Read Mising ROMANKVDVNG 1 Bible Online

ROMANKVDVNG 1 - Mising bible

ROMANKVDVNG 1

¹Poulbv, Jisu Kristokc ager gerya:nc akonc, mclvgla gerdopc mclvgnampc gognamkonc.

²Ru:ncpvnckc tadponc lutad lunamdok lcga:pc okodcm langutagji po:pcbong bv bvk lungor lunckvdv:dokki pesutoji angunnc astrong kvdv:do,

³tadponc lutaddcm Bvk awodok agomcm, sc:kobv Dawidkolokkc lenka:ji adinamvrdcmpc;

⁴odokkc Ru:ncpvnckc Awopc togc:lvgnam ilang-gvlangkokki Angunnc Yalodokkcmpc Bvk sikolokkc turkunamdokki, Jisu Kristobv ngoluk Ru:tumc,

⁵sckkokki ngolu ayangcm pa:toji odokkc appvng ope:lo:pc bvk amin lcgangc mc:jvgdok lukampc gvdopc mclvgla ager gerncpc ila lubidopc,

⁶nolumsin lutc:la sc:kobulum Jisu Kristokcpc idopc gogtagji.

⁷Ro:mdo Ru:ncpvnckc aipc mc:nam appv:do:pc, sc:kobulum angunnc tani:pc gogtoji bulukkolo:pc: Ngoluk Abu Ru:ncpvnckolokkc nolukkolo:pc ayangc mc:po odokkc Ru:tum Jisu Kristokolokkc.

⁸Adsa:danna, ngo noluk appvngkc lcgangc Jisu Kristokokki Ru:ncpvncmc aipai bidung, Kapila:nc noluk mc:jvgnamdcm mo:pv appv:lo lugongambito.

⁹Kapila:nc Ru:ncpvncbv ngok lukanbinnc, sc:kom ngo Bvk Awodok tadponc lutaddcm ngok yalokokki ager gerbidoji, jc ngo mcma:ru:pc nolum lubidung ngok kumdokvdv:do lo:dvscm,

¹⁰kodungai jc kapci kapcidaggom ngo su:pak gvtcr-gvngapso nolukkolo:pc gvnamdcm gvla:ycpc.

¹¹Kapila:nc ngo nolum ka:lv:la dung, jc ngo nolum yaloki pa:nam amanckkc bila:dopc nolum kvnggv:mopc, cdcna,

¹²jc ngolujen lckolakkopc akonkc mc:jvgki akonc asin bottadopc, nolukkclang ngokkc.

¹³Ngo nolum kintoka cmna mc:dag, bvrokvdvnga, jc ngo mcna:mcna:pc nolukkolo:pc gvpc cmna mc:to (cmpige:la su:paklo:pc motumna lc:tag,) cdcmpc ila jc ngo:jen nolukkolok arvgcm gaddopc Ru:ncpvncmc kinma:nc tani:kvdvng ara:do:pc cdcmv:pc.

¹⁴Ngo Girikkvdv:doklang Angu tani: kvdv:dcm, asin mc:jo:nclang aima:nc kvdv:dok lcgangc gvpcru:nammc:

¹⁵Cdcmpila ngo tadponc lutaddcm sc:kobulu Ro:mdo du:nc nolukkolo:sin lulvngc mole:dung.

¹⁶Kapcnc ngo tadponc lutaddcm lubipc anyi:mang: cdc Ru:ncpnckc ilang-gvlang turnam lcganc sckkc mc:jvgc du:ji appv:lo, Jiwu kvdv:do:pc lupo:danna odokkc Girik kvdv:do:pcsin.

¹⁷Kapila:nc Ru:ncpvnckc dormo kanamdc mc:jvgkokki mc:jvglcgangc lenkang; cdcm kapc adla lc:tagji, “Sc:kobv mc:jvgki dormokadagaji turyc.”

¹⁸Taycng amo:tokkc Ru:ncpvnckc aglvngcm lcngkanto tani:kvdv:sok appvng dormo agerkvdv:dok lcgangc lcngkanto odokkc aima:nc agerkvdv:dok lcgangc sc:kobulu bvk aima:nc agerkvdv:dokkc arodcm motumla du:doji.

¹⁹Kapila:nc Ru:ncpvnckc agomdcm kinpcnamdcm bulukkcpc ka:de:yc, kapila:nc Ru:ncpvncbv cdcmbulum lcngkanto.

²⁰Rcngamscm ru:lendodokkcbong bvk kangkurla:ma:nam mcngkamsakkamdc, amin minpc, Bv lo:dvlongkvpc du:nc tornamdc odokkc ru:ncpc inamdc narc:pc:sc:pc bvk ru:nam atvkvdv:do.

²¹Cdcmpidag bulum mc:yinsutomang; kapila:nc Ru:ncpvncmc bulu kindagagom bulu Ru:ncpvnckoncmpc Bvm mcnggcpcnamcm mcnggctomang cdcmanggom bv aipai bitomang, cdcmpige:la buluk mcngkolo bulu cmmumpc Bvkkcpc batpakkang, odokkc buluk kinsupa:suma:n asinkvdv:dc kcmokang.

²²Kinnc pa:nc cmna lusuge:la,

²³bulu okkomsin kinma:ncpc ikang, odokkc cdvlosin sima:nc Ru:ncpvnckc amin gvnamdcm sinc tani:lok moimangcmpinc gcsunckokki bikonsuto cdcmanggom pcttangkokki cdcmanggom simvnkvdv:dokki cdcmanggom ngcnggo:la gvnckvdv:dokki.

²⁴Cdcmpige:la Ru:ncpvncbv bulum buluk asinkvdv:dok aima:sima:pc mcngkampc topaklvgto, buluk avkc amvrkvdv:dcm mcngkampc inamkvdv:dcmpc,

²⁵Kapila:nc bulu Ru:ncpvnckc aro agomdcm lume:lunamko lcgangc lukansuto odokkc ru:namdcmdan kumto Ru:ncpvncmc kumma:pc, sc:kobv lo:dvpc akirba:d pa:ncdc:ji! Amen.

²⁶Sok lcga:pc Ru:ncpvncbv bulum mcngc kama:nam ilvng-gvlv:lo:pc tolvgto. Buluk nc:ngkvdv:dc jontcng ajoncm jonma:pc jongo:to,

²⁷odokkc milbong tani:kvdv:dc:sin avkc la:nam nc:ngcm jonma:pc mcpakto odokkc akonkc lcgangc akoncm ilvnggvlvngcm topaklvgto, milbong tani:kvdv:dc anying kama:nc agercm milbong kvdv:dokki gerto odokkc buluk avkc aima:nc agerlok pa:pcnammcm buluk avkc imurkvdv:dokkcm pa:suto.

²⁸Odokkc Ru:ncpvncmc bulu arro cmna ka:tomang, Ru:ncpvncbv bulum mcngkinma:nam asinno:pc tolvgto odokkc aima:nc inamgvnamlo:pc.

²⁹Bulukkc appvng aisi:ma:nc ager gernam ipa:ma:nam ager, ka:bomc:bonam, ncnamc pv:namkopc dungai. Mirupc mc:namongc bi:la, tani:mokenc, pamvnsunamc, yadnamc, cmpcsin ka:lv:mvnsuma:namc, bulu pvsvpasapc agom luka:mvnsunc,

³⁰lume:pc ammem lujcg lugo:nc, Ru:ncpvncmc tayumnc, bottapc mc:la lusunc, pirtapc mansunc, lubonsula lusunc, aima:nc agercm la:lennc, ancabu agom tadma:nc,

³¹monba: ba:nc, mc:jvg kama:nc, asinkama:nc, ayang-abo kama:nc.

³²Bulu Ru:ncpvnckc lulvgcm bulu kinge:langgom jc cdc sc:kobulu cdcmpinc agercm gerycji sipa:do, bulu imanggom cmpige:la cdc sc:kobulu cdcm iyiddagji bulum aidag cmna tolvgdagsin.