Read Mising ROMANKVDVNG 5 Bible Online

ROMANKVDVNG 5 - Mising bible

ROMANKVDVNG 5

¹Cdcmpila:yam, ngolum mc:jvgkokki ainc cmana lunamkokki, ngolukkc ngoluk Ru:tum Kristokokki Ru:ncpvnckolo mcnganc dung.

²Bvkkokki ngolu sc aya:so:pc gva:begto ngolu oko ara:lo dagdu:ji, odokkc ngolu Ru:ncpvnck aipaidcm ngolu lukonsula mc:pomola:do.

³Cdcmpcyamsin, ngolu ngolum ipusire:kvdv:do mc:pomola:do, ipusire: pa:dolo:sin mentumsula:nam tornamcm lenmodag cmna kinna:yam,

⁴odokkc mentumsunam mc:lang gvla gvnamcm mc:tincm lenmodag,

⁵odokkc mc:tinc ngolum mc:tinkama:pc imomang, kapila:nc Ru:ncpvnckc aipc mc:namdcm ngoluk asinbo pva:lvgtagbong Angunnc Yalodokki okodcm ngolum bitu:ji.

⁶Nolu cdvlo mc:lang-gvla:ma:la dungaji, odo ayirardo Kristobv ngolu aisi:ma:pc inamkvdv:dok lcga:pc sikang.

⁷Kapila dormokanc tani:ako lcgang idaggom kapcji ila sipcgomsinci sagtabla sila:mang.

⁸Cmpige:la Ru:ncpvncbv ngoluk lcgangc ayangcm lcngkandag odo cdvlo ngolu papi:la dungaji Kristobv ngoluk lcgangc sibikang.

⁹Odokkci, cdcmpinamc, ngolu su:pak bvk i:kokki ainc cmna lunamc, Ru:ncpvnckc aglv:dokkc bojcrungko ngolum mopvtyc.

¹⁰Kapila:nc cdvlo ngolu mirua:ji ngolu Ru:ncpvnckolo lckotokubong Bvk awodok sinamdokki, airu:pc bojcya:pc, ngolu jc lckotokubong, Bvk turnamdokki ngolum moturyc.

¹¹Cdcmo:pcmang, cmpige:la ngolusin, Ru:ncpvnckolo mc:podo ngoluk Ru:tum Jisu Kristokokki sckkokki ngolu su:pak ngoluk lckokunamcm pa:tokuji.

¹²Cdcmpinamc kapc pa:bc mopvso tani: akokokki angka:nc odokkc sinamc pa:b kokki, odokkc tani: appvngc pa:bcm inamkokki sinamc appvng tani:lo:pc angabkang —

¹³lujvgluro kama:dodo:bong pa:bc aropakpci dungai, ckvdaggom pa:bcm kvmang okolo lujvglurro kama:ji.

¹⁴Cdcmpidaggom sinamc Adamkolokkc Mose:kolo:pc, cddo:mang Adamkc imurdcmpc ima:nc kvdv:dcmsinci, sc:kobv gvpcncdcmpc incdc:ji.

¹⁵Cmpige:la arc la:ma:pc binamdc cdc imursiyardcmpc imang. Kapila:nc bojcrungc tani: akodok imur siyardokki sika:mvlo, Ru:ncpvnckc aya:dokki airu:pc bojcya:pc odokkc aya:dok arc la:ma:pc binamdc cdc tani: ako Jisu Kristoki bojcrung lcgangc bitung.

¹⁶Odokkc cdc arc la:ma:pc binamdc cdc tani: akodok pa:b inamdokki aima:pc inamdcmpc imang. Kapila:nc kcbang ba:namdc ako imurgvmurki lenna mokemoyenammcm langa:to, cmpige:la arc la:ma:pc binam amandc bojcrungko imursiyarnam lokkc ainc cmnamcm langa:dag.

¹⁷Jodi, Tani: akolok imursiyarkokki, odo tani:dokki sinamc migom doto, bojcru:yangko sc:kobulu bi:poknc ayangcm torvgsuycji odokkc arc la:ma:pc binam amannok pa:yc cdc tani: ako Jisu Kristokoki turdakso dormokanamc migom doyc.

¹⁸Odokkc tani: akodok imur siyarki appvng tani:ycm aimang cmna mokkeyampc gvbokang, cdcmv:pc tani:akolok dormokanamki moturnammc odokkc turnamcm appvng tani:lcgang pa:to.

¹⁹Kapila:nc kapc tani:akolok agom tadma:pc inamki bojcrungcm papi:pc imotonc, cdcmv:pc tani:akolok agom tadma:pc inamki bojcrungcm dormo kancpc imoyc.

²⁰Lujvg-lurodc angkang, imursiyardcm ibarmopc cmna; cmpige:la okolo pa:bc bojcka:ji, ayangc cdc appv:dcmyam bojcyangkang,

²¹odomvlojen, pa:bc sinamlo migom doto ayangcsin dormo kanamki turyarla turnamdo Jisu Kristo ngoluk Ru:tumkokki migom doycpc cmna.