Read Mising 1 KORINTIANG KVDVNG 13 Bible Online

1 KORINTIANG KVDVNG 13 - Mising bible

1 KORINTIANG KVDVNG 13

¹Ngo jodi tani:kvdv:doklang taycng lutad lunckvdv:dok agomkokki agomcm luyc, ckvdaggom aipc mc:namc kama:yc, ngo bc:la du:nc bottcnc arcm aborko cdcmanggom tubla bc:nc lu:pe.

²Odokkc ngokkc lungor lunanc ilang gvlangc jodi dung, odokkc appvng kinnam agom kinyc, odokkc ngokkc appvng mc:jvgc dung, adi: kvdv:dcm ncrpakla:namc, cmpige:la ayang ka:ma:mvlo, ngo okosinmang.

³Ngokkc okko du:nc jodi ngok amvrcm rompakdopc bipakyc, ckvdaggom aipc mc:namc kama:mvlo, ngo okkomsin pa:pc pa:mang.

⁴Aipc mc:namdc mentumsula du:namc odokkc aya:pc mc:namc; Aipc mc:namdc amigdvgncmang cdcmanggom pirtapc mansuncmang; cdc ngowong cmna mc:suncmang cdcmanggom ikat-siyatla incmang.

⁵Aipc mc:namdc odok avkc lambcdok mcmang ke:ke:pc gvmang; cdc aglvngsangke:mang cdcmanggom mc:nying mc:ncmang;

⁶cdc imurlo mc:pomang, cmpige:la arolo mc:podag.

⁷Aipc mc:namdc appvng attarcm torvgsudag, appvngcm mc:jvgdag, appvngcm toka:dag, appvngcm menrasudag.

⁸Aipc mc:namc cdvlosin mc:tcrsumang; lungor lunam kvdv:dokkcpcdan, cdcbulu lungasuyc, kinnamdokkcpc, cdc yogpakyc.

⁹Kapila:nc ngoluk kinnamdc kinapmang odokkc ngoluk lungor lunamdc pv:mang;

¹⁰Ckvdaggom cdvlo pvnga:ycnc, kinapma:namdc yogpakyc.

¹¹Cdvlo ngo kowowa:ji, ngo kowawkoncmpc agomcm luka, ngo kowawkoncmpc asinc mcngka, ngo kowawkoncmpc lugodcm luka. Cdvlo ngo bottaka:ji ngo inam gvnam lambckvdv:dcm ko:kangcmpc mcpakto.

¹²Kapila:nc su:pak ngolu arsilo ka:soka:mola ka:do, cmpige:la odo dagrvgsudanna ka:begyc. Ngo su:pak intagongko kindag; odo ngo appv:dcm kinyc, ngo kapc appv:scmci kintoji

¹³Cdcmpidag, mc:jvgc, mc:tinc, aipc mc:namc dungkolo du:mvndag, cdc awumdok, cmpige:la odok bottarya:ncdc aipc mc:namdc.