Read Mising 1 KORINTIANG KVDVNG 11 Bible Online

1 KORINTIANG KVDVNG 11 - Mising bible

1 KORINTIANG KVDVNG 11

¹Ngok gvkampc gvmvnncpc itoka, ngo kapc Kristokc lcdulo gvmvndoji.

²Ngo nolum aidag cmna ludo kapila:nc nolu ngom appv:lo mc:pa:dag odokkc itcng-gvtcng kvdv:dcmsin idag ngo kapc cdcmbulum nolum bitoji.

³Cmpige:la ngo nolum kintoka cmna mc:dag jc appvng tani:lok ru:tumdc Kristobv, nc:ng tani:lok ru:tumdc milbo:dc, odokkc Kristokc ru:tumdc Ru:ncpvncbv.

⁴Tani: akoncmum sc:kobv kumdoji cdcmanggom lungor ludoji bvk tukkom u:rumsuge:la bv bvk ru:tumdcm mcnggcsuma:pc ido.

⁵Ckvdaggom nc:ng akomumc sc:kobv kumdoji cdcmanggom bvk tukkudcm ungge:suge:la lungor ludoji bvk ru:tumdcm mcnggcma:pc idag — cdc bvk mittukdcm rakutnamdcmpvng idag.

⁶Kapila:nc nc:ng akonc avdc mittugcm u:rumsuma:ycnc, odo bvk dumvtkvdv:dcm scppaksutoka; ckvdaggom cdc ncng akolokkcpc ayang abo kama:ncpc iyc gadpukpcma:mvlo scpakkpc, bvm u:rumsunancko urumsumopcnamc.

⁷Kapila:nc milbong tani:akonc bvk mittukdcm u:rumsupcnammang, bv Ru:ncpvnckc moyirc odokkc amin gvnampc ila:yam; cmpige:la nc:ngc milbo:lok amin gvnamc,

⁸(kapcnc milbo tani:ycm nc:ng tani:lokkcm momangai, cmpige:la nc:ngcm milbolokkcm moto.

⁹Milbongcm nc:lcgangc ru:mangai cmpige:la nc:ngcmdan milbo:lcgangc ru:tungai.)

¹⁰Cdcmpila:na nc:ngc u:rumsupcnamko bvk mittukdo du:pcnammcnc, taycng lutad lunckvdv:dok lcgangci.

¹¹Cdcmpidaggomsin, Ru:tumkolo nc:ngc milbo:lokkc atckmang cdcmanggom milbongc nc:lokkc;

¹²kapila:nc nc:ngcm milbo:lokkcm motagai, cmpige:la su:pak milbongc nc:lokkc angupc onamc. Odokkc appvng attar atvkvdv:dc Ru:ncpvnckolokkc.

¹³Noluk avkc lcgangc aro lume:ycm ka:sutoka; nc:ng akolokkcpc mittugcm u:rumsuma:pc Ru:ncpvncmc kumnamdc kanggu:daglang?

¹⁴Rcngamc luyirma:lang milbong tani:lokkcpc dumvdcm araipc lc:namdc bvm avdcm anyi:sumodag cmna.

¹⁵Cmpige:la nc:ng akonc arainc dumvddcm gcmvlo, cdc bvkkcpc bottapc mc:supcnamc? Kapila:nc bvk dumvddcm ungkomsunaycpc bitag.

¹⁶Sc:kai akonc pamvnsupc cmna mc:yc, ngolu oko iyit-gvyitkodasin torvgsumang, cdcmanggom Ru:ncpvnckc mondoli:dc:sin.

¹⁷Cmpige:la lcdukc agom kvdv:do ngo nolum aidag cmna luma:yc, kapila:nc cdvlo nolu gvkumsudonc cdc nolu aiya:nam lcgangcmang cmpige:la aiya:ma:nam lcgangcmvn.

¹⁸Kapila:nc dunga:pc du:dodcm cdvlo nolu mondoli:pc gvkumsudonc, ngo tadbegdag jc noluk ara:do angu angunammc dung; odokkc ngo cdcm asudowko mc:jvgdo,

¹⁹Kapila:nc noluk ara:do pamvnsunc pakerpayernc kcrcngc du:ru:pc sc:kobulu noluk ara:do mc:jupmcngkapdagji kangkinna:ma:dopc.

²⁰Cdvlo nolu lckopc gvkumsula rvgsudonc, cdc Ru:tumkc donam tv:namdc:mang nolujc dodonc.

²¹Kapila:nc dododcm, appvngc bvkkc bvkkc donamcm dopangcidagbong.

²²Okkon! Nolukkc dopcla: tv:pc okumc kama:nci? Cdcmpcmanggom nolu Ru:ncpvnckc mondoli:dcm tayumdonci odokkc cdc sc:kobulukkc okkosin kama:ji anyv:sumodonci? Okkom ngo nolum luyya:n? Ngo odo nolum aidag cmna luycnci? Ma:, ngo luma:yc.

²³Kapila:nc ngo Ru:tumkolokkcm pa:to okodcm nolum bitoji, jc Ru:tum Jisubv miru alaglo tolvgdo yumcdo pitangcm la:to,

²⁴odokkc bv cdvlo aipai bitoji, cdcm Bv pentu:to, odokkc luto, “Sc ngokkc amvrc okodc noluk lcgangcji. Scm ngom mc:pa:la scmpc ilangka.”

²⁵Cdc ikamv:dcmpc tv:nanc ko:pdcmsin, donam tv:namdok lcdudo, scmpc lula, “Sc ko:psc anu lugoddc ngok i:kokki. Scm ilang, tv:lang mcna: mcna:pc nolu cdcm, ngom mc:pa:la.”

²⁶Kapila:nc cddvko mc:na:-mcna:pc sc pita:scm doycnc odokkc ko:pscm tv:ycnc, nolu Ru:tumkc sinamdcm lutadbido Bv gvlatkuma:dodo:pc.

²⁷Sc:kobvi, cdcmpidag, pita:dcm dodoji cdcmanggom Ru:tumkc ko:pdcm aima:si:ma:pc tv:doji Ru:tumkc amvrdcmlang i:dcm narc:ma:pc imonamdok imurcm incpc iyc.

²⁸Tani:akoncm avdcm ansuka:sumotoka, odokkc cdcmpc pita:dcm domolang odokkc ko:pdcm tv:molang.

²⁹Kapila:nc sc:koi akoncmum dodoji odokkc tv:doji amvrdcm narc:dagji narc:ma:ji ka:suma:pc dodagji odokkc tv:dagji bvk avkc palvgcm pakosudo.

³⁰Cdcmpila:na nolukkolok bojcrungc asin kvnggv:ma:nc odokkc mola:ma:nc, odokkc akke sika:bo:nc.

³¹Ckvdaggom ngolu avkc aropakpc asinc mcngc sagcla ka:sumvlo, ngolum kcbang ba:pcnammang.

³²Cmpige:la cdvlo ngolum kcbangcm Ru:tumkokki ba:dagji, ngolum imurcm aipc imodakku odomvlojen rcngamsokki lckopc palvgkosuma:ycpc.

³³Cdcmpcmvlo, ngok bvrokvdvnga, cdvlo nolu lckopc gvkumsudonc,

³⁴akonkc lcgangc akonc toya:mvnsulangka — sc:koiyc kcno:ycmvlo, bvm okumdo domotoka — ckvma:mvlo nolu palvgkosukapc gvkumsudo. Ake agomkvdv:dok lcgangc ngok gvdodcm ngo lukanbiyc.