Read Mising ROMANKVDVNG 15 Bible Online

ROMANKVDVNG 15 - Mising bible

ROMANKVDVNG 15

¹Ngolu sc:kobulu ilang gvla:dagji rcmagnc kvdv:dcm gerdumsupcnammc, odokkc ngolu avyc avycm aipc mc:tvngsupcnammang;

²ngoluk appvngc kajc bvkkc bvkkc kumrvko:rcm bvk ainam lcgangc bvm aikampomopc cmna aipc mc:molai.

³Kapila:nc Kristobv avdc avycm aipc mc:tv:sumomangai; cmpige:la, cdcm adla lc:namdcmpc, “nom aisi:ma:pc lugc:nc kvdv:dok lugcnamdc ngokkolo pa:to.”

⁴Kapila:nc okodcmci lekkem adtungaji ngolum luyir lcgangc adtungai, jc cngungcma:pc du:namdokki odokkc Ru:nckc agom jvggabdokki ngolukkc mc:bomsunamc du:ycpcji.

⁵Du:tvncdok Ru:ncpvncbv odokkc asin bottadopc lusv:lvgbincdc nolum akonkc lcdulo akoncm cdcmpc lckopc du:namcm bika:langka, Kristo Jisukc lcdulo mcngkampc mc:mvnna,

⁶jc lckopc nolu gomug atcro:pc Ru:ncpvncmc amin gvmotoka odokkc Abudcm ngoluk Ru:tum Jisu Kristomc.

⁷Akoncm akonc torvgsulangka, cdcmpidag kapc Kristobv nolum torvgsutoji, Ru:ncpvnckc amin gvnam lcgangc.

⁸Kapila:nc ngo nolum lubidung jc Kristobv ager gerya:ncpc ikang Ru:ncpvnckc aro ager gernamkvdv:dcm gadpuknamkvdv:dcm lcngkanpc lenpo:nc abukvdv:dcm binam kvdv:dcm,

⁹odokkc cdcmpc ipc jc Ru:ncpvncmc kinma:nc tani:kvdv:dc Ru:ncpvncmc amin gvmoycpc cmna bvk aya:la mc:yinsunam lcgangc. Cdcm adla lc:namdcmpc, “Cdcmpidag ngo nom aipai cmyc tani:kvdv:dok ara:lo, odokkc nok amindcm ni:tompc moyc.”

¹⁰Odokkc cdcm lckoda lutag, “Mc:potoka, O Angu tani:kvdvnga, Bvk tani:kvdv:dok lcdulo!”

¹¹Odokkc lckoda, “Ru:tummc aipai bitoka, Angu tani: appvngc, odokkc tani: appv:dcm Bvm aipai cmmotoka!”

¹²Odokkc Isaia:bv lubarra ludag, “Jessi:kc appvrdc pvrrenyc, sc:kobv Angu tani:kvdv:dcm ka:sv:mosv:pc cmna dagrobycnc; Bvkkolo Angu tani:kvdv:dc mc:tinyc.”

¹³Mc:tomnamdok Ru:ncpvncbv nolum appvng mc:po mcngancm bimoteika odokkc mc:jvgkoko mcnganc, odomvlo jen Angunnc yalodok ilang-gvlang kokki nolu mc:tomlo du:ycpc.

¹⁴Ngo av avyc noluk agomcm mc:tv:sudag, ngok bvrokvdvnga jc nolu av avkvdv:dc ainammc pv:namkopc dung, appvng kinnam-pa:namc bi:la dung, odokkc akoncm akonc luyirla:dag.

¹⁵Cmpige:la agom asudkolok lcgangc ngo nolum adtung mc:pa:mokunam lambcki airu:pc migang ga:la adto,

¹⁶kapila:nc Ru:ncpvnckc ngom binam ayang abodokki Jisu Kristokc migom ager gerncpc idopc Angu tani:kvdv:do:pc Ru:ncpvnckc tadponc lutaddok kumnam ager gernc tani:kvdv:dok gernam agerki, odomvlo ja:te Angu tani:kvdv:dok binamdc, Angunnc yalodokki narc:mola torvgsuycpc.

¹⁷Kristo Jisukolo, cmpcmvlo, ngokkc bottcpc mc:sunammc lugodc ngok Ru:ncpvnckc lcgang agerlo dung.

¹⁸Kapila:nc ngo mc:tapla atv agomcm lula:ma:yc okodcm Kristobv ngokkokki gertonc cdcmma:mvlo Ru:ncpvncmc kinma:nc kvdv:dokkcm lukam tadnamcm gagpc cmna, agomkokkilang ager gernamkokki, ikan gvkanna lcngkanna kanggod kvdv:dokkilang odokkc mcngapla:ma:nam kanggodkvdv:dokki,

¹⁹Angunnc Yalodok ilang gvlangkokki, odomvlo jen Jerusalemdokkc odokkc dunggong appvngc Illirikumdo:pc ngo pv:namkopc Kristokc tadponc lutaddcm lugo:bito,

²⁰cdcmpidag tadponc lutaddcm lugo:pc ngok owudpc mc:la gerpvtpc cmna mc:la, okolo Kristomc amincm mintoji odoma:pc,

²¹ckvma:mvlo ngo akon tani:lok mosangkolo moncpc iycpc, cmpige:la adla lc:tag, “Bulu ka:begyc sc:kom bulum cdvlosin lubimangaji, odokkc bulu cdvlosin tadkvmangai.”

²²Nolukkolo:pc gvpc kapila ngom motumdagnc cdcna lcga:dc.

²³Cmpige:la su:pak, ngokkc sc dungo:ycgo:sc oko agercsin gerpcnammc kamang, odokkc ngo nolukkodo:pc gvpc cmna bojcrung dv:taklokkcbong dungai,

²⁴ngo nolum ngo Ispeinpc gvdodcm ka:pc cmna mc:dag, odokkc ngok gvdodcm noluk lcdulo du:mvnpc cmna, lcko nolum adji:okopc ajon jonsula jonsupoto.

²⁵Silo-yampo, cmpaidcmpai, Jerusalempc gvdag Ru:ncmc kumnc ainc tani:kvdv:dok lcgangc bidumsunam bombila.

²⁶Kapila:nc Makedoniangclang Akaia:dc asudowko bidumsula bipc Jerusalemdok Ru:ncmc kumnc tani:kvdv:do opanncckkcm bilvngkang;

²⁷Cdcm ipc bulu mc:lvgsukangai, odokkc aroru:pci bulu bulukkcpc murkong langgcsucsin, kapila:nc Angu tani:kvdv:dc buluk yalodok akirba:d pa:namkvdv:dcm lukansukapc gvdomvlo, bulu bulukkcpc atv attar akirba:d kvdv:dok lcgangcsin ager gerncpc ipc ipcnammc.

²⁸Cdvlo cdcmpidag ngo scm ingaptoji odokkc bulukkolo:pc scm bipakto, okodcm la:sa:toji, ngo nolukkodok gvko lambcdokkc Ispeinpc gvtvla du:yc.

²⁹Odokkc ngo kindag jc cdvlo ngo nolukkodo:pc gvycnc ngo Kristokc pv:nam akirba:ddokki gvyc.

³⁰Ngo nolum kumna ludung bvrrangkvdvnga, ngolum Ru:tum Jisu Kristokokki odokkc Yalodok aya:dokki, ngok lcdulo sipcturpc cmna imvnna noluk Ru:ncpvncmc ngoluk lcga:pc kumnamkokki,

³¹jc ngom Judia:dok mc:jvgma:nckvdv:dokkcm mopvdopc, odokkc jc Jerusalemdok lcga:pc ngok ager gernamdc Ru:ncmc kumnc ainc tani:kvdv:dok lcga:pc torvgsunampc idopc.

³²Odomvlo jen Ru:ncpvnckc ayangki ngo nolukkolo:pc mc:pola gvla:dopc odokkc noluk jonsunamdo bvdv:bvlong gvpakdopc.

³³Mcngandok Ru:ncpvncbv noluk lcdulo lo:dcm dungka:langka. Amen.