Read Mising AGER KVDVNG 6 Bible Online

AGER KVDVNG 6 - Mising bible

AGER KVDVNG 6

¹Cdcmpidodcm odo longckvdv:do agom tadjvgla gvmvnnc kvdv:dc kvnamlo bojcbomna, Helleni:kvdv:dc Hibriukvdv:dc lujcgmvnsukang lcga:dc buluk tumbo nc:ngkvdv:dcm longgcm longgcm orbikolo cmmumpc mcyodla lc:dungai.

²Odokkc cdc vyvngkolang anyidc agom tadjvgla gvmvnnc kvdv:dok kcrc:dcm gokkumsuto odokkc luto, “Ngolu tcbuldok agercm gerdodcm Ru:ncpvnckc agomdcm lutadbigo:ma:pc du:namdc aimang.

³Cdcmpidag, bvrokvdvnga, nolukkolok ainc amin gvnc tani: anggoko la:lentok, Yalodc:lang kinnam agomdc aipakpc kinncko, sc:kom ngolu sc gerpcnam agerscm togclvgla:ycji.

⁴Cmpige:la ngolu avycm kumnamlo tolvgsuyc odokkc agomdok agerlo:pc.”

⁵Odokkc bulu okodcm lutoji tani: kcrcng appv:dcm mc:lvgsumoto, odokkc bulu Stipenmc balento, mc:jvgc bi:nc odokkc Angunnc Yallo bi:nc tani:ko, odokkc Pilipbv, Prokoru:bv, Nikanor, Timon, Parmenas, Nikolaubv, Antiokdokkc dormo langkonsunckonc.

⁶Cdcmbulum bulu mclvgla ager gerdopc mclvgnam tani:kvdv:dok kcra:do du:moto, odokkc bulu kumto odokkc buluk alagcm buluk tayc:lo ri:tomto.

⁷Odokkc Ru:ncpvnckc agomdc bojcbomna gvbomkang; odokkc Jerusalemdo agom tadla gvmvnnckvdv:dok kvnamc kcrcng kcrc:pc, odokkc dormo ager gernckvdv:dok bojcrungc mc:jvgdok mcngkampc ikangai.

⁸Odo Stipenbv, ayangclang ager ilang-gvlangc pv:la, bottcru:nc mcngapla:ma:nam agercmlang kanggodcm tani:kvdv:dok ara:do lcngkanto.

⁹Odo Mclennvgkunam kvdv:dok (cdcmpc cdcm ludagai) pagbokvdv:dok kumko okumkvdv: dokkc, odokkc Sirenedokkclang Alekjandriang kvdv:dokkc, odokkc Kilikia: dokkclang Asia:dokkc, dagrobamkang. Odokkc Stipenkokki ge:mvnsula luka:mvnsukang.

¹⁰Cmpige:la bv oko kinnampa:namdokki odokkc yalodokki lurasutoji bulu lupvsula:tomang.

¹¹Odokkc bulu kinmango:pc tani:kvdv:dcm luwurlvgto, Sc:kobulu, “Ngolu bvk Ru:ncpvncmc:la: Mose:mc aima:nc cmna lunamcm.” Tatto cmna lutoji.

¹²Odokkc bulu tani:kvdv:dcm odokkc abv:nc kvdv:dcm odokkc agom jvggabnc kvdv:dcm nvgur-nvgbarlvgto odokkc bvm ycnggabto odokkc bvm kcba:do:pc boma:toku,

¹³odokkc lume:pc lukancm lubito sc:kobulu luto, “Sc tani:sc cdvlosiin sc angunnc mo:taksoglang lujvg lurodok biru:di:pc lunamdcm lungasumang;

¹⁴kapcnc ngolu bvk lunamcm tatto jc Najaretdok Jisudc sc mo:takscm momvgyc, odokkc ngolum binam Mose:kc itcng gvtc:dcm angumoyc.”

¹⁵Odokkc bvm nge:la kangge:la, kcba:do tednc appv:dc ka:to jc bvk dumsimigmodc taycng among lutad lunclok dumsi-migmompc idagai.