc dungkodo bv pentu:to odokkc dorobbomkang.

³⁶Odo bulu appv:dc asina:ngcm sagrasukang odokkc donam asudowko doto.

³⁷Ngolu tani:yc ja:j ollu:do appvngc lvngko anyikolang nv:pi:kolang akkcngkai

³⁸Odokkc cdvlo bulu pv:namko dotoji, bulu ja:j ollu:dcm cssa:moto, geu a:mkvdv:dcm siycng asido cryingamlvgge:la.

³⁹Cdcmpinamc longcnammc, bulu amo:dcm kangkintomang, ckvdaggom bulu etedgamnc siycng ru:yiko ka:begto, okodo bulu konga:la:ycmvlo konga:pc cmna mc:to.

⁴⁰Cdcmpila bulu longgordcm cryi:lvgto odokkc bulum siycngdo mcpakto odo ayirv:do rvbvkvdv:dcm mcjarlvgto okodc kungkong monanc rcbaddcm ycnggabla lc:tungaji; odo pa:l tonnam gasordcm tonsangge:la esardo bulu siycng ru:yido:pc tungka:lvgto.

⁴¹Cmpige:la siycng bidrvgsuko anyikolo tunga:la, ja:j ollu:dc tungangka, ku:dumdc tungkondcm cngunma:dopc tubla:yam, odokkc kungko:dc intungko dvrtungkang.

⁴²Mimagmonckvdv:dc mc:namdc makana:lo tumnamkvdv:dcm mokepc cmna, ckvma:mvlo akonc ba:la gvpakycpc odokkc gagsipckc;

⁴³cmpige:la mimag monc kvdv:dok lvngkolok gvgurncdc, Poulmc turmolv:la, bulum buluk mcngkampc imopc imotomang. Bv sc:kobulu ba:la:dagji ja:j ollungara:dokkc sumnenna ba:lendopc odokkc amo:do:pc banga:dopc lulvgto,

⁴⁴odokkc akedc ataknc vsvngki cdcmanggom ja:j ollu:dok intungkolo. Odokkc cdcmpila appv:dc amo:do dugpvamsukang.