Read Mising ROMANKVDVNG 10 Bible Online

ROMANKVDVNG 10 - Mising bible

ROMANKVDVNG 10

¹Bvrrangkvdvnga, ngok asinsok mcngkamclang kumnamdc jc bulum mopvtycpc cmna.

²Ngo bulum lukancm lubidu:bong jc bulukkc Ru:ncpvnckc lcgangc mc:pola mc:namc dung, cmpige:la cdc kinnamdcmpc imang.

³Kapila:nc, dormokanamdcm kinma:pc du:la cdc Ru:ncpvnc kodokkc gvncdcm, odokkc buluk avkcdcm mogablvgpc cmna, bulu Ru:ncpvnckc dormokanamdo:pc tolvg tomang.

⁴Kapila:nc Kristobv lujvglurodok du:tcrc, jc appvngc sc:kkci mc:jvgc du:ji dormokadag cmna luycpc.

⁵Mose:bv adtag jc lujvg lurodok lukamdcmpc dormo ager gerncdc odokki turycpc.

⁶Cmpige:la mc:jvgdo jvggabla jvgnamdc ludag, Nok asin ara:bo “sc:kobv taycng amo:to:pc dc:sa:yckun?” Cmna luyoka, (cdcna, Kristomc sikolokkcm la:sangkakupc.)

⁷Cdcmanggom “Sc:kobv jiki:-jiobo:pc gviycnc?” (Cdcna, Kristomc sikolokkcm la:sangkakupc.)

⁸Cmpige:la cdc okko cmdang? Agomdc noluk kcra:dc, noluk nabberdo odokkc noluk asin kvdv:do (cdcna, mc:jvgdok agomdc okodcm ngolu lutadbidoji;)

⁹kapila:nc no jodi nabberdokki lude:sumvlo jc Ru:ncpvncbv Bvm sikolokkcm turmotoku, no turyc.

¹⁰Kapila:nc tani:yc bvk asinbokki mc:jvgdag odokkc cdcmv:pc aidag cmna ludag, odokkc bvk nabberdokki bv lude:sudag odokkc cdcmv:pc mopvdag.

¹¹Ru:nckc agom adgabdc lutag, “Sc:kosin sc:ko Bvm mc:jvgycnc anyi:moma:yc.”

¹²Kapila:nc angupc lunamc okkosin kamang Jiwukvdv:doklang Girikdok; cdc Ru:tumv:dc appv:lok Ru:tumdc odokkc Bvk mitcmircmcm Bvm gognc appv:dcm bidag.

¹³Kapila:nc, “appvngcmci sc:kobv Ru:tumkc aminno gogycji mopvtyc.”

¹⁴Cmpige:la kapc tani:kvdv:dc Bvm gogycn sc:kom bulu mc:jvgma:ji? Odokkc kapc bulu Bvm mc:jvgycn sc:kokc agomcm bulu cdvlosin tadkvma:ji? Odokkc bulu kapc tadycn agom lutadbinc ako kama:pc?

¹⁵Odokkc kapc tani:kvdv:dc lutadbiycn bulum mclvgma:mvlo? Cdcm adla lc:namdcmpc, “sc:kobulu tadponc lutaddcm lubidagji kapc alckvdv:dc kangkandagnc!”

¹⁶Cmpige:la bulu appv:dc tadponc lutaddcm tattomang; kapila:nc Isaia:bv luto, “Ru:tuma, sc:konu mc:jvgton sc:kobv ngolukkolokkcm tattoji?”

¹⁷Cdcmpinamc mc:jvgdc a:dag okodcm taddagji, odokkc okodcm taddagji Kristomc lutad lubinamdokkc a:dag.

¹⁸Cmpige:la ngo tawudung bulu tattoma:lang? Aropakpci bulu tatto; kapila:nc “Gomugdc mo:pvsok appv:lo:pc gvlenkang, odokkc buluk agom kvdv:dc mo:pvsok du:tcrlo:pc.”

¹⁹Lckoda ngo tawudung, Israeldc mcngkintoma:nci? Lupo:danna Mose:bv luto, “Ngo nolum amik ka:lv:mvnsuma:dopc imoyc sc:kobulu opvnma:ji bulukkokki; okkomsin kinma:nc opvn kokki ngo nolum aglvngcm sa:moyc.”

²⁰Isaia:bv cddvko bottapc lula:dagnc, cdcmpcmvlo, “Ngom cdc sc:kobulu madagaji pa:to; Ngom sc:kobulu ka:pc cmmangaji bulum avycm lcngkansuto.”

²¹Cmpige:la Israeldok agomdcm Bv ludag, longc lo:bung kvdv:do ngok alagcm agom tadma:ncm odokkc birudi:pc agom lunc tani:kvdv:dcm laglento.