Read Mising ROMANKVDVNG 9 Bible Online

ROMANKVDVNG 9 - Mising bible

ROMANKVDVNG 9

¹Ngo Kristokolo du:la agomdcm ludung, ngo lume:ycm lumang; ngok mc:nam sagnamsc Angunnc Yalodo ngom lukancm lubidag,

²jc ngok asinbo kvnggv:pc mc:dvrdag odokkc gvngasuma:nam du:gcm gvnamki.

³Kapila:nc ngo kindagjc ngo av avci pelvgnampc pelvgkosupc mc:la:dagai odokkc ngok bvrrangkvdv:dok lcgangc Kristokolokkc mc:panmvsula:ya:pc, ngok ope:kvdv:dokkc opvnkokki.

⁴Bulu Israeldo du:nc, odokkc bulu awo omma:pc idag, amin gvnamdc, ru:scg lujvg lurodc:bulu, lujvg lurodcm binamdc, kumnamdc;

⁵odokkc bulukkc lenpo:nc tani:kvdv:dc, odokkc buluk ope:kvdv:dc, adinamvrpc, Kristokolo. Ru:ncpvncbv sc:kobv appvngcm bottcya:n akirba:d pa:ncpc lo:dv:pc ika:langka. Amen.

⁶Cmpige:la cdc cdcmpcmang Ru:ncpvnckc agomdc:jc aitomang cdcmpc. Kapila:nc Israeldokkc lennc appv:dc Israelmang,

⁷odokkc appv:dc Abrahamkc omma:mang bulu bvkkolokkc lennam lcngangki; cmpige:la “Isaakkokki nokkolok lennckvdv:dcm amin minyc cmnamdokkipak.”

⁸Cdc okkom cmdagnc cdc adinamvrdok omma:dc:mang sc:kobulu Ru:ncpvnckc omma:dc, cmpige:la pesunamdok ommangkvdv:dcm ope:ycmna kvto:

⁹Cdcmpila:na pesunamdc lutonc, “So ayirso ngo gvlatycku odokkc Sarabv awoko pa:ycpc.”

¹⁰Odokkc cdcmo:pcmang, cmpige:la cdvlo Ribeka:bv tani:akolokkcpc ommangc amvrro du:ycnc,

¹¹ngoluk toku abu Isahakbv, bulum omangadagom odokkc ainckoba: aima:ncko itomang, Ru:ncpvnckc balenna manamdok mcngkvdc du:tvdopc, ager lcgangkimang cmpige:la Bvk gognamkokki,

¹²bvm lutungai, “Abv:ya:ncdc ame:ya:ncdcm ila:sa:la biyc.”

¹³Cdcm adla lcngkamdcmpc, “Jakobmc ngo aipc mc:to, cmpige:la Esaumc ngo tayumto.”

¹⁴Okkom cmna cmpcmvlo ngolu luycn? Ru:ncpvnckolo imur agerc du:nci?

¹⁵Kapcsinmang! Kapila:nc Bv Mose:mc luto, “Ngo sc:kom ayang aboycji ngo ayangaboyc, odokkc ngo sc:kom aya:pc mc:ycji ngo aya:pc mc:yc.”

¹⁶Cdcmpidag cdc tani:lok mc:namkokki cdcmanggom luyirkokkimang, cmpige:la Ru:ncpvnckc ayang abokokkipak.

¹⁷Kapila:nc Paraomc Ru:nckc agom jvggabdc luto, “ngo nom tayc:pc la:sa:to ngok ilanggvlangcm nokkolo lcngkanpc cmnangar, odomvlo jen ngok amindcm mo:pvso lungapbidopc cmna.”

¹⁸Cdcmpila cmpcmvlo Bvkkc ayangabbo dung sc:komci Bv mc:dagji, odokkc Bv sc:komci mc:dagnc asincm tormodag.

¹⁹Odo nolu ngom luyc, “Bv kapila su:paksin imurcm gagdang? Kapila:nc sc:konu Bvk mcngkamdcm motumsula:don?”

²⁰Ckvdaggom sc:kon, tani: akonc, Ru:ncpvncmc lulatsupcncdc? Yondupge:la okodcm motoji odok moncdcm cdc agomko luycnci, “Kapila ngom cdcmpc modon cmna?”

²¹Yondupnam amo:dcm ki:lvng moncdokkc lula:nannc kama:nci, alum akko:dokkcm ki:lvng apvko kangkandopc odokkc akondcm adji:onc ager gernamcm lcgangc.

²²Kapc iyya:n Ru:ncpvncbv jodi, Bvk aglvngcm odokkc Bvk ilang gvlangcm kinpc cmna mc:ya:mvlo, aglv:lok lcgang mopen morenpc cmna monamdcm airu:pc mentumsuto,

²³Bvk amin gvnamdok mircmdcm lcngkanpc ayangabodok lcgangdcm, okodcm bv po:pcbong amingvnam lcgangc mosv:toji, ngolumci sc:kom Bv gogtoji,

²⁴Jiwu kvdvngodokkcmmang cmpige:la Angu tani:kvdv:dokkcmsin?

²⁵Hosea:do Bv aropakpci lutung: “Cdc sc:kobulu ‘ngok tani:manganc’ ‘Ngok tani:yc cmna’ ngo gogyc, odokkc bvk sc:kobv aipc mc:nammangaji ngo ‘nok aipc mc:namc cmna gogyc.’ ”

²⁶“Odokkc odo okolo cdcmbulum lukaji, ‘Nolu ngok tani:mang,’ bulum luyc ‘Turra du:nc Ru:ncpvnckc awokvdvngc.’ ”

²⁷Odokkc Isaia:bv Israel agomdcm jc:la luto: “Israeldok aowangkvdv:dok kvnamdc siycnglok sulli:kvddvkko iyc, odok asudowongkonc turnam pa:yc;

²⁸Kapila:nc Ru:tumbv Bvk lulvg agomdcm mo:pvso:p kvnggv:pc torpcrung luyc odokkc mokeyc.”

²⁹Odokkc Isaiabv po:pcbong luto, “Bojcru:dok Ru:tumdc ngolum ommang kvdv:dcm lc:pagmanggamvlo, ngolu Sodumdcmpc iyya:pc odokkc Gomura:dcmpc moiya:pc.”

³⁰Okkomna cmpcmvlo ngolu luycn? Ru:ncmc kinma:nc kvdv:dc sc:kobulu dormo agomcm mama:nc kvdv:dc cdcm pa:to, cdcna, dormo agomcm mc:jvgkokki;

³¹cmpige:la jc Israelc sc:ko dormo agomdcm matoji okodc lujvglurodcm lukamdcm gerpvttomang.

³²Kapila? Lcga:dc bulu cdcm mc:jvgkokki matomang, cmpige:a cdc ager gernamkvdv:dokki du:ncpc.

³³Bulu lcsutsuko vlv:do lcsutsuto, cdcm adla lcngkamdcmpc, “Ka:tok, ngo Jiondo vlvngko lc:tung cdc tani:kvdv:dcm lcsutsumoyc, rakut vlvngko cdc bulum otapmoyc; odokkc sc:kobv Bvm mc:jvgycnc bvm anyi:sumoma:yc.”