Read Mising 1 KORINTIANG KVDVNG 15 Bible Online

1 KORINTIANG KVDVNG 15 - Mising bible

1 KORINTIANG KVDVNG 15

¹Su:pak ngo nolum mc:pa:moycku, bvrrangkvdvnga, oko gomugki ngo nolum tadponc lutaddcm lubikan, okodcm nolu tadlvgsutoji, okodo nolu dagdu:ji,

²okodokki nolu turdu:ji, cdcm nolu kvnggv:pc gagla du:mvlo — ckvma:mvlo nolu cmmumpc mc:jvgto.

³Kapila:nc ngo mayangarnamdcmpc okodcm ngo pa:toji, jc Kristobv ngoluk pa:p lcgangc Ru:nckc agom jvggabdcmpc sikang,

⁴jc Bvm agolo lc:to, jc Ru:nckc agom jvggabdcmpc lowum longcdo turmotoku,

⁵odokkc jc Kepasmc lcngkansutoku, odokkc vyvngkolang anyidcm.

⁶Odokkc lvngko anggoko bojcya:ngcm bvrokvdvngcm lckoatcro:lo, odokbuluk akedc singapka:bo:daggom.

⁷Odokkc Bv Jakobmc lcngkansuto, odokkc mclvgla ager germonam appv:dcm.

⁸Appv:dok lcdupc, odvma:namlo onamcmpc inam, Bv ngomsin lcngkansuto.

⁹Kapila:nc mclvgla ager germonam kvdv:dok adjiyarya:ncdc, mclvgla ager germonammc cmna lukanci-ma:namc. Kapila:nc ngo Ru:ncpvnckc mondoli:dcm mojog-morogto.

¹⁰Ckvdaggom Ru:ncpvnckc ayangkokki ngokkc ngo sc:kobv:ji, odokkc ngokkolo:pc Bvk aya:dc cmmumtomangai. Odok luyotpc, buluk akoncmmam akoncm agercm torya:pc gerto, cdc ngo:manggom, cmpige:la Ru:ncpvnckc aya:dc okodc ngokkolo dungaji.

¹¹Cdc ngowa:mvlo cdcmanggom buludaggom, cdcmpidag ngolu lutadbido odokkc nolu cdcmpc mc:jvgto.

¹²Su:pak Kristomc sikolokkc turkuncpc lutadbido, kapc nolukkolokkc akke lula:dang sinckvdv:dokkc turkunammc kamang cmna?

¹³Ckvdaggom sinckvdv:dokkc turkunam kama:mvlo, odomvlo Kristomc turmotokumang;

¹⁴jodi Kristomc turmotokumang odomvlo ngoluk lutadbinamdc cmmumc.

¹⁵Ngolu Ru:ncpvncmc lumurla lugcbidung, kapila:nc ngolu Ru:ncpvncmc lukanbido jc Bv Kristomc turmotoku sinckvdv:dc turkumangamvlo Bv Bvm turmokumangai.

¹⁶Kapila:nc sinckvdv:dcm turmotokuma:mvlo, odomvlo Kristomcsin turmotokumang.

¹⁷Jodi Kristomc turmotokumang, noluk mc:jvgdc mc:murc odokkc nolu su:paksin noluk pa:pkvdv:do dung.

¹⁸Cmpcmvlo cdc Kristomc mc:tinna simvnnc appv:dc yogpagamkang.

¹⁹Jodi sc turnamsok lcgangongc Kristokolo ngolukkc mc:jvgc dung, ngolu appvng tani:ycmyam aya:sitapc mc:pcnammc.

²⁰Cmpige:la ncrkvgpc Kristomc sikolokkcm turmotoku, cdc sc:kobulu sika:bo:nc odokbuluk e:pongarnc a:ycdc.

²¹Kapila:nc tani: akodokki kapc sinamc angka:nc, tani: akkungkokki sinckvdv:dok turkunammc lengkang.

²²Kapcnc kapc Adamkolo appvngc sika:ji, cdcmv:pc Kristokolo appvngcm turmoycku.

²³Cmpige:la appvngcm bvkkc bvkkc lukamdcmpc:--Kristobv e:pongarnc a:yckvdv:dokkc, odokkc Bvk gvdokudodo cdc sc:kobulu Kristokcpc inckvdv:dc.

²⁴Odokkc du:tcrdc pvnga:do, cdvlo Bv migom dungko amo:dcm Ru:ncpvncmc Abudcm biycji appvng migom donamcm odokkc appvng ilang-gvlangcm odokkc tornamcm momvgmosvgge:la.

²⁵Kapila:nc Bvk alcbo Bv miruappv:dcm sanggcmma:sisscm Bv migom dopa:ru:yc.

²⁶Mokepcnam du:tcrkc mirudc sinamdc.

²⁷“Kapila:nc Ru:ncpvncbv appvng attarcm Bvk alc kcvgbo du:dopc lc:yc” Cmpige:la cdvlo cdc ludagnc, “Appvng attarc Bvk kcvgpc du:dag,” cdc cmmumpci kinnamc jc Bv langutag sc:kobv Bvk alc kcvgbo appvng attarcm mcdoji.

²⁸Cdvlo appvng attarcm Bvk kcvgpc idoji, odo Awodc avdc:sin Bvk kcvgpc du:ncpc iyc sc:kobv appvng attarcm Bvk kcvgpc lc:dagji, jc Ru:ncpvncbv appvngkcpc appv:pc idopc.

²⁹Cdcmpima:mvlo, tani:kvdv:dc okko cmna mc:ycn sincdok lcga:pc baptismo binamdcm? Sinckvdv:dcm cmpcsinci turmokuma:mvlo, kapila tani:kvdv:dc Bvk lcga:pc baptismongcm bidon?

³⁰Kapila ngo ayir ayirlo pcsokonnom pa:ycn?

³¹Ngo lura lurasula ludung, bvrrangkvdvng, ngok nolukkolo bottapc mc:sunamdc okodc Kristo Jisukolo du:ji ngoluk Ru:tumbv, ngo longgcm longgcm sido!

³²Ngo okkom arckapc pa:don jodi, tani:lukampc ludung, Ipesusolo simvnkokki momvnsuka cmmvlo? Sinckvdv:dcm turmokuma:mvlo “Kajc dola: tv:lai, kapila:nc yampo ngolu sipakyc.”

³³Yadkosuncpc iyoka: “Aima:nc ajonc ainc mc:jong asincm momvgdag.”

³⁴Noluk yvgcmnc asindo:pc mc:toka, odokkc lckoda pa:bcm iyobongka. Kapila:nc akelokkc Ru:ncpvnckc kinnam agom kamang. Ngo scm nolum anyi:sudopc ludung.

³⁵Cmpige:la sc:kaiyc tawuyc, “Kapc sinckvdv:dcm turmotokun? Cdcmpinc amvrdokki bulu gvyckunci?”

³⁶Ci monba:ba:nc tani:ya! No okodcm piddonc cdc sima:sisscm sa:ma:yc.

³⁷Odokkc no okodcm piddoji cdcmanggom amvrdc okodc badpcncji, cmpige:la ammo-amni: anggara:dc, geuosong cdcmanggom angu a:mcsong.

³⁸Cmpige:la Ru:ncpvncbv cdcm amvrkopc bidag Bv kapc balentoji, odokkc appvng ja:tlok amni:kvdv:dc odok avkc amvrcm.

³⁹Kapila:nc appvng adinc c:mo:pcmang, cmpige:la tani:kvdv:dokkcpc ja:tko dung odokkc, simvnkvdv:dokkcpc anguko, odokkc ongolokkcpc anguko.

⁴⁰Taycng amvr kvdvng dung odokkc mo:pvkvdv:sok amvrc dung; cmpige:la taycngtok amin gvnamdc ako odokkc mo:pvsok amin gvnamdc abangko.

⁴¹Do:nyitokkc unjvgdc ako, odokkc po:lodokkc abangko, odokkc takarkvdv:dok unjvgnamdc abangko; kapila:nc unjvgnamlok takar abug lokkc takar bukkondc angudag.

⁴²Cdcmpidag cdcmpc sinckvdv:dok turkunamdc okodcm pittonc kapcnc, okodcm turmotonc sipcma:nc.

⁴³Cdcm mcnggcma:pc pidlvgto, cdcm rcmakpc pitto, cdcm torpc la:sa:toku.

⁴⁴Cdcm adin-amvrpc pitto, cdcm yalo amvrpc la:sa:toku. Adinamvrko du:mvlo, yalo amvrkosin dung.

⁴⁵Cdcmpila cdcm adtag, “Ru:lenpo:nam tani: Adambv turnc tani:pc ikang;” Lcddarkc Adambv turnam-binc yalopc ikang.

⁴⁶Cmpige:la cdc yaloki du:ncdc:mang lenpo:ncdc cmpige:la adinpincdc, odokkc: yalopc incdc.

⁴⁷Lenpo:nc tani:dc mo:pvsokkai, among tani:yc; tani: akondc taycngtokkai.

⁴⁸Amongki monam tani:dc kapc idagji, cdc amongki monamkvdv:dc:sin idag; odokkc taycngtok tani:dc kapc idagji, cdc taycngtok tani:kvdv:dc:sin idag.

⁴⁹Ngolu among tani:dok mokampc monamdcmpc onampagc, ngolusin taycng among tani:dok mokampc monamdcmpcsin dumsimigmo kamvnnc.

⁵⁰Ngo scm nolum lubidung, bvrrangkvdvnga: adinclang i:yc Ru:ncpvnckc migomdokodcm pa:mvnmang, cdcmpcmanggom yogpagpcncdc yogpakpcma:ncdcmpc pa:tcng itc:mvnmang.

⁵¹Ka:tok! Ngo nolum mcngapla:ma:nam agomko lubidung. Ngolu appvngc singapma:yc, cmpige:la ngolu appvngc badyugsuyc,

⁵²vgcmpc, amigc migyabla, lcddarkc tu:lu muddodo. Kapila:nc tu:lu:dc bc:yc, odokkc sinckvdv:dcm sikuma:dopc tursangammoycku, odokkc ngolu badyugsuyc.

⁵³Kapila:nc sc jitpakpcnc rcngamsc jitpakpcma:ncdcm gcpa:ru:yc, odokkc sc sikunc rcngamsc sikuma:nc:dcm gcpa:yc.

⁵⁴Cdvlo jitpakncdc jitpakma:ncdcm gcycnc, odokkc sikuncdc sikuma:ncdcm molvgsuycnc, odo okodcm adla lc:tu:nc cdc pvnga:yc: “Sinamcm mopvla mcpakto.”

⁵⁵“C:i sinam nok mopvnamdc okolon? C:i sinam, nok gvdv:dc okolon.”

⁵⁶Sinamdok gvdv:dc pa:bc, odokkc sinamdok ilang gvla:dc lujvglurro.

⁵⁷Cmpige:la Ru:ncpvncmc aipai bitoka, sc:kobv ngolu Ru:tum Jisukokki mopvnammcm bidagji.

⁵⁸Cdcmpidag, aipc mc:bomsunam bvrrang kvdvnga, mcmang ke:ke:pc du:tok, cngunma:pc, lo:dvscm Ru:tumkc agerlo gertvla, kinnang kinna jc Ru:tumkolo noluk ager gernamdc cmmumpc gvma:yc.