Read Mising AGER KVDVNG 8 Bible Online

AGER KVDVNG 8 - Mising bible

AGER KVDVNG 8

¹Odokkc Soulbv bvk sinamdcm tolvgkka odokkc odo longcdo bottcru:nc ipusire:ycm Jerusalem mondoli:do irobbomkang; odokkc bulu appv:dc Judiangclang Samariangdo dugpitsukang, mclvgla ager gerta:ka cmnam kvdv:dcmbulum lutcngo:ma:pc.

²Dormo kanc tani:kvdv:dc Stipenmc agolo lc:to, odokkc bvk lcgangc kvnggv:pc mc:drvvra kabancm banto.

³Cmpige:la Soulbv mondoli: kvdv:dcm kvnggv:pc dcmpit dcmridam bomkangai, odokkc okum okumkvdv:do gva:la, bv milbongcla nc:ngkvdv:dcm solenamlvgto odokkc bulum makana:lo tumto.

⁴Cdcmpidodcm cdc dugpitdugritsunckvdv:dc appv:lo:pc gvgong gvgo:la tadponc agom lutaddcm lugongamto.

⁵Pilibpv Samaria:dok nogorkolo:pc gvto, odokkc bulum Kristokc agomcm lutadgo:bito.

⁶Odokkc cdc yadkumsunc tani:kvdv:dc lckko:pc tatto okodcm Pilipbv lutoji, bulu cdvlo bvk lunamdcm tattoji odokkc bvk inam kanggodkvdv:dcm ka:toji.

⁷Kapila:nc aima:nc uiyc pa:nam bojcru:lokkc duglenamkang, bottcpc jc:la jc:la; odokkc bojcrungc sc:kobulu intungko sipaknc cdcmanggom lambc gvla:ma:p du:nckvdv:d csangamkangku.

⁸Cdcmpila nogordo kvnggv:pc mc:pokang.

⁹Cmpige:la Simon cmnam tani: ako dungai sc:ko po:pc nogordo montorongcm idungaji odokkc Samariang tani:kvdv:dcm mc:la mcngapla:ma:pc imodungaji, scmpc lula jc bv avdci bottcru:pc mcnggcpcnamko.

¹⁰Bulu appv:dc adjionclokkc bottcnclo:pc bvk agom lunamdcm tatto, scmpc lula, “Sc tani:sc:na cdc Ru:ncpvnckc ilang gvla:dc okodcm bottcru:pc mcngcpcnam cmdagji.”

¹¹Odo bulu bvk lunamkvdv:dcm mc:jvgto, kapila:nc bojcrungko bv bulum bvk montoro:dokki mc:la mcngapla:madopc imoto.

¹²Cmpige:la cdvlo bulu Pilipkc lutad lubinamdcm mc:jvgtoji bv Jisu Kristokclang Ru:ncpvnckc migom doko mo:pvdok lutad lubila, bulu baptismongcm la:to, nc:ngcla: milbongkvdv:dc.

¹³Simonbv:sinci mc:jvgto, odokkc baptismo langge:la Pilipkolo du:mvnto. Bottaru:nc kanggodcmlang mcngapla:ma:nam agerkvdv:dcm inamkvdv:dcm kangge:la, bv mc:la mcngapla:tomang.

¹⁴Cdcmpc inamc Jerusalemdok mclvgla ager germonam kvdv:dc Samariangdo:sin Ru:ncpvnckc agomcm torvgsuto cmna cdvlo tadtoji bulu Pitormclang Jo:nmc bulukkolo:pc mclvgto,

¹⁵sc:kobulu gvla buluk lcgangc bulu jen Angunnc Yalodcm torvgsuka:langka cmna kumtoji;

¹⁶Kapila:nc bulukkolok akolo:sin cdc pvnga:mangada, cmpige:la Ru:tum Jisukc amino:lo bulu baptismongcm la:tungai.

¹⁷Odokkc bulu buluk tayc:lo alagkvdv:dcm pigabamto odokkc Angunnc Yalodcm torvgsuto.

¹⁸Cdcmpc idodcm ager gerdopc mclvgnam tani:kvdv:dok alagcm pigabge:la Yalodcm bito cmna kangge:la, bv bulum murkongcm bito, scmpc lula,

¹⁹“Ngomsin cdc ilanggvla:dcm bi:pcn, odomvlo ngo sckkoloi ngok alagcm pigabycji Angunnc Yalodcm pa:dopc.”

²⁰Cmpige:la Pitorbv bvm luto, “Nok murko:dc noggvngkolo omvgosvg ka:langka, kapila:nc no mc:dungai Ru:ncpvnckc aya:la binam amandcm murkongkokki pa:la:ycpc cmna!

²¹Nokkc odo agomdok inyopkoba: pa:pcnamko kamang, kapila:nc nok asindc Ru:ncpvnckc kcra:lo aipc mc:ma:ncko.

²²Cdcmpidag asinc mc:dvrra mc:latsutokuk cdc nok aima:pc asin mc:nam kvdv:dok lcgangc, odokkc Ru:tumkolo:pc kumtok, odomvlojen, mc:yinsula:ycm, nok asin mc:namdcm jen mc:yinsuycpc.

²³Kapila:nc ngo ka:namc no konc asin kancko odokkc odoromi:ncko.”

²⁴Odokkc Simonbv luto, “Ngok lcganc Ru:tummc kumpo:tei, odomvlo nok lunamkvdv:dok okodc:sin ngokkolo pa:ma:dopc.”

²⁵Cdcmpidodcm bulu cdvlo Ru:tumkc agomdcm lukanbitoji odokkc lutoji, bulu Jerusalempc gvladamkangku, Samaria:dok bojcru: do:lu:lo tadponc lutaddcm lugo:bila.

²⁶Cdcmpila Ru:tumkc taycng among lutad lunc akonc Pilipmc luto, “Darobla pcya:pc gvka:la gvkang Jerusalem dokkc Gajapc gvnc ali: lambcdo:pc.”

²⁷Cdc gvlamma:nam ali: lambckai. Odokkc bv darobla gvkang. Odokkc ka:toka, Itiopiang tani: akonc, magma:nckonc, kandaki:dok migom gergurnckonc Itiopia:dok migom nc:lok, bvk murkong mckumya:nckonc, Jerusalempc gvla kumka odokkc gvlatdunggakui;

²⁸bvk gure:garido sangge:la, bv lungor lunc Isaiangkc lungor lunamcm pola: pola gvdungakui.

²⁹Odokkc Yalodc Pilipmc luto, “Gvkang odokkc cdc gure: ga:ri:do sa:mvntoka.”

³⁰Cdcmpila Pilipbv bvkkolo:pc dugmvnkang, odokkc bvm Isaia: lungor luncdok lunamkvdv:dcm pola: pola gvdopc tadbegto, odokkc tawuto, “No okodcm pola: pola gvdu:ji kindagyc?”

³¹Odokkc bv luto, “Akonc ngom poyirbima:mvlo, kapc ngo kinycn?” Odokkc bv Pilipmmc sa:mvndopc odokkc bvk lcdulo tedmvndopc gogsa:to.

³²Cdc astrodok pa:nam bvk ponam potin intakdc sc:vai: “Me:r sobencm pakencdo:pc boma:namdcmpc, cdcmpcmanggom me:r soben awokonc odok amvd gadnclok kcra:do monba:ncmpc inamdcmpc, Bv Bvk nampangcm koge:tomang.

³³Bvk anyi:sunamdo aipc kcba:monamdc bvm mcpakto. Bvk opvndcm sc:ko lulen lua:la lubila:ycn? Kapila:nc bvk turnamdcm mo:pvsokkcm la:pakto.”

³⁴Odo cdc magma:ncdc Pilipmc luto, “Kumdung ngo, sck agomcm, lungor luncdc scm lutang, bvk avkc agomcmyc: cdcmanggom sc:kaikc agomcmyc?”

³⁵Odo Pilipbv ka:sa:la luto, odokkc cdc astrodokki lusa:bomna bv Jisukc tadponc agomdcm lubito.

³⁶Odokkc bulu asiko gvpa:suto, odokkc magma:ncdc luto, “Ka:toka, sc:na assc du:nc!

³⁷Ngom baptismong bipc okkonu motumdang?”

³⁸Odo bv gure: ga:ridcm du:teddopc lulvgto, odokkc bvnyig anyipakdc asido:pc sv:jvngkang, Pilipbv:la magma:ncdc, odokkc bvm bv baptismongcm bito.

³⁹Odokkc cdvlo bulu asidokkc sv:sa:tokuji, Ru:tumkc Yalodc Pilipmc yv:sa:bomtoku odokkc bv bvm lckoda cdvlosin ka:begmotokumang, odokkc bvk lambcdok mc:po mc:pola gvkangku.

⁴⁰Cmpige:la Pilipbv Ajotuspc pvngkang, odokkc gvla du:tvdodcm tadponc lutaddcm lugobitvla appvng nogorkvdv:do Kaesariapc gvpv:ma:sisscm gvto.